#FIFAfrica23: Muongo mmoja wa kujenga jumuiya ya Kuchagiza Haki za Kidigitali Barani Afrika!

[Analogia Malenga]

Jukwaa la kila mwaka ya Uhuru wa Mtandao(internet) Barani Afrika (FIFAfrica) iliyoandaliwa na Ushirikiano wa Sera za Kimataifa za Teknolojia ya Habari na Mawasiliano kwa Afrika Mashariki na Kusini (CIPESA) itafanyika Dar es Salaam, Tanzania kuanzia tarehe 27 hadi 29 Septemba 2023.

Mwaka huu utaadhimisha muongo mmoja wa mkusanyiko mkubwa zaidi kuhusu uhuru wa mtandao barani Afrika, ambao tangu mwaka 2014 umekuwa ukileta uhuru wa mtandao katika ajenda ya wadau muhimu, ikiwa ni pamoja na watunga sera wa Kiafrika, waendeshaji wa majukwaa ya mtandao, makampuni ya simu, wasimamizi, walinzi wa haki za binadamu, wataalamu wa masuala ya sheria, na vyombo vya habari. Hii imeandaa njia kwa kazi pana ya kusukuma haki za kidigitali barani Afrika na kukuza mfano wa usimamizi wa mtandao kwa njia ya washikadau wengi.

Katika nchi kadhaa za Afrika, inakuwa changamoto kubwa kutumia mtandao kulinda haki za binadamu, kuimarisha vyombo huru vya habari, kusaidia demokrasia, kudai utawala unaowajibika na wenye uwazi, au kupata uhuru wa kufikia habari na kuchangia maudhui kwa lugha mbalimbali za Kiafrika. Hii inakwenda kinyume na kanuni kuu ya mtandao kama jukwaa huru na wazi.

Uamuzi wa kuandaa FIFAfrica 2023 nchini Tanzania unatambua juhudi za Tanzania katika kukuza kidigitali kwa maendeleo endelevu. Chini ya uongozi wa Rais wake wa kwanza mwanamke, Samia Suluhu Hassan, ambaye ni mdau wa haki za raia na haki za wanawake, Tanzania imefanya mageuzi ya kisiasa na kisheria yenye lengo la kuboresha nafasi za kiraia na ajenda ya kidigitali. Kwa kuzingatia hilo, sheria ya ulinzi wa data imepitishwa, sheria inayosimamia shughuli za vyombo vya habari inarekebishwa, na Miongozo ya Maudhui ya Mtandaoni ya 2020 imerekebishwa ili kuunga mkono uhuru wa kusema mtandaoni, faragha, na ufikiaji wa habari.

FIFAfrica 2023 itatoa jukwaa la majadiliano muhimu kwa washikadau mbalimbali kwa lengo la kutambua masuala muhimu na changamoto zinazohusiana na haki za mtandao ambazo zinahitaji kushughulikiwa kwenye ngazi za kitaifa na kikanda. Kwa miaka mingi, FIFAfrica imegundua fursa za kupeleka mjadala kuhusu umuhimu wa haki za kidigitali katika vikao vya kitaifa, kikanda, na kimataifa. Hasa, Jukwaa hili linasaidia kutoa mchango muhimu katika mijadala mbalimbali katika ngazi za taasisi, kitaifa, kikanda, bara, na kimataifa, ikiwa ni pamoja na Umoja wa Afrika, Tume ya Afrika ya Haki za Binadamu na Watu, Baraza la Haki za Binadamu la Umoja wa Mataifa, Mkutano wa Utawala wa Mtandao wa Afrika, Mkutano wa Kikanda wa Utawala wa Mtandao, na Mkutano Mkuu wa Utawala wa Mtandao.

Kuongezeka kwa idadi na aina ya washiriki na mjadala katika FIFAfrica kunathibitisha, FIFAfrica inasaidia kukua kwa jumuiya inayochochea haki za kidigitali barani Afrika, kuongeza uelewa na utetezi wa uhuru wa mtandao, huku ikijenga ushirikiano mpya unaosaidia haki za kidigitali. Inaleta sauti mpya, ikiwemo za makundi ambayo mara nyingi yananyimwa fursa kama vijana, watu wenye ulemavu, na wanawake, na inawawezesha watendaji wa serikali na wasiokuwa wa serikali kukuza hatua zinazotegemea ushahidi unaosaidia sera na mazoezi.

FIFAfrica tayari imefanyika nchini Uganda, Afrika Kusini, Ghana, Ethiopia, na Zambia, na toleo la mwisho lilihudhuriwa na watu wapatao 1,000 (mtandaoni na nje ya mtandao) kutoka nchi 47.