Oxlade-Chamberlain
JF-Expert Member
- May 26, 2009
- 8,635
- 2,198
Mgombea Mweza CCM, Dk. Mohammed Gharib Bilal
Fukuto la kura za maoni lingali linachemka ndani ya Chama Cha Mapinduzi (CCM) kiasi cha kuathiri mahudhurio ya wanachama kwenye mkutano wa kampeni wa Mgombea Mweza, Dk. Mohammed Gharib Bilal, hali iliyolazimu kusafirisha watu kwa magari baada ya uwanja kuwa mtupu.
CCM ilalazimika kuwasafirisha wanachama wake kwa malori ili washiriki mkutano wa kampeni wa mgombea mwenza katika kata ya Dodoma- Makuru mkoani Dodoma jana.
NIPASHE ilishuhudia watu waliovaa sare zinazotumiwa na CCM zikiwa na rangi ya kijani, njano na alama ya jembe na nyundo, wakiwa wamebebwa kwenye malori na kushushwa katika uwanja wa mikutano uliopo kwenye kata hiyo.
Miongoni mwa watu waliokuwa kwenye malori hayo ni wasanii wa vikundi mbalimbali vya burudani.
Mkutano huo ulipomalizika, malori yaliyotumika awali, yaliwabeba wasikilizaji wa mkutano huo na kuwarejesha kwenye maeneo tofauti yaliyosemekana kuwa karibu na makazi yao.
Kata hiyo inasadikiwa kuwa ngome ya Chama cha Demokrasia na Maendeleo (Chadema) hasa baada ya mgombea udiwani aliyeshinda katika kura za maoni katani humo, Ally Biringi, kuihama CCM na kujiunga na chama hicho cha upinzani.
Kuhama kwa Biringi kwenda Chadema kulitokana na Halmashauri Kuu ya CCM mkoani Dodoma, kutorudisha jina la Biringi, ambaye alishinda kwa kura za maoni 196.
Nec badala yake ilirudisha jina la mshindi wa pili katika kinyanganyiro hicho, Zuwena Aweda, aliyepata kura 72.
Kutokana na hali hiyo ya upinzani katika kata ya Dodoma-Makuru, wagombea wote walichukua muda katika hotuba zao kuwasihi wananchi kutomchagua Biringi kwenye Uchaguzi Mkuu wa Oktoba 31, mwaka huu.
Akizungumza katika mkutano huo, Dk. Bilal alisema wapo wanachama wanaoingia CCM kwa ajili ya kutafuta vyeo, na wanapovikosa wanahamia upinzani. Cheo ni dhamana, wengi wanaingia katika chama kwa ajili ya kutafuta vyeo, hatuna uhakika kule wanakokwenda wakikosa wanafanyaje, alisema Dk. Bilal.
Dk. Bilal aliwataka wananchi waliohudhuria katika mkutano huo, kumwambia (Biringi), ajiandae kwenda katika chama kingine mara baada ya kushindwa kwenye Uchaguzi Mkuu.
Pia Dk. Bilal alisema kuwa ujenzi wa uwanja wa ndege mpya wa mjini Dodoma, utaanza kushughulikiwa katika kipindi hiki cha miaka mitano ijayo.
Alisema dhamira ya serikali ya kuhamia Dodoma iko palepale, na kuwataka wananchi kumchagua Rais Kikwete, wabunge na madiwani wanaotokana na CCM.
Kwa upande wake, mgombea ubunge wa Dodoma Mjini kupitia chama hicho, David Mallole, alisema endapo atachaguliwa, atayashughulikia matatizo ya ardhi yanayowakabili wakazi wa Njendegwa.
Alisema kwa nafasi hiyo ya ubunge atakuwa mjumbe wa bodi ya wakurugenzi wa Mamlaka ya Ustawishaji ya Mji wa Dodoma (CDA) na hivyo kumpa fursa ya kutatua matatizo hayo.
Pia aliahidi kuyashughulikia matatizo ya maji, umeme na zahanati yanayoikabili kata hiyo ili wananchi waweze kuishi kwa amani.
Mallole aliwataka wakazi wa kata hiyo wasiziamini ahadi za Biringi hasa kuhusu ujenzi wa zahanati katika aeneo hilo.
Mimi nimekuwa Naibu Meya hapa mjini, sijawahi kusikia akitoa hoja ya ujenzi wa zahanati kwa kipindi chote nilichokuwa pale, leo hii anasema atahakikisha kuwa zahanati inajengwa huo ni uongo mtupu, alisema.
Mkoani Iringa, Makamu Mwenyekiti wa Jumuiya ya Umoja wa Vijana wa Chama Cha Mapinduzi (UVCCM), Beno Malisa, amewasili mjini Iringa hatua inayoelezwa ni kushughulikia mgogoro uliopo ndani ya jumuiya hiyo, katika wilaya ya Iringa.
Mgogoro huo unadaiwa kuiweka CCM na mgombea ubunge wa Iringa Mjini, Monica Mbega katika hali ngumu kisiasa.
Mpasuko ndani ya UVCCM katika Manispaa ya Iringa, ulitokana na uteuzi wa nafasi ya ubunge ambayo Nec ilimuengua mshindi katika kura za maoni, Frederick Mwakalebela na kumrejesha Mbega. Mbega amekuwa mbunge wa jimbo hilo kwa miaka 10 sasa.
Baada ya uamuzi huo, baadhi ya wanachama wa CCM, wengi wao wakiwa vijana walionekana kutoridhishwa, hivyo kujikuta wakigawanyika katika makundi yanayodaiwa kuwepo hata sasa.
Katika juhudi za kumaliza mvutano huo, Malisa alikutana kwa saa kadhaa na vijana UVCCM jana katika kikao cha ndani.
Taarifa za ndani kutoka kwenye kikao hicho zilieleza kuwa Malisa aliwaomba kumaliza mgogoro uliopo ili kukinusuru chama hicho katika hatari ya kulipoteza jimbo la Iringa Mjini.
Ndugu zangu matokeo ya kura za maoni yalishapita na maamuzi ya Nec yatabaki kuwa hivyo, hapa tunatakiwa kuhakikisha jimbo hili linabaki mikononi mwa CCM, alisema.
Malisa aliwataka vijana hao kutambua kuwa katika kipindi cha uchaguzi, falsafa inayostahili kutumika ni chama kwanza na mtu baadaye.
Licha ya mvutano kuwepo katika mkutano huo, Malisa aliwaeleza vijana hao kutodanganyika kwamba Iringa kuna upinzani, na kwamba cha msingi ni kuvunja makundi yaliyopo.
Tutapigana kufa na kupona hadi mgombea wetu (Monica) ashinde na tunatangaza rasmi kuvunjika kwa makundi na tutamuunga mkono kwa kuwa tumesharekebisha kasoro zetu, alisema Malisa.
Kwa upande wake, Mbega ambaye pia ni Mkuu wa Mkoa wa Kilimajaro, aliwashukuru vijana hao kukubali kumuunga mkono na kuahidi kujirekebisha katika kasoro alizokuwa nazo na ambazo hakuzitaja.
Mbega alitumia fursa kumuomba Malisa kufanikisha azma ya nafasi za kitaifa katika UVCCM ziwanufaishe vijana wa mkoani Iringa.
Habari hii imeandikwa na Sharon Sauwa Dodoma na Godfrey Mushi, Iringa.
