Maelfu ya watu Dar wakutana kudai shughuli za Deci ziendelee
Sehemu ya maelfu ya wanachama wa Deci, wakiwa katika mkutano katika Jengo la PTA Uwanja wa Saba saba wakidai kuendelea kwa mpango wao baada ya kuonekana kwa dalili za kusimamishwa na serikali.
Na Waandishi Wetu
MAELFU ya wanachama wa Taasisi ya Development Entrepreneurship Community Initative (Deci) kutoka sehemu mbalimbali nchini, jana walifurika katika viwanja vya Mwalimu Nyerere, jijini Dar es Salaam, kujua hatima yao kutoka kwa uongozi wa taasisi ulioitisha mkutano huo.
Katika mkutano huo uliofanyika ukumbi wa PTA katika viwanja hivyo, huku mvua kubwa ikinyesha, viongozi hao walimtaka Rais Jakaya Kikwete kuwa makini na ushauri wa kuifungia taasisi hiyo kwa kuwa umetolewa na wachache katika misingi ya unafiki.
Viongozi hao ambao walidai kutoyumbishwa, walitangaza kuendelea na shughuli zao na kuitaka serikali kutokurupuka kuchukua maamuzi.
Umati huo wa watu uliokadiriwa kukaribia wa watu wanaofika katika viwanja hivyo kwa ajili ya maonyesho ya SabaSaba kila mwaka, ulihudhuriwa na wanachama kutoka mkoa wa Dar es Salaam, Morogoro, Pwani na Lindi.
Kadiri muda ulivyosonga, idadi ya wanachama ilizidi kuongeza na wengi wao walifika kwa magari binafsi na usafiri wa daladala.
Baadhi ya wanachama waliokuwa wakishuka kwenye magari hayo walikuwa na mabango na wengine kuhoji hatima ya taasisi hiyo na kulaani hatua ya serikali kuingilia huduma hiyo ambayo waliasema inawasaidia kukabiliana na umasikini.
Baadhi ya mabango hayo yalisomeka: Mmeshindwa kutuambia kiasi gani cha pesa za EPA zimerejeshwa, mnaamua kutuzuia wanyonge tusinufaike na Deci, Matajiri, tuacheni na sisi wanyonge tunufaike na Deci.
Wakizungumza kwa nyakati tofauti viongozi wa taasisi hiyo inayoundwa na Baraza la maaskofu wa Makanisa ya Pentekoste Tanzania (PCT), walisema tasisi hiyo ilianzishwa baada ya kubaini kuwa vyombo vingi vya kuinua uchumi vilivyoanzishwa nchini vilikuwa vikijali faida kubwa kuliko kuwatetea wanyonge.
Akisoma tamko la Deci kwa niaba ya wenzake, maaskofu hao, Bathromeu Sheggah, alisema inasikitisha na inakatisha tamaa kuona kwamba kwa kipindi cha miaka isiyopungua mitatu ya huduma ya taasisi hiyo, Benki Kuu (BoT) inatangaza katika vyombo vya habari kuwa taasisi yao haitambuliki.
Alisema tangu waanzishe taasisi hiyo, Serikali imefanikiwa kupata zaidi ya Sh120, 674,497 milioni kama kodi ya mapato na kuwa wafanyakazi 400 wa taasisis hiyo wamekuwa wakilipiwa kodi ya mapato PAYE na Mfuko wa Taifa wa Hifadhi ya Jamii (NSSF).
Alisema ikiwa serikali italazimisha kusitisha kwa huduma za taasisi yao, wananchi wapatao 3,500,000 toka kwa washiriki wao 700,000 wataathirika kiuchumi, kiafya, kielimu na kijamii na hatimaye kuchangia vunjivu kwa amani ya nchi.
Alisema hasara nyingine ni kukosekana kwa ajira sambamba na serikali kutofaidi mzunguko wa fedha unaotokana na mapato ya wajasiliamali wanaovuna fedha kutoka katika shirika hilo.
Askofu Sheggah alisema kuna mashirika mengi yanayotoa mikopo kwa riba kubwa ambayo yamekuwa yakiwafedhehesha wananchi wanaoshindwa kurudisha madeni kwa kuwafilisi mali zao bila huruma, kuwanyanganya mali zao zikiwemo nyumba na mashamba na kuwaacha wakiendelea kuwa maskini.
Alimtaka Rais Kikwete kulisaidia shirika hilo ili tamko la serikali litakalotolewa liwe la haki kwani kitendo cha kutoa ajira 400 na kuwalipa wafanyakazi mshahara unaowawezesha kumudu maisha yao, kumechangia kutimiza ahadi aliyotoa wakati akiingia madarakani kuwa ataongeza ajira kwa watanzania.
Mtoto wako akifanya vizuri msaidie, usimkatishe tamaa hivyo serikali inapaswa kuingiza macho na miguu yake kuisaidia Deci ifanye vizuri zaidi, ili tuweze kufanya shughuli zetu kihalali kama kuna kasoro, lakini si kutunyoshea vidole na kutulaumu wakati lengo letu ni jema, ambalo ni kutekeleza ilani ya CCM, alisema na kuongeza:
Kama yapo mapungufu yoyote ya kuanzishwa kwa Deci yashughulikiwe kwa busara badala ya kutoa vitisho vya kukifunga chombo hiki ambacho kimo mioyoni mwa wananchi wengi wanaonufaika nacho, alisema Askofu huyo.
Maaskofu hao walisema nia ya kuanzisha taasisi hiyo ni kuunga mkoano Ilani ya Uchaguzi ya Chama Cha Mapinduzi (CCM) na kauli mbinu yake ya Maisha bora kwa kila Mtanzania, baada ya kubaini kuwa idadi kubwa ya waumini wao wanaishi maisha duni bila kupata msaada wowote.
Aliitaka serikali kuhakikisha kuwa BOT inaendelea kufanyakazi kwa kufuata taratibu bila kuangalia au kusikiliza maneno ya uchochezi yanaoweza kuifanya itoe maamuzi yatakayoiathiri idadi kubwa ya watu.
Tunaitwa wezi, tumeiba nini? Tangu Deci ianze kazi miaka mitatu iliyopita, hatujawahi kupata malalamiko ya kudhulumiwa kutoka kwa mwananchi yeyote, licha ya kuwa tunawashiriki wengi wao wakiwa wananchi wenye maisha ya chini ambao walisahaulika kabisa alisema
Akielezea mafanikio yaliyopatikana tangu kuanzishwa kwa taasisi hiyo, Askofu Sheggah alisema kuwa wamechangia kukuza uchumi wa wananchi na wa nchi na kutekeleza mkakati wa taifa wa kupunguza umasikini na ikiwezekana kuutokomeza kabisa.
Alidai kuwa Deci imeleta matumaini makubwa kwa wananchi wa kipato cha chini wakiwemo wamachinga, mamalishe, faraja kwa wajane na yatima.
Alisema huduma yao imewawezesha watu wengi kulipa karo za shule na kuinua maisha ya wastaafu waliojiunga na taasisi hiyo tofauti na kabla hawajajiunga Deci.
Aliongeza kuwa wamekuwa wakitoa elimu maalum kwa wajasiriamali wanaochukua fedha hizo kwa ajili ya mitaji ya biashara, hivyo kufanikiwa kukabilina na ushindani wa kibiashara na kupata faida, ambayo kwa njia moja ama nyingine imekuwa ikilinufaisha taifa.
Maaskofu hao walisema katika kipindi cha takribani miaka 48 tangu uhuru, vyombo vya kuinua uchumi nchini zikiwemo benki zimekuwa zikizijali faida bila kuzingatia viashiria vya ukandamizaji, unyonyaji na umaskini hali iliyowafanya wabuni njia itakayomwezesha mnyonge kupata sehemu ya kukimbilia.
Walisema licha ya vyombo hivyo kuwepo, ukweli umebaki pale pale kwamba, wananchi wengi vijijini na mijini wameathirika na ujinga, maradhi na umaskini wa kipato huku baadhi yao wakipata mlo mmoja kwa siku.
Walisema kwa mantiki hiyo, taasisi hiyo haikuona sababu ya kuacha kuendesha shughuli zake kwa kificho ili kuwakommboa maskini.
Hata hivyo, baadhi ya wanachama walionekana kububujikwa na machozi huku wakishindwa kuelewa hatma ya Deci kwa serikali kwa sababu wanadai kuwa inawasaidia kimaisha na hawakuwahi kupata tatizo tangu wajiunge na shirika.
Deci ni shirika lililoanzishwa na taasisi za kidini chini ya ulezi wa maaskofu na wachungaji wa makanisa ya pentekoste ili kuwasaidia waumini wao na jamii nyingine zisizo za kikristo kuinua hali zao maisha.
Wakati mkutano huo ukiendelea viwanja ni hapo, mamia ya wanachama wengine walikuwa wamekusanyika makao makuu ya taasisi hiyo iliyopo Mabibo kwa lenga la kupanda na kuvuna fedha.
Kama ilivyo katika viwanja vya Sabasaba, idadi ya wanachama hao ilikuwa ikiongezeka kadiri muda ulivyosonga mbele ingawa hawakufanikiwa kuonana na viongozi wa Deci.
Baadhi ya wanachama waliozungumza na gazeti hili waliendelea kupinga mtazamo wa serikali kuwa taasisi hiyo ni ya kitapeli, haijawahi kuwaibia katika kipindi chote cha miaka mitatu ilichotoa huduma.
Huu ni mpango wa serikali kutaka wananchi wa chini wasiendelee kwa kuwa wameona watu wanatoa fedha zao katika benki na Saccos na kuziweka Deci," alisema mmoja wa wanachama hao ambaye jina lake halikupatikana.
Wakati huo huo, Chama cha NCCR-Mageuzi kimeitaka serikali kuichunguza kwa undani taasisi hiyo na kusaidia kuboresha huduma zake kwa jamii badala ya kutaka kuifunga.
Katibu Mkuu wa NCCR, Samwel Ruhuza alisema jana kuwa serikali inatakiwa kuichunguza taasisi hiyo kuona kama ina kasoro na hatimaye itafute mbinu ya kuiwezesha.
Serikali kupitia Benki Kuu ina wajibu wa kujua Deci inapata vipi faida, lakini pia iangalie njia zinazotumika kulipa wateja maana ukiweka fedha Deci, baada ya siku cheche unachukua nyingi sasa hapa kinachotakiwa ni kutambua njia wanazotumia kupata fedha zote hizi za kuwalipa watu.
Kwanza wana wateja wengi na inawezekana wakazishinda hata benki zilizoanza biashara siku nyingi, wachunguzwe kama wapo sahihi waboreshewe huduma hadi mikoani, lakini kama wanafanya uhuni wachukuliwe hatua, alisema Ruhuza
Alisema mpaka sasa hakuna malalamiko yeyote yaliyotolewa na wananchi kuhusiana na taasisi hiyo, hivyo inaonyesha wazi kuwa haina tatizo lolote kwa wananchi.
Sina uhakika lakini sijawahi kusikia kama kuna malalamiko juu ya taasisi hii, hivyo inaonyesha kuwa watu wanaweka fedha zao na kupata faida bila kuwa na kasoro zozote alisema Ruhuza
Kwa mujibu wa taratibu za taasisi hiyo, mshiriki huwekeza kati ya Sh10,000 na Sh5 milioni na kulipwa zaidi ya mara mbili kwa kiasi hicho katika muda wa kuanzia wiki 13 hadi 20 kwa wanaowekeza fedha nyingi.
Hata hivyo wakati Deci ikizidi kupata uungwaji mkono mkubwa kutoka kona mbalimbali za nchi, mamlaka za serikali zimezidi kuimaliza baada ya Mamlaka ya Mapato nchini (TRA), kusema hiyo si benki bali ni kampuni ambayo imesajiliwa kutoa mikopo kwa wajasiriliamali.
Kauli hiyo ya TRA ni ya nne kutolewa na mamlaka za serikali, ambapo tayari BoT imesema haijatoa kibali cha kibenki kwa Deci, huku Wizara ya kazi Ajira na Maendeleo ya Vijana pamoja na Soko la Mitaji na Hisa, wakipinga kazi za Deci.
Akizungumza na gazeti hili jana Mkurugenzi wa Elimu kwa Walipakodi wa TRA, Protas Mmanda, alikiri kuwa Deci imekuwa ikilipa kodi kama kampuni ya kutoa mikopo kwa wajasiriliamali kama inavyoonyesha katika usajili wake.
Kwa mujibu wa Mmanda, TRA ilisajili Deci kama mlipa kodi kwa kigezo ambacho kimo katika usajili wake huo kutoka Wakala wa Usajili wa Makampuni na Majina ya Biashara (Brela).
Mmanda akifafanua, alisema katika usajili huo, Deci inaonekana ni kampuni ya biashara iliyoanzishwa kutoa mikopo kwa wajasiriliamali na si vinginevyo.
Mkurugenzi huyo wa TRA alisema, hata hati ya makubaliano (MoU) ambayo hutumika kama katiba, inaonyesha Deci si taasisi ya kibenki.
Alipoulizwa awali kwamba, vipi wamekuwa wakipokea pesa za kodi kutoka kwa kampuni ambayo inajiendesha kinyume cha sheria alijibu: "Hadi sasa tunasubiri ripoti yao ya hesabu ya mwaka 2008."
Mmanda akifafanua, alisema ni kweli Deci imesajiliwa kama mlipakodi wa TRA kwani tayari ililipia usajili wa awali kwa biashara inayofanya baada ya kujisajili na kupewa cheti (TIN).
Hata hivyo, alisema Deci ilianza kazi zake mwaka jana baada ya kuomba kujisajili mwaka 2007 na kuongeza kwamba, hesabu za mwaka wa kwanza wa kulipa kodi wa kampuni hiyo zitaanza kutolewa Juni mwaka huu.
Habari hii imeandaliwa na Tumaini Msowoya, Patricia Kimelemeta, Hidaya Kivatwa, Victoria Kombe, Fidelis Butahe na Ramadhani Semtawa
