Simulizi Yenye Funzo la Maisha: "SINA CHAGUO"

Simulizi Yenye Funzo la Maisha: "SINA CHAGUO"

Mzigua_255 said:
Anafeli kasema ataleta kila siku jioni jana hajaleta
Click to expand...
Jana ilitokea dharura kidogo ndiyo maana sikuweza kulitimiza hilo. Sasa hivi ninataweka (KIPANDE) kwa niaba ya jana, halafu ikifika jioni tutaendelea kama kawaida.🙏🙏🙏🙏🙏🙏🙏🙏🙏🙏
 
TULIPOISHIA.
Alikuwa kimya, umakini wote aliuweka kwenye chakula alichokishambulia kwa utulivu mkubwa sana, pasipo hata kunyanyua kichwa chake. Niliamua kumpotezea kwa maana hii ndiyo ingekuwa mala ya mwisho kukaa na binti huyu mwenye gubu. “Haina noma, kesho naondoka, nakuachia jumba lako na wazazi wako.”

ENDELEA
(Uzuri siutambui, Ubaya kuung’amua,)

Hakika nilikuwa na furaha kubwa sana moyoni mwangu, nilijihisi kama niliyezaliwa upya na kujikuta ndani ya chuo kile kilichokuwa na kila kitu kilichoufurahisha mtima wangu. Siyo mafunzo, malazi, mavazi, chakula, yaani kila kimoja kilikuwa sawa kwangu hasa ukizingatia ule uwepo wa warembo wa kutosha walioyafanya macho yangu kuchangamka wakati wote. Ni mwezi mmoja umepita sasa tangia nilipoanza mafunzo. Kwa kiasi fulani nilikuwa nimeanza kuyazoea mazingira ya chuoni, japo ule ushamba wa kijijini haukuniacha salama. Nilikuwa mgeni wa vitu vingi sana. Kama ujuavyo maisha ya hosteli, marafiki wa kwanza huwa ni wale utakaobahatika kuishi nao chumba kimoja.
Basi hilo lilitokea hata kwangu, rafiki zangu wakubwa wakawa ni wale nilioishi nao chumba kimoja. Nawakumbuka kwa majina yao na sifa zao. Wa kwanza alikuwa Lajoka kijana tokea kanda ya ziwa; huyu alikuwa bingwa wa sanaa ya mdomo. Muongeaji sana ambaye hakuacha hata sekunde moja ya ukimya ipite bila sitori ziwe uongo au ukweli. Wa pili ni Ziaka, kipenzi cha waalimu. Huyu ni kijana mstaarabu sana ambaye wengi humtania kwa kumuita mzee wa busara kutokana na tabia yake ya utulivu wakati wa kutekeleza majukumu yake. Huenda alikuwa na hisitoria ndefu ya maisha iliyomfanya kuwa vile. Wa mwisho ni Ally bingwa wa mambo ya mitandao. Kwakua yeye mwenyewe hupenda kujiita mwana IT, basi nasi tulimtunuku wadhifa huo maana ulimfaa sana.

Ratiba ya masomo ilikuwa ngumu sana kwangu, ikanifanya muda wote kuwa bize na kazi za darasani. Hiyo haikutosha, yakaongezeka majukumu mengine mengi ya nje ya darasa yaliyonichosha zaidi. Mwanzoni nilipata taabu sana kuizoea ratiba hii; baadae niliugundua wepesi uliomo ndani yake. Kumbe nilikuwa nimechanganya mikakati, nikawa nikisoma kana kwamba nipo sekondari kumbe hapa ni chuo ambapo mambo huwa ni mengi sana. Kila siku ina jambo jipya; hivyo ukisema upambane kusoma leo ili kesho usihangaike basi utaishia kuuumia siku zote. Kila siku inajitegemea. Wiki za mwanzoni tulizitumia kusoma masomo ya darasani ya nadharia tukiandaliwa kwa ajili ya kuanza rasmi masomo ya vitendo. Hapo ndipo nilipougundua ugumu wa mfumo wa elimu yetu, yaani hata kile kitu ninachokijua vema; kilinichanganya sana pale kinapoandikwa au kuchorwa ubaoni. Kwanini tusifundishwe kwa vitendo tu???
Mwanzo wa masomo ya vitendo ukawa ndiyo mwanzo wa maisha mazuri kwangu, kila tulichofundishwa ilikuwa ni marudio kwangu. Ukafika muda nikaona hakuna jipya tena. Kazi yangu ikawa ni kukariri majina ya kiingeleza ya vifaa na mifumo mbalimbali niliyopaswa kuijua. Nilianza kuyafaidi matunda ya uamuzi wangu wa kusomea fani ya ufundi makanika niliyoielewa vema. Taaluma niyoiijua na kuifanya kwa vitendo tokea utoto wangu mpaka katika umri wangu wa sasa, miaka ishirini na nne. Ule ujuzi niliokuwanao ulinifanya kuwa miongoni mwa wanafunzi hodari sana darasani, nikiwa na uzoefu wa asilimia kubwa ya ufundi tuliofundishwa. Ikafika hatua baadhi ya waalimu wakanipa jukumu la kuwaelekeza wanafunzi wenzangu niliopangwa nao kundi moja. Huo ukawa ndiyo mwanzo wa kutimia kwa ile ndoto yangu. Ndoto iliyebeba shauku, shauku ya maisha, maisha ya uhuru, uhuru wa kufanya nikitakacho, kwa wakati niutakao.

Kuna nafasi ilipatikana jioni moja, muda wa mapumziko kabla ya kupata chakula cha usiku. Niliitumia vema nafasi hiyo kuwasiliana na ndugu zangu; wazazi wangu nyumbani na familia yangu mpya ya mjini yaani mzee Gelo. Mama yangu hakuacha kunisisitiza kudumisha maadili mazuri niliyokuwa nayo, akiniasa kuwa makini na mambo ya mjini ambayo yangeniharibia ndoto zangu. Mzee wangu hakuwa na mambo mengi, alinikumbusha kupambana kwa bidii nifanikishe malengo, ili nikirudi nyumbani awe na cha kujisifia mtaani. Upande wa mzee Gelo sikuzote huwa ni mzuri kwangu, kila mala nikiongea naye asingeacha kuniuliza kama nilikuwa na changamoto yoyote. Mala zote huwa namjibu mambo yapo sawa kabisa, sikuona sifa kulia shida kilia siku; huenda ni kwasababu mfukoni nilikuwa na akiba ya kutosha. Siku hiyo niliongeanae, akanijulisha kuwa mwishoni mwa mwezi ujao; angefika chuoni kuniona ninaendeleaje. Baada ya kuongea na wapendwa wangu nikaamua nitoke nje ya chuo nikasafishe macho mtaani. Sikuwa peke yangu; niliongozana na Ally (mwana IT) kama mwenyewe alivyojiita. Hakuwa mpenzi wa kuhudhuria uwanjani kama nilivyo mimi.

Tulipolikaribia geti la chuo tulikutana na kundi la wasichana waliotembea pamoja kama zilivyo tabia za wanachuo wengi wa mwaka wa kwanza, lilikuwa kundi la warembo haswa. Sura za wachache miongoni mwao hazikuwa ngeni machoni mwangu. Niliwafahamu ambao nimeshawahi kukutana nao ama katika vipindi vya mafunzo, uwanjani au wakati wa kupata chakula. Kwakuwa sikuwa na ukaribu na yeyote miongoni mwao, nilipishana nao kawaida tu na wala sikumbuki kama nilijihangaisha hata kuwasalimia. Hatua tano mbele ndipo niligundua utofauti ulionifanya kugeuka tena, nikaangalia kule nilikotokea. Nilimuona Ally, amesimama katikati ya wasichana wale. Wamemzunguka mithili ya makada wanaomsikiliza mwanasiasa wao pendwa. Nilisimama kwa sekunde kadhaa kisha nikaendelea na safari; nikijua sasa niko peke yangu. Ally asingeweza kuongozana nami tena kwasababu wale aliokutana nao ndio lilikuwa lengo la safari yake. Ally anapenda sana kukaa na watoto wazuri wasiochosha kuzungumza nao.
Sio yeye tu, bali hata mimi nilipenda sana kitu hicho. Huwa nafurahia sana kukaa karibu na warembo, shida ni kwamba nina matatizo. Labda nisiseme matatizo; niliite tatizo kwa sababu ni moja tu linaloweka utofauti kati yangu na marafiki zangu wengi. Nafurahia kuwaona warembo, tatizo sipendi kuwa na ukaribu nao. Hata ikatokea nikawa na ukaribu nao huwa sipendi kuongea nao. Ikitokea nikaongea nao basi sitokaa mda mrefu kabla sijachoshwa na maongezi hayo. Mwisho naona ni usumbufu na upotetevu wa muda wangu, naachana nao kabisa. Kitakachobaki ni salamu za mbali mbali kisha ukaribu wetu hutoweka kabisa; ukafuatiwa na kitu kingine ambacho bado sijakielewa mpaka sasa. Nikishajiweka mbali na msichana niliyekuwa na ukaribu naye, huwa kuna namna naanza kujisikia vibaya moyoni hasa pale ninapomuona akifurahia maisha yake pasipo kujihangaisha na mimi. Sina uhakika kama huo ni wivu au chuki maana kuna wakati hali hiyo hunitokea hata kwa msichana ambaye sijawahi kuwa na ukaribu naye; wengine sijawahi hata kuzungumza nao kabisa. Shida ni iwe nimeshawahi kumuamini, akili yangu ikampitisha kama binti mwenye tabia fulani. Aghalabu binti niliyemuamini kuwa na maadili na mcha Mungu; baadae nimshuhudie akifanya vitu vya kijinga ambavyo sikuvitalajia toka kwake. Kuna wakati huwa ninakasilishwa na matendo mabaya yanayofanywa na watu wengine nisiowajua, naumia sana kama vile mimi ndiye mlengwa wa hasara itakayopatikana. Hali hiyo ndiyo ilinikuta jioni hii.

Ulikuwa wakati nikizurura mtaani. Nikiyasafisha macho yangu kwa kuangalia kila kilichonifurahisha, ndipo nilishuhudia tukio lililoiharibu ratiba nzuri niliyokuwa nayo. Pembeni ya duka moja la nguo, katika kigiza kidogo kilichosababishwa na uwepo wa nguo nyingi zilizozuia mwanga wa taa kubwa iliyoning’nizwa ndani ya duka. Niliwashuhudia watu watatu wakifanya mchezo ambao sikufurahishwa nao. Mwanzoni niliwaza labda huenda ni masihara. Baadae nikaelewa hayakuwa masihara wala utani wa namna yoyote ile. Yangekuwa masihara gani ya namna ile? yaani kibinti kidogo kilikuwa kikijichekeshachekesha katikati ya wanaume wawili waliokipapasa sehemu mbalimbali za mwili wake. Huyu alikishika matiti akayabofya, huyu akashika kiuno akapapasa, huyu akachapa makalio kwa makofi mepesi, huyu akakutanisha nae mdomo wakawa wakinyonyana ndimi mithili ya kinda la njiwa na mama yake.
Niliamua kuondoka pale niliposhuhudia mikono iliyoshushwa mpaka sehemu ya nyeti za uzazi. Sio nyeti tu ya binti yule, niliishuhudia mikono midogo laini ya kike ikipapasa na kuhangaika kufungua zipu za suruali za wanaume wale. “shiiit” niliongea kisha nikajiondoka kabisa eneo lile. Sina uhakika kama huo ulikuwa wivu au chuki zangu binafsi dhidi ya wanaume wale, lakini ukweli sikufurahishwa na kitu kile. Kilichonikaa kichwani ni taswira ya binti yule ambaye nilimfahamu vizuri.Nilitembea haraka haraka kuelekea chuoni, sikuwa na hamu tena ya kuendelea kuzurura mtaani. Tukio nililorishuhudia mda mfupi uliopita liliniachia hisia tofauti zilizozalisha hasira na uchungu moyoni mwangu. Niliamua kutumia njia za chocho nilizozifahamu ili niwahi kufika niendako. Uamuzi huo ukanikutanisha na msichana ambaye mpaka sasa amekuwa miongoni mwa warembo wachache waliowahi kuzisumbua hisia zangu. Akazitesa na kuziendesha kwa namna aipendayo.

Ulikuwa wakati nikikatisha katika chocho iliyotengenezwa kwa uwepo wa kuta za nyumba pande mbili zikiacha nafasi kidogo katikati iliyogeuzwa kuwa njia. Nilikutana uso kwa uso na binti ambaye sikuwahi kumjua hapo kabla. Alikuwa akitembea mwendo wa haraka haraka sana, mwendo wa kuyumbayumba huku na kule kwa kukosa uwiano mzuri wa mwili wake. “Binti mlevi” niliwaza hivyo huku nikijiandaa kupishana naye, nimkwepe asinipitie. Nilisogeza upande wa kushoto kumkwepa lakini hesabu zangu zikakagonga mwamba, nikajikuta nimepamiana nae mzimamzima pasipo kupenda. Ilinilazimu kuikaza miguu yangu vema kujizuia nisizidiwe na kuangushwa na uzito wa binti yule; aliyenipamia kwa kasi sana. Akajiachia kama gogo mikononi mwangu, nikayasikia mapigo ya moyo wake ziliyodunda kwa kasi kubwa sana.
Hapo ndipo nilibaini kuwa mikono yake aliikunja kwa nyuma kama vile kuna kitu cha siri ilikishikilia. Mala ileile alipiga yowe la hofu, akaanza kuongea kauli za kubembeleza ambazo sikuzielewa. “Niache, niache kaka, sina chochote cha kukupa, niache, niache niende.” Aliongea kwa sauti iliyoakisi hofu kuu aliyokuwa nayo, kisha akaanza kupiga kelele za kuomba msaada. “Mwizi, mwizi, jamani nisaidieni, ananiibia, mwizi, mwiiiizi.” Alitamka maneno hayo kwa sauti ya juu, kisha akaanza kutimua mbio baada ya kujinasua mikononi mwangu. Mbio zake hazikumfikisha mbali, nilimuona akianguka kama gunia la viazi mbele kidogo ya sehemu ile niliposimama. Tukio lile lilikuwa la haraka sana, liliniacha katikati ya bumbuwazi la kupindukia, sikuelewa kama nilitakiwa kutoa msaada kwa binti mlevi anayegalagala chini au kukimbia. Hisia za hofu ya kukamatwa na kupewa kipigo cha mwizi zilinishawishi kukimbia. Nikajionya kutokuwa mzembe wa kuyaokowa maisha yangu dhidi ya hatari iliyonikaribia. Nilitimua mbio kukimbilia kule alikotoka binti mlevi.

Nilikuwa nimechelewa sana kufanya maamuzi yale. Muda ule nilianza kuzisikia sauti za watu wakikimbia kuja ile chocho niliyokuwepo. “Mwizi, mwizi, mwizi, mwizi” sauti hizi zilizagaa eneo lile, ukawa kama wimbo; kila aliyesikia naye aliimba kana kwamba wamemuona mwizi huyo. Wakati nakaribia kuchomoka ndani ya chocho ile nilikumbana na umati mkubwa wa watu waliosogea kwa kasi kunikaribia. Hofu ya kushushiwa kipigo iliuteka moyo wangu, uoga ukaingia mpaka kwenye viungo vya mwili wangu. miguu ikakosa nguvu za kuendelea kukimbia, nikkajikuta nikisimama kama limbukeni nisiyeelewa nini cha kufanya....
​
ITAENDELEA.
(Kila kitu kimeshakamilika, Simulizi ipo tayali. Ili kujua nini kiliendelea, tembelea uzi huu jioni ya kila siku kuanzia leo.)
 
Wakati ndiyo huu, dakika sifuri tu nitakuwa hapa. Nipo nahangaika kukata kipande cha kutosha.
@

Likee2Mzigua_255@Mnachihanguuu​

Washtueni na wadau wengine.✍️✍️✍️✍️✍️✍️✍️✍️✍️✍️✍️✍️✍️
 
ILIPOISHIA
Wakati nakaribia kuchomoka ndani ya chocho ile nilikumbana na umati mkubwa wa watu waliosogea kwa kasi kunikaribia. Hofu ya kushushiwa kipigo iliuteka moyo wangu, uoga ukaingia mpaka kwenye viungo vya mwili wangu. miguu ikakosa nguvu za kuendelea kukimbia, nikajikuta nikisimama kama limbukeni nisiyeelewa nini cha kufanya....

ENDELEA
(Penye mbili sichagui, mwisho zikaniumbua,)
Sikuwa na namna zaidi ya kucheza mchezo wa pata potea kwa namna ya kutafuta kujiponya na balaa lililonikabili. Nikaanza kuita "mwizi mwizi" huku nikiunyoosha mkono yangu kuelekea ndani ya chocho ile; kama ishara ya kuelekeza wapi alipo mwizi halisi. Watu wa kwanza kufika eneo lile hawakudanganywa na janja yangu, wakaanza kunishambulia pasipo kujali ishara niliyotoa. Nilijitahidi sana kukwepa mapigo yao huku nikizidisha bidii kujitetea na kuonesha wapi aliko mwizi, “yupo kule! yupo kule! siyo mimi”. Bidii yangu ilizaa matunda, waliachana na mimi wakakimbilia ndani zaidi ya chocho ile, wakafuatiwa na msururu mkubwa wa watu waliofika kwa kuchelewa. Sikutaka kubaki tena eneo lile, niliitumia vizuri nafasi niliyoipata, nikatoweka kabisa ndani ya mazingira yale. Niliingia chuo mbiombio nisiamini kama nimeponyoka msala ule, nikiusifu mpango wangu ambao japo haukufaulu sana, lakini uliniponya na kipingo kizito ambacho kingenipata.

Ni baada ya kuingia chumbani ndipo niligundua uwepo damu iliyotapakaa mwilini mwangu. Hali hiyo iliniogofya sana, nikawaza labda niliumia wakati wa kujitetea dhidi ya raia walioanza kunishambulia. Hata hivyo sikuhisi maumivu yoyote mwilini, kuwa mzima mpaka dakika ile kilikuwa kitu mhimu sana kwangu. Nikaamua kuingia bafuni nijisafishe kabla rafiki zangu hawajafika na kunikuta katika muonekano ule ambao ungezalisha maswali mengi nisiyoweza kuyajibu. Nilijikagua zaidi ya mala moja lakini sikuona sehemu yoyote niliyoumia, mwili wangu ulikuwa salama kabisa bila mchubuko wowote ule. “Damu hii imetoka wapi” ndilo swali nililojiuliza. “Binti mlevi” ndilo jibu pekee lililonijia akilini. Lazima ingekuwa damu ya binti yule kwani ndiye mtu pekee niliyekumbana naye njiani. Nilithibitisha hilo kwa kuangalia namna damu ilivyojipakaza kwenye nguo zangu. Ilikuwa upande wa mbele tu, upande uleule alionipamia binti mlevi. Mawazo mengi yalipita kichwani mwangu, nikaanza kuukumbuka vizuri mkasa ulionikuta.
Nilimshukuru sana Mungu kwa kuniponya mikononi mwa raia wenye hasira kali, ambao bila shaka wangenipiga waniue kwa kunichoma moto. Mwili ulinisisimka baada ya kuwakumbuka wazazi wangu, nilimkumbuka mama; nikavuta picha ya namna gani angelia na kugalagala kuuona mwili wa mwanaye uliozungushiwa sanda na kuhifadhiwa ndani ya jeneza. Lakini mimi siyo mwizi, sijawahi kuwa mwizi hata siku moja; wala sina mpango wa kuwa mwizi. “Kwanini sasa akaniita mwizi, alitaka waniue?” swali hili halikunifanya kuwaza namna gani ilikuwa hivyo, bali nilijikuta nikimhurumia binti mlevi. Moyo wangu ulinishawishi kuamini kwamba kulikuwepo na mengi nje ya pazia ambayo sikuyajua kuhusu binti yule. Licha ya kwamba sauti yake ilikuwa inipeleke kuuawa, lakini moyo wangu haukumpokea kama muuaji. Ilinipata shauku, nikatamani kumjua kiundani zaidi. Nikawaza huenda aliuhitaji sana msaada wangu wakati tulipokutana.
Roho yangu ilinishawishi kuamini kwamba hakuyumba kwa sababu ya ulevi bali ni katika namna ya kujiokoa dhidi ya wale waliomuumiza na kumtoa damu. Suala la kumjua binti jasiri lilikuwa rohoni, nikapania kufanya juu chini mpaka nimfahamu. Vipi sasa ningemfahamu wakati sikumjua? wala sikuwahi kumuona sehemu yoyote? Sikuwa na uhakika kama ni mwanachuo au la! Niliona njia pekee ya kumfahamu binti mlevi ilikuwa kupitia tukio lilelile. Kwakua tukio lililotokea karibu na chuo, lazima litajulikana sana miongoni mwa wanachuo. Nikatalajia kusikia likizungumzwa na wanachuo wengi itakapofika kesho. Nilipanga kufanya uchunguzi wangu wa kimyakimya mpaka nimpate binti mlevi.

Hakuna siku nilijiona mwenye bahati kama siku hii. Kile nilichokitalajia kilitokea vilevile, nilichokiwaza kikaonekana na kila nilichokifanya kikanikubali pasipo upinzani wowote. Mpaka kufika majira ya mchana tayali nilikuwa nimeshapata taarifa za kutosha kumhusu binti mlevi na mabalaa yote yaliyomsibu. Tukio la jana usiku lilizungumzwa kwa ukubwa sana, zaidi ya vile nilivyotalajia. Uchunguzi kidogo nilioufanya ulinikutanisha na ukweli mgumu kuukabili, ukweli uliojificha nyuma ya mkasa wa binti mlevi. Tukio kama lile halikuwa la kwanza kutokea, lilikuwa sehemu ya mwendelezo wa matukio mengi ya namna ile. Matukio ya kukabwa, kubakwa na kuporwa yaliyowapata wanafunzi wengi wa kike waliokatisha mtaani majira ya usiku kama ilivyomtokea binti mlevi.

"Jina lake ni Agape, mwanafunzi wa mwaka wa kwanza; anayesomea fani ya ususi na ushonaji. Usiku wa jana ulikuwa mbaya sana kwake, maana alikutwa na masahibu ambayo yamemfanya leo hii kuwepo ndani ya chumba cha daktari, akiyapambania maisha yake. Ilikuwa majira ya saa mbili na nusu za usiku, wakati akitoka chuo kwenda geto kwake; ndipo alikutana na kundi la vijana wahuni wa mtaani. Walimshambulia na kumkatakata kwa vitu vyenye ncha kali maeneo mbalimbali ya mwili wake, wakamnyang’anya simu, laptop na vitu vingine alivyokuwa navyo ndani ya begi lake la mgongoni. Muda wote huo alikuwa kawekewa vitambaa kinywani vilivyomfanya kushindwa kupiga kelele, labda walipanga kumbaka kimyakimya maana mikono yake waliifunga kwa kamba ngumu. Mbio za miguu yake ndizo zilimponya dhidi ya ukatili wa kijinsia ambao vijana wale walitaka kumfanyia, alikimbia sana mpaka akafanikiwa kuwaacha wahuni wale ambao hawakujihangaisha kumkimbiza tena.
Wakati akikatisha chocho ya Windo alikumbana na kibaka mwingine ambaye naye alimkaba tena kwa lengo la kumuibia. Baada ya kumkagua na kukuta hana kitu chochote; akataka kumfanyia unyama uleule alionusurika kufanyiwa na vijana wahuni. Bado bahati ikawa upande wake, purukushani iliyotokea ilipelekea vile vitambaa alivyowekewa mdomoni kuchomoka, sasa akawa huru kuongea; hapo ndipo alipiga kelele za kuomba msaada. Kelele zile zilizomfanya kibaka kukimbia. Baadhi ya raia waliofika mapema eneo la tukio walifanikiwa kumuona kibaka yule akikimbia lakini hawakufanikiwa kumkamata kwa sababu aliwazidi ujanja. Mpaka sasa tunao mashahidi ambao wamethibitisha kuuona vizuri uso wa kibaka huyu ambaye ni mwizi wa pili. Upelelezi unaendelea, tunaamini tutampata mtu huyo mapema iwezekanavyo. Tutahakikisha amewataja wenzake wote na huo utakuwa ndio mwisho wa matukio ya ukabaji na uporaji ndani na nje ya eneo la chuo. Tunatoa rai kwa wahusika kujisalimisha mapema kwa uongozi wa chuo, ama wakae na kuusubiri mkono mrefu wa serikali uwakamate walipo, wakaadhibiwe kwa sheria kali mahakamani."
IMETOLEWA NA JESHI LA POLISI KANDA MAALIMU.

Niliisoma kwa uzuri taarifa hii iliyochapishwa kwa maandishi makubwa ya rangi nyekundu na kubandikwa kwenye ubao wa matangazo wa chuo. Ile shauku ya kumjua binti mlevi ilibadirika, ikawa hofu kubwa iliyonifanya kuogopa sana. Niliogopa si kwa sababu mimi ni mwizi, bali yale maelezo ya mwisho ndiyo yalinichanganya. Nikajua kama aliyeonekana ni mwizi wa pili, basi ningekuwa mimi. Ni mimi niliyekumbana na binti yule nikamdaka asianguke, ni mimi pia niliyekimbia baada ya binti yule kupiga kelele za kuomba msaada na ni mimi niliyeonwa na watu wa kwanza kufika eneo la tukio. Du! Nilijiona kukamatika sasa, ningewezaje kujitetea mbele ya watu waelewe kwamba sikuwa kibaka ama mwizi kama walivyoniona? Kilichoniogopesha zaidi ni baada ya kufikiwa na taarifa iliyozagaa chuoni, kwamba kuna kijana alionekana jana usiku, akiingia chuoni, kachafuka damu mwilini mwake. Taarifa hii ilisadikika kutolewa na walinzi wa getini ambao walithibitisha kumuona kijana huyo. “Aisee!! nitafanyaje sasa.” Niliwaza bila kupata jibu zuri la kuniepusha na balaa lililonikabili. Nikajiona nineyeenda kuadhibiwa kwa kosa ambalo sikulifanya. Sikuona kama nitaweza kupona kwa awamu hii iwe kama vile nilivyopona mikononi mwa raia wenye hasira. Taarifa hiyo ilinifanya kunyong’onyea sana, nikakosa amani moyoni. Nilimkwepa kila aliyenisogelea nikiamini anakuja kunikamata, kuna namna niliamini kwamba nimeshajulikana; kilichobaki ni wao kuamua kunikamata tu. Wangeshindwaje kumtambua kijana aliyeonekana kuchafuka damu hali ya kuwa getini kulikuwepo na kamera zilizoinasa vema sura ya kila aliyekatisha eneo lile? Lazima wangenipata tu. Hata hivyo sikuliunga mkono wazo la kujisalimisha kwa viongozi wa chuo, sikuwa tayali kuubali uhusika wa moja kwa moja katika tukio nisilolijua.

Kwa mala ya kwanza nilijitenga na marafiki zangu wakati wa chakula cha mchana, sikutaka wabaini mabadiliko ya hali yangu kwani wasingeshindwa kujua hilo. Nilitafuta sehemu tulivu iliyojitenga, nikakaa mwenyewe nikitafakari namna mambo yalivyoniharibikia ndani ya kipindi kifupi. Ile furaha niliyoihisi kuishi chuo ilitoweka mapema sana, nikatamani kutoweka eneo hilo mapema kabla sijaumbuka. “Mambow Mhanuzi!!” salamu hii ilinishtua sana kiasi nikataka nikimbie. Nilimtazama binti aliyenisalimia nisielewe kwa namna gani amepata ujasiri wa kunifata mpaka huku nilipo, amejuaje nipo huku? Japo nilimfahamu lakini sikuwa na mazoea naye kwa wakati huo, ni yeye tu ambaye malazote hulazimisha kuwa karibu yangu.
Jina lake ni Salome binti mwenye asili ya pemba, mweupe anayemiliki umbile la kipekee linalovutia macho ya kila mwanaume lijari. Siyo mrefu sana, yupo saizi ya kati, unene wake ni ule wa afya siyo ule wa kuzidiwa na mafuta mwilini. Hapo mwanzo uzuri wake ulinivutia sana, nikashawishika kuweka ukaribu naye mala ya kwanza tu nilipomuona. Kufuatia ile shauku niliyokuwanayo juu ya wanawake, nilifanikiwa kujiweka karibu naye. Nikamfanya kuwa rafiki yangu wa kike chuoni naye akanikubali na kunifanya rafiki yake wa kiume. Ukaribu wetu ulikuwa na kuongezeka kila siku, ikafikia hatua watu akaanza kulihisi penzi zito lililochipuka baina yetu. Wakati yeye akitarajia nipige hatua zaidi ndio wakati nilianza kuchukizwa na ukaribu ule. Nikajikuta nikimpotezea pasipo hata kumtamkia chochote kuhusu mapenzi. Sikuwahi kumtongoza wala kumtamkia chochote kuhusu mapenzi. Ule ukaribu wetu wa ghafla ukatoweka, nikalejea kuishi maisha ya kivyanguvyangu. Salome hakuwahi kunipotezea kama nilivyofanya mimi, alijitahidi sana kujiweka karibu kwa kunishirikisha mambo yake ambayo sikuwa na mda nayo tena.
Alisogea mpaka karibu yangu, akakaa pembeni yangu kimya pasipo kuongea chochote. Ujio wa Salome ulikivuruga kabisa kichwa changu, sikuwa tayali kuongea naye kwa wakati ule. nikaamua kunyanyuka ili niondoke eneo lile. “Najua unauchukia uwepo wangu hapa, hunipendi. Lakini mimi sipo kama wewe ambaye hujali chochote kuhusu wengine; nimekuona haupo sawa nikaamua nije nikujulie hari. Una shida gani Mhanuzi!” Maneno yake yalinifanya kusimama, nikageuka na kumuangalia namna alivyonikodolea macho yake makubwa kidogo yaliyozungukwa kwa kope zilizokolezwa kwa weusi wa kuvutia. Maneno yake yalikuwa mwiba mkali wa ukweli uliozijeruhi vibaya hisia zangu. Ni kweli sikuwa kwenye hali nzuri ya kumjibu binti huyu, lakini ule muonekano wa uso wake ulikuwa ujumbe uliotosha kizifikisha hisia zake, alihitaji kusikia neno langu kwa wakati huo. Nilijua hii ndiyo mala yangu ya mwisho kuonana na mrembo huyu kabla ya kukamatwa kwa tuhuma za wizi, uporaji, ukabaji na ubakaji; ambazo sikujua hatima yake ingekuwaje. Nikatamani kuongea neno lakini midomo ikawa mizito kutamka. Nikaishia kumuangalia tu mrembo huyu, naye aliniangalia kwa macho yake ya aibu ambayo hayakustahimili kutazamana kule, yalipepesa kabla ya kuangalia chini. Kuna namna nilijihisi hatia mbele ya Salome, hatia ya kuziamsha hisia zake kisha nikamtelekeza pasipo sababu yoyote.
Zile kumbukumbu za namna alivyowahi kuniomba nimsamehe kama kuna kitu kibaya alikitenda kilichofanya nimchukie; ziliushinda moyo wangu, nikalainika na kuwa mwepesi kama kalatasi mbele ya mrimbwende huyu. “Mbona huna amani, una tatizo gani?” niliisikia kwa ukaribu mkubwa sauti yake, sauti ya upole wa kubembeleza iliyoambatana na pumzi zake zenye joto tamu la kusisimua. Hayakuwa maneno matupu tu; ambayo yangeshindwa kuvunja mfupa, aliongea huku akinishika mikono yangu kama vile hakutaka niendelee kula mwenyewe bali anilishe yeye. Hali hiyo ilinifanya kujihisi kama mtoto aliyeonewa, na sasa nilitakiwa kumtaja aliyenionea mbele ya mama aliyenibembeleza kwa upendo mkubwa sana. “Utajionea mwenyewe,” nilitamka maneno hayo kisha nikajinasua mikononi mwake na kutoweka eneo lile. Ilikuwa lazima nifanye hivyo kuepusha kile ambacho sikutaka kinitokee mbele ya mtoto wa kike. Baada ya kuhisi ujio wa machozi machoni mwangu ambao nilishindwa kuudhibiti nikaamua niondoke, sikuwa tayali kujishuhudia nikitoa machozi mbele ya Salome. Ili iweje? nidhalilike. Sikuwa tayari kunyamazishwa kama mtoto mdogo.

Sikuwa tayali kuonesha mabadiliko yangu mbele ya mtu yeyote, niliigiza kuwa sawa kila nilipokutana na watu walionijua. Kilichotokea nilikifanya kuwa siri yangu ya moyoni ambayo sikuruhusu mtu yeyote aijue, nilifiificha siri hiyo hata mbele ya marafiki zangu. Baada ya kuachana na Salome nilirudi chumbani, nijiandae kwa ajili ya mafunzo ya jioni. Nilipoingia ndani niliwakuta marafiki zangu wote wametulia tuli kila mmoja akifanya mambo yake kwa ukimya. Hali hiyo ilinishangaza kidogo, sikuwa na kumbukumbu za kushuhudia kitu kama hicho. Yaani chumba kikose kelele muda kama huu, muda wa mchana tena watu wakiwa wameshiba. Hapo nikajua lazima kuna kitu kisicho cha kawaida kiliendelea, sasa kingekuwa nini? Wazo baya likanijia kichwani, nikawaza labda wameshazipata taarifa za uhusika wangu katika matukio ya jana usiku. Ndiyo maana wametulia kimya, kusubili nitaongea nini. Hilo liliniuma sana, nikaamua nipande kitandani nijipumzishe pasipo hata kujisumbua kuwaongelesha. “Za ndaaaani kabisa” hii ilikuwa sauti ya Lajoka aliyeongea kwa namna ya kupayuka kisha vikafatia vicheko vya wote waliokuwamo ndani. Sikuwa mgeni wa aina hii ya utani na ucheshi, lakini nilijiuliza nini kipya kinataka kuzungumzwa maana ukishasikia mtu kasema za ndani kabisa ujue kuna jipya anataka kulizungumza. Nilitulia tu kwani nilishajua nini kingefatia, taarifa zangu ndizo zingefatia. Lakini kuna kitu kimoja sikukielewa, iweje marafiki zangu wafurahishwe na kitu kile,” mbona wanacheka kama mazuri?”

“Bingwa wa kuigiza leo umejaa kwenye mifumo. Nilikwambia tangu zamani; lazima itajulikana tu. Sasa leo tumejua mpaka picha zako tunazo. Vipi, bado una kitu cha kujitetea au nikulipue?” Almanusula nidondoke baada ya kusikia maneno hayo, nikajua sasa nimekwisha; kila kitu kimeshajulikana. Niliamua kulala nikajifunika gubigubi nisitake kusumbuliwa na yeyote maana baada ya hapo ningesemwa mimi tu.

ITAENDELEA.
(Kila kitu kimeshakamilika, Simulizi ipo tayali. Ili kujua nini kiliendelea, tembelea uzi huu jioni ya kila siku kuanzia leo.)​
 
TULIPOISHIA
Almanusula nidondoke baada ya kusikia maneno hayo, nikajua sasa nimekwisha; kila kitu kimeshajulikana. Niliamua kulala nikajifunika gubigubi nisitake kusumbuliwa na yeyote maana baada ya hapo ningesemwa mimi tu.....

ENDELEA
(Hili laja hili lenda, Nashindwa lipi kupenda,)

Fikra zangu zilikuwa sahihi kwa kiasi kikubwa sana, mjadala uliofata ulinihusu mimi. Sijui namna gani hali yangu ilibadilika ghafla kutoka kuumia na kuchukizwa na mazungumzo yale mpaka kufurahishwa nayo. Ama kweli, kheri kuwa na mwisho mzuri. Mazungumzo yaliyoanza kwa namna ya kuniogopesha sasa niliyafurahia, nikajifunua shuka ili nishiriki vizuri katika mazungumzo yale. Suala la mimi na Salome ndio ukweli uliojulikana. Kumbe mda ule nilipojitenga na kwenda kukaa mwenyewe eneo la utulivu, Lajoka aliniona. Alishangazwa na kitendo kile maana haikuwa kawaida yangu, akaamua kunifata akijua lazima kuna kitu kipo nyuma ya yote. Alifanikiwa kuniona namna nilivyojiinamia pale chini nilipokaa nikionekana mwenye mawazo mengi kichwani, akataka aje kunijulia hali. Alighairi kufanya hivyo baada ya kubaini ujio wa mtu mwingine eneo hilo, akajibanza kidogo ndipo akamshuhudia Salome aliyenifata moja kwa moja pale nilipokaa. Mpaka hapo akawa amejua nini chanzo cha mimi kujitenga. Wakati naingia ndani ndio wakati alinisubiri kwa hamu aeleze kile kilichotokea. Usishangae kwanini ilikuwa hivyo, ndivyo tulivyoishi. Sikuwa mtu wa kuongea na wanawake kama ilivyokuwa kwa marafiki zangu; ikafikia hatua wakataka kumjua yupi aliniganda. Mala kadhaa nilishawahi kukataa kuwa na uhusiano wowote wa kimapenzi pale chuo lakini sasa nisingeweza kufanya hivyo tena, kila kitu kilikuwa wazi. Maongezi yale yaliilejesha furaha usoni mwangu japo moyoni nilikuwa na huzuni, nilipatwa na hofu kila nilipolikumbuka tukio la jana usiku, jumlisha na lile tangazo la polisi.

Ilipofika jioni tuliendelea na mafunzo kama kawaida. Awamu hii tulikuwa na mafunzo ya vitendo kuhusu namna ya kufungua na kufunga mifumo mbalimbali ya gari. Mkufunzi alianza kwa kutuelekeza kwa vitendo namna ya kufungua na kufunga mifumo ya tairi na injini za gari. Mala zote mkufunzi huanza mafunzo kwa kutoa maelezo ya kina, kisha angefanya kwa vitendo mpaka wanafunzi wote tuseme tumeelewa. Mwisho kila mwanafunzi hupewa nafasi ya kutenda kile alichojifunza; yeye mwenyewe au katika makundi ya darasani. Mda wote wa mafunzo akili yangu ilikuwa umbali mrefu na mwili wangu. Niliwaza namna nitakavyojitetea ishindikane, kufatie kuhukumiwa; nifungwe nipelekwe jela. “Sijui itakuwa miaka mingapi, du! Na vipi kuhusu masomo, ndiyo nitakuwa nimeea…” Nilishtuliwa na mguso wa mtu aliyenipiga kwa nguvu begani pasipo kuongea chochote. Alikuwa mwanafunzi mwenzangu aliyesimama pembeni yangu, macho yake aliyakaza kuangalia mbele alikosimama mkufunzi. “Mbele kuna nini,” nilijiuliza kabla ya kuelewa kilichokuwa kikiendelea kwa wakati huo.
Mkufunzi aliniita kwa jina langu, nikajongea kwenda mbele kusikiliza nini aliniitia. Hofu iliniingia nikawaza huenda amenitambua mhusika tukio la jana usiku. Nilipomfikia aliniuliza kama nimeelewa alichofundisha ama sijaelewa kama wenzangu. Kusemakweli sikuwa nimesikiliza wala kuelewa alichoelekeza wakati wote wa mafunzo, hata hivyo nisingeweza kusema sijaelewa ukizingatia ameniita baada ya kuniona sifatilii mafunzo yake. “Nimeelewa.” Nilijibu kwa ujasiri mpaka wanafunzi wenzangu wakanipiga makofi na kushangilia. Mkufunzi aliniamuru nifanye kwa vitendo kile nilichoelewa ili wenzangu wajifunze toka kwangu. Sikumgomea, nilikubali kufanya vile alivyoniagiza kwasabau nilijiamini sana linapokuja suala la ufundi magari na vyombo vingine vya usafiri wa balabalani. Nilizama chini ya gari la mafunzo, lilikuwa basidogo lililokwisha haribika japo lilifaa sana kwa mafunzo. Kazi ya kuchagua na kunipatia vifaa vya kazi alipewa mwanafunzi mwingine wa kike kama sehemu ya mafunzo ya kupima uelewa wa vitendea kazi.
Uelewa wake ulikuwa mzuri, akawa akinipatia vifaa sahihi kwa wakati sahihi. Niliifanya kazi ile kwa weledi mkubwa sana mpaka pale nilipohakikisha kila kitu kipo sawa ndipo nikataka kuchomoka kule ndani. “Mamaaaa!!!! Ameumiaaa! Damu! Anavuja damu! Inamwagika kama maji!!” ilikuwa sauti ya binti yule, alipiga ukunga kama vile aliumia yeye. Mda huo nilikuwa nimeng’ata meno kwa nguvu, nikiugulia maumivu makali niliyoyapata baada ya kuchanwa ubavuni na chuma kizito kilichonidondokea. “Mhmm! Mhhmm! Mmhhm!” niliugulia maumivu makali yaliyosambaa mwili mzima. Nilianza kujihisi nguvu zikiniishia, nikashindwa hata kukwepa chuma kizito kilichonibamiza kichwani. Taratibu mwanga ulitoweka. Giza likatawala. Hata ile sauti ya maumivu iliyonitoka ikakoma...............

​
ITAENDELEA.
(Kila kitu kimeshakamilika, Simulizi ipo tayali. Ili kujua nini kiliendelea, tembelea uzi huu jioni ya kila siku kuanzia leo.)
 
You must log in or register to reply here.

Similar Discussions

Our Community

Coming Soon

Regional Communities

Coming Soon
Back
Top Bottom
Menu
Forums
New posts
Log in
Register