Nyuki Wamechachamaa, Kingo Wamekasirika... asali haitoki tena!

[Mzee Mwanakijiji]

Nyuki wamechachamaa, Nyuki wameshacharuka,
Hasira kama kichaa, kichwani zimewashika,
Hawana cha msamaha, zamu yao imefika,
Nyuki wamechachamaa, Kingo wamekasirika!

Hawa nyuki wa asali, nyuki wanaosifika,
Wanauliza maswali, yapo yasotamkika,
Si moja au mawili, ni mengi ya uhakika,
Nyuki wamechachamaa, Kingo wamekasirika!

Asali twatengeneza, mbona bado maskini,
Na ng’ambo tunaiuza, inauzwa hata ndani,
Kingo ndio wapendeza, sisi tumekosa nini
Nyuki wamechachamaa, Kingo wamekasirika!

Asali yetu ni bora, mfano wake hakuna,
Mtwara hadi Tabora, mizinga imejazana,
Kingo wanavyotupora, wanetu kula hakuna,
Nyuki wamechachamaa, Kingo wamekasirika!

Wageni wanatujia, kuja kurina asali,
Wanakuja kwa mamia, toka masafa ya mbali,
Kingo wanatuambia, ni wawekezaji mahili,
Nyuki wamechachamaa, Kingo wamekasirika!

Mikataba waingia, kingo wanashangilia,
Mizinga wanagaia, nyuki tunaangalia,
Miaka inakimbia, mizinga yakaukia,
Nyuki wamechachamaa, Kingo wamekasirika!

Mzinga ukiishia, mwingine wanahamia,
Wenyewe tunajifia, huku tunajililia,
Twafa tunaangalia, wapi tutakimbilia,
Nyuki wamechachamaa, Kingo wamekasirika

Kingo walishazoea , kula asali kwa zamu,
Hakuna wa kufokea, wanajilia kwa hamu,
Mabingwa wa kubobea, wamegeuka walimu,
Nyuki wamechachamaa, Kingo wamekasirika!

Wanakula na masega, masega yanye asali!
Mizinga toka Nzega, kwa sahani na bakuli,
Wanakula na kumwaga, nyuki tunalikubali?
Nyuki Wamechachamaa, Kingo wamekasirika!

Sasa nyuki kimewaka, kingo wanataharuki!
Wamezindukazinduka, lahaullah hawa nyuki!
Kingo wanatetemeka, wamezidiwa mikiki!
Nyuki wamechachamaa, Kingo wamekasirika!

Wanaleta na polisi, kupiga mkwara nyuki,
Nyuki wanazidi kasi, wala hawababaiki,
Wanapigwa na risasi, nyuki chini haanguki,
Nyuki wamechachamaa, Kingo wamekasirika!

Toka Arusha na Mtwara, Tanga hadi Newala,
Na nyuki toka Tabora, wa Iringa, na Ukala
Utadhani Tora Bora, Kingo wanashindwa kula!
Nyuki wamechachamaa kingo wamekasirika!

Nyuki wametuma neno, asali haitoki tena,
Haitoki kwa maneno, au vitisho vya jana,
Kingo wakosa unono, wageni waulizana,
Nyuki wamechachama, kingo wamekasirika!

Tushikamane nyuki, asali hiyo ni yetu,
Ya kwenu tena ya haki, yenu na ya wanetu!
Kingo wakae na nyuki, asali itufae petu!
Nyuki wamechachamaa, kingo wamekasirika!

Ninalo neno kwa kingo, kingo walamba asali,
Mmetawala kwa uongo, mkikimbia maswali,
Ahadi za mlolongo, mkipindisha kauli!
Nyuki wamechachamaa, kingo wamekasirika!

Kukasirika kwa kingo, hakuwasumbui nyuki!
Hata waje na magongo, huyu nyuki hatishiki,
Umeporomoka wongo, umekoma uzandiki!
Nyuki wamechachamaa, kingo wamekasirika!

Nyuki wameshaamka, kulala tena hakuna,
Na lindo wamelishika, hawatoachia tena,
Zamu yenu kugeuka, kingo ngondo mwaona,
Nyuki wamechachamaa, kingo wamekasirika

Beti zangu zinakoma, ninafunga kwa nukta,
Wakijiji natuwama, heshima zangu wapata,
Nyuki wameshasimama, hawa kingo watajuta!
Nyuki wamechachamaa, kingo wamekasirika!

Na. M. M. Mwanakijiji (Sauti ya Kijiji)
Kwa heshima ya Marehemu Saadan Abdul Kandoro na Shairi lake la “Siafu Wamekazana”

 

[Izz]

Ujumbe maridhawa kaka! Huu ndio uandishi ambao unakufanya ukae nakufanya tafakuri jadidi!

Sio kama uandishi ambao uko wazi kama "vazi la kahaba"

 

[MC]

Yeah this is great,

Ingekuwa ni 'paper' mwishoni kungekuwa na Swali,... Je Nyuki ni nani na Kingo ni nani...

Kwa upande wa Nyuki kuna majibu mengi, ila upande wa Kingo jibu ni moja tu na lazima ningepata:- Watawala na Viongozi wa CCM kwi kwi kwi..

 

[numlock]

Inapendeza,imekaaa vizuri amakweli nyuki wamechachamaaaaaaaaaa

 

[Mnyamahodzo]

Nyuki hawafiki mbali, japo ni wenye hasira,
Wote wao ukali, onekana kama mkwara,
Mfupi wao umbali, kimbiza mleta hasara,
Za nyuki wakwetu, ni busara ama woga?

Wamekamatwa na wazo, ndani kuna malkia,
Akili na nguvu wanazo, na maarifa usiyodhania,
Japo hawana mwongozo, wote wamekau wakilia,
Za nyuki wakwetu, ni busara ama woga?

Malikia wa mzingani, amekuwa kikwazo,
Jinale ni AMANI, mrembo asomchezo
Wakitoka milimani, huwasumbua wazo,
Za nyuki wakwetu, ni busara ama woga?

Kingo wamegundua, kelele kuwapigia,
Nyuki wanapoamua, adui kumfuatilia,
Kingo huwashitua,"malkia anakimbia",
Za nyuki wakwetu, ni busara ama woga?

Nyuki wana nia, asali kuilinda,
Malkia tamania, wanashindwa kulinda,
Asali ya Tanzania, komba huipenda,
Za nyuki wakwetu, ni busara ama woga?

 

[Mzee Mwanakijiji]

Nyuki wamechachamaa

 

[Mzee Mwanakijiji]

Mnyamahdzo nimependa mtiririko wako hapo! Safi sana

 

[sweetlady]

Nzuri sana...... Like ! Like ! Like

 

[Mtoto halali na hela]

Hawa nyuki balaa

 

[kibol]

nyuki tumechachamaa hawa kingo wamekasirikia nini mbona siwaelewi??????????????????hawajachoka tu muda wote waliotusulubisha jamani??????????????

 

[kibol]

Hawa nyuki balaa

kingo na wenyewe si mchezo mkuu

 

[Ntuga]

Ndio tabia ya nyuki hata kama unamiliki mzinga hupenga uvune asali kwa utaratibu kwa kuzingatia maslahi yao lah sivyo utakosa asali, watakuuwa au wao wafe!

 

[Ntuga]

Ndivyo nyuki walivyo, hata kama wewe ni mmiliki wa mzinga unapoenda kurina asali lazima uzingalie maslahi yao ama sivyo wakuuwe, ukose asali, wafe nyuki, nyuki wakimbie msitu mwingine!

 

[MADAM T]

Warinaji sijui wamelisoma hili shairi jamani...

 

[Safari_ni_Safari]

Afrika bwana......hata la kusema sina!

 

[Mnyamahodzo]

Mnyamahdzo nimependa mtiririko wako hapo! Safi sana

Nashukuru Mzee wetu, tunaendelea kujifunza. Nani ajuaye, huenda nikawa malenga mtarajiwa...ha ha haa!

 

[Mzee Mwanakijiji]

Duh.. kuna mtu amenikumbushia shairi hili la miaka mitano kamili siku ya leo... ukweli wake bado upo?

 

[911sep11]

Duh.. kuna mtu amenikumbushia shairi hili la miaka mitano kamili siku ya leo... ukweli wake bado upo?

siku hizi umepigwa tape mdomoni unaongea kwa shida na kwa nadra sana.

 

[Mzee Mwanakijiji]

siku hizi umepigwa tape mdomoni unaongea kwa shida na kwa nadra sana.

Siyo kila anayeongea anazungumza...

 

[primaquin]

Nyuki wamechachamaa, Nyuki wameshacharuka,
Hasira kama kichaa, kichwani zimewashika,
Hawana cha msamaha, zamu yao imefika,
Nyuki wamechachamaa, Kingo wamekasirika!

Hawa nyuki wa asali, nyuki wanaosifika,
Wanauliza maswali, yapo yasotamkika,
Si moja au mawili, ni mengi ya uhakika,
Nyuki wamechachamaa, Kingo wamekasirika!

Asali twatengeneza, mbona bado maskini,
Na ng’ambo tunaiuza, inauzwa hata ndani,
Kingo ndio wapendeza, sisi tumekosa nini
Nyuki wamechachamaa, Kingo wamekasirika!

Asali yetu ni bora, mfano wake hakuna,
Mtwara hadi Tabora, mizinga imejazana,
Kingo wanavyotupora, wanetu kula hakuna,
Nyuki wamechachamaa, Kingo wamekasirika!

Wageni wanatujia, kuja kurina asali,
Wanakuja kwa mamia, toka masafa ya mbali,
Kingo wanatuambia, ni wawekezaji mahili,
Nyuki wamechachamaa, Kingo wamekasirika!

Mikataba waingia, kingo wanashangilia,
Mizinga wanagaia, nyuki tunaangalia,
Miaka inakimbia, mizinga yakaukia,
Nyuki wamechachamaa, Kingo wamekasirika!

Mzinga ukiishia, mwingine wanahamia,
Wenyewe tunajifia, huku tunajililia,
Twafa tunaangalia, wapi tutakimbilia,
Nyuki wamechachamaa, Kingo wamekasirika

Kingo walishazoea , kula asali kwa zamu,
Hakuna wa kufokea, wanajilia kwa hamu,
Mabingwa wa kubobea, wamegeuka walimu,
Nyuki wamechachamaa, Kingo wamekasirika!

Wanakula na masega, masega yanye asali!
Mizinga toka Nzega, kwa sahani na bakuli,
Wanakula na kumwaga, nyuki tunalikubali?
Nyuki Wamechachamaa, Kingo wamekasirika!

Sasa nyuki kimewaka, kingo wanataharuki!
Wamezindukazinduka, lahaullah hawa nyuki!
Kingo wanatetemeka, wamezidiwa mikiki!
Nyuki wamechachamaa, Kingo wamekasirika!

Wanaleta na polisi, kupiga mkwara nyuki,
Nyuki wanazidi kasi, wala hawababaiki,
Wanapigwa na risasi, nyuki chini haanguki,
Nyuki wamechachamaa, Kingo wamekasirika!

Toka Arusha na Mtwara, Tanga hadi Newala,
Na nyuki toka Tabora, wa Iringa, na Ukala
Utadhani Tora Bora, Kingo wanashindwa kula!
Nyuki wamechachamaa kingo wamekasirika!

Nyuki wametuma neno, asali haitoki tena,
Haitoki kwa maneno, au vitisho vya jana,
Kingo wakosa unono, wageni waulizana,
Nyuki wamechachama, kingo wamekasirika!

Tushikamane nyuki, asali hiyo ni yetu,
Ya kwenu tena ya haki, yenu na ya wanetu!
Kingo wakae na nyuki, asali itufae petu!
Nyuki wamechachamaa, kingo wamekasirika!

Ninalo neno kwa kingo, kingo walamba asali,
Mmetawala kwa uongo, mkikimbia maswali,
Ahadi za mlolongo, mkipindisha kauli!
Nyuki wamechachamaa, kingo wamekasirika!

Kukasirika kwa kingo, hakuwasumbui nyuki!
Hata waje na magongo, huyu nyuki hatishiki,
Umeporomoka wongo, umekoma uzandiki!
Nyuki wamechachamaa, kingo wamekasirika!

Nyuki wameshaamka, kulala tena hakuna,
Na lindo wamelishika, hawatoachia tena,
Zamu yenu kugeuka, kingo ngondo mwaona,
Nyuki wamechachamaa, kingo wamekasirika

Beti zangu zinakoma, ninafunga kwa nukta,
Wakijiji natuwama, heshima zangu wapata,
Nyuki wameshasimama, hawa kingo watajuta!
Nyuki wamechachamaa, kingo wamekasirika!

Na. M. M. Mwanakijiji (Sauti ya Kijiji)
Kwa heshima ya Marehemu Saadan Abdul Kandoro na Shairi lake la “Siafu Wamekazana”

Safiiii