Padri Privatus Karugendo
JAMBO linaloshangaza katika ulimwengu wa leo ni kwamba mambo yote aliyoyafanya Yesu wa Nazareti yamewekwa pembeni.
Yale ambayo hakufanya yanatangulizwa na kutukuzwa kwa nguvu zote. Yesu wa Nazareti hakuandika waraka; yeye alifundisha, aliponya na kuyaishi maisha ya watu wanyonge. Alikuja duniani kutengeneza mifumo mizuri ya kuishi utu wema.
Yesu wa Nazareti, aliishi kwenye ulimwengu unaofanana na wa kwetu. Ulimwengu uliokuwa umezongwa na matatizo mengi yaliyokuwa yakihitaji suluhu ya haraka.
Ulimwengu uliohitaji mfumo mzuri wa kuyaendesha maisha ya binadamu. Ingawa kuna maoni tofauti ya kwa vipi, kwa nini na lini, Wayahudi wengi wanakubaliana kwamba Yesu wa Nazareti, alipoanzisha utume wake, ulimwengu wao ulikuwa na matatizo makubwa. Hivyo mtu huyu alitengeneza mfumo mzuri wa kupambana na matatizo hayo.
Kristo wa Nazareti hakuandika waraka, pamoja na ushahidi wa kutosha kwamba wakati wa maisha yake watu walikuwa wanafahamu kusoma na kuandika. Hata yeye Yesu wa Nazareti alijua kusoma na kuandika:
"Akasimama ili asome maandiko matakatifu kwa sauti. Akapokea kitabu cha Nabii Isaya, akakifungua na kupata mahali palipoandikwa hivi: "Roho wa Bwana yu pamoja nami, kwani ameniteua rasmi niwaletee maskini habari njema. Amenituma niwatangazie wafungwa kwamba watapa uhuru, vipofu watapata kuona tena; amenituma niwakomboe wanaoonewa na niutangaze mwaka ambao Mungu atawaokoa watu wake."
"Baada ya kusoma akafunga kile kitabu, akampa mtumishi, kisha akaketi; watu wote wakamkodolea macho." (Luka 4: 16-20).
Huu ni ushahidi wa kutosha kwamba Yesu wa Nazareti, alifahamu kusoma! Kama alisoma inawezekana pia alifahamu kuandika. Lakini pia kuna ushahidi kwamba kuna wakati aliandika:
"Lakini Yesu akainama chini, akaandika ardhini kwa kidole
Kisha akainama tena, akawa anaandika ardhini." (Yohana 8: 6-8).
Inaonyesha wazi kwamba Yesu wa Nazareti, alifahamu kuandika, lakini hakuandika waraka wowote. Waraka wake yalikuwa maisha yake. Yeye alipambana na mifumo mibaya katika jamii na kujitahidi kuisimika mifumo mizuri. Aliyaishi maisha na si kuandika juu ya maisha; aliziishi sheria na sikuandika juu ya sheria; aliuishi upendo na si kuandika juu ya upendo; aliishi haki, wema na huruma na si kuandika juu ya haki, wema na huruma.
Tunahitaji mifumo mizuri ya kujenga maadili mema katika jamii. Huwezi kuufundisha waraka hewani. Ni lazima pawepo mfumo mzuri wa kuwafundisha watu. Mfumo huu hatuna! Yesu alipambana na mifumo mibovu. Hivyo na maaskofu wetu wapambane na mifumo mibovu na kutengeneza mifumo mizuri ya kumwezesha mwanadamu kuishi maadili mema.
Tofauti na Yohana Mbatizaji, ambaye alifanya kazi ya kubatiza tu, Yesu alikwenda mbali na kuanzisha harakati za kuwakomboa watu kutokana na unyonge wao, kutokana na kunyanyaswa na kutokana na umaskini.
Alianzisha harakati za ukombozi wa nyakati zote, nyakati zilizopo na nyakati zijazo. Ni lazima tukumbuke kwamba utume wa Yesu, ulielekezwa kwa watu wanyonge, watu waliokuwa wamepoteza matumaini. Watu hawa waliishi kwenye jamii yenye matabaka. Yesu, aliwarudishia matumaini, aliyafanya maisha yao yawe na maana. Aliwaelekeza kujiamini na kupambana na maisha. Aliwaelekeza kushirikiana na kugawana kila walichokuwa nacho, ili kupambana na maisha yenye matabaka.
Kwa kuponyesha na kufanya miujiza, Yesu alianzisha safari ya ukombozi wa Mwanadamu.
Kitu cha pekee, kinyume na manabii waliotangulia na wale tulionao sasa hivi ni kwamba Yesu, aliponya na kufanya miujiza bure. Hakutoza fedha wala kusubiri shukrani. Alitumia kipaji chake bure! Wagonjwa walipona, mamia ya watu walikula na kunywa kwa miujiza ya Yesu, bila malipo yoyote yale.
Leo hii wale wenye kipaji cha kuponya wanaogelea kwenye utajiri wa kutisha. Wanatoza fedha, wanataka shukrani na sifa nyingi. Wanataka kuheshimiwa na kuabudiwa wanafanya kinyume kabisa na Yesu wa Nazareti.
Yesu, hakufanya miujiza kujionyesha, bali alikuwa na lengo la kuwasaidia watu, kuwatoa watu katika mateso ya umaskini, kunyanyaswa na kupuuzwa. Aliponya kwa vile aliwahurumia watu. Alitanguliza huruma, badala ya kutanguliza umaarufu na kuheshimika, alitanguliza wema badala ya kutanguliza kutumia vipaji vyake kujitajirisha na kujineemesha!
Kitu kingine kinachomtofautisha Yesu wa Nazareti na manabii wengine na hata Yohana Mbatizaji, ni kwamba Yohana Mbatizaji aliwahubiria wakosaji, alitaka watubu na kumgeukia Mungu. Lakini Yesu alikwenda kuishi na omba omba, watoza ushuru na malaya. Mbali na kazi ya kuhubiri, aliishi na kushiriki maisha ya wafuasi wake.
Vitabu vidogo vinne tunavyoviita Injili, si wasifu wa Yesu na wala havikuandikwa kwa ajili hiyo. Na wala hatuwezi kusema kwamba vitabu hivi vinaelezea historia ya Yesu. Hata hivyo havikuandikwa kwa lengo hilo! Lengo la vitabu hivi lilikuwa kuonyesha jinsi Yesu, anavyoweza kuwa muhimu kwenye maisha ya watu waliokuwa wakiishi nje ya Palestina, vizazi zaidi ya viwili baada ya kifo chake.
Vizazi hivi havikuhitaji wasifu wa Yesu, bali mwongozo na mfumo wa maisha wa kuwawezesha kuishi nje ya Palestina. Muhimu ni matendo ya Yesu, matendo ambayo hapana shaka hayakufanana na ya mtu mwingine.
Hata sisi leo hii hatuhitaji wasifu wa Yesu, bali tunahitaji mwongozo wake na mfumo wa maisha wa kutuwezesha kupambana na matatizo ya ulimwengu wa leo.
Hivyo maaskofu wetu wasituandikie waraka: Watutengenezee mifumo ya kuishi utu wema; waishi maisha ya wanyonge na wanaoonewa.
Mamilioni ya watu kwa miaka mingi wamekuwa wakilitaja jina la Yesu na kumwabudu, lakini wachache kati ya mamilioni ndio waliomwelewa Kristu na namba chache kabisa ndiyo waliofuata kile alichokitaka kitendeke. Maneno ya Yesu Kristu, yamebadilishwa na kupindishwa ili yatekeleze kile watu wanachokitaka, na wakati mwingine maneno yake yamebadilishwa na kupindishwa yasimaanishe kitu chochote!
Jina la Yesu, limetumiwa kubariki maovu ya kila aina, kama wale waliokuwa wakiongoza vita na kuua watu huku wakitanguliza msalaba na Biblia. Latini Amerika, mamilioni ya watu walipoteza maisha yao na sehemu nyingine kizazi kilifutika kabisa katika harakati za kueneza neno na mafundisho ya Yesu Kristu.
Lakini pia jina la Yesu, limetumiwa kuwashawishi na kuwaletea imani kubwa wanaume na wanawake wengi hata kufikia hatua ya kupumbazika na kufanya matendo ya kijinga, kama kujinyima chakula na kuitesa miili yao kufikia kiwango cha uwendawazimu. Yesu amekuwa akitukuzwa na kuabudiwa kwa yale ambayo hakuyalenga, yale aliyoyapinga na kuyakemea kuliko yale aliyoyalenga, aliyoyahubiri, aliyoyatetea na kuyafia.
Jambo la kushangaza ni kwamba mambo ambayo Yesu aliyapinga wakati wa uhai wake, yalifufuliwa, yalihubiriwa na kusambazwa dunia nzima kwa jina lake. Tatizo kubwa linaloisumbua jamii yetu, ambalo ni lazima maaskofu walielewe vizuri ni kutokuwa na mfumo unaoeleweka wa kuishi Ukristu ,utu wema na maadili mazuri. Mbali na ufisadi, kuna matatizo mengine mengi kama ukimwi, maadili mabovu, nk. Bahati mbaya hadi leo hii hakuna kanisa lenye mfumo wa kuwajibishana, kushauriana, kuelekezana na kujuliana hali. Hakuna mfumo wa kuhojiana, kama ni fisadi Mkristu na tunasali naye tukafahamu fedha anazipata wapi. Ukosefu wa mfumo unalifanya kanisa liendelee kuwakumbatia mafisadi. Fedha za mafisadi zimejenga makanisa, zimenunua vifaa vya kanisani, zimewasomesha mapadri na wachungaji, zimenunua chakula cha mapadri na wachungaji. Hivyo jambo muhimu na la haraka ni mfumo, vinginevyo tutaendelea kulumbana juu ya waraka hadi kufikia kuvuruga amani ya taifa letu!
Source: Tanzania Daima
