SIMULIZI: Mkufu wa Malkia wa Goshen

SIMULIZI: Mkufu wa Malkia wa Goshen

*MKUFU WA MALKIA WA GOSHEN -- 039*
*Simulizi za series*

ILIPOISHIA…
.
.
Mzee wa baraza akatabasamu kwanza. Alimtazama mwenyeji wake akaona machoni namna gani alivyokuwa na kiu ya kujua.
.
.
“Unaweza ukawa mkwe wa mfalme,” akasema kwa ufupi.
.
.
“Ukimaanisha nini?” Melkizedek akalipuka kwa swali.

ENDELEA..
.
.
“Mfalme amempenda mwanao.”
.
.
“Tattiana?” Melkizedek akauliza kana kwamba ana binti kumi. Macho yalikuwa yamemtoka nje ya mashavu yake makubwa.
.
.
“Ndio, Tattiana wako huyo.”
.
.
Melkizedek akajikuta anaangua kicheko kizito tumbo lake likicheza kama ngoma. Akampatia mzee mkono wa kuume akitikisa kichwa.
.
.
“Nashukuru sana, mzee.”
.
.
“Huna haja ya kunishukuru mimi, ni uzuri wa binti yako ndiyo ambao umekamata macho ya mfalme.”
.
.
“Macho hayo yasingelimuona kama usingelimpeleka huko,” Melkizedek alidakia, Mzee akatabasamu.
.
.
“Hiyo ni kazi yangu tu nilikuwa natimiza. Lakini kwakuwa ni mwiko kukataa shukrani, acha niipokee.”
.
.
“Ahsante sana. Sijui ni namna gani ninavyoweza kulipa fadhila zako.”
.
.
Mzee akatabasamu tena. Hapa ndipo alipokuwa anapataka na kupangojea – kulipwa fadhila. Ila akaigiza kama mtu asiye na mhemko.
.
.
“Melkizedek, wewe ni mtu mkubwa na muhimu ndani ya himaya yetu. Kila mtu anajua namna unayoingizia serikali kodi rundo kutokana na biashara zako. Mimi ni mzee tu ambaye naelekea kufa sasa, usiumize sana kichwa chako.”
.
.
“Hapana, mzee wangu. Chungu kinachoivisha chakula mapema, hutunzwa vema. Ningependa kukuachia alama ya shukrani maishani mwako kama ambavyo waenda kuniachia mimi.


Unajua endapo mfalme akimuoa mwanangu Tattiana akawa malkia, hata biashara zangu zitapanuka sana. Kodi itapungua kama si kuondoshwa kabisa. Hata himaya zingine ambazo bado si wabia wangu kibiashara, naweza kuwateka.”
.
.
“Hakuna tone la uongo hapo,” Mzee akatia chumvi akitikisa kichwa.
.
.
“Sasa niambie ni nini naweza nikafanya kukushukuru, mzee wangu. Ningependa kujua mapema ili basi nipate nafasi ya kujipanga, kama itahitajika.”
.
.
Mzee akasafisha koo lake na kutulia. Akatazama chini na kuminya viganja vyake vya baridi.
.
.
“Melkizedek,” Mzee akaita, kisha akasema: “Hili jambo ni siri. Na ningependa libakie hivyo kati yangu na wewe.”
.
.
Melkizedek akaminya lips.
.
.
“Usijali. Nina kifua cha kutunza na mdomo wa kufumba.”
.
.
Mzee akashusha pumzi ndefu kwanza kabla hajasema:
.
.
“Nina biashara yangu fulani, naomba unisaidie kuikuza.”
.
.
“Biashara?”
.
.
“Ndio. Si maarufu sana, jitihada na kutoka kwake ni hafifu … unajua nataka kuwaachia wajukuu zangu jambo la kufanya. Angalau hata nitakapoondoka, basi wasianguke. Sina cha kuwarithisha, vilivyopo havitoshi kukidhi hata robo ya hitaji lao.”
.
.
Melkizedek alikuwa kimya akisikiliza kwa umakini.
.
.
“Sasa nilihangaika sana kutafuta bashara itakayoweza kusimama kwa haraka maana mimi sina muda mrefu tena hapa duniani … kwenye uchambuzi wangu nikaona biashara ya cedar itanifaa.”
.
.
Melkizedek akatoa macho ya mshangao.
.
.
“Ndiyo maana nikasema ni siri,” Mzee akasema kwa sauti ya chini. Melkizedek akatazama kushoto na kulia, akasema:
.
.
“Ndiyo cedar?”


“Ndio.”
.
.
“Si unajua ni hatari kubwa ikigundulikana? Kifungo miaka minne na kazi ngumu?”
.
.
“Najua kila kitu, Melkizedek. Mimi pia nilihusika kwenye kutengeneza na kupitisha sharia hiyo. najua kila kitu, ila nimeona hamna namna na huo ndiyo mlango pekee wa mimi kutokea, kwa haraka.

Naomba uwe unanisaidia kusafirisha mzigo huo huko nje ya Goshen.”
.
.
Melkizedek akakosa cha kusema. Alikunja ngumi na kuing’ata akitafakari. Alikuwa kama vile ametoka kupigwa na kupumbazwa na shoti ya umeme. Kizuri gharama.
.
.
“Tattiana akiwa malkia, mizigo yako haitakuwa tu haitozwi kodi bali pia itakuwa haikaguliwi. Usihofu sana, bwana Melkizedek.”
.
.
“Mzee, naomba uniwie radhi. Nipatie muda wa kulitafuna hilo jambo lako.”
Mzee akashusha pumzi na kupandisha mabega.
.
.
“Sawa. Ila naomba unitaarifu mapema kama umeshindwa kumeza.”
.
.
Kabla hawajaagana, Mzee akahitaji kuonana na Tattiana. Binti akaitwa wakapewa faragha ya kuongea. Melkizedek aliwapisha sebuleni akirejea chumbani.
.
.
“Kuna uwezekano ukawa unafuatiliwa na watu toka makaoni. Hakikisha mienendo yako inakuwa safi na stadi. Umesikia?”
.
.
Tattiana akatikisa kichwa. “Ndio, nimesikia.”
.
.
Mzee akaendaze.
.
.
. ***
.
.
.
.
“Mama anaendeleaje?” Malkia aliuliza punde tu alipompokea Fluffy toka kwenye farasiwe.

Yalikuwa ni majira ya saa tatu usiku kama wangelikuwa wanatumia mfumo wa masaa wa sasa. Kulikuwa ni tulivu na penye baridi lililowavesha watu nguo nzito. Wanajeshi walikuwa wametanda eneo hili la Malkia kuhakikisha usalama.


Malkia alikuwa amevalia gauni rangi ya fedha, lililobana kiuno chake na kujimwaga huko chini. Nywele zake ndefu zilikuwa zimesukwa kwenye njia pana pana na kumfanya aonekane kama kabinti cha shule ya msingi.
.
.
Mkononi alikuwa amevalia bangili za kuvutia zinazong’aa, shingoni mkufu ulioonekana vema kutokana na gauni lake kutelekeza mabega.
.
.
Fluffy alikuwa amevalia suruali yenye mkanda mkubwa uliononing’iza mfuko wa jambia lake refu. Viatu virefu vilivyokomea magotini. Blauzi ya kumbana, mikononi akiwa amejifunga riboni za ngozi ngumu.
.
.
“Anaendelea vizuri tu, amesema nikusalimu,” Fluffy alimwambia Malkia akitabasamu.
.
.
“Ahsante sana. Mbona hujaja naye?”
.
.
“Amegoma kuja pasipo kujali nimembeleza namna gani. Amesema tukienda kumsalimia inatosha, hamna shida.”
.
.
Malkia akafadhaika.
.
.
“Nilijua nitamuona ukija naye. Nilifanya makosa kutoenda nawe.”
.
.
“Usijali, Malkia wangu. Tutakuwa tunaenda kumsalimu.”
.
.
“Lini? Itachukua muda kwenda na kupata nafasi hizo. Ningejua ningekupatia zawadi zangu uende nazo.”
.
.
“Usiwaze sana, Malkia.”
.
.
“Lazima niwaze, Fluffy. Alinitendea wema sana, sina budi kumrejeshea fadhila.”
.
.
“Mama anaelewa yote hayo. Usijipe shida ya mawazo .”
.
.
Walifika sebuleni walipoketi na kuongea kwa dakika kadhaa kabla Fluffy hajaaga anaenda kupumzika. Malkia akamsindikiza akaenda zake. Ilikuwa ni safari ya hatua thelathini za mtu mzima toka kwenye himaya ya Malkia.


Nyumba kubwa yenye walinzi ishirini na mbili waliobebelea silaha mbalimbali. Waliinamisha vichwa kumpokea jenerali wao. Fluffy akawarejeshea salamu na kuzama ndani

Akavua nguoze na kuzitupia chini kupumzisha mwili, kisha akaenda kuoga, huduma aliyokosa kwa muda wote aliokuwa safarini. Alitoka bafuni na nguo nzito akijifutia maji.
Ndani kulikuwa kuna joto kwasababu ya kufungwa madirisha na milango.
Aliokota nguo zake alizozitupia chini, na mara akaona karatasi imedondoka toka nguoni. Akainyanyua na kuitazama. Ilikuwa ni ile mama yake aliyompatia.

Alikuwa ameisahau. Kuiona kwake kukamkumbusha maneno ya mama yake. Na hata kukamtia hamu ya kutaka kujua karatasi hiyo ina taarifa gani.
Akaketi kitandani na kuanza kuiperuzi. Alikunja ndita akiwa makini, macho yake yalienda kila kona ya karatasi, lakini hakuambulia kitu.

Karatasi ilikuwa imeandikwa kwa lugha ngeni asiyoijua. Michoro na alama zilizokuwepo karatasini zilikuwa vitendawili alivyoshindwa kuvitegua.
.
.
“Sasa mama amenipaje kitu anachojua siwezi kukifahamu?” akalalama.

Akajaribu kusoma tena lakini hola! Akawaza namna ya kufanya kwa sekunde kadhaa, akapata wazo.
.
.
Akajivesha nguo kisha akamuita mwanajeshi mmoja na kumuagiza.
.
.
“Niitie Seth haraka!”
.
.
Mwanajeshi akatimiza agizo ndani ya muda mfupi, Seth akawa amefika mbele ya Fluffy. Wakaketi sebuleni wakisindikizwa na vikombe vya kahawa.


“Nimekuita hapa nataka unisaidie jambo moja, lakini uufunge mdomo wako maana ni siri,” alisema Fluffy. Seth akatikisa kichwa pasipo kusema jambo. Alikuwa amejitanda tambara kubwa zito jeusi lililokomea kidevuni kuacha mdomo unywe kahawa.

Fluffy akatoa karatasi lake na kumkabidhi Seth. Seth akapitisha macho yake upesi, haraka akauliza:
.
.
“Umetoa wapi hii?” .
.
“Ni siri,” Fluffy akajibu, kisha akauliza: “Ina nini?”
.
.
“Ina siri,” Seth akajibu.
.
.
“Siri gani?”
.
.
“Siri ya giza.”
.
.
“Giza?”
.
.
“Ndio!”
.
.
“Giza lipi?”
.
.
“Yani eneo la giza lililopo huko Misri!”
.
.
“Misri kule kwa wakina Farao?”
.
.
“Ndio. Kule kuna piramidi ya Giza.”
.
.
“Hiyo piramidi ina nini? Yani kuna siri gani kwenye hiyo piramidi?”
.
.
“Ndiyo nataka kusoma sasa, maana hicho ni kichwa cha habari tu.”
.
.
“Sasa mbona ulishtuka?”
.
.
“Hili eneo si la kawaida, jenerali. Panatisha na panaogofya. Si watu wengi wana habari nalo, linatunza siri muhimu za watawala wakubwa, mafarao, na mojawapo ya himaya kubwa kuwahi kutokea duniani, Misri!”
.
.
Kwa maelezo hayo ya Seth, Fluffy akaanza kujenga hofu. Kwanini mama yake amempa habari hizo? Ina maana hajui kuhusu eneo hilo? Alipumbazwa na mawazo.
.
.
“Tunaweza tukasoma kwa pamoja?” Seth akamshtua kwa swali. Fluffy akatikisa kichwa.
.
.
“Ndiyo, tunaweza.”
.
.
Taratibu Seth akaanza kusoma na kumfafanulia Fluffy yale yaliyokuwepo kwenye karatasi. Fluffy akapata vipele vya msisimko kwenye ngozi.


Kadiri karatasi ilivyokuwa inasomwa, vinyweleo vikamsimama, na mwili ukaanza kumtetema. Mpaka Seth anamaliza, moyo wake ulikuwa unaenda mbio kana kwamba umechoka kukaa ndani na sasa unataka kwenda nje kupunga hewa.
.
.
.
.
.
*JE KARATASI HIYO INA SIRI GANI? FLUFFY ATASHEA SIRI HIYO AMA ATAIWEKA SIRINI?*
.
.
*KWANINI MELKIZEDEK ANASITA KUMJIBU MZEE KUHUSU BIASHARA YAKE YA CEDAR? CEDAR NI NINI?*
.
.
*JE KULE KASRINI KWA SULTAN KUPO SALAMA?*
.
 
You must log in or register to reply here.

Similar Discussions

Our Community

Coming Soon

Regional Communities

Coming Soon
Back
Top Bottom
Menu
Forums
New posts
Log in
Register