Wakatoliki waliwaita 'vigogo' kuandaa ilani
Mwandishi Wetu
Julai 15, 2009
Wamo wa mahakama, wabunge
CCM ilialikwa lakini haikuhudhuria
Mafisadi waelezwa hawatapona
WAKATI mjadala mkali ukiibuka kuhusiana na nyaraka zilizotolewa na Kanisa Katoliki kuelekea Uchaguzi Mkuu wa mwaka 2010, imefahamika kwamba baadhi ya vigogo ndani ya serikali na vyama vya siasa walishirikishwa katika hatua za awali za maandalizi yake.
Raia Mwema limefahamishwa kwamba maandalizi ya nyaraka hizo ikiwa ni pamoja na Ilani ya Mapendekezo ya Vipaumbele vya Taifa, yalifanyika kwa kuwapo vikao vya pamoja kati ya wanataaluma wa kanisa hilo na wadau mbalimbali kutoka serikalini na sekta nyingine.
Nyaraka hizo ambazo tayari zimekabidhiwa ofisi nyeti nchini, ambazo ni Ikulu, Mahakama, Bunge, Ofisi ya Waziri Mkuu na vyama vya siasa, kwa ajili ya kufanyiwa kazi, zimeibua mjadala zaidi baada ya kuanza kuandikwa na Raia Mwema baadhi wakikerwa na jinsi taarifa kuhusiana na nyaraka hizo zinavyoripotiwa.
Ndani ya nyaraka hizo, pamoja na mambo mengine, kumesisitizwa kwamba kutenda haki ni zaidi ya kufuata sheria na taratibu, na watawala sio mabosi mbele ya watu.
Baadhi ya washiriki katika vikao vya maandalizi wanatajwa kuwa ni pamoja na Jaji Mkuu Augustino Ramadhani, baadhi ya wabunge, maofisa kutoka Ofisi ya Waziri Mkuu na baadhi ya vyama vya siasa. Hata hivyo, Chama Cha Mapinduzi (CCM) ambacho ndicho chama tawala hakikushiriki licha ya kualikwa kama chama tawala.
Mjadala wa kwanza wa maandalizi hayo unaelezwa kufanyika Mei, mwaka huu na kwamba kutakuwapo na muendelezo wa mijadala na vikao katika siku zijazo kabla na baada ya uchaguzi mkuu wa mwaka 2010.
Kwa mujibu wa Mwenyekiti wa Chama Cha Wanataaluma Wakristo Tanzania (CPT), Joseph Ibreck, kati ya Agosti na Septemba, mwaka huu, makundi ya kijamii yatapata fursa ya kujadili juu ya mrejesho (reflection) wa ilani hiyo. CPT ndio waliokuwa waratibu na waandaaji wa nyaraka hizo kwa Baraka zote za Kanisa Katoliki.
"Kalenda inaonyesha kuwapo kwa forum (jukwaa la majadiliano) Agosti au Septemba, mwaka huu kwa kushirikisha wadau mbalimbali wakiwamo viongozi, NGOs, wanahabari," alisema Ibreck na kuongeza kuwa;
"Kwa bahati mbaya tumekuwa tukinyanyasana sisi wenyewe (Watanzania) na si mtu kutoka nje ya nchi
kwa nini? Kwa hiyo lengo la ilani hii ya vipaumbele ni hadhi ya utu wa mwanadamu, marekebisho ya Katiba, uongozi wa umma na mengine."
Kwa mujibu wa Ibreck, Kanisa Katoliki linasisitiza kuwa suala hilo si la kidini bali ni la kiimani.
"Hili si suala la kidini kwa kuwa udini ni sawa na ukabila ni ubaguzi. Hili ni suala la imani, na katika imani sote tunaamini Mungu, lakini kwenye dini tunatakiwa kujitambua kama watu wa mfumo fulani na taratibu mahsusi kwa hiyo tunajiweka katika makundi, '' alisema.
Alipoulizwa kuhusu Kanisa Katoliki kuhusika katika kutoa kauli kali kuhusu umasikini wa Watanzania, na hasa kwa kuhoji; ''uchumi na siasa vipo kwa madhumuni gani?'' Ibreck alisema Mwalimu Julius Nyerere aliwahi kutoa kauli kali zaidi kuliko msimamo huo wa kanisa.
''Hatujaeleza kwa ukali ni masuala yenye hoja za msingi kwa kila Mtanzania, na tumeitwa kutoa ufafanuzi na hasa pale awali kulipojitokeza kikundi kilicholenga kupotosha ukweli, lakini sasa wengi na hasa viongozi wameelewa lengo letu.
''Mwalimu Nyerere alikuwa akitoa maneno makali zaidi kuhusu umasikini wa Watanzania na pia kuhusu ufisadi. Ni mambo yaliyokuwa yakimkera.
''Mwadhana Polycarp Kardinali Pengo amekwishaeleza kuwa kanisa halitawalinda mafisadi na anatambua kati ya waumini wapo watu wa aina hiyo.
''Kwa hiyo ni kuipigania jamii ibaki salama, watu wasinyanyasane na kubaki wakinung'unika na kulaumiana, utu wa kila mtu upewe hadhi inayostahili.
''Unajua tatizo kubwa nchini ni kwamba watu wenye sifa za kuwa viongozi bora hawajitokezi, sasa tunataka kuamsha dhamira, watu wajitokeze kuchaguliwa na kuchagua pia,'' alisema.
Ilani ya Mapendekezo ya Vipaumbele vya Kitaifa inazungumzia marekebisho ya Katiba, suala ambalo limekuwa likipigiwa kelele na wadau mbalimbali nchini kwa muda mrefu.
Katika mapendekezo yake ya marekebisho ya Katiba, ilani hiyo inaeleza kuwa Katiba ni zaidi ya sheria, ni dira`ya kimaadili na maelezo ya kifalsafa ya tunu na kanuni watu wanazotaka kuzizingatia katika maisha yao ili kuwakikishia amani, haki na kuheshimiana na kuvumiliana katika kuwa na maoni tofauti.
Imeelezwa kwamba hakuna chama cha siasa wala serikali ya wakati huu wanaoweza kihalali kutumia Katiba kwa faida zao za kisiasa.
Inapendekezwa Baraza la Mapitio ya Katiba. Katika mifumo mbalimbali ya kisiasa, kuna njia kadhaa za kuwezesha suala hili kutekelezwa: Mahakama ya Kikatiba, Bunge na Mkutano wa Katiba.
Pia inapendekezwa kuundwa kwa Baraza la Wazee, wanaoteuliwa na sekta za kijamii, ama wanaochaguliwa na taasisi mbalimbali za kijamii, kidini na wanazuoni. Chombo hicho kichaguliwe na kuhakikishiwa uhuru watendaji wake na Katiba yenyewe, kisibanwe na serikali.
Inapendekezwa kuwekwa kanuni za udhibiti wa upatikanaji wa fedha za chama ama mgombea, kuchagua wagaombea ndani ya chama kufanyike kwa uwazi na kwa demokrasia zaidi.
Kuanzisha mfumo wa kiuwiano katika uwakilishi badala ya sasa wa mwenye kupata kura nyingi kuwa ndiye mshindi. Kuruhusu wagombea binafsi isipokuwa Rais.
Kuheshimu kanuni ya kuwa serikali haina dini na kutoruhusu taasisi zake za kidini kuwa sehemu ya mfumo wa nchi na kulinda haki ya watoto ambao hawajazaliwa.
Wakati hayo yakiendelea, kuna habari kwamba baadhi ya watendaji ndani ya serikali wameelezea kukerwa kwao na taarifa zinazonukuu nyaraka hizo za kanisa, wakielezea kwamba zinapotoshwa bila kutoa ufafanuzi mwanana.
Kwa mfano, watendaji hao wanazungumzia kutotajwa kwa udhaifu wa serikali katika nyaraka hizo, ambazo kwa sehemu kubwa zinaelezea udhaifu katika mfumo wa kiutendaji na utoaji huduma na kutoa mapendekezo ya mambo ya kurekebishwa ikiwa ni pamoja na Katiba ya sasa kufanyiwa marekebisho.
Hofu kubwa imejengwa kwamba kwa sasa waraka huo umejengewa mazingira na picha kama vile ni shambulio la Kanisa Katoliki dhidi ya Serikali ya Rais Jakaya Kikwete.
"Pamoja na ufafanuzi wa Kardinali Polycarp Pengo, uliofuatiwa na ule wa Rais Kikwete aliyezungumzia uhusiano mzuri ulioko kati ya Serikali yake na dini mbalimbali katika hotuba yake ya mjini Songea, Wilaya ya Kilindi, Mkoa wa Tanga wakati anazindua Hospitali Teule ya Wilaya ya Kilindi mwishoni mwa mwezi uliopita, bado juhudi za kupotosha uhusiano huo zimeendelea," anaeleza mmoja wa watu ndani ya serikali (ambaye hakupenda kujitambulisha) katika taarifa yake aliyoituma Raia Mwema.
"Picha inayojengwa ni kwamba Kanisa Katoliki limeishambulia Serikali ya Kikwete katika Waraka huo kwa sababu mbalimbali, kuanzia kwenye madai ya rushwa na mambo mengine. Kwamba Kanisa Katoliki halimtaki Rais Kikwete na kuwa halitamuunga mkono katika Uchaguzi Mkuu wa mwakani. Kwamba Kanisa Katoliki linaandaa viongozi wake kwa ajili ya kukamata madaraka katika uchaguzi huo wa mwakani," anaendelea kulalamika ofisa huyo wa Serikali.
Mtendaji huyo, aliye ndani ya duru la wasaidizi wa karibu wa Kikwete wa sasa, ameendelea kulalamika kwamba kumekuwapo na upotoshwaji wa makusudi unaohusisha pia uamuzi wa Serikali kufuta misamaha ya kodi kwa baadhi ya vifaa vya matumizi ya dini na adhabu dhidi ya viongozi wa dini kwa sababu ya Waraka huo.
"Kwa nini dini zote nchini ziadhibiwe kwa sababu ya Waraka uliotolewa na madhehebu ya Wakatoliki ni jambo ambalo hata halielezwi kwa sababu halina maelezo yoyote yenye mantiki kwa hata mtu mjinga," anasema.
Hata hivyo, hofu imeelezwa kuwaingia serikalini baada ya kuelezwa kwamba wapo baadhi ya viongozi wa Serikali ambao sasa wameanza kulitisha Kanisa Katoliki kutokana na Waraka huo.
"Waraka wa mwaka huu, uliotolewa Januari hata kama wakubwa wameugundua majuzi tu, siyo wa kwanza kutolewa na Kanisa Katoliki tokea kuanzishwa mfumo wa vyama vingi vya siasa. Kanisa Katoliki lilitoa Waraka wa kwanza wa namna hiyo mwaka 1995, likatoa wa pili wa namna hiyo mwaka 2000, na Waraka wa sasa ni wa tatu. Na wala hakuna tofauti kubwa katika Nyaraka zote hizo tatu," anaendelea kueleza mtumishi huyo wa serikali.
Raia Mwema limekuwa likiandika taarifa zilizonukuu maandiko hayo huku likichambua vipaumbele vilivyotajwa ikilinganishwa na hali ya sasa serikalini katika utendaji na utoaji huduma.
