Naomba tujikumbushe kidogo kuhusu "King Maker"
Tumeingiliwa, tusimame imara kulinda usalama wetu
Padri Privatus Karugendo
HABARI zilizotangazwa na vyombo vya habari kwamba mafisadi walijitahidi kutumia fedha ili kuuingilia uchaguzi wa KKKT, ili kuhakikisha hata na kwenye dini wanaweka viongozi wanaowataka wao, imetushtua sana na kuthibitisha wasi wasi wetu wa kuingiliwa na mafisadi katika kila nyaja.
Inatisha! Iwe mikataba mibovu wamo, iwe siasa wamo, iwe michezo wamo na sasa wanataka kuingilia dini?
Wanataka kumwondoa Askofu Alex Malasusa, ili wamsimike nani huyo watakaye mwendesha na kuwasikiliza na kuwasaidia katika kampeni za uchaguzi wa 2015?
Ni mchungaji gani anayeweza kukubali mtego huu wa kumziba mdomo na kumzuia kufanya kazi zake za Kinabii? Haiwezekani mafisadi wakajiingiza kanisa kichwa kichwa bila kukaribishwa na kuelekezwa. Msaliti huyu akijulikana; ni heri asingezaliwa!
Ni lazima kuamka sasa na kusimama imara kulilinda na kulitetea taifa letu. Watu wachache, hata kama wana nguvu za fedha hawawezi kuliyumbisha taifa letu.
Tusiwakubalie, tukatae na kupambana nao. Makala hii ni wito wangu kwa Watanzania kuwa macho na kutambua kwamba hali imekuwa mbaya zaidi; kama mafisadi wamefanikiwa kujipenyeza kwenye taasisi za dini, tumeingiliwa! ni lazima kutafuta dawa vinginevyo tunateketea.
Niupongeze mkutano mkuu wa Kanisa la Kiinjili na Kilutheri Tanzania, Dayosisi ya Mashariki na Pwani kwa msimamo wao wa kumpigia kura ya imani Askofu Alex Malasusa.
Kura asilimia 96.6 alizozipata Askofu Dk. Malasusa, si zake peke yake bali za heshima ya kanisa na taasisi zote za kidini hapa Tanzania. Nawapongeza wajumbe wa mkutano huu kuu kwa kuzikubali fedha za fisadi na kuzitafuna lakini wakabaki na msimamo wenye heshima na uliotukuka.
Wangefanya kinyume; historia ya kanisa na taasisi za kidini hapa Tanzania zingeandika historia mpya; historia ya kuongozwa na kutawaliwa na nguvu za "giza". Likifanyika kosa la kuruhusu "shetani" huyu kuingiza ushawishi wa fedha kwenye uongozi wa kanisa, ndo utakuwa mwisho amani na utulivu katika taasisi za kidini.
Taasisi za kidini zikivurugika, amani na utulivu itapotea kabisa kutoka katika maisha ya kila siku ya Mtanzania.
Ingawa watu hawa waliotaka kulivuruga Kanisa la KKKT wamebatizwa jina la "Mafisadi", mimi ningependa kusema kwamba kwa kitendo chao cha kutaka kuingilia hata uongozi wa kanisa watu hawa si mafisadi tu bali "Majambazi".
Hawa ni hatari kwa taifa letu, na kama tusipoamka wataendelea kutuyumbisha na kutuchanganya kama walivyojaribu kufanya ndani ya kanisa la KKKT.
Wengine wanasema, hawa si kundi la watu bali mtu mmoja au wawili. Mwenye nguvu zaidi anajulikana kama "King Maker". Wanasema huyu ndiye anayewapitisha wabunge, mameya hata na Rais wa nchi anatengenezwa na yeye.
Mtu huyu aliuvuruga umoja wa Vijana wa CCM, aliuvuruga pia umoja wa wanawake Tanzania na inasemekana mtu huyu ndiye anayeivuruga CHADEMA na ataendelea kuivuruga hadi atakapohakikisha viongozi wa CHADEMA ni wale wanaompigia magoti na kumtumikia.
Mtu huyu amevuruga vyombo vya habari karibu vyote na kuhakikisha kila chombo cha habari kina mtu wake anayelipwa donge nono ili kuhakikisha agenda zake zinapita bila matatizo.
Bila kupita kwake ni vigumu kusonga mbele. Huyu mtu ana mbinu na watu wengi amewaweka mfukoni mwake. Habari za kuaminika ni kwamba hata na spika wa bunge la Jamhuri wa Muungano wa Tanzania, alichaguliwa kwa maelekezo ya huyu bwana "King Maker".
Wanaofuatilia mambo wanasema, "King" huyu alisafiri hadi nyumbani kwa Spika na kujaribu kumshawishi akubali kusimama na kupambana na Spika aliyekuwa akimaliza muda wake wa uspika.
Ushawishi wake kwenye mchakato wa kumtafuta Spika, haukuwa na lengo kama lile tunalolisikia leo hii la kuwapatia wanawake nafsi za juu katika taifa letu, bali ni ushawishi wa kutaka kuhakikisha kila nafasi ya juu katika taifa letu inakamatwa na mtu mwenye uwezo wa kupiga magoti na kumsujudia huyu "Kinger maker".
Kama uchaguzi wa Spika Mwanamke, ungekwenda sambamba na wazo zuri la kuwapatia wanawake nafasi za juu katika uongozi wa taifa letu, basi mwaka huu tungeshuhudia; Makamu wa Rais Mwanamke, Waziri Mkuu Mwanamke, Mkuu wa Majeshi Mwanamke. Kwa vile hili hatulioni, ndo tunatambua janja ya hawa " Majambazi" ambao bila aibu wala woga wanataka kujipenyeza kanisani!
Haishangazi ni kwa nini Askofu Dk. Alex Malasusa, alilengwa na fisadi huyu na maswahiba wake. Msimamo wa Askofu, unajulikana wazi.
Amekuwa mstari wa mbele kupigia kelele "Ufisadi", wakati wa uchaguzi mkuu alijitokeza na "Kauli mbiu" ya chagua mtu, usichague chama. Ni wazi hii ni Kuli mbiu isiyowapendeza wakubwa.
Lakini yeye kama Nabii, alikuwa akitimiza wajibu wake na kawaida Nabii, hapendwi! Nabii, akipendwa na kushangiliwa anakuwa hafanyi kazi yake!
Historia inatwambia kwamba Manabii waliuawa, walifukuzwa na walibezwa na jamii. Na Nabii wa kweli ni yule asiyeogopa kufa, asiyeogopa kutukanwa wala kufukuzwa.
Hali inayojitokeza sasa hivi katika taifa. Wakati demokrasia inachezewa; fedha inakuwa na nguvu ya kuwaweka watu madarakani; fedha inatumika kuwachaguliwa watu mwakilishi wao.
Serikali inanyanyasa haki ya wapiga kura kama ilivyotokea kule Karagwe na majimbo mengine ambako ushindi ulilazimishwa hata kwa kura moja na sehemu nyingine kwa mtutu wa bunduki ni lazima viongozi wetu wa dini kusimama imara na kufanya kazi yao ya unabii.
Viongozi wetu wa dini wasiogope kutukanwa, wasiogope kufukuzwa na wasiogope kufa. Wawe tayari kuutetea ukweli kufikia kiasi cha kuhatarisha maisha yao.
Mtu anakufa mara moja katika maisha yake; hata ukiogopa kufa leo, utakufa kesho au kesho kutwa na ukweli ni kwamba hakuna mtu atakayeishi milele. Atakayekuua leo, naye atakufa kesho.
Hivyo ni bora viongozi wetu wajitokeze kufanya kazi yao ya unabii hata kama mbele yao kifo kitakuwa kikiwakaribisha. Hiyo ndo njia ya manabii wote waliotutangulia.
Huyu aliyetaka kuuvuruga uchaguzi wa KKKT, anajulikana. Itashangaza sana kama viongozi wengine wa dini hawatasimama na Askofu Dk.Alex Malasusa, kumlaani na kupambana na "Jambazi" huyu hadi ashindwe kwa Jina la Yesu na kwa jina la Mitume wote waliotumwa na Mungu, kuwasha moyo wa haki, amani, upendo na wema hapa duniani.
Source:
Tumeingiliwa, tusimame imara kulinda usalama wetu
