Tarehe 15, Novemba kwa saa za Marekani, dunia nzima inaelekeza macho Philori Manor mjini San Francisco, ambapo Rais Xi Jinping wa China alialikwa na kuwa na mkutano wa saa nne na rais Joe Biden wa Marekani. Huu ni mkutano mwingine wa ana kwa ana kati ya wakuu wa nchi hizo mbili mwaka mmoja baada ya mkutano wao mjini Bali mwaka jana, ni kipindi muhimu cha kushughulikia uhusiano tata kati ya China na Marekani kwenye ngazi ya mkakati. Rais Xi Jinping alisema kwa uwazi wakati wa mkutano wao kuwa, "hakuna anayeweza kuhimili matokeo mabaya ya mgogoro na makabiliano kati ya China na Marekani."
Kusema kweli, katika mwaka mmoja uliopita, Marekani haikufuata makubaliano yaliyofikiwa na wakuu wa China na Marekani katika mkutano wao wa Bali, ikiwa ni pamoja na kuendelea kutekeleza mkakati wa "vita baridi mpya" dhidi ya China, na kusababisha uhusiano kati ya nchi hizo mbili kudidimia sana. Lakini tangu mwezi Mei, kumekuwa na sauti zenye mantiki zaidi katika serikali ya Marekani na maoni ya wananchi wakisema kwamba mlango wa mazungumzo hauwezi kufungwa. Waziri wa Mambo ya Nje wa Marekani Bw. Antony Blinken, waziri wa fedha Bibi Jannet Yellen, waziri wa biashara Gina Raimondo na maafisa wengine wengi waandamizi wa serikali ya Marekani wameitembelea China, na kutuliza kiasi uhusiano baina ya nchi hizo mbili. Hali hiyo iliweka mazingira mazuri ya kufanyika kwa mkutano huo wa San Francisco.
Hivi sasa, dunia inakabiliwa na changamoto mbalimbali ikiwemo ya usalama, maendeleo, na usimamizi. Ikiwa uhusiano muhimu zaidi kati ya nchi hizo mbili duniani, iwapo China na Marekani zitafanikiwa kutafuta njia sahihi ya kuelewana sio tu kunahusu nchi hizi mbili pekee, bali pia kutaathiri mwelekeo wa siku zijazo wa dunia. Kuhusiana na suala hili, Rais Xi Jinping kwa mara nyingine tena alielezea mtazamo wa China katika mkutano wake na Biden kuwa, maadamu China na Marekani zinaweza kuheshimiana, kuishi pamoja kwa amani, na kufanya ushirikiano wa kunufaishana, zinaweza kudhibiti tofauti zao na kutafuta njia sahihi ya kuelewana kwa nchi mbili kubwa duniani. Kwa kweli, hii pia inaonyesha udhati na dhamira ya China ya kushughulikia vizuri uhusiano kati yake na Marekani.
Hata hivyo, suala kubwa zaidi linalozuia uhusiano kati ya nchi hizo mbili kuboreshwa kwa sasa ni kama Marekani, ambayo imezoea kufanya maamuzi katika nyanja ya kimataifa, inaweza kutambua na kuheshimu ukweli kwamba China pia inachukua nafasi muhimu ya kuamua mchakato wa maendeleo ya uhusiano kati ya nchi hizo mbili. China imejitolea kujenga uhusiano tulivu, mzuri na endelevu kati yake na Marekani, lakini hii haimaanishi kuwa inaweza kupuuza maslahi, kanuni na msingi wake. Wakati huo huo, Marekani pia inatakiwa kuacha makabiliano ya kiitikadi ambayo ni mtazamo uliopitwa na wakati wa Vita Baridi na kujenga upya tabia ya kushirikiana na China. Kwa kweli, China na Marekani zina maslahi makubwa ya pamoja katika nyanja nyingi, ikiwa ni pamoja na nyanja za jadi kama vile uchumi na biashara, na nyanja zinazoibuka kama vile mabadiliko ya tabia nchi. Mkutano huo huko San Francisco unakuja kabla tu ya Mkutano wa Umoja wa Mataifa wa Mabadiliko ya Tabianchi huko Dubai mwishoni mwa mwezi huu. Wachambuzi wanasema "diplomasia ya hali ya hewa" ya muongo mmoja uliopita imefuata mkondo kwamba wakati makundi makubwa zaidi ya kiuchumi duniani yanakaribia, mambo mazuri yatatokea. Iwapo China na Marekani zitashirikiana kwa mara nyingine tena katika kupunguza utoaji wa hewa chafuzi, zitahimiza maendeleo ya "Mkutano wa Dubai" na kutoa mfano wa kuigwa kwa ushirikiano kati ya nchi kubwa katika kutatua matatizo makubwa yanayowakabili binadamu.
Mwaka kesho ni kumbukumbu ya miaka 45 tangu kuanzishwa kwa uhusiano wa kibalozi kati ya China na Marekani. Historia imetuambia kwamba maendeleo ya uhusiano kati ya China na Marekani hayapatikani kwa urahisi. Hata hivyo, ni lazima ikubalike kwamba wakuu wa nchi hizo mbili wana nafasi ya kama "dira" ya kuweka kwa usahihi mwelekeo wa maendeleo ya uhusiano kati ya nchi zao, na kufanya uhusiano wa nchi hizo urudi kwenye njia sahihi. Kama Rais Xi Jinping alivyomwambia Rais Biden wakati wa mkutano wao kuwa, "Sisi ni manahodha wa uhusiano kati ya China na Marekani na tunabeba majukumu mazito kwa watu, dunia na historia." Inaaminika kuwa baada ya mkutano huo, uhusiano kati ya China na Marekani unaweza angalau "kuacha kudidimia ", lakini pia haijulikani kama unaweza "kutulia na kuboreka", hali ambayo inahitaji juhudi za pamoja kutoka pande zote mbili.
Mji wa San Francisco umeshuhudia historia ndefu ya mawasiliano ya watu wa China na Marekani, pia umeshuhudia juhudi za China na Marekani za kujenga dunia bora. Inatarajiwa kwamba Marekani inaweza kutambua vya kutosha aliyosema rais Xi Jinping “Sayari ya Dunia ni kubwa ya kutosha nchi mbili kufanikiwa, na mafanikio ya nchi moja ni fursa kwa nyingine”, kukutana na China njiani baada ya mkutano wa San Francisco na kutekeleza ahadi zake kwa vitendo. Jumuiya ya kimataifa imejaa matumaini makubwa juu ya hilo.
