Sikilizeni ninyi Wakristo, hasa mlio washiriki au communicants wa Roman Catholic, Anglikana, Moravian na Lutheran.
Kanisa hufungisha ndoa kwa Wakisto walio washiriki (communicants). Kanuni na taratibu za kushiriki mnazifahamu. Kama mtu alitengwa au alijitenga mwenyewe anaruhusiwa kushiriki baada ya kuondolewa kifungo hicho na Mchungaji/Kasisi/Padre au Askofu.
Tendo la kumruhusu mtu kushiriki ni la muda mfupi na linafuatia maungamo ya mtu mbele ya Mchungaji/Kasisi/Padri au Askofu. Ungamo linaweza kuwa la hadharani au la siri kutegemeana na mazingira ya kilichomfanya mhusika atengwe au ajitenge mwenyewe.
Kanisa halizuiwi kufungisha ndoa ya mjamzito kama aliungama. Mkiona ndoa inafungwa mjue kuwa ungamo lilifanyika mbele ya mtumishi wa Mungu. Ni vizuri watu wakaelewa kuwa Kanisa haliwezi kutangaza kila ungamo linalofanyika.
Yapo maungamo yanayotangazwa na pia yapo maungamo ambayo hayatangazwi. Kwa nini baadhi ya maungamo hutangazwa huku wakati mengine hayatangazwi, huo ndio Uchungaji wenyewe ambao Wakristo Walei hawaujui. Sio afya na haikubariki waumini wakaanza kuhoji mambo ya maungamo. Kwa ujumla masuala yanayohusu maungamo ni ya Mchungaji/Kasisi/Padri au Askofu.
Kama hata Askofu hawezi kuhoji maungamo yaliyofanywa na Mchungaji/Kasisi/Padri, basi hata Mkristo mshiriki hawezi kuhoji suala hilo. Mkiona mjamzito anafungishwa ndoa mjue kuwa ungamo lilishafanyika na mkiona Kanisa limekataa kufungisha ndoa ya mjamzito, basi mjue kuwa ungamo halikufanyika au ungamo bado halijamilika.
Mwana Kondoo Ameshinda! Tumfuate!
Askofu Emmaus Bandekile Mwamakula
Kanisa la Moravian la Uamsho Tanzania & Afrika Mashariki
