Itakuwa mara ya pili kuwa na mjeshi PCCB, kwani kabla ya Hosea alikuwepo Maj Gen Anatoly Kamazima. Na taasisi nyingi zilishikwa na wajeshi tangu kabla, kama kuna wanaojua sababu watuambie: Col Abihud Nalingigwa (mawasiliano, sasa TCRA), Brig Gen Prof Dr Yadon Kohi (COSTECH), Maj Gen Herman Lupogo (TACAIDS), Brig Gen Muhiddin Kimario (CDA), Brig Gen Augustino Ramadhani (Makamu Mwenyekiti, Tume ya Uchaguzi. sasa Jaji Mkuu), na wengine tajeni. Hii imekaaje? Na je kuna nafuu kuliko zikishikwa na raia? Au huko jeshini hakuna kazi za hawa wakubwa? Ingekuwa vipi kama hawa wakuu wangetumia taaluma zao kuimarisha jeshi kama taasisi inayojimudu ki-rasilimali, kuliko wao kuondoka huko halafu wanabaki kuajiri raia? Majeshi ya wakubwa huku yana viwanda vya zana, taasisi za research zinazojitegemea na tena zinachapisha scientific journals katika fani nyingi, mashule hadi university, vyuo vingine vya viwango mbalimbali, mahospitali makubwa ya rufaa na ya kufundishia madaktari wao, viwanda vya madawa (na utafiti wake), mashamba ya nafaka,, mboga, mifugo, usindikaji wa vyakula (ration) na mambo mengine kibao, askari mtaalamu ana kazi za kutosha jeshini. Na ikitokea dharura hawa jamaa wana uwezo wa kuchukua nafasi zote za raia (wanao watawala, wachumi, wanasheria, wanasayansi wa karibu kila kitu kilichoko uraiani, na wapiganaji wenyewe wa medani) yaani ni kama li-serikali fulani la akiba tena lenye maguvu, lakini limetulia tu! Sijui kama jeshi letu ni hivyo au nao wanasubiri wachomolewe kambini na JK na kupewa ukuu wa wilaya na ukurugenzi wa mashirika!
Na sielewi hawa maafande wakikutana kwenye madaraka ya kiraia vyeo vyao vya kijeshi wanaviweka wapi, yaani sijui wanapeana vipi heshima wao kwa wao. Kwa mfano kuna wakati pale Arusha mkuu wa mkoa alikuwa Captain (na alikuwa anatajwa siku zote kwa cheo chake) na mkuu wa wilaya mojawapo alikuwa Colonel, sasa hawa sijui walikuwa wanasalimianaje wakutanapo! Na si kwamba hawakuwa active jeshini hawa, walikuwa bado active sana tu. Afande Brig Gen Augustine Ramadhani alifanyiwa gwaride la kuagwa jeshini akiwa ameshatumikia tume ya uchaguzi kwa muda mrefu na kufanikisha chaguzi mbili za Mkapa, kwa kushirikiana na mwenyekiti wake Lewis Makame. Muungwana JK alipandishwa cheo kutoka Meja kuwa Lt Col akiwa tayari Naibu Waziri wa Maji, Nishati na Madini. Maj Gen Said Said Kalembo alifanyiwa gwaride la kuagwa kwa ule mtindo wao wa kusukumwa gari lake hadi nje ya kambi akiwa tayari keshakuwa mkuu wa mkoa kwa miaka kadhaa.
Ufanyaji kazi wa hawa maafande na raia munaufahamu? Kule Mahenge kulikuwa na mkuu wa wilaya Brig Gen Sylvester Hemed, siku moja walikuja wazungu wafadhili wa mradi fulani, wakati wa kumkaribisha atoe hotuba ya kuzindua mradi, wakamtaja ni "Mr Sylvester Hemed", hakuinuka kitini! Na hata viongozi wengine wa wilaya walipowashitua mabosi wa mradi kuwa wamekosea kumtaja mkuu kwa cheo chake, na mhusika kurekebisha kosa hilo, hakukubali hadi alipoombwa radhi hadharani na kutamkiwa kuwa kosa hilo halitarudiwa! Ya Maj Gen James Luhanga nawaachia waliobahatika kumtumikia pale Iringa (natumaini wapo hapa) wayaseme, na ya Maj Gen Tumainieli Kiwelu huko Kagera nasikia sifa nyingi, lakini wakimbizi wa Ngara huko najua wanayo hadithi yao.
