Nikiwa nimelala. Joto kali. Umeme hakuna. Nimeoga maji ya chumvi. Ya kunywa nanunua ndoo sh.600. Kero.
Mara napokea hii crap kutoka kwa namba ambayo ata siijui:
"WANANCHI TAFADHALI, WAKUJENGA NCHI NI SISI NA WA KUBOMOA NI SISI, TUNAPODAI HAKI PIA TUTIMIZE WAJIBU, MIGOMO NA MAANDAMANO KILA KONA NI SULUHU YA MATATIZO? TUSILAUMU JESHI LA POLISI, TUACHE SIASA ZA MIGOGORO NA KUTAFTA UMAARUFU, UCHAGUZI UMEPITA, TUKUBALI UKWELI"TUMA KWA WATU 10.
MY TAKE:
Hakuna haki bila wajibu; hakuna wajibu bila haki
Umenena vyema na ningependa kuangalia kwa undani ulichonena kwa muktadha wa Tanzania.
Ni kweli kuwa wajenga nchi ni sisi wananchi wenyewe na wabomoa nchi ni sisi wananchi. Ili wananchi waweze kujenga nchi lazima washiriki kikamilifu kwenye mchakato wa ujenzi wa nchi. Wanashiriki mchakato huo kwa kuwachagua wawakilishi wanaowataka na kuwasimamia ili watekeleze yale waliyowatuma kuyasimamia.
Ili uweze kuwachagua na kuwasimamia wawakilishi unahitaji mchakato endelevu wa KISIASA ambao siyo tu utawapa wananchi fursa ya kuchagua wawakilishi bali pia uwezo wa kuwasimamia utendaji wao wa kila siku na kama hawafikii malengo waliochaguliwa kuwaondoa madarakani ili kuchagua wengine. Mchakato wa aina hii hauwezi kuwa wa msimu wa uchaguzi peke yake. Kwa ufupi huwezi kufananisha mchakato wa KISIASA na ununuzi wa wa mazao ya kilimo kama korosho au pamba wakati wa msimu wa mavuno. SIASA ni mchakato endelevu na unakuwepo muda wote ili kuwawajibisha wawakilishi watekeleze wajibu wao. Tatizo letu Tanzania tunadhani siasa ni shughuli ya msimu ambayo inaanza na kuisha baada ya mchakato wa uchaguzi.
Umenena vyema kuwa HAKI inadaiwa haiombwi. Ukiona mpaka mtu anafikia hatua anadai haki yake ujue amenyimwa na yule aliyepaswa kumpatia. Suala la msingi hapa siyo kuangalia ni jinsi gani haki inadaiwa na mdai haki bali ni kuangalia kwa nini mpaka mtu adai HAKI yake ambayo alitakiwa aipate katika utaratibu wa kawaida usio na mizengwe wa mtoa haki.
Katika mazingira ambapo KATIBA inatoa HAKI kwa wananchi halafu serikali inatunga sheria na kuweka taratibu ambazo kimsingi zinazuia hiyo haki kutolewa basi sioni ni jinsi gani mdai HAKI ataweza kuipata bila kuingia kwenye mgogoro na waliopewa dhamana ya kutoa haki hiyo bila mizengwe. Kwa ufupi ninakunyima haki yako halafu ninakupangia utaratibu wa jinsi ya wewe kunidai haki yako bila kunibughudhi. Utaipata kweli hiyo haki?
Kwa suala la maandamano Tanzania kuna ushahidi kuwa hakuna maandamano ya kudai haki ya kisiasa au kijamiii (mfano wanafunzi) yanayoruhusiwa nchini bila ya wadai haki kuingia kwenye mgogoro na jeshi la polisi. Kiini cha tatizo hili ni kuwa wanaodaiwa haki ndio wenye mamlaka ya kuwaamuru hawa mapolisi watoe ama wasitoe "kinachoitwa kibali" cha maandamano ili wale wanaodai haki waweze kuandamana. Sasa kwa akili ya kawaida kabisa je unadhani hakuna mgongano wa kimaslahi hapa hasa pale watoa haki wanapokuwa wameacha kutekeleza wajibu wao kwa makusudi na kupelekea mgogoro wa kudai haki?
Umeshauri tuache siasa za mgogoro na kutafuta umaarufu. Hapa nashindwa kuelewa ufahamu wako kuhusu maana ya neno Mgogoro na hasa dhana ya siasa isiyokuwa na mgogoro. Ninavyofahamu siasa inahususha mapambano ya hoja na maoni baina ya wanasiasa kila mmoja akiwashawishi wapiga kura kuwa yeye ana njia nzuri zaidi ya kutatua matatizo yao. Tofauti za hoja na maoni ya wanasiasa zinajitokeza pia kwenye makundi mbali mbali yanayokuwa na misimamo tofauti kuhusu masuala mbalimbali ya kisiasa. Mgongano wa maoni unaweza kutokea ndani ya chama kimoja au baina ya chama na chama. Mgongano wa hoja na maoni unapoendelea bila kufikia muafaka wa haki kwa pande zote zinazohusika unageuka na kuwa kuna mgogoro hasa pale kila kundi linapo simamia upande wake na kupelekea sintofahamu inayoathiri watu wengi zaidi.
Hivyo kwa mantiki hiyo hapo juu huwezi kuwa mwanasiasa halafu ukaogopo siasa za migogoro kwani siasa yenyewe inajengwa kwenye tofauti za maoni na mitazamo ambayo ndio kiini cha migogoro. Kinachotakiwa ni kutafuta jinsi nzuri zaidi ya kutatua tofauti hizi za maoni na mawazo ambazo mara nyingi huwa ni za ndani na kuepusha kutokea kwa migogoro.
