Yupo jamaa yangu aliondolewa kwenye sakata la vyeti feki, kabla ya hapo alikuwa kwenye shirika la umma mjini na cheo kinono tu, yeye na mke wake ukiwaona ungeweza kufikiri wametongozana jana tu, mapenzi motomoto, walifanikiwa kupata mtoto mmoja.
Baada ya sekeseke, mke akaanza kuzisimamia biashara zote, hii ni kutokana na jamaa yangu kuvurugwa kisaikolojia na kukosa utulivu wa nafsi. Nilimuuliza kama ataweza kuweka aibu pembeni tufanye kazi ya udalali ambayo mimi ni mzoefu, akauliza vipi ikitokea mteja au muuzaji ni mtu tunaefahamiana, hapana siwezi. Nikamwambia, ikitokea hivyo hiyo kazi utaihamisha kwangu, na wewe utalamba kamisheni kama tufanyavyo kwenye michongo mingine, akakataa. Nikamwambia, chukua muda kuikubali hali yako kuwa sasa wewe si yule afsa mnene tena na huwezi kuwa yule afsa mnene, ila unaweza kuwa mnene kupitia fursa nyingine, ukijikubali.
Alichoamua jamaa ni kwenda kukaa kwenye moja ya maduka yao na kuuza, huku akisimamiwa na mkewe. Ndani ya mwaka mmoja mke akaona mume hana ramani tena, hela anayoingiza jamaa ni ile ya dukani pekee, hana tena safari za kikazi, warsha wala semina. Mke akaanza visa wakitaka waachane, maana jamaa ilifika kipindi mke siku zile za kushika ujauzito anavaa jinsi taiti na hagusiki.
Nikamuuliza bado unampenda mkeo, akajibu ndio.
Nikamwambia muage mkeo unasafiri kwenda mkoani kwa mwezi mmoja, uje ukae kijiweni kwangu, kweli, hapa niseme kitu, ukiamua kumsaidia mtu, msaidie tu, hata kama unajua kile atakachopata kinaweza kisivuke matarajio yake, lakini wewe msaidie.
Nikaanza kuzunguka na jamaa yangu kwenye michongo yangu yote ya udalali, ikawa wakati mwingine, nikitoka ofisini, namuacha jamaa akipokea wateja na kuwapeleka kwenye maeneo ambayo nilishampitisha iwe ni chumba, nyumba, kiwanja, shamba, magari, fremu, office appartment, masoko ya mazao n.k baada ya wiki tatu nikamwambia hiki ulichopata mtumie mkeo mwambie akaongeze mtaji wa dukani.
Kwa mara ya kwanza usiku wa siku hiyo jamaa akapokea simu kutoka kwa mke wake wakaongea kwa furaha baada ya wiki tatu za ukimya. Jamaa akaamini kuwa udalali ni kazi akawa ananishauri baadhi ya mambo ili kuboresha, na kweli tukaona vitu vina imarika bila kutumia nguvu nyingi kama zamani.
Ikatokea akanishauri tufungue kampuni flani hivi mwaka jana, mtaji ulikuwa ni mdogo tu, lakini jamaa yangu alisimama kikamilifu mpaka hivi ninavyokwambia kampuni inaendelea kuimarika na kile kinachopatikana kama faida tunagawana, ndoa yake imenusurika, na furaha imerudi kama zamani.
Alitumbuliwa 2017, 2018 akawa dalali, 2019 ni mkurugenzi wa kampuni yetu...Ndimi dalali.
