Riwaya: Kibiritingoma

[Godlove Kabati]

Alikuwa mrembo wa sura, mwenye umbo la kuvutia na sauti ya kuburudisha. Akawa mashuhuri kama fedha, na adimu kama almasi.

Sifa hizi, akazitumia kama fimbo, alipokutana na wanaume wenye tamaa kali ya ngono; alipokaribishwa kwenye dunia ya ukahaba.

Kisha, akakutana na huyu.
Kijana msomi, mwenye uwezo wa kucheza na kompyuta na mitandao.
Kwa pamoja, wakaanzisha biashara haramu, iliyowatajirisha kisha baadaye ikawafikisha kando ya kinywa cha mauti...

BIashara ya kuwauzia watu dhambi zao, kwa gharama yoyote waliotaka. Ni biashara gani hii?

Na kwa vipi, iwafikishe mautini?

Ungana nami kwenye mkasa huu wa aina yake, uliotungwa na mwandishi mbarikiwa, Godlove Kabati

 

[Godlove Kabati]

KIBIRITINGOMA
Imeandikwa na, GODLOVE KABATI
Kwa udhamini wa, MAJIVU YA FASIHI

SEHEMU YA KWANZA...



Dhamiri ni kweli.
Humsuta mtu hasa pale anapotembea njia isiyo sahihi. Humkumbusha mtu kuwa, japokuwa hajakamilika, bado anahitaji kuufukuzia ukamilifu kwa juhudi zake zote.


Jua zuri la kupendeza, lilionekana likichomoza kutokea upande wa Mashariki wa anga. Mwanga wake mzuri wa dhahabu uliufukuza mwezi ambao nao ulitii bila shuruti na kuanza kufifia mawinguni.
Ndege wa angani wakaanza safari zao za siku zote kila ilipofika mida kama hii, wakaimba na kufanya fujo za kila namna. Ni hizo fujo na kelele za nyimbo zao, vilivyowaamsha wanadamu ambao walikuwa bado wameyakumbatia malazi yao.
Kulikuwa kumekucha...ilikuwa ni alfajiri.

Naam,
Hata mwanaume huyu alikuwa mmoja kati ya wale waliokuwa bado wameyakumbatia malazi yao alfajiri hii. Yeye akiwa bado ameunatisha mwili wake juu ya godoro hili laini kwa gundi ya ajabu.
Gundi inayowatesa wale wapenda usingizi. Uzembe!
Ni uzembe tu, wenye chembechembe za uchovu, uliomfanya mwanaume huyu aendelee kujilaza kifudifudi palepale kitandani, akiwa ndani ya shuka jepesi lililokuwa na joto la haja. Sio kwamba amesinzia la! Ila kaamua tu, kulifaidi joto la asubuhi lililochanganyikana na uchovu kisha likapigiliwa msumari mzito na uvivu.
Uchovu? Kwa nini uchovu?
Usiku uliopita alikuwa na shughuli nzito mno ambayo imemfanya aendelee kujilaza palepale kivivu.
Uchovu huuhuu ukamfanya ajihisi mzito sana walau hata kujigeuza ili alale chali.
Haya, afungue macho basi ili aione dunia, akashindwa!
Badala yake akalivuta shuka na kujikunyata akijiviringa zaidi ndani yake. Ingezuka vita ya tatu ya dunia kama mtu angempokonya shuka hili muda huu.

Alizisikia kwa mbali sauti za ndege wanaoimba kwa furaha kuikaribisha siku hii mpya.
Akawaza kuhusu furaha yao,
"...Hawapandi, hawavuni na wala hawaweki ghalani lakini baba wa mbinguni huwalisha hao....je nyinyi si bora kupita hao?..." Akajaribu kurejerea mstari huu katika maandiko matakatifu.
Akasonya baada ya kugundua kuwa yeye sio ndege, hivyo hana namna yoyote ile ya kujilinganisha nao.
Kitendo cha kukumbuka kuwa amerejerea mstari mtakatifu tu, akamkumbuka Mungu,
akalikumbuka kanisa, akamkumbuka mke wake wa ndoa, akaikumbuka familia yake aliyoiacha nyumbani.
Kisha mara moja akaikumbuka shughuli nzito iliyojaa laana aliyoifanya usiku uliopita.

Naam,
Ni kwa mara ya tano sasa amediriki kutoka nje ya ndoa na kukutana na binti huyu. Kwa pamoja wameshiriki, juu ya vitanda tofauti tofauti, kwenye hoteli tofauti tofauti, katika siku tofauti tofauti—kuisulubu amri ya sita.
Akapata sononeko la moyo. Alikuwa na donda ndugu lililogoma kupona. Akamfikiria tena mke wake...hakupenda kuisaliti ndoa yake.
Lakini ukorofi na fujo za mke wake, vilivyoilizokithiri ndizo zilizopageuza nyumbani kwake kuwa kama jehanamu ndogo.
"Mama Junior!...ni kwa nini lakini?"

Akazungumza yeye na nafsi yake,
Akajilaumu peke yake,
Ameoa tayari ana mke,
Lakini bado anajihisi mpweke.

Mara akakurupushwa na rabsha ndani ya chumba kile, zilizosababisha ukelele fulani ambao haukumkera...na hapo macho yake yakakubali kufunguka.
Akajitahidi kukipindua kichwa chake, akijipindua kama nyoka pale juu ya kitanda kilichoshirikiana na joto kumshikilia asiamke.
Macho yake yakagota juu ya umbo la mwili wa kike uliokuwa umesitiriwa ndani ya taulo fupi lililolowana kiasi, likiwa limefungwa maridadi kifuani na kuacha wazi mabega yake huku likijitahidi kuyaficha mapaja laini yaliyonona na lisiweze.
"Huyu hapa huyu..."
Akatamka na nafsi yake kwa mara nyingine,
"Huyu nd'o amekuwa faraja ya moyo wangu...yaani dah! Mama Junior, umenifanya nilale na malaya?" Akazidi kujiuliza na kujijibu mwenyewe.

Ni wazi kuwa binti huyu alikuwa ametoka kuumwagia maji mwili wake. Na sasa huyu hapa ametazamana na kioo kipana kilichobandikwa kwenye kabati, amempa mgongo tu huyu mwanaume na mara binti huyu akafanya tukio ambalo lilisababisha hali ya uchangamfu pale chumbani.

Taratibu bila papara akalifungua taulo lile fupi na kubaki kama alivyokuja duniani, maungo yake yote yakabaki wazi!
Lile jotoridi pale kitandani likaanza kuongezeka. Likazidi na kuiyeyusha ile gundi yote ya uchovu. Bwana huyu akachangamka na kukaa mkao wa kula ili macho yake yasiyo na pazia yafanye jukumu lake la kila siku.

Mwili uliobarikiwa ngozi laini, ulikuwa umelowanishwa kwa tembe chache za maji. Kama embe bichi mwituni.
Rangi yake asili iliyokataa daima kueleweka kama ni nyeusi, machungwa au ile ya maji ya kunde ikaonekana iking'ara. Hii haikuwa ngozi yenye rangi bandia iliyotegemea vipodozi wala kemikali ili ing'ae.

Binti akalikamata taulo lile na kuanza kuupapasa mwili wake taratibu, akijipangusa tembe zile za maji. Alikuwa ni kama anapiga deki.
Mboni za macho ya huyu kiumbe aliyekuwa kitandani yakazidi kufuatisha tu kila kiungo kilichofikiwa na huduma ya taulo lile. Kwa kila kiungo akakifanyia uchambuzi wa kisanii.
Mwinuko wa milima miwili yenye ukubwa wa kadri iliyokuwa na bonde katikati yake, ikibebwa na mapaja manono angavu yaliyojazwa nyama na yakajazika, sambamba na miguu mizuri ya kike iliyonyimwa michubuko ya aina yoyote ile.

Hivi ni miguu tu? Akakagua tena kama kuna mchubuko au kipele chochote kile juu ya mwili wa huyu binti; Kama kingekuwepo basi kitakuwa kinapitia dhuluma na aibu ya upweke kwa kukaa mahali isiyostahili.

Kiuno chake chembamba,
Ngozi laini isiyo na magamba,
Yavutia kwa macho waweza kuilamba,
Yote hii kazi ya muumba.

Taulo lilipohamia mbele hakuweza kufanya uchambuzi wake. Na hilo likamsononesha upya.
Akapitia mateso kuamini kuwa binti huyu amemaliza kujikausha mwili wake.
"Hivi kweli huyu ndiye nilikuwa naye usiku kucha?" Akajiuliza.
Kila siku alizidi kumuona mpya kabisa machoni mwake, hakuwahi kuuzoea uzuri wake.

Binti huyu akainua mguu wake na kuuweka juu ya stuli ndogo. Taratiibu akaanza kuipakaa ngozi laini ya mwili wake mzuri kwa mafuta.
Juu ya mwili wake laini,
Mijongeo ya vidole kwa umakini,
Kajipakaa toka juu mpaka chini,
Akitazamwa tokea pale juu kitandani,
Na dume kubwa la nyani,
Kwa macho yenye huzuni.

Katikati ya miguu ya mwanaume kulikuwa na askari ambaye daima alikaa chonjo kukabiliana na hali za hatari kama hizi. Tayari alikuwa amesimama wima kwa ukakamavu.
"Amekosa nini huyu binti?"
Likawa swali gumu ambalo daima alijiuliza tangu alipomtia mrembo huyu machoni kwa mara ya kwanza. Alikuwa na urembo wa kutosha kabisa kumfanya shetani aungame makosa yake yote kisha aamini kuwa yupo Mungu anayeishi, muumba wa kila kitu kizuri.
Lakini ajabu!
Mrembo huyu ni changudoa, kahaba, malaya, dada poa ama waweza kumuita KIBIRITINGOMA!
Asingekosa mwinyi mwenye pesa za kutosha kumuoa au hata kumfanya hawara.
Ukute ana mikosi!
Au ana laana kutoka kwa wazazi wake..
Kwani ana wazazi kweli huyu?

Ilikuwa ni foleni ya maswali ambayo iliendelea kujipanga akilini mwa bwana Didas Ambrozi; mkurugenzi wa kampuni, baba wa familia, mzee wa kanisa na mzee wa busara aliye muungwana kama alivyojulikana na jamii.
Kila wadhifa aliokuwa nao, ulitosha kabisa kumfanya aone aibu kutoka nje ya ndoa na kununua makahaba. Mara mia hata angekuwa na hawara wa nje lakini kahaba?! Hakika alikuwa amepiga hatua ndefu sana ya kujitafutia aibu.

Lakini kwake yeye, aliitazama hii aibu kwa jicho la tofauti kabisa. Wakati nyinyi mnamuona huyu binti kama kahaba na changudoa, yeye alimuona kama hawara au mchepuko wa pembeni!
Kila aliposhambuliwa na vurugu na masimango ya mke wake, aliifuata faraja yake na tulizo kwa huyu binti. Alionjeshwa asali, yeye akaamua kuchonga mzinga kabisa.

Bwana Didas Ambrozi akajikohoza kidogo,
"umeamkaje Bebe." Kwa sauti yenye kitetemeshi akatoa salamu ile akiwa na matarajio kuwa labda binti huyu aitwaye 'Bebe' atamuoena aibu na kujisitiri.

Lakini haikuwa hivyo, kwa nini ajisitiri?
Hakuna alama yoyote ile ya mwili wake isiyojulikana na mwanaume huyu. Wameshakutana kimwili zaidi ya mara nne, wakibadilishana bidhaa ambazo kila mtu alihitaji kutoka kwa mwenzie.
Bebe alihitaji fedha na Bwana Didas alihitaji ladha ya tunda la mti wa katikati. Kwa Didas ikiwa ni burudani lakini kwa Bebe ilikuwa ni kazi iliyoachana kwa sentimita chache sana na neno 'biashara'!

"Salama tu Daddy...vipi wewe!" Kwa sauti changamfu iliyojaa huba, Bebe akamjibu akiwa amemtazama Didas huku sura yake ikivaa tabasamu lenye bashasha. Hapa yakazuka mafumbo mapya kabisa, yaliyohitaji uchambuzi wa kisanii.

Sauti yake ya kinanda,
Nyepesi nyororo iso na inda,
Tamu kama soda ya Mirinda,
Kutoka kinywani mwa huyu kinda,
Bwana Didas ikamshinda!

Macho yake yakagota kwenye sura yake.

Kasura kake kazurii,
Kamefinyangwa kwa umahiri,
Anatabasamu kwa desturi,
Tabasamu tamu la alfajiri,
Utataka kumtazama adhuhuri,
Hutochoka mpaka alasiri,
Si utani Bebe alikuwa zaidi ya neno 'mzuri'!

"Eeer...mi mzima! Naona leo umewahi kuamka aisee!" Akajitahidi kulazimisha tabasamu usoni mwake, akafanya jitihada za kusimama huku akimficha askari wake aliyekuwa tayari kupigana asubuhi hii.
"Mh...jamani Daddy, sa ulitaka nilale mpaka saa ngapi. Nina kazi nyingi zinanisubiri asubuhi hii mwenzioo"
Bebe akamjibu kwa sauti ileile ya madeko akianza kuvaa nguo zake za ndani moja baada ya nyingine. Mwisho akamalizia na kigauni kifupi chekundu kilichokataa katakata kuyafunika yale mapaja yake yaliyokuwa na uwezo wa ajabu wa kuamsha ashiki ya dume lolote lile rijali.

Bwana Didas akajinyoosha huku akipiga mwayo mrefu, mkono wake wa kulia ukahamia kiunoni, na ule wa kushoto ukakipapasa kitambi chake chepesi kisha akarejea upya juu ya kitanda na kuketi.
Bado macho yake yako kwa Bebe.
Umbo lake matata likijisanifu vyema ndani ya kigauni kile kilichoung'ang'ania mwili wake kwa kuubana kiasi.

Bebe akachukua pochi yake ndogo na kupiga hatua zake kwa madaha, miguu yake ikijikata kwa mwendo wa paka 'catwalk' mpaka pale juu ya kitanda na kuketi kando ya Bwana Didas.
Viganja vyake laini vikavikamata viganja vigumu vya Didas na kuanza kuvitomasa katika namna upole na kubembeleza.

"Daddy..."
Akamtazama usoni kwa macho ya kusinzia, Katika namna ya kurembua,
Kwa sauti ya kichokozi,
Akalitaja jina kwa mapozi,
Ambalo siku zote liliyapoza maumivu yote ya moyo wa Didas Ambrozi.

"Niambie mrembo..." Didas akamjibu kwa upole...tayari ameshalainishwa akalainika.
"Mi nd'o naondoka hivyo..." Soni ikauvamia uso wake akazihamisha mboni zake mpaka kwenye vile viganja alivyokuwa anacheza navyo.
Didas akashusha pumzi kwa nguvu kisha akauruhusu mkono wake wa kulia umzunguke Bebe na kumkumbatia.
"Asante sana kipenzi...umeugeuza usiku wangu wa jana kuwa sawa na sikukuu!Nimefurahi sana." Akatamka kwa mahaba huku akiusaili uso wa Bebe uliobarikiwa uzuri.
"Mmh jamani kwelii?..." mrembo akauliza kwa sauti ya kinanda.
"Haswaa...na laiti kama ningekuwa na uwezo ningekufanya mke wangu wa pili. Ni vile tu dini yangu hainiruhusu." Didas akatema cheche.
Bebe akaishia kuguna bila kusema neno. Ukimya wake ukamruhusu Didas aendelee kutumia vyema uwanja wa mazungumzo.

"Kuna swali nataka nikuulize Bebe...kama hautojali lakini." Akameza funda jepesi la mate kwa woga.
"Uliza tu"
"Uum...utaishi haya maisha mpaka lini Bebe?!" Akaweka pumziko na kumkazia macho usoni, macho yaliyohitaji majibu.
Bebe akatazama sakafu na kuufyata mdomo wake mdogo, akabaki kimya.

Didas akaendelea,
"Wewe ni msichana mrembo sana. Na najua fika kuwa hili unalijua, hata kioo ulichokuwa unakiangalia muda mfupi uliopita hakikukudanganya. Lakini ni kwanini unafanya hii biashara?!" Akamuongezea swali jingine bila kujibiwa lile la kwanza. Bado Bebe aliendelea kubaki kimya.

"Nisikilize Bebe...nataka niyabadilishe maisha yako. Huu mwili wako haukuumbwa ili uishi kwenye madanguro, nataka nikupe jumba kubwa la kifahari ukae, uishi kwa raha. Ngozi yako hii mama, haikufumwa ili ipigwe na vumbi mpenzi, wala miguu yako haistahili adhabu ya kutembea zaidi ya hatua kumi mama yangu. Nitakupa gari la kutembelea. Sipendi kukuona unaishi hivi mrembo..."
Wakiwa wametazamana uso kwa uso, Didas akiwa amekishika kidevu cha Bebe kilichochongoka kama embe. Akaendelea kumshawishi Bebe akubaliane na ombi lake la siku nyingi. Aachane na biashara hii ya kujiuza na aishi kwa kutulia akihudumiwa na yeye mwenyewe.

Bebe akayalegeza macho yake makubwa na kurembua kimahaba akauondoa taratibu mkono wa Didas kwenye kidevu chake. Akatumia mkono wake kukishika kidevu cha Didas kilichoota ndevu nyingi mithili ya 'steelwire' akakisogeza karibu na akaivamia midomo yake kwa papi za midomo yake.
Kilichofuata ni kitendo cha kubadilishana mate kwa sekunde kadhaa.

Kisha Bebe akaondoa midomo yake na kumtamkia kwa ukaribu,
"Daddy...Uko tayari kumuacha mke wako kwa ajili yangu?!... Uko tayari kuandikisha mali zako zote kwa jina langu?!...Uko tayari kunioa kwa ndoa ya kifahari...Ndoa itakayofanyika kwenye fukwe za Uarabuni?! Nijibu Daddy uko tayari?!..."
Maswali yake yakageuka shubiri kinywani mwa Didas. Yalikuwa machungu mno...hakuweza kuyajibu na akaishia kuguna.

"Hayo yote nimehaidiwa na wanaume tofauti sijui ni nani mkweli na nani mdanganyifu. Lakini wote wamenipatia sifa zilezile. Kama unazonipatia wewe." Akatamka akisimama taratibu.
"Kila mmoja amenihaidi pete ya ndoa. Lakini wote hawa wanajua fika kuwa mimi sifai kuwa mke wa mtu. Nimzalie watoto, niwe mama wa familia...mnalijua hilo kabisa! Kwanza ni mwanaume gani timamu atakubali kumuoa malaya?!" Akaliacha swali lake lielee hewani. Likamfanya Didas aone aibu na kutazama chini. Jibu alilolipata lilimfanya ajione sawasawa na kuwa uchi hadharani.

"Sitaki kufungwa kwenye gereza la pete. Sitaki nipitie mateso ya pingu za maisha.Furaha yangu ni pesa! Ndoa yangu ni pesa, ninachokitaka ni pesa tu, pesa mezani!" Akatamka huku akiunyoosha mkono wake kwa Didas ambaye alielewa alichokimaanisha.

Upesi huku akitetemeka akalipekua suruali lake na kuibuka na waleti. Akahesabu noti kumi na tano nyekundu na kumpatia Bebe.
Bebe akazihesabu na kushangaa,
"Eh? Kilo na nusu?!" Akauliza Bebe baada ya kuona kazidishiwa ujira.
"Eeh..wala usiwaze...chukua zote hizo!" Akajibu kwa kigugumizi Didas. Kijasho chembamba kikianza kumvuja makwapani.

Bila kujibu kitu Bebe akazisukuma kwenye pochi yake, akainama na kuachia busu la hewani kuelekea usoni kwa Didas, aliyelazimisha tabasamu.
"Bye bye Daddy...mpaka kesho tu utakuwa umenisahau tayari!"
Akageuka nyuzi mia tatu sitini kwa maringo, na kupiga hatua kuondoka pale chumbani.
Viatu vyake vya kuchuchumia vyenye visigino vilivyoinuka, vikaifanya marumaru ya sakafu ile iziimbe sifa zake.

Nyama zake za makalio zikipata mtikisiko,
Sakafu chini ya viatu vyake ikalia ko!ko!ko!,
Nyuma yake akaacha masikitiko,
Didas akabaki na masononeko,
Hawezi kulipikia peke yake hili jiko,
Kumbe wapo wengi wale wavuta kiko,
Wenye nasaba bora wanaomzidi mshiko,
Labda atumie hirizi na mazindiko,
Lakini ye mzee wa kanisa, ushirikina kwake mwiko!

"Aiseee!" Ikamtoka bwana Didas, hakuamini anachokiona. Kifurushi kilichosheheni kila aina ya baraka ya uumbaji nd'o kileee kilikuwa kinamuacha peke yake chumbani. Bebe alikuwa ni tafsiri halisi ya 'complete package' ya neno 'mwanamke mzuri'.
Alikuwa amemzoea Bebe. Lakini kila siku alimuona mpya.
Akaachwa chumbani mle akifanya tafakuri. Bebe alimuachia sentensi tata mno iliyomdai aiandikie insha yenye kichwa,
"NDOA YA MWANAUME TIMAMU NA CHANGUDOA!"
Hakika alipewa darasa huru. Darasa la bure. Akarejerea upya kulitafakari neno la Mungu.

*****

Nje ya hoteli hii ndogo...Bebe akasimama na kuvuta hewa safi kwa sekunde nne. Upepo mwanana ukamlaki na kuuburudisha mwili wake kwa kumpepea.
Naam, ilikuwa siku mpya!
Akatabasamu na kuifungua pochi yake, akahesabu upya noti zile huku akiuhisi ushindi moyoni mwake.
Upesi akazitenga noti tano na kuzifutika kwenye sidiria yake, huenda hizi zilikuwa za ziada.
Akaitazama simu yake aliyokuwa ameiamuru iwe bubu kwa kuiseti katika 'silent mode' usiku kucha. Akakuta jumbe nyingi na simu nyingi zilizomtafuta bila mafanikio.
Zilimtafuta nyingi lakini ni moja tu iliyokuwa na umuhimu kuliko zote.
MADAM SALLY!
Ndivyo alivyohiifadhi.
Akaipigia upesi akiwa tayari kupokea lawama, matusi, shutuma na malalamiko yote.
Na kweli! Hakukuwa na salamu.
Mvua ya matusi ya nguoni na lawama ilimnyeshea kutokea upande wa pili.

"Madam, madam...calm down madam! Nd'o nilikuwa nakuja jamani. Kanikamia huyo, hakutaka niondoke haraka!" Akajitetea.
"Kwa hiyo unataka kusema umempa na 'Cha asubuhi au?'...we ruka ruka tu huko. Ukitapeliwa shauri yako!"
Sauti ile kavu ya kike ikafoka.
"Nakuja jamani madam nipo njiani hapa!"
"We hata usipokuja...ili mradi hela yangu inifikie huku mie!"
Simu ikakatwa.
Bebe akatazama kulia na kushoto, akapunga mkono kumuita dereva bodaboda. Kisha akapanda huku akimpatia maelekezo ya wapi anapokwenda. Pikipiki ikachochewa moto, ikaviringisha matari yake na kuondoka.
Nyinyi hamkuwepo,
Lakini acheni mimi niwasimulie...Hakika Bebe hakufanania hata kidogo na kupanda bodaboda. Huenda bwana Didas Ambrozi alikuwa sahihi, akampa fursa lakini Bebe akaikataa na kuendelea kuyakumbatia maisha yaliyozidi kumparua kwa makucha makali.
Kwa nini akatae?
Hata mimi sijui,
Maana ukiona mtu anatema asali kwa nguvu kisha akakimbilia kulamba pilipili, tena kwa hamu kubwa, lipo jambo! Hakika lipo jambo. Tena sio jambo dogo!

Itaendelea...

 

[Godlove Kabati]

KIBIRITINGOMA
YA: Godlove Kabati
Chini ya udhamini wa: MAJIVU YA FASIHI


SEHEMU YA PILI


Chimbuko la jamii yoyote ile huanzia kwenye ngazi ya familia.
Familia ni kitovu cha taifa, na ni chemichemi ya tamaduni zote zinazolijenga taifa.
Nguzo za familia zinapoyumba, ni rahisi sana maadili ya jamii kuporomoka na kuzua janga kwa taifa.
Japokuwa malezi ya watoto katika familia ni jukumu mama la wazazi yaani baba na mama,
Hilo halizuii mchango wa jamii kwenye malezi ya watoto wetu.
Malezi ni ya kwetu sote...


Anaitwa Frolida Pasko,
Walioona kuwa ndimi zao zitapata taabu sana kulitaja jina lote hili, wakamuita Frola ili kuokoa muda.
Hakutegemea kupachikwa jina jingine katika maisha yake. Mpaka pale alipoianza shughuli hii ya ukahaba na kutumika kingono ili apate pesa.
Alivutia sana kwa urembo wa sura yake, wale waliokuwa wajuvi wa misemo na lugha, wakadai kuwa ati ana sura ya upole na adabu kama ya mtoto mdogo. Wanaoijua ile lugha iliyokuja kwa ndege wakasema ana 'baby face', wakamuita 'baby'. Waswahili wakafunga kazi kwa kumuita 'Bebe'.
Naam,
Muite kwa majina ya Frolida na Frola wakati wa mchana. Lakini anapokuwa kazini, anavaa wajihi mpya kabisa...hapa muite Bebe!
Jina la Bebe likajizolea umaarufu mkubwa, yale mengine yakazikwa kwenye kaburi la sahau.

Malezi?!
Alilelewa ndio, tena na wazazi wawili, baba na mama. Yeye akiwa mtoto wa pekee.
Jinamizi la umasikini liliiwinda familia yao usiku na mchana, likapanua mdomo wake mkubwa na kunyoosha makucha ili kuwaangamiza.

Baba yake mzazi, mzee Pasko; hakuwa na kazi maalumu ya kueleweka. Kila siku aliamka asubuhi kisha huyoo anaondoka, anakoelekea hapajulikani. Na aliporudi usiku alikuwa akiyumba na kutoa maneno machafu na yenye aibu.
Alikuwa mlevi wa kupindukia, aliyezifanya baa,vilabu na vijiwe vya pombe za kienyeji kuwa kama nyumba za ibada. Huko aliudhuria asubuhi, mchana na jioni. Alipokosa bia, alizikumbatia pombe za kienyeji.
Pombe zikang'ang'ania kila sarafu yake, zikakamata kila noti yake. Akayasahau majukumu yake kwenye familia kama baba.
Hakuwa na mahusiano na pombe tangu zamani lakini marafiki zake aliofanya nao kazi kwenye kampuni ya ulinzi, ndio hawa waliomsogeza kwenye meza za vilabu na baa mbalimbali. Wakazitambulisha chupa za pombe na bia kwake, wakazinadi kuwa zina uwezo wa kuufukuza msongo wa mawazo na kuleta utulivu wa nafsi.
Ni nani asiyeupenda utulivu wa nafsi?
Umaskini na taabu viliyafinyanga maisha ya Pasko na familia yake, vikamsuta na kumuonyesha kuwa yeye sio baba bora.
Akaikaribisha pombe kwa mikono miwili, akaionja mara ya kwanza na kufinya uso wake kwa ukakasi na uchungu aliouonja, akaambiwa ni kawaida hiyo kwa mtu anayeanza pombe kwa mara ya kwanza.

Akajikaza,
Taratibu...katika namna ya ajabu, uchungu ukageuka kuwa utamu, utamu ukasafiri kooni ukasafisha umio na kutulia tumboni mwake. Baada ya dakika chache tu akahisi faraja ambayo hakuwahi kuihisi popote pale maishani mwake.
Ni hapo, aliposaini mkataba wa maisha na pombe. Akaivisha pete na pombe ikawa kama mke wake wa pili.

Kuvaa miwani ikawa tabia yake ya moja kwa moja...na alipozoea kwenda kazini akiwa amevaa miwani, waajiri wake wakamuachisha kazi mara moja.
Hapo akazidisha mapenzi yake kwa pombe... kwa nguvu zake zote, akili zake zote na moyo wake wote.
Akawa mzigo nyumbani. Wakati anaotegemewa alete chochote kitu, yeye akawa anategemea akute chochote kitu.
Kijiti cha jukumu la kulea familia kikahamia kwa mama moja kwa moja. Kazi zake ndogondogo za kuuza nyanya,vitunguu na mbogamboga zikawa kama jicho lake pekee alilolitegemea kuilisha familia yake.
Aliitwa Bi Devotha;
Mwanamke ambaye tumbo lake lilibarikiwa kumleta duniani mtoto mmoja pekee.
Frolida!

Bahati mbaya kwake, hakufanikiwa kupata uzao mwingine, ama mtoto wa kiume kama alivyodai mzee Pasko. Hili likawa doa katika ndoa yake, lililosababisha vurugu na kutoelewana kila kukicha, hasahasa pale Bwana Pasko aliporudi nyumbani akiwa kapandwa na pepo chafu la pombe za kienyeji.
Aligeuka mbogo, akavurumisha matusi na lawama kila kukicha. Leo hii atadai watoto halafu kesho atadai mtoto wa kiume.

Chumba chao kidogo kiligeuka ulingo wa ndondi kila usiku wa manane. Majirani waliuingilia ugomvi huu mpaka pale walipochoka na kuanza kuuchukulia kama ni sehemu ya maisha ya kila siku ya familia hii, wakaanza kuyazoea.
Mazoea...mazoea yakajenga tabia, hakuna hata mmoja aliyechukua hatua.
Mpaka ilipohitimu ile siku ambayo bwana Pasko alikuja akiwa na hasira aliyoiokota kilabuni baada chupa yake kupigwa teke na walevi waliokuwa wakigombana.
Siku hii alirejea akiwa amevimba kwa hasira. Anatamani kurarua kiumbe hai chochote atakachokikutana mbele yake. Hakugonga mlango, akaupiga teke kwa nguvu, ukaitika kwa kuteguka kwenye bawaba na kuvunjika kisha akaingia ndani kwa jazba.
Mke wake aliposimama mbele kumuuliza sababu ya kuuonea mlango ule legevu, akampiga bila huruma na kumjeruhi kwa kipande cha panga butu lenye kutu tumboni.
Akaogopa sana baada ya kushuhudia namna damu inavyofumuka kwa fujo kutoka tumboni kwa mkewe. Pombe yote iliyomhadaa kuwa itamfariji, ikamsaliti na kuyeyuka kichwani kwake.Akaogopa!
Akaamua kutafuta uelekeo na kukimbia kadri miguu yake ilivyoweza kumbeba.

Ukelele usio wa kawaida ukawafanya majirani watoke nje kutazama ni nini kimejiri. Mazoea hayakuchukua nafasi wakati huu.
Bi'Devotha alikuwa hoi...Frola akiipunga mikono yake hewani, macho yakimtazama mama yake pale chini, machozi mengi usoni.
Ilitisha, iliogopesha, ilisikitisha na kuhuzunisha sana kutazama.

Upesi akawahishwa hospitalini kupatiwa matibabu. Na msako mkali dhidi ya bwana Pasko ukaanza. Alitafutwa kwa muda mrefu sana bila mafanikio. Alipotea na kutokomea kusikojulikana.
Huku nyuma, mkewe akabaki hospitalini akipatiwa matibabu. Matibabu ambayo gharama yake isingeweza kukidhiwa na binti peke yake abadani.
Huu mpira ukapigwa pasi kwa jamii yake ya karibu.
Ndugu, jamaa na marafiki wakajichanga mpaka pale walipoweza...lakini wangeweza mpaka wapi?!
Familia kama hii, iliyoishi kwenye mitaa korofi iliyomezwa na umaskini, njaa, maladhi, uhuni, ubakaji, umbea, wizi na vurugu za kila aina. Wangepata wapi hao ndugu na jamaa wa kutosha kulipia matibabu ya bi.Devotha?!

Tiba yake ikafanyika kwa kipimo kilichostahili malipo yaliyotolewa...mpaka pale kitanda cha hospitali kilipomchoka.
Bi'Devotha akahamishiwa nyumbani kwake, kidonda chake kikiwa bado hakijapona vyema.
Hakukuwa na namna, ilitakiwa ahudumiwe palepale juu ya godoro lake lililozizoea chaga mbovu ambazo hazikupenda bugudha ya aina yoyote ile ama sivyo, zinavunjika katika wakati usio na jina.
Baada ya muda fulani, magonjwa ya ajabu ajabu yakaanza kumshambulia. Maumivu ya kidonda yakaikaribisha homa kali na mateso kwenye mwili wa mama yule.

Ule msemo wa asiyefunzwa na mamaye hufunzwa na ulimwengu, ukamvamia Frola katika namna ya tofauti. Sio kwamba hakuwahi kufunzwa na mamaye, la hasha!
Alifunzwa na kufunzika...lakini sasa alihitajika apate darasa la ulimwengu. Maana kwa wakati huu majukumu yote ya familia yalimgeuzia macho yeye.
Darasa la ulimwengu likamdai ada kubwa, akiwa kidato cha tatu tu. Akaanza kuugawanya muda wake wa masomo na kumtazama mgonjwa. Akaamua aache masomo ili achague moja, ndipo akaanza biashara ndogondogo ili apate fedha za kumhudumia mama yake na kupata chakula.
Naam,
Ulimwengu haukuwa na huruma kwa huyu binti wa miaka kumi na nane, Frolida Pasko akasulubiwa na maisha. Akaulaani sana ulimwengu, akamlaumu sana Mungu aliyeruhusu yeye azaliwe kwenye familia yenye baba aina ya mzee Pasko.
Jahazi la maisha yao likayumba...wakala kwa taabu, wakavaa kwa taabu na wakalala kwa taabu...sahau kuhusu kusoma, sahau kuhusu majaribu aliyokutana nayo Frola mitaani kutoka kwa wanaume na vijana wenye uchu wa ngono.

Usiku mmoja ulioambatana na mvua za rasharasha sambamba na radi zenye ngurumo za kutisha. Familia hii duni, iliyosahaulika kwenye mgao wa bahati na furaha, ilikuwa imejihifadhi chini ya paa lilelile lenye mabati yenye kutu yanayogongana daima, kukiwa na hali ya upepo wenye fujo.

Kwa mwangaza hafifu wa kibatari kilichokuwa kinakata viuno baada ya kufyonza mafuta bila haya, Frola alikuwa amempakata mama yake.
Ule ukimya wa 'shetani amepita' ndio ulitawala. Kisha ghafla,
"Frolida binti yangu..."
Sauti ya kufifia, iliyolazimishwa kutoka kinywani mwa Bi Devotha ilitamka kwa upole.
"Abee mama."
Akajibu, akiwa ameyaruhusu mapaja yake yatumike kama mto wa kulalia, amekipakata kichwa cha mama yake...mikono yake ikijaribu kumliwaza mama huyu ambaye mwili wake umekataa katakata kuuacha urembo wake wa ujanani, japokuwa ulionekana kuwa umepitia suluba na uchovu wa kutosha kuukaribia uzee.
"Nisameheni sana mwanangu,
Najua kuwa nakuchosha, nimekuwa mzigo kwako binti yangu. Haikutakiwa uishi haya maisha hata kidogo!"
Akakatishwa mara moja,
"Mama...mama usiseme hivyo mama. Wewe sio mzigo kwangu bhana...Na hata siku moja hautakuja kuwa mzigo kwangu mama!" Kwa sauti ya kudeka, Frola akamfariji huku mkono wake ukitambaa taratibu kichwani mwa mamaye. Bado huyu alikuwa ni mama yake, kwa nini asideke? Mtoto hakui mbele ya mama.

"Haya sio maisha niliyotaka uishi mwanangu, sio kabisa! Lakini baba yako...kho!kho!kho!"
Kikohozi kikamvamia, upesi kikombe kilichojaa maji kikasogezwa, Frola akamnywesha mama yake kwa taabu.

"Niliwahi kuwa binti kama wewe enzi zangu. Niliwahi kuwa mrembo kama ulivyo wewe.
Pale kijijini kwetu, niliweza kuwazuzua vijana wengi sana, ambao walinitamani sana kimapenzi. Wazazi wangu wakanikanya na kunizuia kujihusisha na mahusiano ya kimapenzi katika umri ule.
Nilianza kwa kuwaelewa mpaka nilipokutana na Pasko. Huyu akanifanya nisahau makanyo yote ya wazazi wangu, nikampa moyo wangu wote, nikampenda kwa kila namna inayostahili kuitwa upendo wa kweli. Sikujua...kumbe nilimkumbatia shetani mwenye mapembe saba kichwani na mkia mrefu.

"Akanilubuni na kwa mara ya kwanza nikakutana na mwanaume kimwili. Ilikuwa mara ya kwanza lakini haikuwa ya mwisho, tukazini tena na tena. Nikapata mimba na akanishawishi nizitoe mara kwa mara ili tusigundulike kwa urahisi.
Zilikuwa mbio za sakafuni tu...na tulipoishia ukingoni tulikuwa tumechelewa sana. Niligundulika baada ya kukamatwa nikiwa kwenye jaribio la kutoa mimba.
Hali ikawa zaidi ya hatari, wazazi wangu wakageuka mbogo.
(Anakohoa)

"Baba alinipiga sana akitishia kuniua, nikaogopa na kukimbia. Huko nyuma, akaagiza watu wanitafute. Woga ukanizidia, ukali wa baba niliuelewa kwa maneno na vitendo. Ili kuitafuta salama yangu, nikajitahidi kumuepuka kadri niwezavyo.
Giza la usiku nalo likaanza kuiinamia ardhi katika namna ya kutisha.
Sikuwa na kimbilio, zaidi ya kuelekea kwa
Pasko, ambaye naye alikuwa katika harakati za kutoroka pale kijijini, hofu ikionekana waziwazi usoni mwake. Akanishurutisha kuwa tutorokee jijini Dar, akidai kuwa huko anao ndugu na jamaa watakaoweza kutupa hifadhi kwa siku chache akiwa anaweka mambo yake sawa.
Ni hapo nilipoanza kuuona waziwazi uongo wake aliokuwa ameuvisha nguo hapo kabla.
Kuwa ana biashara zake nyingi huko mjini na nyumba ya kuishi.

"Bila kufikiria mara mbili, nikakubali huyo shetani anidanganye kwa mara ya pili. Usiku wa siku hiyo hiyo Pasko akanitorosha. Chozi la kwaheri likanitoka nilipokuwa nakiaga kijiji changu cha nyumbani.
Tulifika Dar-es-Salaam tukiwa hoi baada ya ugumu wa safari,iliyokuwa ya kubangaiza.
Ajabu na kweli!
Ile Dar niliyokuwa nasimuliwa na baba yako pale kisimani, haikuwa kama nilivyoikuta.
Mara moja, jiji likanipokea na ugumu wa maisha, ulioanza ukaanza kunisigina bila huruma.
Mpaka wewe unazaliwa mwanangu...kho! Kho! Kho!"

Kikohozi kikamzidia...
Mara hii alikohoa sana kama aliyekabwa na kitu kigumu kooni. Frola akaruka na kusogeza kikombe cha maji, akamnywesha kwa taabu kabla hajatulia tena na kuhema juujuu.
"Frola..." akamuita, bado koo lake liko vitani na pumzi zinazopishana kwa nguvu.
"Abee mama."
"Nife leo, nife kesho mwanangu.
Kuwa makini sana na wanaume! Hata siku moja, usimwamini mwanaume.
Fanya yote lakini tambua kuwa wanaume ni watu wabaya." Na hapo kikohozi kikamvamia upya kwa fujo.

Akashindwa kuendelea na Frola akampumzisha juu ya kitanda. Anatetemeka kwa baridi japo tembe za jasho zilionekana kuulowanisha mwili wake.
Frola akayaandaa malazi yake pale juu ya sakafu ya baridi, na kujitanda kwa shuka jepesi kuusubiri usingizi ambao ungejileta wenyewe wakati ambao ungefaa.
Hali ya hewa huko nje ilitisha sana, ngurumo za radi na miale ya kushtukiza vilizidi kuikoleza historia ya usiku huu na kuufanya uwe wa kukumbukwa zaidi kwenye maisha ya Frola.

Na kweli!
Ulikuwa ni usiku wa kihistoria haswaa..
Alipoamka asubuhi hakuamini kile ambacho macho yake yalikishuhudia.
Bi. Devotha, mama yake kipenzi...alikuwa marehemu.

Angejaza mapipa kwa machozi, angetamka kila aina ya laana, angeulalamikia ulimwengu...lakini asingeweza kuurejesha uhai wa mama yake.
Hakukosea yule aliyetamka kuwa,
"Gharama ya maisha itamhusu marehemu mwenyewe, lakini gharama za mazishi ni ya wale waliobaki duniani...hii haitamuhusu marehemu moja kwa moja".
Na kweli, mwili wa Bi.Devotha ulirejeshwa upesi mavumbini japo katika namna ya tofauti. Jamii ikachukua jukumu la kuusindikiza mwili wa marehemu kaburini. Ulikuwa msiba wa kushangaza hakika, huu ulipingana na ile methali ya wahenga unaodai kwa kila msiba una mwenziwe.

Kama mtu angetaka kuifahamu tofauti kati ya kuzikwa na kufukiwa ardhini, basi angejionea mwenyewe katika msiba huu mubashara.
Hakukuwa na ndugu wa karibu zaidi ya Frola peke yake. Akaachwa katika shimo la majonzi akiwa mkiwa, yatima ambaye chuki za maisha magumu ya dunia na laana zake vyote vilikuwa vimejiandaa kumshambulia kwa uchu.

Dunia ikamuinamia, akapoteza tumaini la maisha. Kama lilivyo jani la mti lidondokavyo kutoka kwenye tawi lake, mzee Pasko alipotea moja kwa moja. Achana na kutojulikana alikimbilia wapi, jamii ilimsahau moja kwa moja.
Huruma pekee aliyoonewa Frola, ni kusikitikiwa tu, maana hali aliyoachwa nayo haikupe
Frola akashika hatamu za uongozi wa familia hii mpya inayohusisha mtu mmoja tu. Yeye mwenyewe akiwa baba na yeye mwenyewe akiwa kama mama pia.
Pesa kiduchu za rambirambi zilizokusanywa zisingemtosha kulisukuma gurudumu la maisha yake. Mtoto huyu wa kike akaamua kujifunga kibwebwe na kutafuta shughuli yoyote ile...

Mradi mkono uende kinywani,
Hana wa kumlisha abadani,
Alishaitupa kalamu zamani,
Usishangae kutomuona shuleni,
Binti kibwebwe kiunoni,
Kafunga aingie vitani,
Kupigana na adui gani,
Nani mwingine zaidi ya umaskini?

Akaanza kwa kufanya kazi kwenye migahawa kadhaa, lakini huko hakudumu sana kabla hajasumbuliwa na wateja wa kiume wa migahawa hio.
Hawa walimhusudu katika namna ya kugombea na kushabikia kuhudumiwa na yeye peke yake. Wakamsifia kwa urembo wake na haiba yake nzuri, wengine wakaanza kumtongoza.
Ni usiku mmoja tu, ulitosha kabisa kumkaribisha kwenye dunia mpya.
Siku hii alichelewa kurudi nyumbani baada ya kuhudumia wateja kwenye mgahawa ule mdogo aliokuwa ameajiriwa.
Hakujua kama alikosea kona au alipita kwenye kona hio katika muda usio sahihi. Yeye alishtukia ameparamiwa na kuzibwa kinywa kwa nguvu. Kisha akaburutwa mpaka kwenye jumba ambalo halijamalizika ujenzi wake.
Bila salamu wala kujitambulisha, vijana watatu mashababi walioonekana kuwa walimpania kwa muda mrefu, wakamvamia na kumbaka kwa zamu.
Frola alilia sana akihitaji msaada na hakukuwa na msaada wowote ule kwa ajili yake usiku huu eneo lile.
Baada ya kukidhi haja zao za kimwili, vijana wale waliokosa utu wakayeyuka gizani. Wakamuacha pale Frola akiwa hajielewi. Hawakutaka kujua amezirai? Amekufa? Hawakujali, ili mradi wamemaliza haja zao basi.

Fahamu zilimrejea Frola akiwa kwenye chumba cha matibabu hospitalini. Hakujua amefika pale vipi, hakujua amelala pale kwa siku ngapi. Alichokiona ni dripu iliyofungwa kwenye mkono wake wa kuume na akagundua kuwa kuna tabasamu lipo pale kando yake likimtazama.
Mwanamke mmoja mnene wa kadri, aliyevaa mavazi ya gharama kiasi na kuukamilisha urembo wake kwa vipodozi vilivyoigeuza rangi ya uso wake kutoka kwenye asili yake mpaka kuwa mwekundu.
"Pole kipenzi!..."
Alitamka akiwa bado anatabasamu. Tabasamu kama hili alikuwa amewahi kuliona mahala...aliliona wapi?
Mama mzazi!
Lilikuwa tabasamu kama la marehemu mama yake. Tabasamu la upendo.
Halafu ghafla akaukumbuka unyama aliotendewa na wale vijana madhalimu.
Chozi likamdondoka Frola.

"Pole mamy...daktari atakuja hivi punde!"
Akatamka huku akifanya jitihada za kumfunika Frola kwa shuka lile jeupe.
"Niite madam Salome...ama waweza kuniita Madam Sally."
Akajitambulisha kwa mara ya kwanza maishani mwa Frola.

*****

Mara ya kwanza na mara moja tu!
Na ni huyu akawa mama mpya kwa Frola, mama aliyesababisha apate jina jipya kabisa la Bebe.
Ni huyuhuyu,
Madam Sally amempigia simu na kumuuliza ni wapi alipo mpaka muda huu.
Na kwake ndiko anakoelekea...


Itaendelea....

 

[Matunzo 02]

Siti ya mbele kabisa nangoja mwendelezo.

 

[Godlove Kabati]

KIBIRITINGOMA
yake: Godlove Kabati
Kwa udhamini wa MAJIVU YA FASIHI

SEHEMU YA TATU


Aliutazama mlango wa geti lile kwa hofu, akashusha macho yake taratibu mpaka kilipo kitasa. Akasita kukipindua.
Akashusha pumzi ndefu ili kujirejeshea ari ya kujiamini.
Kisha,
"Ngo! Ngo! Ngo!..."
Akagonga mlango ule. Hakuna kauli yoyote ile ya kumkaribisha iliosikika.
Akagonga tena bila kujibiwa. Akajaribu kuusukuma mlango ule na kweli ulikuwa wazi.
Akazama ndani.
Mlinzi wa mahala pale aliyetegemea awe wa kwanza kumpokea alikuwa mbali sana kimwili.
Amechutama akiegama kwenye ukuta, uso wake ameuficha kwa kofia pana, kama aliyezirai...anakoroma. Alikuwa amechotwa na usingizi mzito. Silaha yake duni ya siku zote alikuwa ameitelekeza mbali naye, rungu dogo.
"Lo! Maskini mzee wa watu!".
Bebe akatumia sekunde kadhaa kumtazama kwa masikitiko kabla hajamsogelea na kumgusa kidogo katika namna ya kumshtua.
"Mzee Baraka!...we mzee Baraka!"
Mlinzi yule mzee akakurupuka, akachupa na kuliokota rungu lake.
Upesi akawahi pale getini, almanusura amchote Bebe na kumbwaga chini. Bebe akapepesuka hewani lakini mara akajiwahi na kupata mhimili .
"Khaa! Wewe..."
"Naam...samahani sana! Samahani..po-pole!" Mlinzi akiwa amebaa akawahi kuomba radhi. Pumzi zinapishana kwa kasi puani mwake, hofu, woga na wasiwasi vimemvamia kwa pamoja.
"Ina maana umechoka namna hiyo kweli mzee wangu?" Bebe anajikun'guta vumbi na kujiweka sawa.
Mzee huyu ambaye alionekana kuwa na umri wa kutosha kabisa kuwa na mabinti wenye umri sawa na Bebe kama wawili au zaidi, akajipangusa kijasho chembamba kilichoanza kulowanisha paji lake la uso.
"Ha-hapana mwanangu, ni uchovu tu, nimekesha usiku kucha. Na-na huu nd'o muda wangu wa kupumzika." Akajitetea.
"Mmh...babu nd'o uache geti wazi?"
Mzee akawahi kukagua mlango mdogo wa geti lile kuhakikisha alichoambiwa, kisha akajikuna kichwa chake bila kuwashwa. Alipogeuka nyuma ili ajitetee tena akajikuta yuko peke yake, tayari Bebe alikuwa anazihesabu hatua zake kuelekea ndani ya jengo hili kubwa la kifahari lililokuwa kimya likiwatazama.
Akaingia ndani yake, kama aliyemezwa hivi. Huku nyuma akamuacha mzee aliyekuwa na mawazo mengi sana juu ya mustakabali wa kibarua chake.


********

"Yaani ndani ya masaa yote hayo, umepata laki moja tu?!" Sauti ya kike iliyoshiba ubabe, ilikoroma.
"Mteja mmoja tu Madam!" Akajibiwa kwa sauti nyingine ya kike, hii ilikuwa nyepesi inayotangaza huruma.
"Hapana Bebe! Kuna kitu hakiko sawa hapa. Wewe sio wa kuniletea kiasi kidogo namna hii! Uliv'onambia utakesha huko mpaka asubuhi nikadhani utapata hata laki na nusu hivi au mbili kabisa! Sasa hii nini hii? Nakupasulia ngapi hapa?" Akalalamika.
Hakujibiwa moja kwa moja, zaidi Bebe aliviringisha macho yake makubwa na kutazama pembeni katika namna ya kususa.

"Wewe ni moja kati ya wasichana ninaowaamini sana, na thamani yako ni ya juu. Wewe sio wa laki moja kabisa! Au umeanza kuniibia? Eh? Niambie Bebe...umeanza kunizunguka?" Safari hii akasimama na kumtazama Bebe usoni, mikono yake kiunoni, amemuinamia kisharishari.
Bebe bado ametazama pembeni, anaonesha kukereka.

Madam akarejea tena juu ya sofa na kuketi. Akaikusanya mikono yake juu ya kifua chake kipana na kuikunja katika namna ya kuibebanisha.
"Ulikuwa wapi Bebe?", akamuuliza kwa sauti ya polepole akiwa amemtazama kwa macho ya kumpima.
Bebe akaugeuza uso wake taratibu na kumtazama Madam usoni kimya bila kunena lolote.
"Nilitaka kukupatia kazi, ukanambia una mteja wako binafsi...na ukaniambia kuwa ana fulusi. Kwahio hapa nikupe fote utaridhika kweli?"
"Madam Sally, we nipe chochote kile mi nitaridhika tu! Alikuwa vibaya kiuchumi...nimegombana naye sana lakini kwa vile nafahamiana naye nd'o ikawa kama hivyo." Bebe akajibu kwa ufasaha na kweli, akaeleweka.
"Sawa!" Ikamtoka Madam Sally.
Akatenga noti sita nyekundu na kumpatia noti nne Bebe.
"Kha! Madam vipi tena, mgao gani huu?" Bebe akapigwa na butwaa.
"Nafsi yangu inanisuta kuwa umepewa mia hamsini. Na hizo hamsini umezificha Bebe, sitaki nikukague. Unafahamu mwenyewe!"
Madam Sally akajibu kwa kujiamini.

Kanuni yao ya mgawo wa asilimia ilikuwa ni ileile ya siku zote, yeye anachukua arobaini na sitini zinachukuliwa na binti husika. Na hata sasa, machale yake yalimtaarifu kuwa Bebe ameficha elfu hamsini na alichokifanya yeye ni kufuata kanuni.
"Nimezificha wapi? Wapi Madam? Niambie..." Bebe akalalamikia mgawanyo ule.
"Unataka nikuonyeshe zilipo eh?"
Madam akasimama na kukivamia kifua cha Bebe kwa nguvu.
Bebe akiwa hajategemea tukio hilo, akajitahidi kumzuia bila mafanikio.
Noti tano zikaibuliwa kutoka kwenye sidiria ya Bebe, iliyopekeuliwa kwa mikono shupavu ya Madam Sally.

"Haya hiki nini?"
"Lakini-lakini...hio ni bonasi yangu Madam. Kanizidishia yeye mwenyewe!" Akiwa na sauti ya kilio, Bebe akajiweka kwenye nafasi iliyodai haki yake iliyopokonywa.
Madam Sally akazitupa noti zile juu ya meza ndogo ya kioo.
Zilikuwa zimekunjwakunjwa na kupoteza ule unyoofu wake.
"Nimewalea mabinti wengi sana Bebe. Nimeshuhudia tabia nyingi sana, wapo niliowaamini kama wewe na wapo waliogeuka wasaliti, wakawa nyoka wenye vichwa saba. Hakuna ujanja wowote ambao unaweza kufanya ukawa mgeni kwangu.
Nina uzoefu wa kutosha Bebe...naweza kukutazama tu na nikagundua umelala na wanaume wangapi kwenye usiku tuliokubaliana unaenda kwa mwanaume mmoja."
Akaweka kituo akiusanifu uso wa Bebe, ambaye alikuwa ameruhusu machozi mepesi yaulowanishe. Jambo lililouzidisha urembo wake.
Madam Sally hakuyajali machozi yake, akaokota pakti la sigara na kuchagua mojawapo.
"Ni katika michezo na ujinga wa namna hii, ambao nyie mnaona kama unjanja. Mabinti wanaoanza kuniibia huwa nawapoteza!
Sitaki kuwaza kuwa hata wewe utaingia kwenye hili kundi Bebe...sitaki!"
Tayari sigara iko kinywani mwake. Bebe akaokota kiberiti na kukiwasha, Madam akasogeza kinywa chake na mwale wa moto ule wa kiberiti ukaichoma sigara ambayo ilijibu kwa kutoa moshi.
"Asante!" Ikamtoka Madam Sally.
Akazikusanya fedha zote na kumpatia Bebe.
"Sidhani kama nimekuonea...lakini kwa vile unataka fedha, haya mrembo hizo hapo!"

Bebe akapigwa na butwaa. Bado alikuwa haelewi ni kwa namna gani Madam Sally amekubali kumpatia kiasi chote kile hivihivi.
"Madam lakini-" akakatishwa.
"Ulisema ni mteja wako...sijakutafutia mimi. Basi kula kilicho chako binti. Sawa eh?!" Madam akamjibu huku akizidi kupambana na sigara ile ambayo ni kama alikuwa anaivuta kwa hamu kubwa.
Bebe akazikusanya fedha zile kutoka pale mezani huku mikono ikimtetemeka, kisha akamtazama Madam usoni.
Alikuwa mwanamke wa shoka haswaa, mwili wake wenye umbo kubwa ambalo liko katikati ya unene na wembamba.
Mwonekano wake ambao daima ulimfanya aonekane kama aliyekula chumvi nyingi na hapohapo ukamfanya aonekane kama anayeukimbia uzee kwa nguvu zake zote.
Mikono yake shupavu iliyozoea kupambana na suluba za maisha ilichora mishipa ya damu ilioelekea kufanana na mizizi juu ya ngozi yake.
Ni huyuhuyu Madam Sally, aliyekuwa mama mlezi wa Bebe kwa kipindi chote hiki cha miaka miwili na nusu tangu wamekutana.
Mama mlezi?
Mlezi gani huyu anayeunga mkono ukahaba?
Yumkini ana malezi ya tofauti.

"Asante Madam!" Ikamtoka Bebe na akasimama na kupiga hatua kingonge kuelekea kilipo chumba chake.
"Halafu Bebe!" Akaitwa.
"Leo usiku mimi na wewe tutakuwa wote pale Club! Mwambie hivyohivyo Sharon na Kulusumu!" Madam akatamka.
"Sawa Madam!"

******

Muite Madam Sally,
Kama ukitaka kulitaja jina lake kwa ufasaha basi muite Salome.
We muite hivyo tu ataitika, hakuwa na majina mengine ya ziada. Labda alikuwa nayo lakini hakutaka yajulikane.
Waswahili wa mitaa ya Sinza walimjua kwa jina hilo tu.
Ni Club yake maarufu iliopatikana palepale Sinza Mori... iliyojulikana kwa jina la LE CLUB GRANDE, iliyompatia jina la heshima. Watu wakaanza kumuita Madam.

Umiliki wake wa club hiyo kubwa ya kisasa, ulikuwa ni fumbo kwa wakazi na wale waliopenda kujiburudisha mahali hapo.
Hakuna aliyehoji na hata hivyo maneno yalikuwa mengi sana chini ya meza.
Yeye hakujali!
Alikuwa na mitego yake ya siri katika eneo hilohilo la LE CLUB GRANDE.
Biashara ya kuuza mabinti warembo na makahaba kwa matajiri wenye fedha!

Aliwakusanya kwa wingi popote kule walipokuwa kwenye mitaa maarufu ya jiji la Dar-es-Salaam. Aliwachagua kulingana na vigezo vyake yeye mwenyewe.
Aliwaahidi matunzo na haki zote za binadamu; Mavazi, chakula na malazi.
Akawaahidi kuwatafutia soko la wanaume wenye fedha waliohitaji huduma ya ngono.
Kisirisiri aliwasiliana nao kwa njia za siri akafanikisha biashara hii haramu.
Akaliendesha danguro hili katika namna ya kipekee.
Jina lake likapata sifa miongoni mwa wale waliofahamu ni kitu gani kinaendelea pale LE CLUB GRANDE.
Wakamtunuku cheo cha Madam!
Na yeye akawapa kilicho bora.

Ni usiku fulani ambao alikuwa kazini kwenye mawindo ya mabinti wake, akiwa na mabinti kadhaa wajuvi wa mitaa ya Dar.
Na siku hii saa saba usiku, walikuwa Manzese katika mitaa ya mwanzoni tu.
Mabinti wakaomba udhuru wakatafute mahala pa kujisitiri kwa haja ndogo. Madam akawasihi wavumilie maana hatari ya kuvamiwa na vibaka ilikuwa njenje, hakufanikiwa kuwashawishi. Wakashuka kutoka kwenye gari lake, wakihaidi hawakawii kurudi na hata hivyo hawaendi mbali.
Baada ya dakika moja, akasikia yowe!

Mmoja kati ya binti wale alikuwa akipeperusha mikono yake hewani. Ulikutwa mwili wa binti aliyekuwa hoi ndani ya jumba bovu. Hali yake ilitisha! Mavazi yake yamechanika na yu nusu uchi akiwa hajitambui.
Akafanya wema wa kumuwahisha kwenye kituo cha afya.

Baada ya siku kadhaa, hali ya binti huyu ilikuwa njema na baada ya maongezi ya hapa na pale, wakafahamiana.
Madam Sally akabeba jukumu la kumsaidia binti huyu kama mwanae.
Frola akahamia nyumbani kwa Madam, akapatiwa kazi ya uhudumu pale pale LE CLUB GRANDE .

Kama mtego tu,
Baada ya muda kidogo Frola akaleta malalamiko kwa Madam kuwa anasumbuliwa na wateja wakimtaka kimapenzi.
Madam akatabasamu na kumueleza kuwa avumilie tu na baada ya muda mambo yote yatakaa sawa.
Uvumilivu huu ambao ulitegemea binti Frola ale mbivu, ukamletea mbichi na kumlazimisha azile kwa nguvu.
Bila kuelewa akakutana na mwanaume mmoja aliyekuwa anaongea maneno matamu kama asali.
Huyu akamshawishi akashawishika!
Kamlainisha akalainika!
Mwisho wa siku tunda lake likalika!
Akalipwa pesa, pochi yake ikafurika!

KARIBU KWENYE MCHEZO!
Frola akakaribishwa rasmi kwenye maisha ya ukahaba.
Madam akamuweka mbele ya kioo,
Kisha akaliinamia sikio lake la kulia na kumtamkia taratibu,
"Unamuona huyo hapo mbele?
Huyo ni mrembo ambaye amezaliwa kula mema ya hii nchi.
Huyo amezaliwa kula matunda ya uhuru wa hii nchi.
Amepewa uzuri kama silaha yake ili aishi kwa usalama kwenye hii dunia. Anastahili kila kilicho kizuri hapa duniani.
Na ni kitu gani kizuri hapa duniani kuliko hela?!"
Yalikuwa maneno ya kishujaa kutoka kinywani
mwa Madam Sally.

"Wewe ni mrembo sana Frola.
Urembo haudumu milele mwanangu. Ipo siku utazeeka na urembo wako utafifia kama jani kavu. Na ukizeeka kabla haujaufaidi urembo wako utakuwa umefanya dhambi kubwa chini ya jua.
Hiyo dhambi yako haitasameheka kabisa!
Urembo wako ni zawadi!
Itumie ukingali nao bado!
Wewe ni mali, wewe ni hela!" Akamaliza na kuondoka akimuacha palepale mbele ya kioo.

Frola akamtazama yule Frola mwingine ambaye alikuwa pale kwenye kioo. Ni kama naye alikuwa anamweleza,
"Wakati ni sasa. Urembo haudumu milele shauri yako!"
Katika namna ya ajabu, Frola akabobea kwenye ukahaba wa viwango vya juu.

Kazi ilikuwa rahisi sana,
Madam Sally anawasiliana na mabwanyenye wanaohitaji huduma ya makahaba. Hawa wanamlipa yeye kwanza kisha anawatumia mrembo waliemchagua.
Baada ya kazi, noti nyingine nyingi, safi, zilizonyooka, zinagawiwa kwa mrembo aliyetoa huduma siku hiyo.
Kisha ile sitini kwa arobaini inaemda kufanyika huko kwenye danguro.

Maisha yakaenda hivi kwa muda mrefu sana. Hakuna aliyedhani kama yatafikia mwisho, hela ilijenga kiota kwenye miguu ya Madam Sally na warembo wake.
Labda ingeendelea kuishi milele kama asingekutana na huyu Frola wa kuitwa Bebe.
Labda asingemuokoa kabisa usiku ule.
Hakujua!
Hakujua....



ITAENDELEA..

 

[Godlove Kabati]

KIBIRITINGOMA
Ya: Godlove Kabati
Kwa udhamini wa MAJIVU YA FASIHI


SEHEMU YA NNE


Usipotumia uwezo wako kuitimiza ndoto yako, wapo watakaoutumia uwezo wako kuzitimiza ndoto zao.
Na baada ya kukutumia, hawatakuacha uende mbali. Watahakikisha unabaki kwenye mduara wao ili wazidi kukutumia tena na tena.
Watakuonyesha mafanikio utakayoyafikia kama tu utakuwa chini yao na kuwatumikia. Na wewe daima utazidi kuzunguka kwenye duara lilelile daima.
Akili kichwani mwako!

Na hii ni sehemu ya nne...



Ulikuwa ni usiku wenye hekaheka.
Jambo ambalo sio ajabu hapa jijini Dar-es-Salaam. Labda kwa mgeni jijini.
Lala wewe tu! Lakini kwa wengine, nd'o kwanzaa kumekucha.
Bado watu wanautafuta mkate wao wa kila siku, tena katika namna tofautitofauti.
Naam!
Huu ni muda muafaka kwa wale waliofanikiwa kuupata mkate wao, kuja kuipa miili yao pole kwenye kumbi na maeneo mbalimbali ya starehe.
Kwenye hayo maeneo mbalimbali, yapo machache yaliyosifika kwa ubora wa huduma zake. Kuanzia mapambo, burudani ya muziki, vyakula na vinywaji mpaka wahudumu.
Lakini LE CLUB GRANDE, ilikuwa kwenye anga la peke yake miongoni mwa kumbi hizo chache.

Ni nani asingevutiwa na zile taa nzuri zenye rangi mchanganyiko 'disco lights' zinazomeremeta?
Eneo pana la wazi, kubwa lililozungukwa na ukuta,
Vyakula na vinywaji vyote vitamu, si ajabu ukila mpaka ukajing'ata. Miziki ya kila ladha ipo hapa. Rhumba, reggae, amapiano hata ngoma za kikongo utasakata.
Tembea kote lakini ukifika hapa, hakika pengine utapakataa katakata.

Uchangamfu!
Ni moja kati ya sifa lukuki za klabu hii kubwa.
Na leo hii Jumamosi ambayo kwa wengi ilikuwa 'wikendi', palikuwa pamejaa na kuchangamka.
Kila mtu alikuwa na sababu yake ya kuchangamka na kufurahi. Huyu angefurahishwa na muziki, yule vinywaji, na huyu mwingine mapambo.
Huyu wa mapambo tusimshangae! Ni haki yake kufurahi bwana.
Lakini kuna hili kundi la wale waliofurahia kutazama watu wengine, watawachambua kuanzia walivyovaa, wanavyotembea, wanachokula ama wanachokunywa. Kisha watakipa daraja chakula chao na kupitia hicho watachagua thamani ya huyu mtu wanayemtazama.
Wamdharau au wamuheshimu, watajua wao!

Lakini miongoni mwa hawa watazamaji na wachambuzi, lilizaliwa kundi kubwa la wanaume ambao walikuwepo pale kwa dhumuni moja tu.
Kuwinda mabinti!
Macho yao hayakutulia. Walipepesa huku na huko wakimuona mmoja wao tu, haraka macho yao yatahamia kwenye maumbile yake halafu watamuhukumu kwa kumfuata ili wakauze lugha zao.

"Oya D ,una uhakika kuwa anafanya kazi hapa lakini?!" Ilisikika sauti changamfu.
"We tulia Jeifoo...mimi huwa sikosei mzee. Hili nd'o chimbo lake we sikilizia tu, muda sio mrefu utamuona kwani saa ngapi hapo?"
"Sa'hivi?...Saa nne na nusu!"
"Enheee...sasa tulia, hii nd'o mida yenyewe hii."

Yalikuwa maongezi ya vijana wawili waliokuwa mawindoni katika klabu hii. Jumanne aliyejulikana kama Jeifoo (J4) pamoja na Dotto aliyependelea kuitwa 'D'. Yupo mtu waliyekuwa wanamtafuta na meza yao ilitosha kabisa kulielezea hili. Ilijitofautisha na meza nyingine nyingi kwa kubeba chupa mbili za bia na glasi mbili pekee.

Ghafla ukumbi ukalipuka kwa shangwe. Baadhi ya watu wakasimama huku wakipunga mikono yao hewani kwa furaha. Ilikuwa ni kama kuna ugeni ambao kama haukusubiriwa kwa hamu basi kuna mtu maarufu ambaye ameingia ukumbini pale.
Sauti ya muziki ikaongezwa maradufu na mshehereheshaji wa bendi ya siku hio akapaza sauti yake,
"O yeah, finally! Mama la mama...mama lao, jike la shoka! Mabibi na mabwana...si mwingine ni Madaaam!...Madam Sally Salome!"
Shangwe likazidi maradufu, likasindikizwa na sauti ya mdundo wa muziki. Jambo lilizozidisha uchangamfu mahali hapa.
"Madam! Madam! Madam!..." ziliendelea kuvuma.

"Enhee...sikia sasa Jeifoo. Em sogea!" Mmoja kati ya vijana wale akamsogeza karibu mwenzie aliyeitwa kwa jina la J4(Jeifoo). Wakiwa wamesimama, wakajaribu kuchuchumia ili waone yanayoendelea.

"Yule maza niliyekwambia wanamuita Madam yule...nd'o huyo hapo anayeshangiliwa sasa!" Akipambana na kelele za shangwe zile, akamnong'oneza J4 sikioni mwake.
J4 akamkazia macho mwanamke yule mwenye umri wa makamo, akijaribu kumlinganisha na taarifa fulani fulani alizozisajili kwenye ubongo wake.
Madam Sally akasogea moja kwa moja mpaka jukwaani, akapewa kipaza sauti.
"Kama kawaida! Hapa ni chemchemi ya burudani! Kula, kunywa, furahi!"
Akaondoka kwa mbwembwe, umati ukimshangilia sana kwa shangwe.

"Kwa hio unataka kusema huyo nd'o anasimamia shoo nzima au?" J4 akamuuliza D kwa sauti kubwa ili asikike pia.
Mwenzie akatikisa kichwa huku akiyumbayumba katika namna ya kufurahia burudani ya bendi ile.
"Na ni huyuhuyu anayewamiliki hao wasichana akiwemo huyo ambaye tunamtafuta!" D akatamka kwa kujiamini. Wakarudi kuketi na kuusubiri muda wao wa mawindo ufike.
Chupa zao zikawa tupu ndani ya dakika chache tu. Akaja mhudumu mrembo kuziondoa chupa zile na akauliza kwa tabasamu murua kama wanahitaji huduma ya ziada.
J4 na D wakatazama kwa kuibia kisha wakamjibu kuwa kama wakihitaji watamuita tu. Ni heri walitamka maneno haya, maana hata fedha zilizokuwepo mifukoni mwao ni za kuhesabu tu. Hapa hawakuja kuburudika, walikuwa na jambo lao.

Mhudumu yule akaanza kuhesabu hatua zake kuondoka kwenye meza ile. Upesi ishara zikatembea baina ya J4 na D kwa kasi kama umeme.
"Oyah, tumuulizie huyuhuyu, itakuwa anamfahamu!" J4 akamkonong'oneza D.
Mara ghafla,
"Da-dada..samahani, tunakuomba mara moja!"
Akaitwa tena kutokea pale pale kwenye meza aliyotoka.
Taratibu kwa mwendo wa madaha, kiuno chake chembamba kikipepea huku na kule akawafikia na kurejesha upya tabasamu lake usoni. Hii ni namna yao ya kipekee na nidhamu ya kuwahudumia wateja, waliyofunzwa katika klabu hii.

"Bila samahani!" Mwanya ukaonekana kinywani mwake, alipotamka maneno haya.
"Uum...samahani, sijajua kama una haraka lakini natamani nizungumze na wewe japo kwa dakika moja tu. Tafadhali..."
Nani huyu mwingine kama sio D?
J4 akaamua kuwa mtazamaji tu.
Muhudumu yule akalikoleza tabasamu lake na kuketi kando ya D,
D akajikohoza kidogo na kulazimisha tabasamu.
"Naam, naitwa Brown sijui we nani mwenzangu."
"Naitwa Sharon!" Binti akajibu kwa sauti ya kubembeleza iliyojaa uchangamfu. Hapa akazidi kumpandisha D mizuka.
"Ooh jina lako mbona zuri hivyo...ulijichagulia mwenyewe au?"
"Mmh..hapana! Kwa nini?" (Anacheka)
"Zuri sana aisee..na hongera jina lako linakufanana kwa uzuri!" D akazidisha mbwembwe.
Mbwembwe zake zikawa kero kwa J4 ambaye alitaka aende moja kwa moja kwenye pointi ya msingi.
"Naam, kuna mhudumu mmoja hivi hapa namtafuta. Uuum silifahamu jina lake, lakiniii ni mrembo mrembo hivi kama wewe...
Si mrefu sana, wala si mfupi sana..." D akaanza kuzunguka.
"Anaitwa Bebe!...Bebe nd'o jina lake!" J4 akaamua kuingilia kati. Jambo lililomfanya D ajichekeshe na kuomba radhi.
Yule mhudumu akashusha pumzi na kuwakagua J4 na D nyusoni mwao. J4 akiwa makini na D akijichekesha.
"Yupo..lakini kwema?" Akahoji.
"Aah dada...kwani sie tunaonekana kama wakorofi? Yule ni rafiki yetu tu tunataka tumsabahi, hivyo tu!" J4 naye akachonga tabasamu la uongo usoni mwake.
Binti akashusha tena pumzi zake na kusimama akiangaza huku na huko.

"Yule pale! Ngoja nikawaitie..."
"Ha-haamna shida sister...acha tu tutamuita wenyewe. Mbona hamna shida, we nenda tu tusikusumbue!" Wote wawili wakaruka na kumchangamkia.
"Mmh sawa!" Akaguna.
"Nadhani naweza kuondoka kama hakuna shida nyingine..." lile tabasamu lililokuwa usoni mwake likafifia. Na sasa yu tayari kuondoka.
"Uum naweza kupata mawasiliano yako tafadhali?" D akamuwahi na kumpatia simu yake ili anakili namba zake.
Kitendo cha kuombwa nambari za mawasiliano kikamrejeshea tabasamu lake la mwanzo.
"Mh za nini tena?" Akajibu huku akiwa ameipokea tayari na vidole vyake vimeanza kuchezacheza juu ya skrini ile ya simu-janja.
"Aah Sharon we naye....kwa hiyo hautaki niisikie sauti yako tena au?" Huyu ni D kwenye moja na mbili.

Wakati huu J4 alikuwa mbali sana. Macho yake yalimakinika kwenye kile kiwiliwili cha mwili ulioinama kuhudumia wateja, waliyeoneshwa na mhudumu huyu, Sharon.
Aliliona umbo matata lenye mwondoko wa kiwango cha nyota tano, lililomilikiwa na mhudumu huyu aliyempa mgongo. Kwa harakaharaka tu, angemtafsiri kuwa ni mrembo. Aliwatazama mamwinyi waliokuwa wakihudumiwa naye namna mate yanavyowadondoka walipokuwa wanamkagua binti huyu.

Umakini wake wote ukachotwa kwa binti yule. Kumtazama kwa nyuma tu ilikuwa ni burudani tosha na kumsubiria ageuke lilikuwa ni tukio kubwa ambalo macho yake yalilisubiri kwa hamu, sawa na muumini aliyefunga mchana kutwa aisubiliavyo adhana ya jioni akale futari.
Naam,
Hata yeye alisubiri ageuke tu ili aione sura yake kwa mara nyingine tena, baada ya kuiona mara moja tu kwenye picha ya mtandaoni.

Mara ghafla, binti yule akageuka!
Macho ya J4 yakatiwa ukungu, ikawa ni kama eneo lile anamuona yeye tu. Kwa mara ya kwanza maishani mwake, macho ya J4 yakaishuhudia kazi tukufu ya sanaa ya uumbaji wa Mungu.
Mdomo wake ukabaki wazi, akapigwa na butwaa.

"Oa Jeifoo...Oa Jeifoo!" Akashtuliwa na D asimsikie.
"Oa vipi unaangalia nini mzee? Umeona mali mpya nini?" D akamuuliza akijaribu kukagua upande ule ambao J4 ametazama.
Alipogeuka tu na yeye akaungana naye kwenye huu msafara.
Wote wawili wakamtazama.

"God bless Africa!"
J4 akahamishia mikono yake kichwani kwa mshangao. D naye alibaki kukikuna kidevu chake chenye ndevu chache zilizokosa rutuba. "Hii nd'o maana halisi ya kisu kikali kaka...yaani hapa aisee!" Akamalizia J4, huku akiketi vyema kwenye kiti chake.
"Enhe nd'o yeye sasa huyo halafu ni kama anakuja huku." D akaweka nukta ili wamtazame kwa ukaribu zaidi. Hili ndilo lilikuwa windo lao haswaa.

Ni yule yule Bebe!
Akakatiza karibu na meza yao kwa madaha, mwendo wake ule ule maarufu kama 'catwalk'. Harufu yake murua ya manukato ikazivamia pua za J4 na D na kuwaachia mateso.
Huku nyuma, mtikisiko wa nyama zake zilizompa umbo namba 8 zikawa kama msumari wa mwisho kwenye jeneza la urembo wake.
Msumari huuhuu ukamchoma J4, akashika kifua chake.

"Oyah bro!" J4 akatamka huku akisimama.
Bado macho yao yanamsindikiza Bebe mpaka alipoingia ndani ya kaunta.
"Vipi unamfata au sio wa levo zako..." sauti ya D iliyojaa kicheko ikamuuliza J4.
"Em ngoja nikajaribu! Lakini dah, ngoja tuone..." hakueleweka.
Akatembea moja kwa moja kuelekea ilipokuwa kaunta.
Ile hali ya kujiamini aliyokuwa nayo ikaanza kuporomoka kwa kasi. Akakagua huku na huko na macho yake yakanasa tena kwa Bebe kama sumaku.
Wakati huu Bebe alikuwa akipakia vinywaji kwenye tenga lake kuvipeleka kule alikoagizwa.

J4 akasogea karibu na njia ambayo ni lazima tu angekutana naye asma la watapishana. Mapigo ya moyo wake yakaanza kwenda kasi.
Woga ukamvamia, na ili asionekane kama mwenye aibu,
Akaiwasha simu yake ya mkononi na kuipekua pekua bila mpangilio. Mara aende kwenye faili la picha mara atoke, mara aingie kwenye orodha ya majina ya watu atoke. Alikuwa amekamatika haswaa.
Huyu ni binti aliyekuwa anamuwinda kwa siku nyingi bila mafanikio, mara baada ya kukutana na picha yake kwenye mitandao ya kijamii na kuzisikia habari zake.
Leo hii ni huyu hapa mbele yake...mwili wake ukapigwa ganzi.
Akarudisha simu yake mfukoni baada ya kugundua kuwa anaelekea kwenye nusu-uwendawazimu kama sio kuwehuka kabisa.

Akazubaa pale kaunta akimtazama Bebe kwa muda mrefu. Jambo hili likamfanya agande kwa dakika kadhaa bila kujua la kufanya.
"Karibu bro!...Nikuandalie kinywaji gani?"
Mhudumu mwingine aliyekuwa mule ndani ya kaunta akamkaribisha kwa bashasha.

J4 akashtuka na kujiweka sawa,
"Uum...naomba Vant moja hapo!" Akatamka kwa kujiamini. Akatoa noti moja ya shilingi elfu tano ya kitanzania. Ilikuwa noti pekee aliyokiwa nayo mfukoni, na labda ingemsaidia kama nauli usiku huu. Yeye akaitumia ili asionekane mnyonge mbele ya Bebe.
Huyu ni mwanaume!

Akapewa chupa ile ndogo na kabla hata hajaanza kuipunguza. Bebe huyooo, akaondoka tena.
Namna gani!
J4 naye akasimama na kinywaji chake kuelekea uelekeo uleule sawa na Bebe. Lakini akajihadhari sana asigundulike kama anamfatilia. Akachagua kubaki nyuma yake, tena kwa mita za kutosha, akizuga kuwa bize na simu yake na mkono mwingine na chupa ndogo ya kinywaji kile kikali.

Upande mwingine, D alikuwa anaifatilia hii sinema ambayo kwake ilikuwa ya kuchekesha.
Akakumbuka viapo na tambo za J4 kuwa akimtia machoni tu huyo mlimbwemde wa kuitwa Bebe, hatachelewa kumsaini kama mpenzi wake mpya.
"Duh! Huyu dogo ataishia kula kwa macho tu."D akasema na nafsi yake.
"Hapo kanunua mzinga ili aoshe, halafu hana nauli! Mmh...yangu macho tu."
Akaweka kituo na kuegamia kiti chake, kicheko chepesi kikamtoka baada ya kumuona J4 anarejea, uso wake ukiwa umesawajika.
Hakuna alichokuwa ameambulia, zaidi ya kuwa mpenzi msindikizaji.

Usiku mchangamfu, uliopambwa na burudani ukaendelea pale LE CLUB GRANDE.
Saa sita kasorobo usiku!


********

Ni shughuli hizi za kiofisi pekee zilizoibana ratiba ya bwana Didace Ambrozi. Yeye kama mkurugenzi wa kampuni hii kubwa ya usindikaji wa vyakula na vinywaji hapa nchini, CHIVIHI & KABATI COMPANY LIMITED.
Daima meza yake ilijaa mafaili na nyaraka lukuki zilizoisubiri saini yake tu ili shughuli nyingine ziendelee.
Atasaini bila kuzipitia nyaraka hizi?
Hapana.
Ilimbidi azipekue, azichambue na afanye milinganyo kwenye mizani ya faida na hasara kabla ya kuidhinisha shughuli yoyote ile.

Asubuhi ya Jumatatu hii, meza yake ilikuwa vilevile kama alivyoiacha Ijumaa iliyopita, kama alivyomwelekeza karani wake ampangie nyaraka zote.
Ikamlaki kwa bashasha, ikiwa imepangwa vyema.

Kama kawaida yake akaanza kwa sala fupi, kisha akaketi na kuanza kupekua faili moja baada ya jingine.
Akaiona karatasi ambayo alikuwa akiichorachora na kuandika vitu ambavyo havieleweki. Akaguna,
'Nini hiki?' Akajiuliza.
Lakini hakukaa muda mrefu kabla hajamkumbuka Bebe.
Naam, ni yeye aliyekuwa akiongea naye jioni ya siku ile kwenye simu na bila kuelewa akajikuta amechorachora maandishi yale juu ya karatasi, kama tu yalistahili kuitwa maandishi.

Hapohapo akaachana na nyaraka,
Akaegamisha mgongo na kichwa chake juu ya kiti chake kikubwa cha kuzunguka. Akaenda huku na kule, fikra zake zikiwa kwa Bebe tu.
Akaifikiria sura yake nzuri na utukufu wa urembo wake wote.
Halafu ajabu!
Akakumbuka kuwa eti naye ni kahaba anayeishi kwenye danguro, tena kwa kulelewa!
Bwana Didace Ambrozi akasikitika sana.
"Maskini..." Akatamka.
"Halafu naye, akili yake imeshafungwa minyororo ya utumwa. Eti ameridhika na hali aliyo nayo." Akatikisa tena kichwa chake.
"Lazima nitamsaidia tu. Siwezi kumuacha apotee kwenye msitu wa ukahaba! Kama atazikataa fedha zangu, basi hatozikataa fursa nitakazompatia zimuinue!" Aliyatamka haya akiwa analichora neno BEBE juu ya karatasi ile.

Mara simu yake ya mezani ikaita, akajinyoosha kabla hajaipokea. Alikuwa ni karani wake, aliyemtaarifu kuwa meneja wa masoko anahitaji kuwasiliana naye.
"Vipi nimuungamishe na wewe bosi?", sauti ile ya kike, changamfu yenye nidhamu ikamuuliza.
"Naam, muunganishe! Halafu Tessy..."
"Abee Bosi!"
"Niandalie kahawa hapo...na kama kawaida usisahau kuweka cocoa, sukari iwe ya kusikilizia!" Akaamrisha.
"Hamna shida Bosi!"

Baada ya sekunde chache simu yake ikaita na aliyekuwa hewani ni meneja masoko.
"Habari za Asubuhi mkuu!" Akasalimiwa.
"Salama tu kaka...habari yako Mr. Atumanya Kiiza!"
"Kwema mkuu...nisijue huko kwenu."
"Kwema. Naam...nakusikiliza!"
"Uum..samahani mkuu kuna mswada tuliutuma kwako hapo tangu Alhamisi iliyopita. Nadhani utakiwa umeuona!"
"Mswada kutoka wapi huu...idara ya masoko au?" Didace akauliza huku akipekua nyaraka zilizokuwepo mezani pale.
"Naam mkuu...faili namba CVK/345/7..." Hakumaliza.
"Naam nimeliona!" Didace akamkatisha.
"Eeh mkuu tunatarajia kufanya utekelezaji kuanzia wiki hii. Nadhani ukilipitia utaona tulichokijadili kwenye kikao chetu mkuu!" Akatamka kwa nidhamu.
"Bila shaka Mr. ATM, bila shaka, nitalipitia upesi." Akamtamkia na kumuita kwa jina ambalo alilitumia kiutani tu.
Wakaagana na macho yake yakavutiwa na mada mbalimbali zilizokuwepo kwenye mswada ule.

Ulikuwa ni mpango mkakati wa kuongeza ubunifu wa matangazo ya bidhaa zao hasa kwenye vipindi vya televisheni kubwa za hapa nchini.
Mr. Didace Ambrozi akaketi vyema kwenye kiti chake na kuusoma mpango huu, tena kwa umakini mkubwa.
Kwenye ukurasa wa mapendekezo,
Kulikuwa na hoja ya kufanya usaili wa kumtafuta binti mrembo atakayeweza kusimama mbele ya kamera na kuigiza tangazo la bidhaa zao.

"Mungu wangu!" Bwana Didace alianza kuuhisi ushindi moyoni mwake. Akalitazama neno BEBE alilokuwa amelichora juu ya karatasi ile.
Hii ilikuwa ni nafasi ya dhahabu aliyokuwa anaisubiri kwa muda mrefu.

Ni kweli Bebe hakuwa na elimu ya kutosha, mpaka amuweke kwenye ofisi mojawapo ndani ya kampuni ile.
Wala hakuwa na ujuzi wa kazi yoyote ile ya kiofisi hata ya kufanya usafi tu, hata hivyo hili la Bebe kufanya usafi halikumfanana.
Kwake alilitafsiri kama kitendo cha kukufuru kazi tukufu ya Mungu aliyoifanya kwenye mwili wa Bebe.
Lakini hili la kumtafuta mrembo wa kufanya promotion (matangazo) ya bidhaa halikuhitaji vyeti vya darasani.

Bwana Didace akasimama na kushangilia kwa nguvu akitupa ngumi zake hewani. Akafumba macho na kumuona Bebe akiwa kwenye majukwaa makubwa ya mitandao na media kubwa hapa nchini.
Akaziona bidhaa za kampuni hii zikinunuliwa kwa wingi.
Akayaona matangazo na mabango makubwa pale jijini yakiwa na picha zenye lile tabasamu angavu la Bebe.
"Bahati iliyoje kwa mabango haya kumiliki sura yenye urembo usiopimika kama ile?" Akajiuliza.

Akarudi na kuketi upya juu ya meza yake mara moja akamwaga wino wake juu ya ule mswada huku akitabasamu.
Karani wake akagonga mlango, akamruhusu aingie ndani.
Alikuwa kabeba kisinia cha udongo chenye jagi na kikombe kidogo pamoja na jagi maridadi.

"Hii hapa mkuu!" Akatamka kwa nidhamu.
"Enhe vipi na wewe kikombe chako kiko wapi?"
Akamuuliza huku furaha yake ikionekana waziwazi.
"Nani mimi?" Binti yule mwenye nidhamu akauliza kana kwamba mule ofisini alikuwepo kiumbe hai mmoja tu.
"Ah, mi nishakunywa Bosi..." akajiwahi.
"Kaa hapa tunywe pamoja bwana...utachangamka lini wewe? Enhe?" Akamshurutisha kwa uchangamfu. Binti yule akaenda na kurudi akiwa na kikombe chake kisha akaketi bila kujiamini.

"Tessy! Mbona huniulizi mama? Eh? Niulize kwa nini nimekupa hii ofa!" Didace Ambrozi amechamngamka.
"Mh..kulikoni tena?" Binti akauliza akiwa na aibu.
"Hahahahahaha!" Kicheko cha ushindi kikamtoka Didace. Hili likazidi kumshangaza sana binti huyu.
"We furahi tu mama yangu...muda sio mrefu chapa ya bidhaa yetu inaenda kuwa ya moto sokoni. Tutauza mnoooo! Hahaha!"

Huenda cheko lake lilibeba matumaini. Huenda alikuwa na imani kubwa na mambo yatakayozaliwa na mswada huu aliousaini.
Kwake ilikuwa ni vita ambayo alianza kuuona ushindi wake akilini, na silaha yake aliyokuwa nayo aliiamini kwa asilimia zote.
Hakujua kuwa silaha aliyo nayo hajaizoea vya kutosha.
Akasahau ule msemo usemao kuwa, silaha usiyoizoea usiiamini!




ITAENDELEA.....

 

[Mnachihanguu]

Mkuu endelea

 

[Godlove Kabati]

RIWAYA: KIBIRITINGOMA
Ya: Godlove Kabati
Kwa udhamini wa: MAJIVU YA FASIHI
WhatsApp: 0763204351


SEHEMU YA TANO


Hakika utakutana na nyakati bora zaidi maishani mwako,
Kisha utakutana na nyakati ngumu sana, zitakazokuumiza.
Lakini kamwe usisahau hakuna kinachodumu milele, kila nyakati itapita...
Na hii ni sehemu ya tano!

Siku moja baadaye,
5:00, Usiku.


Usingizi uligoma kabisa kuhamishia makazi yake kwenye kichwa chake usiku huu.
Kulikuwa na jambo linalozunguka akilini mwake likimdai jibu. Jibu ambalo alihofia kulitoa moja kwa moja.

"Tutakulipa fedha za kutosha, utapata umaarufu mkubwa!"

Yalikuwa ni maneno yanayojirudia-rudia kwenye akili ya Bebe.
Muda huu alikuwa peke yake chumbani, amevalia nguo nyepesi ya kulalia, kajilaza juu ya kitanda akiwa amekumbatia mto laini.
Akajigeuza ubavu wa pili akiyafikiria maneno aliyoambiwa jana usiku na bwana Didace Ambrozi.

"Kampuni yetu itagharamia kila kitu. Narudia tena kila kitu! Wewe kazi yako ni kukaa mbele ya kamera tu, halafu kuigiza matangazo ya bidhaa zetu. Hivyo tu!"

Sasa akalala chali na kulitazama dari.

"Kalifikirie hili mrembo...na ni matumaini yangu kuwa majibu yako, yataendana na kile ninachokifikiria! Sipendi kuona ukiutukana muonekano wako kwa tusi kubwa la kazi unayoifanya..."

Bebe akaukumbatia mto kwa nguvu kabla hajauachia na kuutupa katika namna ya kuususa. Akasimama na kushuka juu ya kitanda kile.
Akasogea mpaka mbele ya kioo kikubwa kilichokuwa pale chumbani.
Akajitazama.

Huenda Bwana Didace Ambrozi alikuwa sahihi.
Yumkini, yeye hastahili kuwa kahaba.
Sura, rangi na umbo lake. Ni hivi vilivyokuwa sumu kwa kila macho ya mwanaume atakayemtazama. Katika umri wake mdogo tu wa miaka ishirini na mbili kasoro, tayari alikuwa ana shahada ya ukahaba.
Shahada ambayo haijaidhinishwa kwa cheti chochote kile, sahau kuhusu chuo alichosomea taaluma hii.
Ni maisha tu na watu wanaomzunguka. Labda hawa nd'o angewalaumu.
Ni mzazi gani atakayefurahi kumuona binti wake akiugeuza mwili wake kuwa burudani ya watu tofauti tofauti kwa ajili ya pesa?
Kwani yeye ana baba? Huyu alimkimbia na hakujua alienda wapi.
Mama yake je? Umaskini ulimnyanyasa na kuidai roho yake kwa nguvu mpaka umauti ulipomfikia.
Hakuwa na ndugu yeyote yule aliyemfahamu, awe wa damu yake au damu ya mbali.
Yeye alipoteza kila kitu maishani mwake.
Na sasa hana cha kupoteza.
Machozi yakamdondoka alipoyafikiria yote haya. Yalikuwa machozi yenye maumivu kwa binti yatima lakini yakageuka machozi yenye aibu kwa binti kahaba juu ya uso wa dunia.

Akapiga hatua moja na kukikaribia zaidi kioo kile, akamtazama yule Bebe mwingine aliye upande wa pili.
Huyu alikuwa anacheka kwa dharau.
"Hata ukilia, hakuna kitu utakachoweza kukibadilisha. Wewe ni malaya...malaya ni malaya tu! Hata maandiko matakatifu yamekulaani." Taswira ile ilitamka na kuweka pumziko ikimtazama Bebe.
Hakuwa na la kujibu zaidi ya kuyapangusa machozi yake usoni.

"Wewe ni laana Frola! Ulizaliwa kama laana juu ya uso wa dunia. Tangu ukiwa tumboni mwa mama yako ulikataliwa.
Na hata ulipozaliwa, hakuna aliyefurahi kukubeba wala kukumbembeleza. Mama yako aliona aibu kukunyonyesha! Alikuwa na umri mdogo hivihivi kama ulivyo wewe.
Ulipokelewa na ulimwengu kama laana na si baraka. Hamna sababu ya wewe kuishi kwa raha hapa duniani.
Utatumiwa na wanaume halafu utatupwa jalalani kama takataka.
Hata huyu Madam Sally, atakutumia kwa manufaa yake halafu akubwage...", Bebe wa kwenye kioo akazidi kutoa maneno ya kashfa.
Akionekana mwenye furaha sana na huzuni ya Bebe.

"Hakuna jambo jema lolote utakaloweza kulipata hapa duniani, mwili wako utatumika mpaka uchakae. Utazidi kutumika na kutumika na kutumika na kutu-" hakumalizia maneno yake.
"INATOSHAAA!!" Bebe alinyanyua stuli ndogo iliyokuwepo pale chumbani na kuibamiza moja kwa moja mpaka kwenye kioo kile.
Kikatoa mlio mkali na kupasuka kwa nguvu...

Bado Bebe aliendelea kuiona ile taswira yake iliojiunga kwenye vipande kadhaa vyilivyobaki kwenye kioo kile.
"Hahaha...bado utateseka Bebe! Utazidi kutumi-"
Akakivamia na kukipasua pasua kioo kile zaidi zaidi. Huku akipoga mayowe kwa nguvu.

Mlango wa chumba kile ukafunguliwa kwa ghafla, taa ikawashwa na mwanga ukaangaza kwa mlipuko. Binti mrefu kiasi aliyevaa mavazi ya kulalia akaingia bila kubisha hodi. Hali aliyoikuta mule ikamtisha zaidi.
Bebe alikuwa chini sakafuni akilia, amechutama akishikilia kichwa chake katika namna ya kuuficha uso wake. Kichwani nywele zake zilikuwa timtimu na vipande vikubwa vya vioo vilikuwa vimetapakaa sakafuni.

"Eh! Bebe uko sawa?! Ni-ni nini kimetokea mpenzi?" Akapiga hatua kwa kunyata, akihofia kukanyaga vipande vya kioo. Akamsogela Bebe na kumuinua kutoka pale sakafuni na kumketisha kitandani.

"Sharon!" Bebe akamuita binti huyu kwa sauti yenye kwikwi.
"Baby, ni nini kimetokea?" Sharon akauliza.
Akiwa bado yu kwenye kilio, Bebe akanyoosha mkono wake kuelekea kwenye kioo akionesha kitu fulani.
Sharon akuambulia chochote zaidi ya kuona mhimili wa kioo kile ambacho kiliharibiwa vibaya.
"Nani huyo mpenzi? Nini?..." Akauliza bila kujibiwa. Akamkumbatia Bebe kwa karibu zaidi ili kumtuliza.
Wakati huu chumba hiki kikapokea ugeni wa mabinti wengine wanne pamoja na Madam Sally, aliyeonekana kuwa na macho mazito shauri ya usingizi.
"Kuna nini humu? Mbona makelele?" Akauliza.
"Ni Bebe...itakuwa alikuwa anaota!" Sharon akawahi kutoa jibu.
"Mmh? Nd'o amepasua mpaka kioo? Hio ni nd'oto gani tena au alikuwa amekabwa na majinamizi?" Wasiwasi ukaufukuza usingizi wote machoni mwa Madam Sally baada ya kuona vipande vile vya vioo sakafuni.
Sharon akabetua mabega yake kuashiria kuwa hafahamu lolote.
"Ndoto zenu hizo...kuweni makini maije niunguzia nyumba. Haya safisheni hapo, mkalale." Mwayo mrefu ukaisindikiza kauli hii na Madam Sally akaondoka mule chumbani.

Upesi vipande vikaondolewa, Bebe akafarijiwa na mabinti wale wanne wakarudi kuufaidi ubwabwa wao wa mwana mtamu. Ni Sharon pekee aliyebaki na Bebe pale chumbani.

"Shosti, umeota nini?" Wasiwasi ukaonekana wazi usoni mwake, mkono wake mmoja ukimzunguka Bebe na kumshika begani katika namna ya kumfariji na mwingine ukivipapasa viganja vyake.

"Hata mi sielewi mpenzi...ni kama kulikuwa na kitu kimenikaba koo hivi, halafu mara kikakimbilia kwenye kioo." Bebe akabuni uongo upesi akijaribu kuyakwepesha macho yake yasikutane na yale ya Sharon, aliyekuwa amemtazama kwa umakini.

"Basi mamy, we lala utulie. Sali halafu ulale. Na ili usiogope, hii taa usiizime sawa eeh" Huku akitabasamu...Sharon akalifuta jasho jembamba kwenye uso wa Bebe kutumia kanga. Bebe akatabasamu pia, tabasamu lake lilelile lilizoea kuzua mabalaa.
Sharon akaondoka akimtakia kila la kheri kwenye usingizi wake usiku huu.

Bebe akashusha pumzi ndefu,
Bila kupepesa macho, akaikamata simu yake ya kupangusa, akatafuta jina alilohifadhi kama CHIEF DIDA katika orodha ya majina.
Akabofya na kuandika ujumbe mfupi,
"MBEZI BEACH, Saa nne asubuhi." Akautuma kisha akarejea tena juu ya godoro lake, kufanya kazi ngumu ya kuutafuta usingizi.

********

Siku hiihii,
Saa tano usiku,

Lilikuwa jambo gumu sana kutofautisha chumba chake alichoishi na karakana ya vifaa vya umeme.
Upekee wake ni kwenye kumiliki kitanda, vyombo vichache sana vya kupikia na kulia chakula...labda na jiko.
Lakini mtawanyiko na mrundikano huu wa vifaa vya kieletroniki, ndivyo vilikifanya chumba hiki kuonekana kama chumba cha mwendawazimu.
Huko nje alijulikana kama fundi wa vifaa vya umeme. Na alifanikiwa sana kujitengenezea jina jema la kuwa fundi bora wa vifaa hivi.

Alianza rasmi urafiki na vifaa hivi vya umeme tangu akiwa shule ya sekondari. Alikuwa mbunifu, mwenye kipaji kikubwa cha kuunganisha waya huu na waya ule, betri hii na ile, hasi hii na chanya ile, mwishowe angeibuka na kiredio kidogo lakini kinachonasa mawimbi ya sauti.
Akasifiwa na yeye akaendelea kuzama kwenye bahari ya ubunifu na ugunduzi wake yeye mwenyewe.

Taratibu, akalipenda somo la fizikia! Akawa bora sana kwenye ufaulu wa somo hili kwenye mitihani yake. Alipomaliza elimu ya juu ya sekondari akajiunga na chuo kikuu cha DaresSalaam , akisomea shahada ya uhandisi wa umeme. Akaongeza juhudi binafsi na maarifa, akaijua kompyuta nje ndani na mifumo yote ya mitandao.
Akachanganya maruwani yaliyo kichwani mwake na maarifa aliyoongezewa darasani, akawa na uwezo mkubwa sana wa kuipambanua teknolojia.
Kichwa chake kikamiliki akili kubwa ya Sayansi na teknolojia.

Naam,
Hatimaye rasmi Jumanne Maliki akahitimu shahada yake chuoni hapo. Hakutaka kurudi nyumbani kwao Ushirombo, akachagua kubaki hapahapa jijini ili ayafinyange maisha yake. Wazazi wake wakabariki maamuzi yake na rasmk akaingia mtaani kupambana na maisha. Ni huku akajuana na watu wengi na akajipatia marafiki wapya, wakalifupisha jina lake na kumuita J4 (Jeifoo). Upesi sana, kipaji chake J4 kikagundulika, akakigeuza kuwa kazi iliyompatia pesa. Ni kupitia kazi hii, akafahamiana na Dotto Banzi. Kijana ambaye alivuka mstari wa urafiki na kuwa kama ndugu.
Huyu hakuwa na kazi ya kueleweka, lakini alijulikana hasa kwa shughuli zake za udalali, yaani "Winga" kama wasemavyo watoto wa mjini. Pacha moja matata ikaundwa miongoni mwa vijana hawa. J4 kama fundi mashuhuri na Dotto kama dalali wa vifaa vibovu ama kutafuta wateja wa baadhi ya vifaa.
Wakapiga kazi!

Leo hii, J4 alikuwa peke yake chumbani akiikagua upya picha ile kwenye simu yake. Picha ya Bebe. Binti ambaye urembo wake ulimfanya akiri kwa mara nyingine kuwa, yupo Mungu aumbaye dunia na vitu vyote vizuri juu yake.
Na miongoni mwa vitu hivi vizuri ni huyu binti. Akaitazama kwa muda mrefu, akatabasamu na kutikisa kichwa chake,
"Nadhani nitaanzia hapa! Hapa kuna hela ya uhakika!"
Akazima simu ile na kuirusha kitandani. Kisha akapekua makorokoro ya vifaa vilivyokuwa chini ya meza yake kubwa.
Akaibuka na sanduku dogo jeusi la mbao na kuliweka juu ya meza.
Akalifungua akiwa ameuma meno yake kwa ugumu wa sanduku lile, hatimaye likafunguka. Akalipekua na kukagua ndani yake. Akatabasamu kwa mara nyingine.

"Kila kitu kiko sawa...Hatimaye ndoto yangu ya muda mrefu sasa itatimia!"
Akalifunga sanduku hili na kulisukumia chini ya kitanda chake kwa uangalifu mkubwa.
Akarejea upya kitandani na kujilaza.
Alilala lakini katu usingizi haukumkaribia,
Akafumba macho yake na kujiona akiwa ndani ya gari la kifahari, gari la ndoto zake...lenye matairi ya sambusa na milango ya zipu.
Akiwa amevaa suti ya gharama, mwili wake ukinukia marashi ya utukufu.
Amekaa meza moja na watu mashuhuri hapa nchini wakila nyama laini, mapaja ya samaki na mashavu ya kuku...
Makoo yao yakipozwa na mvinyo bora kutoka Ulaya, mvinyo usiotiwa chachu...
Wanaongea lugha moja tu...Pesa!

Usingizi ukamchukua akiwa mwenye tabasamu!

******

Usiku huuhuu,
Katika eneo jingine ndani ya jiji, ipo nyumba ya kifahari, iliyomiliki chumba kipana chenye kila sifa ya kuitwa chumba cha mtu mwenye fedha. Alilala Bwana Didace Ambrozi ambaye saa moja tu lililopita ametoka kulumbana na mkewe.
Mkewe amelala naye pale pale kitandani, lakini ajabu, amegeukia upande mwingine. Alimzoea hivyo...hii sio mara ya kwanza.
Hakujishughulisha naye, usiku huu alikuwa na mambo mengi ya kufikiria.
Alikuwa amelala chali akilitazama dari, kichwani mwake akiwa na maswali mazito ambayo majibu yake yalikuwa mbali mno, Sinza Mori na yeye akiwa Masaki.

Alikutana na Bebe mchana wa siku ile na kuitandaza ofa yake mezani. Safari hii alitumia sauti ya baba, sauti iliyojaa malezi. Akamuonyesha Bebe waziwazi kuwa anayo nia ya kumsaidia na kumuondoa kwenye shughuli hii chafu ya ukahaba.
"Sijui lile shangingi litamkatalia? Lakini mmhm, ye ni mtu mzima bhana, atajitetea!"
Alijiuliza na kujijibu.
"Au atadhani kuwa namdanganya labda, maana hawa nao hawaelewekagi hawa. Lakini mbona nilivokuwa naongea naye alikuwa ni kama amekubali hivi? Aaaah hofu zangu tu!"
Atajikosoa na kisha kutabasamu huku akisonya taratibu.

Mara ghafla, kioo cha simu yake kikalipua mwanga na kutoa mlio wa sauti. Akaketi kitandani na kuokota simu ile. Akaitazama, ulikuwa ni uleule ujumbe kutoka kwa Bebe.
"MBEZI BEACH, SAA NNE ASUBUHI."
Huu ulikuwa ni wito hakika.
Bwana Didace akarusha ngumi ya ushindi hewani. Akajiona kuwa amekaribia kunasa saini muhimu zaidi kuliko zote alizowahi kusainisha watu kwenye kampuni ile. Saini ya Bebe!
Akapiga magoti na kumshukuru Mungu.
Akajiona kuwa muda mchache ujao atakuwa ameboresha uandishi wa jina lake kwenye kitabu cha uzima huko mbinguni, ambalo lilikuwa limeanza kufutwa...
Kwake yeye kama mzee wa kanisa, kitendo cha kumuokoa binti kitoka kwenye ukahaba na kumpatia kazi, ni jambo la kufurahisha malaika mbinguni.
Kama walivyo wengine, huyu naye akafumba macho na kutafakari sifa lukuki na mafanikio yatakayoiandama kampuni hii kila kukicha. Akatafakari namna jina la kampuni hii likitajwa mpaka na watoto wadogo, watakaoliona kwenye vipindi vya luninga.
Akatabasamu, usingizi ukamchukua.

Mwezi uliofanya kazi yake ya kuumulika ulimwengu usiku kwa uaminifu, ukaendelea kutoa huduma yake. Giza nalo likafyata ulimi wake lisitoe siri za watu wa jiji hili. Siku mpya ikakaribishwa, siku yenye ahadi za mipango mingi. Naam! Saa sita usiku!



ITAENDELEA...

 

[Mnachihanguu]

Shusha mkuuu

 

[Godlove Kabati]

KIBIRITINGOMA
Ya Godlove Kabati



SEHEMU YA SITA

Sikia,
Siku zote machaguzi muhimu yanahitaji uwe na moyo wenyw uwezo wa kufanya maamuzi magumu.
Yasingefanywa maamuzi magumu na watu wenye mioyo imara huenda tusingepata simulizi tamu na historia za kusimulia
Huenda dunia isingekuwa kama ilivyo hivi leo,
Huenda...huenda.
Akili kichwani mwako!
Na hii ni sehemu ya sita



Kama walivyokubaliana...
Walikubaliana? Hapana...ni Bwana Didace aliyeukubali wito wa Bebe.
Wakiwa ndani ya mfano wa kibanda cha kienyeji kilichojengwa kwa miti na paa la makuti yaliyosukwa vyema na kutandaza kivuli, waliendelea kujiburudisha kwa vinywaji vilivyolipiwa na yeye mwenyewe bwana Didace.
Walibiridika sana kuitazama bahari ya Hindi huku upepo murua na mwanana wa bahari ukiwaburudisha, upepo ambao uliambatana na faraja ya joto la kadri la jua la asubuhi ya siku hii.

Ni bwana Didace pekee aliyekuwa na kofia pana kichwani pamoja na miwani ya jua iliyouficha wajihi wake barabara. Kwake huu ni muda wa kazi, na haikuwa sahihi kuonekana maeneo kama haya.
Achana na Bebe aliyekuwa akijiamini kwa asilimia zote, hata hivyo ahofie nini na amuhofie nani?

Didace akapiga funda kubwa la sharubati ile baridi ya matunda kabla hajajikohoza kidogo na kutamka,
"Sidhani kama itakuwa ngumu sana kumshawishi Madam akuachie! Hata hivyo, nitamlipa pesa yoyote ile atakayotaka...huo uwezo ninao!"
Akarekebisha miwani usoni mwake na kumtazama Bebe akiusanifu uelewa wake.

Bebe akaguna,
"Mmh...tatizo sio kumlipa hela. Tatizo ni hofu atakayokuwa nayo, kama tu nikimtajia ombi kama hili tena wakati kama huu.
Anaweza kunielewa lakini ikawa ngumu kuniruhusu!" Akatamka kwa sauti inayoelekea kukata tamaa.

"Aam...kwa upande wangu mi sioni ugumu wowote hapo. Kama wewe ukifeli kumshawishi basi mimi niko tayari kulimaliza hili mwenyewe. Nitakuja niongee naye, kama akihitaji malipo yafanyike.Then we are good to go!" Didace akatamka huku mikono yake ikijongea kulingana na uzito wa maneno yake alioumaanisha.
Akameza funda jepesi la mate kisha akaendelea,
"Sikia Bebe,
Haya ni maisha yako, una uhuru wa kuchagua uyaishi vipi. Ni mtumwa pekee anayepangiwa na bwana wake namna ya kuishi. Na ni miaka karibu mia na ushee iliyopita tangu utumwa upigwe teke hapa nchini. Halafu wewe ni mtu mzima, huyu Madam ni nani mpaka akunyanyase na kukunyima haki ya kufanya maamuzi?" Akaweka nukta akimuuliza swali.
"We hujui tu. Hujui ni wapi Madam amenitoa!" Akiketi vyema kwenye kiti kile murua kinachonesa, Bebe akamjibu huku akishusha pumzi nzito.

"Haya fungua hii bahasha!"Kwa kujiamini, Didace akaweka bahasha kubwa mezani. Bebe akaiokota na kuifungua lakini akachelea kufungua vilivyokuwemo ndani. Akamtazama Didace kwa macho yanayosubiri ruhusa,
"Soma hizo!"
Didace akamuamuru.
Taratibu Bebe akaanza kusoma kwa umakini karatasi zile zilizounganishwa pamoja. Didace ametulia tu akimsanifu, akanena yeye peke yake na nafsi yake,

"Kwani anajua kusoma huyu kweli? Labda, lakini sidhani...ngoja nione"
Na kweli!
Ni miaka mingi imepita tangu Bebe amekutana na karatasi nyeupe yenye maandishi yanayomtaka asome, tena eti asome kwa umakini mpaka aelewe. Kwa kasi yake ya kusoma neno moja moja mpaka aelewe, angetumia dakika kumi kuisoma kurasa inayohitaji dakika tatu tu kusomwa na kueleweka.

"Hizi nini hizi?" Akaamua kujiwahi, ili aokoe muda.
Didace aliyekuwa ameagamisha mgongo wale kwenye kiti akaketi vyema na kumfanyia ufafanuzi.
"Hizo ni document ambazo zinatambulisha ofa ambayo kampuni yetu inakupatia. Ukimuonesha hii, hakika ataelewa mara moja ni bahati gani imekuangukia. Na wewe utamshawishi akuachie uwe huru. Sidhani kama atagoma, hata hivyo alikuwa anakumiliki kinyume na sheria. Kwani ulisaini mkataba wowote ule na yeye?
Bebe akatikisa kichwa chake kukataa, kuashiria kuwa hakuwahi kusaini mkataba wowote ule.
"Bingo! Sasa unahofia nini hapo. We mpelekee hizo atasoma na atajua la kufanya. Na zaidi ya hapo, utampatia hii hapa business card yangu. Yeye mwenyewe atanitafuta. Vipo hapo!" Akampatia kadi yake ya mawasiliano na kuyasindikiza maneno yake kwa mafunda kadhaa ya kinywaji kile.

Bebe akashusha pumzi ndefu,
"Sawa mimi binafsi nimekubali. Hapa tumsubiri yeye tu." Akarudisha karatasi zile kwenye bahasha na kuigongagonga mezani ili kuzipanga vyema.
"Umefurahi eh?" Didace akamuuliza huku akijitahidi kuunda tabasamu kwenye uso wake ulioanza kukubaliana na mikunjo shauri ya uzee.
Bebe akatabasamu kwa aibu na mara ghafla akazivamia papi za midomo ya Didace na ndimi zao zikaanza kucheza ndondi.
Ashukuriwe Mungu, eneo hili hawakuwepo watoto muda huu.

******

Moshi mwepesi wa sigara uliendelea kuunda mawingumawingu yaliyoeneza harufu iliyokera kwenye sebule hii.
Madam Sally akavuta funda jingine kubwa na kuitua sigara hii kwenye kisahani kilichokuwa pale mezani.
Akazikamata karatasi zile kwa umakini. Akazipindua moja baada ya nyingine, kisha akamtazama Bebe aliyekuwa amekaa kwa nidhamu, akivifikicha vidole vyake kwa aibu.
Kama ungepata nafasi ya kuwaona,ulikuwa ni mfano wa mzazi mwenye hasira anayesoma barua yenye maovu ya bintiye aliyoyafanya shuleni.
Akazitua nyaraka zile mezani na kuirejea upya sigara yake. Akaruhusu ukimya utawale kwa sekunde kumi.
"Nilichokisoma hapo kiko sahihi?" Akauliza akiwa amechotwa na hali ya utulivu. Utulivu ambao Bebe hakuutarajia asilani.
"Ni sahihi Madam...na pia-" Akakatishwa.
"Huyu mmliki wa kampuni ni nani?" Akaulizwa.
"Namba zake za mawasiliano ni hizi hapa..." Bebe akiwa amekereka akaitoa kadi ile yenye mawasiliano ya Didace Ambrozi.
Madam Sally hakuipokea.
"Sihitaji mawasiliano yake...mi nimekuuliza yeye ni nani. Au ni hii kadi imekupa huu mkataba?" Akauliza, bado yuko katika hali ileile ya utulivu. Anaongea kwa kujiamini na hana papara ya kuyamaliza maneno yake.

Bebe akapigwa na butwaa. Madam Sally aliyemtegemea sio huyu aliyekuwa mbele yake. Alitegemea muda huu awe tayari amecharuka, akifoka na kuzilaani kurasa zile, kama sio kuzichana kabisa!
"Ni yule Chief Dida!" Bebe akatamka na kuweka kituo, yuko tayari kupokea hukumu yoyote ile kutoka kinywani mwa Madam.
"Ooh kumbe ni Mheshimiwa." Madam Sally akakung'uta jivu refu kutoka kwenye sigara yake.
"Enhe tayari nimesoma kwani kuna jambo jingine labda?" Likawa swali la baridi mno kama barafu kwenda kwa Bebe.
Likawa gumu kumezeka, na koo la Bebe likawa gumu kwa sekunde kadhaa.

"Nd'o kama hivyo Madam! Nimepata kazi kwenye hio kampuni, nimekuja hapa unipe baraka zako tu...kisha uniruhusu niondoke!" Akatangaza hitaji lake katika namna ya kulazimisha.
Madam akatabasamu kisha ghafla akacheka kwa sauti, kicheko kile kikaungana na moshi uliokuwa unatambaa kwenye koo lake kuyatafuta mapafu, vikakishtua kifua chake na kumsababishia kikohozi kikali. Kikohozi cha kupaliwa.
Machozi nayo hayakuwa mbali, yakamtiririka kuashiria furaha yake ambayo nayo haikueleweka kama ni ya kweli au la.
Akayumba na kuketi vizuri kwenye kiti.

"Duuh! Hii kweli kali, kwamba unataka mimi huyu nikubariki. Enhe ni baraka gani hiyo ambayo mdomo wangu umewahi kumnenea mtu?" Akaacha swali lile lielee hewani. Akamuamuru Bebe ammiminie kinywaji kikali kwenye glasi ndogo iliyokuwa pale mezani. Akafanya hivyo.
Madam akaigida upesi glasi ya kinywaji kile huku akiukunja uso wake mpana kwa uchungu wa pombe ile kali.
"Niliyategemea haya!" Akatamka.
"Niliiona hii siku hapo kabla na nilitegemea kuwa itafika upesi." Akaweka pumziko huku akimtazama Bebe usoni, kisha akaendelea.
"Unataka ukaonekane kwenye matangazo mitandaoni na magazetini, mabango makubwa yakupambe...sura yako ionekane kwenye makopo ya vyakula madukani ukiwa unatabasamu au sio? Halafu ulipwe uishi maisha mema, si nd'o unataka?!" Akamuuliza swali huku akihangaika kuiwasha sigara yake nyingine. Bebe akamsaidia kisha akadakia,
"Hapana Madam! Nimechagua kuanza maisha mapya mama yangu. Nataka nipate kazi mpya ya yofauti na hiki nilichokuwa nakifanya. Sikulaumu kwa lolote, lakini nataka tu niwe huru. Labda na mimi nijitegemee, nitengeneze hela yangu halali kwa shughuli halali Madam!"
Bebe akajitetea kwa sauti nyonge ya kubembeleza.

Madam akavuta na kupumua mawingu kadhaa ya moshi wa sigara ile. Akatabasamu, "Hakuna hela ya halali binti yangu!" Akaweka pumziko kisha akaendelea,
"Wewe ni moja kati ya wasichana wangu wa shoka niliokuwa nawaamini sana. Uamuzi wako ni sahihi, lakini mimi siubariki.
Baraka yangu siku zote imegeuka laana kwa kila aliyekuja kuniaga kama ufanyavyo wewe. Na wala sikulaani, maana laana yangu ni sumu kali isiyo na dawa.
Nenda uko upendako, lakini hakika siku moja isiyo na jina, utanirudia hapa.
Na mimi sitakufungia milango maana hapa ni nyumbani kwako.
Haya Bebe mrembo wangu sogea hapa!"
Akaifutika sigara kwenye papi za midomo yake na kunyoosha mikono yake kama anayetaka kukumbatia hewa.

Bebe akamrukia upesi na kumkumbatia kwa nguvu. Kila mtu akayasikilizia mapigo ya moyo ya mwenzie, yalikuwa sawa.
Machozi ya kwa heri yakamtririka Bebe.
Walipolivunja kumbato lao, Bebe akajitahidi kuyaficha machozi yake ili yasionekane...alikuwa amechelewa.
"Usilie Frola! Siku zote machaguzi bora yanahitaji ufanye maamuzi magumu."

Kuitwa kwa jina lake hili la Frola kukamuamsha Bebe na kumrejeshea hali ya kujiamini. Akaelekea chumbani kwake na kukuta ule mkusanyiko wa mabinti kadhaa waliokuwa wakimsubiri, huzuni imezikusanya nyuso zao kwa pamoja na kuziinamisha chini.
Tayari walikuwa wanafahamu kila kitu kinachoendelea.

Akaingia ndani na kumalizia kukusanya kila kilicho chake. Mabinti kadhaa walioonekana wadogo zake kiumri na kiumbo, lakini waliopevuka, wakawa wanamsaidia kupaki vilivyo vyake kwa upendo.
"Dada Bebe! Utakuja tena kututembelea? Au utatusahau ukisha kuwa Staa." Mmoja wao akamuuliza.
"Jamani vipenzi hapa ni nyumbani kwangu. Sitoacha kuja kuwaona, nahaidi!" Kwa sauti ya kitetemeshi, Bebe akakiri.

Sharon ambaye alikuwa kimya muda wote akashindwa kuvumilia, akamrukia Bebe na kumkumbatia kwa nguvu. Kumbato lile halikuwa la kawaida.
Lilikuwa ni kama bomu lililotegwa na kusubiri mlipuko na myeyusho wa barafu za machozi zilizoganda machoni mwa kila aliyekuwapo chumbani humu.
Wote wakaingia kwenye ulimwengu wa kilio.

"Baby, usiende Baby! Nitabaki na nani mimi?" Sharon akalalamika kwa upole.
"Tu-tuko pamoja daima Shary, nipo na wewe daima. Unaweza usinione machoni lakini nipo na wewe rohoni."
"Hakuna neno linaloumiza zaidi, kama kusema kwaheri!"
Baada ya vilio na maagano ambayo yasingekoma bila ya Bebe kubeba sanduku lake na kuondoka haraka bila kuangalia nyuma, hata hivyo wale waliojipa majukumu ya wasindikizaji wakajitahidi kiwa naye sambamba.

Wakafika mpaka sebuleni.
Ilikuwa sebule kubwa, lakini jioni hii aliiona ndogo. Madam Sally alikuwa amejitanua kwenye sofa lake lililokuwa na uwezo wa kukaliwa na mtu mmoja pekee. Lilikuwa sofa la kifahari na lilitumika na yeye peke yake.
Ni yeye pekee ambaye hakuwa na dalili yoyote ile ya kudondosha machozi.

"Madam mie nd'o naondoka hivyo..." Bebe akapiga hatua taratibu huku akimtazama Madam.
"Nenda Bebe...lakini hawa wengine wasitoke humu ndani." Madam akatamka kwa sauti kavu lakini yenye urafiki. Mabinti wakaguna bila kutoa sauti,
Bebe akapokea mizigo yake na kuwageukia wenzie, akawapungia mkono wa kwa heri. Taratibu akizidiwa na uzito wa begi lile kubwa akakisogelea kitasa cha mlango.

"Lakini kamwe usisahau jambo moja!.." Sauti ya Madam ikaunguruma.
Bebe akageuka kumtazama kabla hajakipindua kitasa kile.
"Wewe ni kahaba!" Ilikuwa kauli tata lakini inayoeleweka.
"Siku utakayoharibu ama kuharibikiwa huko uendako, usisite kurejea hapa kuutafuta msaada. Mimi nitakuwepo kukusaidia binti yangu."
Bebe akatabasamu na kukipindua kitasa kile, mlango ukafunguka akatoka nje. Huenda aliondoka humu daima, akiwa na uhakika kuwa hatakaa akarudi ndani ya jumba hili la danguro kamwe. Alidhani hivyo!
Alipofika nje akageuka na kulitazama upya jumba lile kubwa. Akaliaga kisha akajikokota mpaka getini, hapo akakutana na msaada wa mzee Baraka, mlinzi mkongwe wa uzio wa nyumba ile.
Akasaidiwa mzigo ule mpaka nje kidogo ya eneo la nyumba ile. Wakaagana kwa ahadi nyingi zisizo na uhakika wa kuonana tena.

Bebe akalipekua jina lile lile la CHIEF DIDA na kumpigia simu ambayo haikuita muda mrefu kabla ya kupokelewa,
"Daddy niko tayari!" Alitamka hivyo.
Naam,
Rasmi Bebe akawa tayari kutazamana na dunia uso kwa uso.
Akawa tayari kuufungua ukurasa mpya wa kitabu cha maisha yake.
Dunia nayo ikawa tayari kumpokea na kumuonyesha kila kito cha thamani ilichomwandalia.
Huenda ni hivi vito vilivyo sababisha yaliyopaswa kutokea yatokee ili tu mkasa huu uwe wa kusisimua.
Huenda, huenda!

----------------

ITAENDELEA

 

[Godlove Kabati]

RIWAYA: KIBIRITINGOMA
Imeandikwa na GODLOVE KABATI
Maoni: 0763204351



SEHEMU YA SABA


Asikudanganye mtu,
Ukipata nafasi ya kufurahi we furahi.
Pia ukipata nafasi ya kucheka we cheka tu.
Furahia nyakati zako zote zilizo bora bila kujibania.
Kula vilivyo bora, kunywa vitamu, vaa vinavyonukia..
Maisha yetu ni mafupi sana na tunaishi mara moja tu.
Na hii ni sehemu ya saba



Akiwa chini ya Bwana Didace Ambrozi, Bebe alijiona kama kinda aliye chini ya mbawa salama.
Walau sasa hakuishi kwa kanuni na sheria za kupangiwa muda maalumu wa kuwa nje au ndani ya nyumba.
Bwana Didace Ambrozi akamlegezea kila kifungo kilichoonekana kuwa kigumu kwake.
Taratibu ubongo wake ukaanza kuzichana kurasa za maisha yake ya zamani.
Kwanza ni kwa nini azikumbuke?
Ulikuwa ni wakati wa kuishi maisha mapya na kutengeneza barabara nyoofu.
Bebe akapewa nyumba na gari la kutembelea. Hakujua vilitoka wapi lakini Bwana Didace alimdokeza kuwa ni vya kampuni.

Hakukuwa na pingamizi lolote lile kutoka kwa uongozi wa kampuni baada ya kumuona Bebe, kama alivyopendekezwa na bwana Didace Ambrozi. Badala yake wanaume wote waliachwa vinywa wazi na wanawake wakajichukia na kujiona wana mapungufu katika uumbaji wao licha ya kujipara kwa vipodozi vya bei ghali.
Huyu hapa!
Akatambulishwa kama Frola mbele yao.
Jina lake la Bebe likapigwa teke na kusukumiwa kapuni.
Upesi Bwana Didace na uongozi wa kampuni hii wakamsainisha mkataba na rasmi akawa kama muigizaji wa matangazo ya bidhaa zao kwa njia ya video na picha.
Kilichofuata hapo ni historia!

Achana na matangazo ya vyakula, mafuta na makopo ya siagi yaliyokuwa yakitangazwa kwa juhudi kubwa kwenye vipindi mbalimbali vya televisheni, mabango makubwa barabarani na kwenye majukwaa makubwa mitandaoni.
Habari iliyokuwa ya kusisimua zaidi ni yule mlimbwende aliyekuwa akitamka maneno ya kuzitangaza bidhaa hizo.

Kila mtu alivutiwa sana na sura yake iliyoneemeshwa kwa mpangilio maridhawa, sauti yake nyororo ya kinanda, umbo lake la kuvutia na kilichohamasisha zaidi ni lile tabasamu lake la kupagawisha.
Tabasamu lililoyaacha meno yake meupe yaonekane namna yalivyopangiliwa kwa ustadi na kuuacha ule mwanya wake katikati.

Inasemekana kuwa aliwahi kutokea Mhubiri hapo kale kwenye maandiko matakatifu akadai kuwa, kila kitu kina muda wake.
Basi huu ulikuwa ni muda sahihi wa kampuni hii kubwa ya CHIVIHI & KABATI COMPANY LIMITED kuwa kwenye kilele cha ubora wake.
Bidhaa zake zikasifika zaidi kwa ubora na zikatembea sokoni kwa kasi ya ajabu.
Daima zilibeba ile sura ya Bebe iliyochora tabasamu murua....tabasamu lililozifanya bidhaa hizi kuwa chapa ya moto sokoni.

--------

"Madam! Madam! Si dada Bebe huyu?!" Binti kigori katika danguro la Madam Sally, alikurupuka na kumvamia Madam sebuleni akimuonesha kopo la nyama za kusaga zilizokuwa na picha Bebe anayetabasamu.
"Ni yeye..." akajibu kwa ufupi na kurejea kuvuta sigara yake.
"Waooo! Amekuwa karembo, jamooon!" Binti yule akiwa kwenye kilele cha furaha yake baada ya kuona picha ile akaligeuza geuza kopo lile kumuonesha Sharon, ambaye naye alikuwa sebuleni pale na Madam. Macho yake yaliendelea kuwaka kwa bashasha.

"Hebu kapike hukooo! Matumbo yanauma njaa hapa!" Madam akafoka akiwa na kisirani.

Binti yule akaondoka upesi kwa woga kuelekea jikoni alikotokea.
Huku sebuleni akamuacha Madam Sally akiwa mwingi wa maswali yasiyoweza kujibiwa kwa urahisi na akili yake iliyochafuliwa kwa bange na sigara.
"Matangazo! Matangazo!...Matangazo yamekuwa matangazo sasa humu ndani." Akatamka bila kumuangalia Sharon usoni. Akagida pombe kali iliyokuwa kwenye chupa katika namna ya kupiga tarumbeta.
Alikuwa kwenye starehe yake ya kila siku, pombe na sigara.

Akayahamishia macho yake kwenye ile sigara aliyokuwa akiivuta, akatumia dakika nzima kutazama namna inavyoteketea na mkia wake kugeuka jivu refu. Chumba cha sebule hii kililazimishwa kuzoea giza la kadri, kama alivyotaka yeye mwenyewe.
Aliuchukia mwanga, alipendelea sana kumezwa na giza.
"Ina maana moshi wote huu unaishia kwenye kifua changu tu? Walahi hawa wazungu watatumaliza." Akatamka peke yake kisha akalisaga jivu lile kwenye kisahani kidogo, akiketi vyema.
"Mmh Madam....wazungu wanahusikaje tena hapo? Si bidhaa ya Tanzania hii?" Sharon akamkosoa.

"Lakini wanatuambia wenyewe, kuwa tuvute kwa ustaarabu...halafu walivyo wanafiki, kwenye tangazo hilohilo wanatuonya kuwa uvutaji wa sigara ni hatari kwa afya!
Kwa lugha nyepesi hapa inamaanisha kuwa wanatuuzia hatari halafu wanatubembeleza tuitumie kwa ustaarabu." Madam akatamka kisha akatupa jicho lake sakafuni. Sakafu ilikuwa imechafuka kwa majivu na vipande lukuki vya sigara. Zote zikiwa zimeteketezwa na yeye mwenyewe.
Akashusha pumzi kwa nguvu,

"Nd'o hawahawa kina Bebe. Wanaigiza kututangazia bidhaa zao kuwa ni rafiki kwa matumizi ya wanadamu, kumbe zimejaa makemikali na sumu!" Akatema mate chini kwa hasira.
Sharon hakumjibu kitu, alikuwa amemzoea Madam katika hali zake zote mbili, wakati anaokuwa timamu na wakati anaokuwa amechanganyikiwa.
Yeye akaendelea kuchezea simu yake.

Madam akasimama huku anayumba. Akamtazama Sharon usoni kwa muda mrefu kama anayetaka kumwambia kitu alichokisahau. Kisha ghafla katika kigiza kile cha ndani ya sebule, macho yake yakaonekana kama yanayong'aa kwa machozi.

"Niambie Sharon....wewe utaondoka lini?"
Lilikuwa ni swali lililobeba hisia za kukata tamaa usoni mwa Madam Sally aliyelewa.
Sharon akalitambua hilo.
Akaacha mara moja kuichezea simu yake ya kupangusa.
"Utaondoka lini Sharon?" Safari hii Madam Bebe alikuwa akitokwa na machozi.
Sharon akasimama na kumfikia akimtuliza na kumfariji.
Madam Sally, akalia kama mtoto mdogo.
"Hana shukrani mwanaharamu yule...ameniacha na hajawahi kurudi walau kutoa salamu. Salamu tu, ameshindwa kutoa. Anataka tumuone kwenye makopo na mikebe ya maziwa?.."
Madam akalalamika akilia, yumo ndani ya mikono ya Sharon iliyomkumbatia kifuani mwake.
Sharon akatambua wazi kuwa japokuwa Madam Sally, alizuga kutoshtushwa na kuondoka kwa Bebe, bado alimpenda na kumthamini sana.
Ni kweli,
Alikuwa sahihi...maana pombe huongea yale yaliyo moyoni. Mlevi hadanganyi!

---------

Aligeuka lulu inayong'ara gizani,
Bebe akajizolea umaarufu mkubwa nchini Tanzania na baadhi ya nchi za Afrika Mashariki.
Maisha yakatabasamu upande wake. Ile bahati aliyokuwa akiitafuta siku zote asiipate, sasa ilikuwa inamuwinda yenyewe kwa mikuki na mishale.

"Imetosha sasa...imetosha, Mungu bariki na wengine! Kwangu imetosha Heheheheh!" Cheko hili likafuatiwa na kugonganishwa kwa glasi mbili za vinywaji bora vya bei ghali, vinavyopatikana kwenye hoteli hii kubwa yenye hadhi ya nyota tano.
"Kama wewe umeridhika na baraka zako, sawa...ila mimi bado. Aendelee kuzimimina tu." Akatamka Frola.
Akiwa na Bwana Didace Ambrozi wakijipongeza kwa vinywaji.
Ghafla wakatokea watoto watatu waliokuwa na wazazi wao, walionekana kuwa nasaba bora ya kitajiri.
Watoto wakalilia kupiga picha na Bebe wakiigiza msemo wake maarufu kama asemavyo kwenye televisheni.
"Mommy, mommy nipe simu...nikapige picha na yule Anty wa Yoghurt kwenye TV!" walilalamika.

Frola akatabasamu na kupiga nao picha upesi kabla hajarejea mezani pale kuendelea na mazungumzo.
"Naam, nilitaka nikuambie kuwa kampuni yetu imepokea ofa kadhaa zinazokuhitaji ukahusike kwenye matangazo ya bidhaa zao. Nimeona haitakuwa vyema kama tukifanya maamuzi ya moja kwa moja katika ngazi za juu, bila ya kufahamu mapokeo yako wewe kama mlengwa!"
Didace akatamka kwa kujiamini, akiwa ametulia anatazamana uso kwa uso na Frola.
Likapita kundi jingine la watu walioonekana kuwa mashabiki wa Frola.
Kama kawaida, wakamsifia na wengine wakadai picha.
Bila hiyana Frola akawajali.

"Nadhani tutoke nje!" Akiwa amekereka, Didace akatangaza haja yake, baada ya kuona kero za mashabiki wa mara kwa mara.
Amekuwa maarufu kuliko wamiliki!
"Utanikuta pale nje, bustanini!" Akamaliza na kutangulia nje.
Frola akiwa kwenye harakati za kutoka nje, mlangoni akapigwa kikumbo cha ghafla na kijana asiyemtambua.
Alikuwa kijana mtanashati ambaye waliparamiana bila kukusudia. Ule mkoba uliokuwa na vitu vyake ukaanguka na vitu vikazagaa sakafuni.

Kijana yule akajiwahi,
"Ooh sorry!" Akachutama na kuanza kuokota vitu vyake kwa kasi akivipakia mkobani.
Frola naye akajishughulisha kumuomba radhi akiwa mwingi wa aibu, anatamani watu wasione kilichotokea. Hawezi kuinama maana vazi lake halimruhusu kuinama na akabaki kwenye stara.
Kijana yule akainuka taratibu na kumpatia mkoba wake, alipomtazama usoni tu akagundua kuwa huyu ni yuleyule Frola maarufu.

"Ayaaa, kumbe ni wewe! Aisee, leo nina bahati sana bwana." Kijana akamchangamkia na kumuomba radhi kwa kilichotokea.
Frola hakutilia maanani sifa zake kijana yule, alikuwa mwemye haraka na alitamani aondoke pale mara moja.
Kama kawaida kijana yule alimuomba picha ya pamoja, Frola akakubali kishingo upande na baada ya hapo akaondoka upesi kumuwahi bwana Didace Ambrozi.

Huyu kijana aliendelea kubaki na tabasamu usoni mwake, kisha taratibu likafifia na mara sura yake ikakakamaa na kuwa makini na picha ile aliyopiga na Frola kutumia simu yake.
"Kwisha habari yako!" Akatamka, kisha akaifutika simu ile mfukoni.
Akavaa vyema sweta lake aina ya hood katika namna ya kukificha kichwa chake. Akageuka alikotokea na kutoka nje ya hoteli hii.
Anaonekana kufahamu anachokifanya...labda alichokifanya baada ya kukutana na Frola.
Huyooo, akatokomea kwenye vichochoro vya mitaa ya jiji la Dar!
Huyu kijana si mwingine,
Bali ni Jumanne Maliki, almaarufu kama J4.

 

[Godlove Kabati]

KIBIRITINGOMA

SEHEMU YA NANE


Yale maovu yote yafanyikayo gizani, huumbuliwa hadharani kwenye mwangaza mweupe.
Ulimwengu umeumbwa katika namna ya ukweli kushinda daima.
Haijalishi ni kwa wakati gani, kama utachelewa au la.
Uongo haujawahi kusimama mbele ya ukweli.
Na hii ni sehemu ya nane...



"Naam, kama nilivyokueleza. Tumepokea ofa nyingi za mashirika, kampuni na watu binafsi wanaokuhitaji kwa ajili ya matangazo yao." Bwana Didas akatamka huku akimakinika na baadhi ya nyaraka alizokuwa nazo mkononi. Yeye na Bebe wameshafika nje ya hoteli kuepusha usumbufu wa mashabiki na adha zisizohitajika.
"Na kama ujuavyo, wewe sa'hivi ni mtu huru. Unayo maamuzi ya kufanya kitu chochote unachokitaka. Haya, kuna hizi hapa..." akamkabidhi nyaraka zile ili azisome.

Bebe akazipekua upesi upesi bila kuzitilia maanani. Akatabasamu na kutikisa kichwa katika namna ya kukubali.
"Ni sawa tu Daddy. Sina pingamizi!" Akazipanga na kumrudishia bwana Didas.
"Ina...ina maana umekubali au? Ume...umezisoma zote kweli?" Didas akahoji kwa kubabaika.
"Sasa kwa nini nikatae? Maana hapo kwenye kila ofa kuna malipo mazuri. Na hili ni suala litakalotufaidisha sisi sote, mimi na kampuni." Bebe akamaliza kwa kutabasamu.
Tabasamu lililomuambukiza Didas, naye akatabasamu pia, tabasamu la kuigiza lililoambatana na wasiwasi.
Alichokitamka Bebe kilimuonesha waziwazi, faida iliyokuwa mezani mara tu Bebe atakapokodiwa na kampuni nyingine kutoka kwao. Hofu aliyokuwa nayo ni endapo tu Bebe atapata ofa kubwa zaidi itakayomtangazia malipo ya kiwango cha juu kuizidi kampuni yake.
Huenda huo ndio ukawa mkono wa kwa heri kwake na akampoteza Bebe moja kwa moja. Tabasamu lake likayeyuka mara moja alipolifikiria hili.
Akahamishia macho yake kwenye zile karatasi na barua zilizokuwa mkononi mwake. Akajitia kuzisoma upya...akatishika.
Hakika kurasa za mikataba hii zilifoka utajiri wa pesa za kutosha.
Pesa zenye uzito wa kupasua mizani.
Ni kweli kampuni ingefaidika kama tu Bebe akikubali ofa hizi, lakini kwake yeye hakuwa na hitaji la pesa wala utajiri.
Hivi ni vitu alivyojenga navyo urafiki tangu zamani. Anataka nini sasa?
Jibu lake likawa jepesi tu...Bebe.
Huyu hapa aliye mbele yake. Alitamani amtunze na awe karibu yake daima! Na hapa akayarudisha upya macho yake usoni kwa binti huyu mrembo aliyekuwa bado ana cheche za lile tabasamu lake.
Didas akatabasamu upya na kutamka,
"Nakupenda sana Bebe!"
Zile cheche zikasuguana na kuunda moto mpya wa tabasamu usoni kwa Bebe.
"Nakupenda pia!" Akamjibu na kumsogelea karibu zaidi.
Wakakumbatiana na papi za midomo yao zikagusana,
Zikaruhusu ndimi zao kupinduana,
Wakajitahidi kujizuia, si wakashindwa bwana!
Joto la miili yao likapanda bila hiyana,
Kila mtu na ashiki yake, tayari kupambana,

"Si hapa Daddy..." Bebe akamsukuma kwa upole. Huku akiyalegeza macho yake.
Jasho lilianza kumvuja Didas akiwa anahema juujuu. Macho yake yanapepesa huku na kule, wasiwasi na aibu vimemvamia kwa nguvu.
"Hii si hoteli hii? Ngoja nikalipie chumba." Akajiwahi.
Haooo....wakazama ndani ya hoteli ya nyota tano. Ikamlazimu Didas ateketeze mamilioni ya fedha, kwa ajili ya burudani ya usiku mmoja tu akiwa na Bebe.
Madaraja ya maisha!

-------------

Akiwa mbele ya kompyuta yake ndogo, J4 alikuwa makini sana na kila kitu ambacho kilikuwa kinaendelea kwenye skrini ya kompyuta hii.
Sikio lake linayanasa mawimbi ya sauti na macho yake yana na umakini mkubwa kuzitazama picha zote anazoweza kuziona mbele yake.
Mkono wake wa kushoto ulikuwa na kalamu na kando yake palikuwa na kidaftari kidogo alichokuwa anaandika kila taarifa aliyoipokea na kuipa umuhimu katika shughuli hii.
Ni shughuli gani?
Anajua mwenyewe.
Mara anakunja ndita na kuihamishia kalamu ile mdomoni kwa dakika kadhaa. Kisha anaendelea kuandika.

Ghafla simu yake ya mkononi ikaita. Jina la aliyempigia lilisomeka kama D, akatabasamu. Ni yuleyule swahibu wake mkubwa- Dotto.
Kabla hajaipokea, akasimamisha shughuli zake kwenye kompyuta, alimuelewa sana huyu rafiki yake.
"Kama hana mchongo wa hela ya haraka huko kwenye ulanguzi wake huyu....basi ni wanawake." Akawaza na kuipokea upesi simu ile.
Kama kawaida zikaanza salamu zilizoambatana na matusi ambayo daima yalinyimwa uzito wa kuitwa matusi na yakapewa uzito wa salamu ya kawaida.
Maongezi yao yakaendelea kisha mara D akauliza swali ambalo lilimrejesha J4 kwenye uso wa kompyuta ile.
"Vipi kuhusu yule demu wako mzee...umefikia wapi sasa?"
"Duh kaka, kuna ramani moja kali ninaichora hapa, yule atanasa tu. Hutaamini bro, we tulia!" J4 akarekebisha upya video zake alizokuwa akizitazama pale kwenye skrini ya kompyuta yake.
"Aah wapi, wewe mzito sana mdogo wangu ile pisi ni ya viwango vya kimataifa!" D akatania huku akitokwa na cheko la dharau.
"Hautaamini bro...nitakushangaza!" J4 akamjibu huku akiwa bado anapekua faili ambalo alikuwa liliuvutia umakini wake.
"Yule ukimpata nitatembea uchi mitaa yote ya Manzese." D akatamba.
"Hebu sikilizia kwanza bro...kata simu chap! Kuna kitu hapa nimekiona!" J4 akamshtua D.
"Umeona nini dogo? Umeo-"
Alikuwa suala la kusubiri simu ikatwe, akaikata mwenyewe.
J4 akainama na kuitazama skrini ya kompyuta ile kwa umakini zaidi, kuliko ule wa awali. Lilikuwepo faili la video ambalo alikuwa analisubiri kwa muda mrefu. Akalifungua.
Hamadi!
Alichokiona kilimkurupua mara moja kutoka kwenye kiti chake. Akasimama na kutupa ngumi ya ushindi hewani.
Huenda huu ulikuwa ni wakati bora zaidi aliokuwa akiusubiri kwa hamu kubwa.
Upesi akarejea kwenye kompyuta yake na kucharaza maneno kadhaa ambayo yalilihifadhi faili hili kwa upekee wake peke yake.
"Nitawashangaza!" Akatamka na kucheka kwa sauti.
Sauti iliyopenya kwenye giza la chumba kile chenye mwanga hafifu, ikadunda kwenye kuta na kuishia mulemule chumbani.
Ni siri yake.

--------------

Ilikuwa ni siku njema iliyoanza kuonekana tangu asubuhi kama wasemavyo wahenga. Haikuzoeleka hivi kwa Bwana Didas hata kidogo.
Asubuhi hii aliamshwa kwa upendo na mke wake wa ndoa, akaandaliwa chai nzito ambayo alishiriki pamoja na familia yake mezani.
Mkewe akamkumbusha kuwa bado anampenda. Akambebea briefcase lake mpaka kwenye gari, kisha akamuaga kwa busu zito na kumbato la huba.
Ajabu hii!
Hivi vitu mara ya mwisho kufanyiwa na mkewe hakumbuki ilikuwa ni lini...ama yeye mwenyewe aliruhusu atendewe hivi lini? Hakumbuki.
Alizoea kulumbana na mkewe, hakuwa na muda wa kukaa na familia yake. Daima alidai kuwa amezikumbatia shughuli za ofisini ili ailishe familia yake.
Sasa mambo yalikuwa yametakata, madirisha ya neema yamemfungukia na maendeleo yanagombana kuishi naye.
Didas akameza funda la mate na kuondoka akiwa mchangamfu mno.
"Kuna nini leo?" Alijiuliza.
Hata barabarani hakukuwa na foleni kama alivyotarajia.

Akafika ofisini mapema, yeye kama mkurugenzi siku hii akawa mfano bora wa kuigwa. Alifika hata kabla ya karani wake.
Siku hii hakuwa na mafaili ya kushughulikia zaidi ya kusaini fedha kadha wa kadha zinazoingia kama faida.
Ilikuwa ni zaidi ya neema.
Bwana Didas akafumba macho yake na kutabasamu. Kila alipoyafikiria mafanikio, jina Bebe likatangulia.
Bebe alikuwa ni ufunguo wa kila kitu alichokuwa akihitaji kwenye maisha yake.
Akasimama na kutoka nje ya ofisi yake, akahesabu hatua zake akiwa mwingi wa furaha mpaka kwenye roshani iliyokuwa katika ghorofa ile. Hapa aliweza kuyatazama majengo kadhaa ya jiji la Dar es Salaam na pilikapilika zilizokuwa zinaendelea ndani yake.
Akaifikiria fahari yake iliyomjia katika namna ya ajabu na haraka tangu amemfahamu Bebe.

Akiwa kwenye fikra hii, simu yake ikaita na alipoitazama ilikuwa ni namba ngeni iliyompigia.
Akafikiria kuipuuza lakini akachelea kuwa huenda ni mteja ama ofa mpya inabisha hodi.
"Namna gani bwana...mbona namba ya simu ya mezani inajulikana? Eboh!" Akasonya na kuipokea akiwa amekunja sura.
Hakuzungumza kwanza, akasikilizia upande wa pili uliopiga.
"Bwana Didas habari yako!"
Ilikuwa sauti ya kiume, iliyojaa ubichi. Angeweza kuidai salamu kama akitaka.
"Salama! Naongea na nani?" Akajibu kwa kifupi.
"Utanifahamu tu kiongozi wala usiwe na haraka. Nina ujumbe wako tu hapa, ambao-" akakatishwa.
"Mimi unanifahamu hongera kwa hilo. Lakini mimi bado sijakufahamu. Kama huwezi kujitambulisha sina haja ya kuzungumza na wewe!" Akataka kukata simu lakini akagundua kuwa hawezi kuikata.
"Taratibu kiongozi taratibu...haya maongezi ni yangu mimi na wewe tu. Hakuna mtu anayesikia wala anayeweza kuyafikia, kuwa na amani kabisa."
Sauti ile ya kijana wa kiume ikarindima.
"Wewe ni nani kijana?" Didas akauliza baada ya kuona jitihada za kukata simu ile zimeshindikana.
"Utanifahamu hivi punde tu wala usijali. Hii simu huwezi kuikata, unachotakiwa kufanya sasa hivi ni kufungua mtandao wako wa WhatsApp na kutazama ujumbe niliokutumia. Baada ya hapo nitafute kabla ya adhana ya saa saba! Shime.."
Simu ile ikakatwa.

"Kelbu!" Didas akarusha tusi.
"Hii mihadarati na bange vitakuja kutuharibia taifa." Akaweka nukta.
Moyo wake ukadunda kwa nguvu baada ya kukumbuka maelekezo aliyopewa.
Upesi akaingia katika mtandao wa WhatsApp na kupekua jumbe kadha wa kadha zilizoingia hivi punde.
Kweli, akaona ujumbe kutoka kwa namba ngeni. Akaufungua!
Lilikuwa ni faili dogo tu la video lililoambatana na ujumbe,
"Hiki ni kipande kidogo tu cha keki nzima!" Akaufungua ujumbe ule.
Ilikuwa ni video...mara ghafla zikasikika sauti za miguno ya mahaba!
Akapunguza sauti ya simu upesi akihofia sauti ile kusikika na watu.
"Kijana mjinga sana huyu, anafikiri kila mtu anapenda hizi video za uchafu?"
Akatazama vizuri, ilikuwa ni video iliyounganishwa katika namna isiyoeleweka kamera ilikuwa upande gani.
"Kina nani hawa?"
Akakaza macho yake.
Alikuwa ni yeye na Bebe.


ITAENDELEA....

 

[Godlove Kabati]

KIBIRITINGOMA
Ya: Godlove Kabati


SEHEMU YA TISA


Usijidaganye...
Siri ni ya mtu mmoja tu.
Ikiwa ya wawili hiyo siyo siri tena, itatambaa kwa kasi ya ajabu...ikiwa na onyo lilelile la "Usimwambie mtu, hata mimi nimeambiwa nisiseme."
Hii ni sehemu ya tisa.

TAHARUKI!
Aliyafikicha macho yake kwa viganja vya mikono yake ili ajihakikishie kuwa ile sio ndoto. Kisha akaigeuza ile simu ili aone kama ni ya kwake au labda ni ya mtu mwingine. Nayo ikawa ni kama inamwonya kuwa chondechonde, asiikane. Akaitambua kuwa ni simu yake.
Hayo hayakutosha.
Akaitazama video ile kwa mara nyingine. Mara ya nne.
Akajihakikishia kuwa hawa viumbe wanaopinduana kwenye video hii anawatambua. Huyu wa kiume hakumtambua kwa sura na majina tu, alimtambua mpaka kiroho na kimwili.
Alikuwa ni yeye mwenyewe.

Didas akajipapasa mfukoni mwake na kutoa leso. Huku akiitazama simu yake, akajipangusa matone ya jasho yaliyokuwa yameanza kuota kimafungu kwenye paji la uso wake. Yakatengeneza michirizi kwenye shingo lake.
Simu ikamponyoka na kuanguka sakafuni. Hapa akagundua kuwa hata mwili wake ulimtetemeka sana, ni kama ulioshtushwa na video hii ya ajabu.
Akainama na kuikota upesi akichelea kuonekana na mtu yeyote eneo lile licha ya kwamba alikuwa peke yake eneo hili.
Asubuhi hii ya saa tatu kasoro, joto la mwili likamzidia. Koti la suti yake nadhifu akaliona kama mzigo mkubwa wa kilo hamsini juu ya mwili wake, akalivua.
Tai yake shingoni akaiona kama kitanzi kilicho tayari kumpa mkataba wa kuiaga dunia, akailegeza katika namna ya haraka mpaka akaichomoa katika fundo lake.
Didas alibabaika.

Eneo lile ambalo dakika kadhaa nyuma aliliamini kama eneo lake bora kwa ajili ya mapumziko, akaliona sio salama tena.
Simu yake akaiona kama bomu ambalo muda wowote linaweza kulipuka kama tu ikiwa mkononi mwa watu wengine. Akaitia kwenye mfuko wa suruali lake kwa umakini mkubwa kisha akapiga hatua kubwa kubwa kukitafuta chumba cha ofisi yake.
Njia nzima kuelekea ofisini mwake, macho yake ni kama yametiwa kiwi. Hakuona wala kutambua mtu au kitu chochote.
Wafanyakazi wakamshangaa,
"Bosi amekuwaje tena?" Waliulizana na hakuna aliyekuwa na majibu.
Siku hii Didas alionekana kuwa wa tofauti kwao kuanzia asubuhi.
Aliwahi mapema kabla yao, alikuwa mwenye tabasamu na bashasha tele usoni na alikuwa mchangamfu mno kuliko walivyomzoea.
Lakini ajabu ndani ya kipimo cha masaa mawili kama sio moja, Bosi wao Didas huyu hapa amebadilika.
Miguu yake inapishana kwa kasi koridoni. Anahema juu juu, koti mkononi, tai imemlegea shingoni.
Didas amepagawa!

"Sipokei simu wala mtu yeyote kuanzia muda huu. Nina kazi ya maana sana naifanya ofisini, sitaki usumbufu!" Yalikuwa ni maagizo yaliyotolewa na sauti inayoamrisha kutoka kwa Didas kwenda kwa karani wake.
"Sawa bo-" Hakusubiri jibu. Upesi akauvamia mlango wa ofisi yake na kuzama ndani, kisha akaubamiza mlango kwa nguvu na kitasa kikasikika kikitekenywa na ufunguo kwa ndani.
"Kha! Kulikoni tena?" Karani huyu mrembo wa kike ,akapigwa na butwaa.

Huko ndani, Didas akazima kila kifaa cha umeme alichokiona kwa hofu ya kuvujisha kile anachotaka kukifanya, safari hii hakutaka kufanya makosa.
Akaikagua ofisi yake kwa umakini akihofia kuwa labda kuna vinasa sauti vilivyotegwa, visije vikamtia upya majaribuni.
Aliogopa sana. Akamuogopa sana yule mtu aliyempigia simu na kumpa maelekezo kama haya yaliyoambatana na hii video ya aibu.
"Ameturekodi muda gani huyu hayawani?" Akajiuliza yeye na nafsi yake.
Kabla hajaanza kugawanya lawama, akajipa dakika chache za kukaa na kutafakari.
Akiwa ameketi juu ya kiti chake kikubwa kinachonesa, ambacho muda huu kilikiwa kigumu kama chuma, akavua shati na kubaki na fulana.
"Labda pale hotelini walitufanyia uhuni? Au...walitega kamera kwenye koti langu? Au Bebe...hebu ngoja!"
Akaipekua orodha ya namba za mawasiliano kwenye simu yake, akitafuta namba ya Bebe. Akampigia, simu yake haikupokelewa. Akampigia mara ya pili, ya tatu na ya nne bila mafanikio.
"Shit!"
Akasonya na kupiga ngumi juu ya meza yake kwa nguvu. Akiwa kwenye taharuki, akajikuna kidevu chake kilichosheni ndevu nyingi.
Fikra zake zikapaa na kumuonesha kila rangi ya hatari ambayo hakuwahi kuomba imkute maishani mwake.

"Hiki ni kipande kidogo tu cha keki nzima." akausoma upya ule ujumbe ulioambatana na video ile. Safari hii aliuona ni kama umeandikwa kwa mwandiko wa kishetani, na aliyeuandika anamcheka kwa dharau.
Didaa akatetemeka kwa hofu.
"Ni kipande cha keki. Labda ipo au zipo ndefu zaidi ya hapa. Labda huyu jamaa video zangu za siku nyingi, hata kabla ya hii ya jana." Akatamka kwa huzuni.
"Vipi...vipi kama akizitundika video zote mitandaoni na watu wa rika zote wazione. Nitaweka wapi sura yangu mimi Dida?!" Akahamishia mikono yake kichwani. Kumbukumbu zake zikamsulubu, zikimkumbusha matukio na matendo yake yote maovu aliyoyafanya na Bebe.
Chozi likamdondoka!
Akafikiria namna atakavyoaibika, namna atakavyoichafua sura ya kampuni. Akaona waziwazi atakavyoporomosha soko la bidhaa zao, atakavyouangusha ufalme wa biashara uliojengwa kwa muda mrefu tena kwa jasho, machozi na damu.
"Eeh Mungu wangu!" Macho yake yakawa ya moto kwa machozi. Alikuwa na muda mrefu tangu ametoa machozi, lakini leo hii hofu ya matokeo ya kumbukumbu ya dhambi zake za nyuma, inamtoa machozi.
Alipokumbuka kuwa hata mwanaye mkubwa Junior ana simu janja aliyompatia kama zawadi, Didas Ambrozi akahama kutoka kwenye kiti na kuchutama sakafuni.

"Shenzi kabisa!" Akafoka kimyakimya.
"Mtoto mdogo kama yule anamiliki vipi simu ya mkononi?" Haikujulikana kama anamlaumu mwanaye au anajilaumu yeye mwenyewe aliyempatia. Mwanaye ambaye nd'o kwanza yuko elimu ya msingi, darasa la sita.
Tena ni mjuvi na mtundu wa kuperuzi kwenye mitandao ya kijamii. Hakuna kurasa yoyote ya watu maarufu ambayo hakuijua.
Didas siku zote alichekelea na kudai kuwa hiki ni kizazi kipya, kizazi cha teknolojia, hivyo haoni kosa la mtoto mdogo kuijua mitandao na kuitumia.
Alichoka!
Fikra hii ikaambatana moja kwa moja na matokeo baada ya mkewe kuiona video hii ambayo aliitafsiri kuwa ni video chafu. Kwa nini hakukifikiria kitendo kile alichokifanya kuwa kichafu na badala yake aichafue video? Alijua mwenyewe.
Kwa mara nyingine akaona kuwa huenda hii ikawa hoja kubwa na yenye mashiko kwa mkewe anayelumbana naye kila uchwao.
Akaifikiria heshima aliyojijengea katika kanisa lake la kiinjili analoabudia, heshima na busara zake vikampatia cheo cha kuitwa mzee wa kanisa.
Hamadi!
"Nitapoteza kila kitu!" Akatamka kwa sauti ya chini huku akipambana kulifuta jasho usoni mwake.
"Kwamba magazeti yataaandika, SAKATA LA MREMBO FROLA NA BOSI WAKE LAITETEMESHA DAR." Akawaza.

Hakutaka kusubiri mashambulizi haya ya kushtukiza yamfuate alipo...
Akaamua kujihami kwa silaha alizo nazo. Na silaha yake kubwa aliyoitegemea muda huu ni pesa.
"Anataka fedha huyu. Aseme kiasi chochotekile anachokitaka nitampatia! Ili mradi tu, aniondolee hii aibu!"
Akaamua aipigie namba ya mtu yule asiyemfahamu.
Ikapokelewa upesi.
Akaanza kujitetea mara moja,
"Nakusikiliza wewe. Niambie unataka nikulipe sh'ngapi? Nitajie kiasi unachokitaka tuyamalize." Akatamka kwa jazba iliyochanganyikana na woga.
"Kunilipa? Kiasi? Sielewi unaongelea nini mzee wangu." Katika namna isiyotegemewa sauti ile ikajibu kwa utulivu.
"Come on! Nisikilize kijana...usitake kushupaza shingo yako bwana. Ni matarajio yangu kuwa unaelewa ni nini namaanisha. Tafadhali, niambie unataka kiasi gani tuimalize hii kesi." Didas akirejea taratibu juu ya kiti chake akarusha karata yake nyingine.
"Mzee...mimi nimebahatika kukufahamu japo kwa jina, lakini wewe hunijui. Nimefanya wema wa kukutumia kipande cha keki tufaidi pamoja. Na nikakueleza kuwa uniafute ili tujadiliane juu ya ladha yake, hivyo tu!" Akamalizia sentensi yake akiwa na cheko la dharau.
Didas akazidi kuchanganyikiwa, akatoka kwenye kiti chake kwa mara nyingine, akaanza kutembea akizunguka zunguka mule ndani. Alitamani amjibu kwa kumrushia matusi mazito lakini wakati huu alihitajika awe mjinga na mnyonge, akachagua kubaki kimya.
"Nisikilize mzee wangu..." sauti ile ikatangaza ubabe.
"Maelekezo yote atakupatia huyo malaya wako. Ni maelekezo yanayohitaji utekelezaji wa haraka, mna siku moja tu. Ama sivyo vyombo vya habari na mitandao vitapata habari mpya inayovutia!" Sauti ile ya kukoroma ikaweka kituo na simu ikakatwa!

Moyo wa Didas ukaruka mapigo kadhaa baada ya kusikia maneno yale. Kwa mara ya kwanza maishani mwake akamuweka Bebe katika orodha ya viumbe hatarishi wa kuogopwa. Akawa na asilimia zilizotosha kuvunja imani yake kwake.
"Kumbe anahusika!" Donge kubwa la hasira likajiunda kifuani mwake.
Akiwa harakati za kuvaa upya mavazi yake ili aondoke ofisini mule, simu yake ikaita.
Mpigaji sio mwingine bali ni Bebe. Akashusha pumzi na kuitazama simu ile. Akaipokea akiwa anatukana matusi mengi kimoyomoyo.
Lakini ajabu!
Akapokelewa na sauti ya kilio na malalamiko.

"Daddy...tuna siku moja tu Daddy!" Bebe alikuwa analia na kuomboleza. Achana na kilio chake wala maombolezo yake. Kilichomzuzua Didas ni ile sauti nzuri na tamu ya Bebe, hasa akiwa kwenye kilio.
Hata kama angekuwa anaigiza, kilio chake kingetosha kabisa kumpa msamaha na akauepuka moto wa milele.
"Kuna nini Bebe? Mbo..mbona unalia eh?" Didas anazuga haelewi kinachoendelea, amevaa ujasiri bandia wa kiume.
"Ametupa siku moja tu mpenzi wangu...siku moja tu!" Kitendo cha kuitwa mpenzi kikawa kama msumari wa moto kwenye kifua cha ujasiri wa Didas.
Akasahau hasira yake yote aliyokuwa nayo dhidi ya Bebe. Akachukua jukumu la kumbembeleza na kumuondoloea hofu.
"Usijali kipenzi...kila kitu kitakuwa sawa. Hili nitalimaliza mimi mwenyewe dear. Huyu nyang'au nitamtia adabu, hatatuchezea michezo yake tena! Uko wapi sasa hivi?" Didas akajitutumua na kuonyesha uanaume wake.
Bebe akamueleza kuwa yuko nyumbani kwake. Wakapanga mahali pa kukutana ili wachore ramani ya kuokoka kwenye msitu huu mpya walioingia na kupotea ndani yake.
Didas akiwa na huruma tani mia kwa Bebe.
"Huyu dogo atanitambua mimi ni nani!" Akaweka nia yakumuangamiza huyo aliyewachezea mchezo huu.
Hakujua! Hakujua!


ITAENDELEA....

 

[Godlove Kabati]

SEHEMU YA KUMI


KUMBUKA...
Usimpe mwanadamu asilimia zako zote za uaminifu, hasa kila linapofikia suala la pesa.
Hapa usishangae sana yule rafiki yako unayemuamini atakapogeuka na kuwa kama mnyamamwitu mkali, aliyetayari kukurarua!
Mungu alimuumba mwanadamu,
Mwanadamu akaiumba fedha,
Ajabu! Fedha iliyoumbwa na mwanadamu, inamchanganya na kumuweusha.
Tafsiri kadri ya uelewa wako!
Na hii ni sehemu ya kumi...



Lilikuwa ni anga la saa saba mchana.
Anga lililomiliki jua la utosi, jua linalofukuta joto zito linalokera lakini lililozoeleka haswa kwa wakazi wa jiji la Dar es Salaam.
Jua hili liliendelea kufanya ukatili wake kwa watu wenye vichwa vyenye mtindo wa nywele aina ya kipara, kama tu kipara ni mtindo wa nywele.
Naam, hata kipara kinachong'aa cha Didas Ambrozi kilipokelewa vyema na miale ya jua hili lenye hasira punde tu aliposhuka kutoka kwenye gari lake, nje ya mgahawa aliokubaliana kukutana na Bebe.
Hofu ya masaibu yaliyomkuta ikaungana na ukali wa jua hili, vikamchanganya na kumkasirisha.
Akakunja ndita usoni baada ya kugundua kuwa asingeweza kulitazama jua hili, ili walau alirushie tusi.
"Hili jua limetumwa au?" Akalalamika huku akikihifadhi kipara chake kitukufu ndani ya kofia.
Akapiga hatua ndefu ndefu na kuingia ndani ya mgahawa ule. Haikumchukua sekunde kumi kabla macho yake hayajainasa nafasi kwenye kona kama alivyokuwa ameelekezwa.
Hapa alikuwa ameketi Bebe. Ambaye ameufunika mwili wake gubigubi kwa mtandio, suraye ameipamba kwa miwani kubwa ya jua na kichwa chake kikiwa ndani ya kilemba. Mezani hana chochote kile kinacholika, badala yake ana chupa kubwa ya maji ya kunywa. Ameketi kwa utulivu, mkono wa kushoto umeshika tama na uke wa kulia ukiigonga gonga glasi ile ya kioo iliyojazwa maji.
Alifanana na mwanamke ambaye kama hayuko kwenye maombolezo basi alikuwa na lengo lake binafsi. Na kweli, kwake yeye mavazi yote haya hayakuwa na lengo tofauti zaidi ya kuepuka kujulikana na watu, ama kujiepusha na usumbufu usiohitajika kutoka kwa mashabiki zake.
Bahati iliyoje muda huu hapakuwa na watu wengi ndani ya mgahawa.

Didas akamfikia na kumsalimia, lakini hakujibiwa.
Hapa akagundua tofauti nyingine ya ziada, ambayo ni kama aliitegemea abadani.
Bebe hakuwa na furaha.
Mhudumu aliyekuwa karibu akaichangamkia meza yao na kumuuliza Disas kama anatumia chakula chochote.
"Nitakuita!" Jibu fupi lilitosha kuuzima ule uchangamfu wa mhudumu yule, ambaye aliificha hasira yake kwenye tabasamu la uongo.
Kimyakimya Didas akaketi katika kiti mkabala, akamsogelea kwa ukaribu na kumtazama usoni. Bebe akavuta kamasi puani mwake katika namna ya huzuni, hapa akavua miwani na kutazamana na Didas uso kwa uso. Macho ya Bebe yalikuwa yamevimba baada ya kulia kwa muda mrefu.
Walitazamana bila kutamka lolote. Didas akaamua kukohoa kidogo na kuuvunja ukimya,
"Nisikilize Bebe...kila kitu kitakuwa sawa. Hauna haja ya kulia na kuhuzunika wakati mimi nipo. Usijali, nitampatia chochote anachokitaka. Kama anachokitaka ni fedha, hilo sio tatizo kwa-" Didas akakatishwa.
"Ulivyoongea naye mara ya mwisho amekueleza anachokihitaji?" Sauti ya Bebe iliokata tamaa ikatupa swali.
"Uum...yeye nimeongea naye asubuhi hii hii, lakini inaonekana ana kiburi mwanaharamu yule, nitamfanya aju-" Didas aliyeanza kubwata akakatishwa.
"Umeshafahamu anachokitaka?" Bebe akarudia swali lile. Sasa ni mtulivu, haonekani kuwa na wasiwasi na wala hana papara katika kuongea kwake.
Mchirizi mwembamba wa jasho ukamtambaa bwana Didas kutoka kwenye paji la uso wake, akavua kofia yake na kuwahi kuufuta kabla haujafika kwenye shavu lake la kulia.
"Hapana hajaniambia...kanieleza kuwa amekupatia maelekezo yote wewe." Akatamka huku akipambana kupangusa matone yote ya jasho yaliyotia kambi kwenye kipara chake na paji lake la uso.
Bebe akashusha pumzi ndefu na kutamka,
"Ana mahitaji mawili tu. Na kulingana na alivyodai, anataka yatekelezwe ndani ya masaa ishirini nne kuanzia kesho. Kwa maana hiyo mpaka kufikia keshokutwa, kasema lolote litakalotokea tusimlaumu."
Didas akakurupuka na kasi yake ya kupumua ikaongezeka maradufu,
"Ana..anataka nini. Niambie Bebe anataka nini?" Akauliza akiwa amemuinamia Bebe kwa ukaribu zaidi. Macho yamemtoka pima yakikagua huku na huko kama kuna wateja ambao wanayafuatilia maongezi yao kwa ukaribu.

Bebe akaketi vyema na kuendelea,
"Daddy, kama ikitokea hatujamtimizia kile anachokitaka. Basi ujue kuwa huo nd'o mwanzo wa mimi na wewe kupakwa matope.
Akheri yangu mimi nisiye na ndugu, lakini jifikirie wewe mpenzi.
Mke wako, wanao, jamii inayokuzunguka na mbaya zaidi sifa ya kampuni yetu." Alipofika hapa Bebe akabadilika ghafla na kuwa mnyonge....ule ujasiri wake ukayeyuka ghafla na machozi yakachukua nafasi.
"Nisaidie Daddy....naogopa sana. Jina langu limekuwa kubwa! Nafahamika na watu wengi sana. Kama ikitokea akavujisha hizo video, sifa yangu niliyo nayo itakuwa imenajisiwa tayari. Hakuna dili lolote la promotion nitakalolipata!" Akainama chini na kuuficha uso wake ndani ya ule mtandio, akaanza kulia.
Didas akasimama mara moja, akaiacha kiti chake na kuketi sambamba na Bebe. Akamkumbatia kifuani mwake na akachukua jukumu jipya la kumbembeleza.

"Usilie mpenzi...hili ni jambo dogo sana mbona. We niambie anataka nini, nitajie hayo matakwa yake huyo mjinga mmoja. Nina hela nyingi mimi, hata akitaka nimpe benki nampa!" Didas akatamba.
Ni kweli kwake yeye neno fedha halikumtetemesha hata kidogo. Na ni jambo gani kubwa ambalo mtesi huyu angeliomba kama sio fedha? Alijiamini.
Sura yake ikingali bado ndani ya mtandio ule, Mdomo wa Bebe ukawa kwenye mapambano makali na pua, iliyojikita kwenye kuvuta kamasi.
"Anataka milioni mia." Sauti nyepesi yenye kilio ikatamka sentensi ile ambayo kidogo iliufanya moyo wa Didas uruke mapigo kadhaa.
"Milioni mia?!" Haikueleweka kama Didas anauliza kwa kutosikia vyema au anakishangaa kiasi kilichotajwa.
Lakini Bebe hakuwa na muda wa kumjibu, yeye akaendelea kuwasilisha.
"Kingi...kingineee..." Akarejea upya kwenye kilio. Tena safari hii akalia kwa nguvu zaidi ya mwanzo.
Baadhi ya watu waliokuwa karibu na meza yao wakawatazama kwa udadisi. Kijana mmojawapo miongoni mwa wateja akasogea kwenye meza yao na kuuliza,
"Aiseee kiongozi, habari yako bwana. Vipi shemeji ana tatizo lolote?"
"Ha-hapana kaka...ni kichwa tu kinamsumbua, si unajua tena wanavyodeka hawa heheheh." Didas akajichekesha ili kuonesha kuwa lile halikuwa jambo kubwa.
Kijana naye akajichekesha na kuondoka kishingo upande.
"Niambie jambo la pili Bebe,niambie..." akamnong'oneza.
"Anataka uuvunje mkataba wangu na kampuni yako!"
Hali ya hewa ikambadilika Didas ghafla, mijongeo ya viumbe kama vipepeo...ikaanza kupepea tumboni mwake, akahisi utumbo mdogo umechanganyikana na utumbo mkubwa. Taratibu akamuachia Bebe, akakikamata kitambaa chake na kujipangusa jasho lililokuwa likitambaa shingoni mwake.
Alichoka!

Bebe akajipangusa machozi na kuuibua uso wake uliokuwa umetota kwa machozi. Akamtazama Didas ambaye alionekana waziwazi kuwa amechanganyikiwa.
Huenda hoja ya milioni mia haikumbambaisha, lakini hili takwa la pili lilikuwa kama ngumi ya tumbo kwake.
"Hivi huyu mshenzi ni nani?!" Didas akanong'ona huku akikiuma kidole chake kwa hasira.
"Hawezi kuwa mmoja kati ya wafanyakazi wa ile hoteli kweli?" Aliongeza swali ambalo halikujibiwa moja kwa moja na Bebe.
Akashusha pumzi ndefu na kumtazama Bebe. Macho lake safari hii yalivaa utu mpya, hayakuwa yake ya huruma na wala hayakubeba huba. Alimtazama Bebe kwa macho ya tofauti na Bebe akaligundua hilo.
"Ni kwa nini kakupatia wewe haya maelekezo na sio mimi? Au kuna kitu unanificha Bebe."
Akiwa na macho yanayoonesha wasiwasi, Didas akatupa swali kwa Bebe.
"Unataka kumaanisha nini? Kwamba hauniamini ama?" Bebe akajitetea, sauti yake ikapata nguvu kiasi.
"Simaanishi hivyo...lakini huenda ikawa hivyo. Hii ni dhania yangu tu." Didas akakoroma.
"Dhahania? Didas...hili ni tatizo letu sote. Kwa hio unataka kusema kuwa nimekula njama na huyu mtu, nikatega kamera pale chumbani? Serious..?" Bebe naye akapandisha sauti...ndita zimeuvamia uso wake mdogo.
Kitendo cha kuitwa kwa jina lake la kwanza, Didas. Kikamshtua sana Bwana Didas, haikuwa kawaida kwa Bebe kumuita jina hili moja kwa moja.
Ikawa ni kama wanapandishiana sauti na kuwavutia wateja waliokuwapo mule ndani. Waama walionekana kama watu wa kushangaza sana. Ni dakika moja tu iliyopita, walikuwa wanabembelezana lakini sasa wanalumbana.
Didas akainamisha kichwa chake kwa kukiegamiza kwenye viganja vya mikono yake akisikitika. Aliuona uzito wa dunia ukimuinamia moja kwa moja na kumzidia.
Hakutegemea kama video ile ama zile kama tu ziko nyinginge nyingi, kuwa zimgharimu kiasi cha milioni mia moja. Hili kwake angelihesabu kama hasara ya kununua kipande cha jiwe kwa kubadilishana na almasi kubwa inayong'ara.
Alikuwa tayari kuipokea hasara hii, sio mara yake ya kwanza kukutana na hasara abadani. Japo hii ilikuwa imemtazama moja kwa moja usoni.
Lakini hili suala la kukatisha mkataba wake na Bebe, aliliona kama mpango ambao umekaa kimtego. Akiwa na wasiwasi kuwa labda Bebe amemchoka na amekula njama ili akapate malisho mapya katika sehemu nyingine. Wasiwasi wake bado ulikuwa palepale kwenye dhahania.

"Nataka kumjua huyu mtu!" Didas akakoroma.
"Umjue? Huo muda wa kusubiri mjuane utautoa wapi Daddy? Tuna siku moja tu. Only one day." Kidole chake kimoja cha shahada kinaelea hewani kuashiria namba ya siku iliyobaki na sauti yake nzuri ya kubembeleza inatangaza hofu yake.
Vyote kwa Didas wakati huu havikuwa na nguvu yoyote ile. Kidole kile alikiona kama mdomo wa bunduki iliyoshikwa na gaidi. Na sauti ile aliiona kama sauti ya msaliti.
"Bebe umenisaliti!" Didas akatamka huku macho yake yakionekana kung'aa kwa machozi yanayolengalenga. Bebe akaonekana kubabaika, hajui amjibu nini.
"Sawa nimekubali!" Sauti tatanishi ikakitoroka kinywa cha Didas.
"We si unawasiliana naye huyo jamaa sio? Wewe nd'o anayekupa maelekezo yote au sio? Haya mwambie hivi, na mimi nina matakwa yangu hapa. Mwambie nataka nionane naye uso kwa uso. Atapata noti zake anazotaka na mkataba nitauchana mbele yake! Shwaini!" Akasimama kwa ghadhabu na kuivaa kofia yake. Kisha upesi akaondoka hotelini pale akiwa amevimba kwa hasira.
Akamuacha Bebe ambaye alichagua kubaki kwenye utulivu. Utulivu ambao huenda aliuhitaji mno kwa wakati huu.
Kuondoka kwa Didas kukapishana na hatua za yule yule kijana aliyesogea mezani pale kuwajulia hali wakati ule.
Muda huu hakuja kumjulia mtu hali, bali aliketi moja kwa moja kwenye kiti kilekile alichopishwa na Didas.

Moja kwa moja akatazamana na Bebe.
"Vipi amekubali?" Likawa swali lake la kwanza.
"Mh...hapana, bado hajakubali moja kwa moja. Inaonekana ameushtukia mpango wetu, hasa huu wa kuvunja mkataba." Bebe akamjibu kwa utulivu. Sauti yake ina nidhamu ya hali ya juu.


ITAENDELEA....

 

[Mnachihanguu]

Shusha mkuu ni bonge la simulizi

 

[kulwason]

Kibiritingoma kaenda wapi tena

 

[Godlove Kabati]

SEHEMU YA KUMI NA MOJA


Mwanaume mnyime ugali...atakula hata viazi.
Mnyime kanzu, atavaa hata kaniki mbovu ama gunia
Mnyime salamu, hii ataipata popote pale kwingineko kama sio kwako.
Lakini chondechonde, katu usimnyime heshima yake.
Na hii ni sehemu ya kumi na moja.

Siku yake iliyoanza kwa bashasha sasa ilikuwa imegeuka siku mbaya.
"Siku ya shetani hii!" Nafsi yake ilimshtakia,
kila alipolinganisha vibwanga na vibweka vyote vilivyomuandama siku hii.
Didas Ambrozi alikuwa njiani kuelekea asikokujua.
Alikuwa amechanganyikiwa haswaa. Mikono yake ilioshikilia usukani ilikuwa bado inamtetemeka kwa hasira.
Kila mara jina la Bebe likimjia kichwani ana sonya na kutukana kimoyomoyo. Mara nyingine anapiga honi hovyohovyo kwa kuupiga kwa nguvu usukani.

"Nimeyaona macho yake yule mnafiki. Changudoa mkubwa na tapeli kutoka kuzimu. Nimeyaona macho yake, yalikuwa makavu kabisaaa. Malaya yule!" Hatimaye akatamka kwa sauti akilalamika. Sentensi zake zikafuatiwa na honi iliyomkurupua mwendesha baiskeli ambaye aliponea chupuchupu kupitiwa na gari lile lililokuwa kasi.
Didas amechachamaa!

"Machozi yake ni ya kinafiki! Machozi ya wizi kabisa. Nimemuona usoni! Msaliti...mpumbavu." Didas akazidi kulalamika, akatema mate kwa hasira, amesahau kuwa yu ndani ya gari lake zuri la kifahari.
"Yaani jitu pumbavu pumbavu litoke huko kusikojulikana, lile magimbi na ugali lisishibe...halafu liniamrishe eti ooh, nipe milioni mia halafu sitisha mkataba! Mimi huyooo?! Yeye kama nani kwanza."
Didas yu peke yake garini, bado analalamika.
Safari hii ghafla akashika breki zake kwa nguvu almanusura amgonge mlemavu aliyekuwa anavuka barabara kwenye alama za pundamilia.

Nje ya gari, aliweza kuwatazama watembea kwa miguu waliokuwa wamecharuka kwa hasira, ndita zimechoreka kwenye nyuso zao, midomo na vinywa vyao vikionekana kumnenea maneno ya hasira kwa kuaalamika. Vidole vyao vya shahada vikilinyookea gari lake la kifahari lililomficha kwa vioo vyeusi vyenye sifa ya 'Wa ndani anamuona wa nje, lakini huyu wa nje katu, hawezi kuona kilicho ndani.'
Yeye hakuwasikia na akamshukuru sana yule mtu mwerevu aliyebuni vioo vya namna ile. Mzee yule mlemavu alipovuka salama, akachochea upya gari lake na kufyatuka eneo lile.

Baada ya kilomita chache akagundua kuwa anakosa umakini kwenye kuendesha gari. Akaliegesha gari lake kando ya barabara na kutulia akijipa dakika chache ili afanye tafakuri.
Bado mawazo yake yanashindwa kuamini kuwa huenda Bebe amemzunguka na kumchezea shere tena katika namna ya kitapeli.
"Au namsingizia?" Akajihoji.
"Hapana simsingizii!" Akajijibu.
"Hawa malaya wana mambo mengi sana ya ovyo! Wana mitandao yao ya siri ya kufanya uhalifu na dhambi zote zimchukizazo muumba." Sasa Didas akaikumbuka kofia yake ya uzee wa kanisa.
"Yaani afanye uzinifu na uasherati huko halafu nimpe-"
Mawazo yake yakavurugwa na mlio wa simu yake iliyoita kwa ghafla.
Akaitazama kwa hofu, nambari iliyokuwa imempigia wakati huu ilionyesha kuwa ya tofauti kidogo.
Akaitazama kwa sekunde chache. Kumbukumbu zake zikamkumbusha kuwa aliwahi kuziona mahali.
Namba za namna hii hutumiwa na watu wachache sana hasa wale walio kwenye sekta nyeti za kiserikali kama mawaziri au usalama wa taifa.

"Atakuwa nani huyu ambaye sijamsevu?" Didas akaingiwa na hofu akiinua simu yake tayari kwa kuipokea. Alikuwa akifahamiana na viongozi wengi tu wakubwa wa kiserikali, lakini wote alikuwa na mawasiliano nao. Ni kwa namna gani simu hii mpya imjie tena kwenye nyakati kama hizi ambazo anaandamwa na hofu?
"Video zimewafikia!!" Kengele ya hatari ikalia kwenye ubongo wake.
Akaketi vizuri na kujikohoza ili kuweka sawa sauti yake kisha akaipokea simu ile kwa nidhamu na unyenyekevu mkubwa.

"Ha...haloo!"
"Naongea na Didas Kilonzo Ambrozi!" Sauti nzito changamfu iliyoonekana kuwa na haraka ilipepea kutoka kwa mpigaji.
Didas akagutuka.
Kutajwa kwa majina yake matatu kama yalivyo kwenye vyeti vyake vya elimu, kukamshtua. Tena wakati huu hakuitwa bwana au muheshimiwa.
Hakika alikuwa anaongea na mtu mkubwa.

"Naam ni..ni mimi!" Akajibu kwa kigugumizi.
"Unaongea na Special agent YW536 kutoka kitengo cha kiintelijensia na usalama wa mitandao Tanzania." Utambulisho huu ukamfanya Didas apate tumbo la kuhara. Akajishikilia kwa nguvu ili kujizuia.
Mfano wa vitu kama vipepeo, vinapepea tumboni mwake.

"Kwa nini unafanya mambo ya aibu ndugu yangu?" Swali jepesi la kiungwana lakini linalotatanisha likaachika kutoka kwa mpigaji yule.
Mfumo wa upumuaji wa Didas ukabadilika. Pumzi zikaanza kupishana kwa kasi puani mwake, hakujua ajibu nini. Maadamu anayeongea naye ni mtu wa ndani ya mfumo, basi kuna uhakika wa asilimia zote kuwa ameziona video zake.
Hakuwa na sababu yoyote ya kupoteza muda kuuliza mambo gani ya aibu aliyoyafanya.
Aulize ili atumbuliwe?
"Nisaidie ndugu yangu!" Kauli hii ikamtoka kwa uchungu huku akiikumbatia simu ile kwa mikono yote miwili sikioni mwake.
Alikuwa anazungumza na masihi wake.

"Hapa nakusaidiaje Didas? Enhe?
Yaani ungejua namna unavyoheshimika huku lkulu, sidhani kama ungefanya huu upuuzi wa kujirekodi ukifanya uchafu.
Huu ni upuuzi aisee! Akiona mheshimiwa Raisi itakuweje?
Kwenye mitambo hapa inaonesha bado nusu saa, video zote ishirini zitakuwa mitandaoni!
Na mtandao wa kwanza kufikiwa na huu upuuzi ni ule unaotumiwa na serikali."
Sauti ya mpigaji ikapandwa na jazba, bado kasi yake ni ya haraka na haina mahusiano na utani wa aina yoyote ile. Yalipotajwa maneno kama Raisi na serikali , ushuzi ulimponyoka Didas kwa mafungu.

"Bwana mkubwa! Bwana mkubwa! Naomba unisaidie kaka.
Ni wahuni tu wamenifanyia mchezo mchafu. Nimeangushiwa jumba bovu ndugu yangu!" Ni Didas kwenyw harakati za kuutafuta wokovu wake.

"Mimi sio ndugu yako! Na wala usiniite kaka.
Sina undugu na wazee wazinifu wasio na uaminifu kwa wake zao.
Wewe mzee hauna maadili kabisa!" Sauti ile inaonekana kama haitaki kupoteza muda, ni nzito, sauti ya mamlaka.

"Kesi za maudhui ya namna hii hutufikia siye kabla ya kuingia mitandaoni. Yapo yanayofutika na yapo maudhui kama haya tusiyoweza kuyafuta kutokana na umahiri na ujanja wa mdukuzi anayeyapakia kwenye system.
Na mimi siko tayari kuona huu uchafu unaingia kwenye rada za serikali yetu tukufu ya Jamhuri.
Kwanza ni bahati sana nimeipata namba yako na nikakupigia. Nimekuheshimu sana kwa vile mimi ni mpenzi wa bidhaa za kampuni yako.
Kimsingi sina cha kukusaidia,
Lakini kama kuna mtu unayedaiana naye kwa namna yoyote ile, mlipe kabla ya nusu saa...
Ama sivyo,
Mzee wangu...jiandae kisaikolojia!
Adui yako anaijua teknolojia vyema kuliko kitu chochote kile!"
Simu ikakatwa.

Upesi!
Didas hakuwa na muda wa kujiuliza mara mbili. Akaliwasha gari lake na kuugeuza usukani. Gari likachomoka kwa kasi kuelekea eneo lolote lile ambalo alifahamu kuwa kuna jengo linaloitwa benki.
Kiburi na majivuno yake yote akaamua avitie mfukoni kwa muda.
Shilingi yake ya ukombozi ilikuwa ikinesanesa kiganjani mwake karibu na tundu la choo, hakutaka kuipoteza!
Potelea mbali kama Bebe ni msaliti, mnafiki ama malaika mtoa roho. Akampigia simu mara moja kutaka kukutana naye ofisini mwake.
Alikuwa ni kama aliyepewa mzani achague ni kipi chenye uzito kati ya utajiri na heshima yake alivyovihangaikia tangu zamani akiwa kijana, ama msichana changudoa aliyekutana naye ukubwani na kuamua kumsaidia.
Wakati huu akaipa heshima yake uzito wa jiwe la fatuma mbele ya Bebe mwenye uzito wa unyoya.

********

"Saini hapa na hapa!" Didas anaitazama saa yake, upara wake unavuja jasho.
Anamtazama Bebe ambaye naye ni kama haelewi ni nini kinachoendelea.
"Nisaini nini tena mbona sielewi?" Bebe anauliza.
"Usinichanganye! We saini hapa... sina muda wa kupoteza. Mengine utayajua mbele ya safari." Didas anabwata, matone kadhaa ya mate yakimtoka kinywani.
Tai yake shingoni imegeuka nyuma. Ina maana kifua chake kimehamia mgongoni?Hatujui. Anajua yeye.

Bebe akakamata kalamu ile ya wino na kuanza kusoma karatasi ile kabla hajasaini.
"Come on! Unasoma nini tena?"
"Unataka nisaini kitu ambacho sikijui? Kama unataka kuniuza?" Bebe akauliza kwa kujiamini.
Didas akashusha pumzi kwa nguvu.
"Sikia Frola!" Kwa mara ya kwanza baada ya muda mrefu akamtaja kwa jina lake halisi.
"Hapa tunaongelea uhai na kifo! Heshima yangu na familia yangu niliyo nayo ni maisha yangu Frola.
Huu ni mkataba wa kusitisha kazi yako wewe na kampuni yetu kama anavyohitaji huyo mwenzio...Ahhh (Anabadili) huyo jamaa aliyeturekodi.
Umenielewa?!" Uso wake umetota kwa jasho anamtazama Bebe.

"Ina maana naacha kazi?"
"Yeah! Haya saini hapa."
"Kwa nini lakini?"
"Bebe...hayo masuala mengine tutajua baadae. Tazama! Tuna dakika kumi na moja tu hapa."
Bebe akaiinamia karatasi ile na kuanza kuchonga herufi zake. Didas anamtazama kwa shauku, bado anaona Bebe kama anaandika taratibu.
Bebe akamaliza kutia saini yake. Didas akaikwapua bahasha kubwa ya kaki iliyosheni fedha kutoka kwenye begi dogo na kumkabidhi Bebe.
"Haya mama! Mpelekee huyu jamaa hivi vitu haraka kwenye eneo nililokuelekeza. Fanya upesi." Didas akamsurutisha Bebe.
"Lakini-"
"We nenda, hili likiisha hayo mengine tutayaongea!" Didas akamkatisha.
Bebe akaondoka kishingo upande kutoka ofisini mwa Didas na kutoka nje.
Huku nyuma akamuacha Didas aliyechanganyikiwa, anaitazama saa yake kila baada ya sekunde kadhaa.

Baada ya takribani dakika ishirini simu yake ikaita. Akakurupuka kuipokea baada ya kugundua kuwa mpigaji ni huyu huyu aliyepelekewa mahitaji yake.
Didas akapongezwa kwa juhudi zake alizozifanya kukamilisha kile alichoagizwa.

"Makubaliano yetu ni kutoziachia video mitandaoni. Kwa hio ziko salama kabisa! Hutozikuta kwenye mtandao wowote ule kiongozi wala usiwe na wasiwasi.
Na hakuna mtu awaye yote anayeweza kuzipata." Sauti ya kijana mchangamfu asiyejulikana ikamtoa hofu.
"Naweza nikaongeza kiasi zaidi ili zifutwe kabisa kama inawezekana? Samahani lakini."
Didas anauliza kwa sauti ya nidhamu.
"Ninayo furaha kukuambia kuwa hilo haliwezekani mzee wangu!" Sauti changamfu akamjibu.
Anayo furaha? Kivipi?

"Kwa nini haiwezekani?" Didas akauliza.
"Siku yoyote ile utakapolitamka jina la Frola, ama kukutana naye, ama kumuhusisha kwenye mduara wa maisha yako, basi video hizi zitakuwa kama wa muhtasari wa taarifa za habari kwenye televisheni kubwa hapa nchini. Nina uhakika sishindwi kufanya hilo jambo!" Sauti changamfu akaweka kituo kisha akaendelea.
"Kiufupi kuanzia muda huu, nataka uachane na Frola moja kwa moja. Huyu nd'o anguko lako! Muone kama ukoma.
Kaa mbali naye kabisa. Hapo utakuwa salama." Akamaliza na simj ikakatwa.
Didas akachoka.

*******

"Kiufupi kuanzia muda huu, nataka uachane na Frola moja kwa moja. Huyu nd'o anguko lako! Muone kama ukoma.
Kaa mbali naye kabisa. Hapo utakuwa salama." Yalikuwa ni maneno ya mwisho kutoka kinywani mwa J4 akiwasiliana na mtu kwenye simu.
Kando yake ameketi Bebe akiburudika kwa kinywaji chepesi kulipasha tumbo lake kwa ajili ya maandalizi ya mlo mzito uliokuwa ukisubiri hukumu yake pale mezani.
J4 akakata simu ile na kumtazama Bebe aliyekuwa anatabasamu kwa madaha.
Cheko fupi likawavamia wote kisha wakahamia mezani pale na kuanza kula.

"Unawezaje kuyafanya haya yote?" Bebe akamuuliza huku akitafuna paja nono la kuku wa kukaanga.
"Ni njaa tu!" J4 akamjibu kwa kifupi.
"Njaa? Kivipi."
"Njaa amekuwa mwalimu wangu mzuri. Kama hujanielewa endelea kula, ukishiba utanielewa vizuri." J4 akatamka kwa mzaha akiwa na uso unaowaka tabasamu.



ITAENDELEA....

 

[Godlove Kabati]

RIWAYA: Kibiritingoma.
Yake: Godlove Kabati.


SEHEMU YA KUMI NA MBILI

Kwa kuwa bado tunaishi ndani ya hii dunia..
Hakika ipo siku moja isiyo jina, utakutana na mtu ama atakuja mtu mpya maishani mwako.
*Huyu ataubadilisha mwelekeo wa maisha yako...atakupa elimu mpya na changamoto ambazo hukuwahi kamwe kukutana nazo."
Omba sana, mtu huyu mpya asilipeleke motoni jahazi la maisha yako...
Hii ni sehemu ya kumi na mbili!

Zilipotea takribani dakika thelathini na tano, mpaka walipoukamilisha mlo wao katika hoteli hio kubwa waliokutana.
Wakaziteketeza dakika nyingine ishirini kwenye mazungumzo ya hapa na pale huku wakiyasindikiza maongezi haya kwa vinywaji laini.
Matumbo na nafsi zao zilipotosheka, ukawadia muda maalumu ambao uliwaweka katika hoteli hii mpaka muda huu.
Bebe akaangaza macho yake huku na kule kuhakikisha usalama ambao tayari ulikuwepo. Kisha taratibu bila papara akainama na kuibuka na begi dogo mfano wa briefcase kutoka chini ya meza hii. Sanduku lililoonekana kuwa na uzito baada ya kujazwa vitu fulani fulani, akalitua juu ya meza ile, na meza ikaitika kwa kutoa mlio TIIII!!

Naam, lilikuwa na uzito usiokuwa wa kawaida. Ni uzito ambao unahitaji dakika moja tu ya maajabu kumbadilisha mtu anayeonekana kama mwehu, aanze kuitwa chifu.
Uzito wa fedha!
Akalisukuma katika namna ya kuteleza kuelekea kwa J4. J4 ambaye alikuwa na mshawasha wa kuziona hizo milioni mia zilizomo. Akajisogeza karibu zaidi, uso wake ukiwa na shauku.
"Mzigo huu hapo, ufungue!"
J4 akasita na kumtazama Bebe usoni kwa macho ambayo ni kama yanamuuliza,
"Una uhakika kuwa humu ndani kuna milioni mia?"
Bila kutamka neno lolote, akayerejesha tena macho yake juu ya sanduku lile.
Huenda huu nd'o muda pekee ambao J4 alihitaji kuwa mtulivu. Milango yake yote mitano ya fahamu ikaanza kufanya kazi sawasawa.
Akainyoosha mikono yake tayari kwa ajili ya kulifungua.
Akili yake ilikuwa tayari imelifungua sanduku hili na kukisia juu ya wingi wa mabunda makubwa ya fedha uliomo ndani yake. Na sasa alikuwa akienda kuyahakiki yale aliyokuwa akiyadhahania akilini mwake mubashara kabisa.
Milioni mia! Alaaa, hii ilikuwa fedha ambayo hakika asingewahi kuimiliki mpaka atakapozama futi sita ardhini.
Mikono inamtetemeka, J4 akavibetua vyuma vilivyolikaza sanduku lile. Kisha kama anayefungua mlango hivi, akalifungua sanduku.
Hamadi!

Pua zake zikapokelewa na harufu ya kipekee. Harufu halisi ya fedha kutoka sandukuni.
Mboni za macho yake zikapanuka, macho yake yakaona,
Safu za mabunda ya noti mpya nyekundu zilizonyooka zilijipanga vyema kama zimepigwa pasi.
Bado haamini, mkono wake hakukutaka kubaki nyuma. Akaamua kuzigusa.
Mkono wake ukatambaa na kuteleza juu ya noti hizi. Vidole vikakana kuwa havijawahi katu kuzigusa milioni mia moja.
Akafanya kama anayechimba, akaibuka na bunda moja la noti zilizoviringwa ndani ya mpira mdogo.
Akalitikisatikisa kama anayepima uzito wake. Akazichezesha noti kwenye ncha za vidole vyake kama anayezihesabu hivi. Ni noti mpya kabisa ambazo hazijapita kwenye mikono ya watu wengi.

Uso wake ukawa wa mwisho kudhibitisha kuwa amefurahishwa sana na kile alichokikamilisha. Tabasamu likawaka usoni mwake, akamtazama Bebe usoni.
Akaufungua mpira ule uliozidhibiti noti za bunda lile, zikawa huru.
Akazitupa juu ya meza kumwelekea Bebe. Noti zikateleza mezani katika mfumo wa kusambaa.
"Unajua tunaziitaje hizo?" J4 akauliza akiwa wima.
"Zinaitwa hela!" Bebe akamjibu kwa bashasha.
"Lipe neno uzito...sema fedha! Kama wasemavyo wao." J4 akarejea kwenye kiti.
Akauinua mguu wake wa kulia na kuubebanisha juu ya paja la ule wa kushoto, akakaa kwa kuchonga namba nne.
"Ni burudani sana kutazamana na utajiri uso kwa uso. Na leo nimepata bahati ya kuipata burudani hii bure kabisa. Kwa nini nisiburudike?"
J4 akatamka huku akilifunga upya briefcase lile. Bebe akacheka kidogo huku akiuziba mdomo wake kwa aibu.

"Haya nd'o maisha tunayotakiwa kuyaishi Bebe!" J4 amemaliza kulifunga sanduku lile na sasa anafanya jitihada ya kuzikusanya fedha zile alizozitawanya mezani pale kwa mbwembwe.
"Hii ndio namna tutakavyo-yanyanyasa maisha. Mpaka yapige magoti yakisota na kuomboleza chini ya nyayo zetu.
Hivi hivi...mimi na wewe!" Sauti yake imejaa unabii, J4 anatamka akiwa ametazamana na Bebe uso kwa uso.
Wote wakatabasamu wakitazamana.
Tabasamu lao lilinena lugha moja.
Lugha ambayo waliielewa wao tu.
Sio lugha ya mapenzi asilani.
Ilikuwa lugha ya ajabu ambayo Bebe aliitafuta kwa muda mrefu sana bila mafanikio.
Lugha ya ukombozi!
Ni lugha hii hii iliomfanya akutane na J4 na kumkabidhi uaminifu wake wote.
Hakuwahi kumuamini mwanaume yeyote yule lakini kwa J4 ilikuwa tofauti.

"Tutakuwa huru...tutakuwa matajiri! Ni haya haya maisha yaliyotufikisha hapa tulipo. Mimi na wewe tunajua ni nini tunakihitaji." Ni maneno ya J4 yaliyogeuka kuwa asali masikioni mwa Bebe.
Maneno ambayo baadae yalimfikisha Bebe kwenye anga ambazo hakuwahi kutarajia kufika.
Anga zinazoifanya simulizi hii iwe hii.


*******

Ilikuwaje mpaka wawili hawa wakakutana?
Ni swali ambalo hakika linakufanya unishutumu mimi ninayekusimulia.
Ilikuwa hivi...


Jumanne Maliki, ama J4 kama mlivomzoea ndiye alikuwa mchoraji wa hii ramani yote.
Mpango wake aliusuka kwa ustadi na hakutaka kupoteza muda kabisa.
Hapo awali,
Akiwa katika harakati za ujana maji ya baridi na swahibu yake Dotto, alipagawa alipoitia sura ya Bebe kwa mara ya kwanza kwenye mboni za macho yake.
"Hii pisi kwelikweli aisee, imenyooka sana hii!" Dotto aliinadi picha ile kwenyw simu yake.
"Anaishi wapi huyu? Mbona sijawahi kumuona hapa mtaani." J4 akahoji.
"Aaa wewe...unadhani hiki kiwango ni cha kucheza kwenye viwanja vya chandimu? Hiki ni kiwango cha kimataifa kaka. Class A kabisa! Wa watu wazito hawa!" D akaanza mbwembwe zake zilezile za udalali.
J4 akampokonya simu yake na kuitazama picha ile kwa umakini zaidi. Akakitikisa kichwa chake kukubaliana na alichokiona.
"Mali iko Sinza hii mzee baba. Inapiga ukaunta pale GRANDE!" Dotto akaendelea kuipamba picha yake.
"Ni baamedi eh?"
"Itakuwa...lakini ninasikia, japo sina uhakika...kuwa ni dada poa!" D akanong'ona.
Hili la mrembo huyu kuitwa dada poa, likazitia doa kubwa jeusi sifa zote nyeupe zilizokuwa zikipepea kwenye akili ya J4.
"Kwamba anajiuza au?"
"Nasikia hivyo...maana yule bimdashi mmiliki wa klabu, nasikia nd'o mishe zake hizi pande zile."
"Duh anaitwa nani aisee?!"
"Nani? Huyo bimkubwa au-"
"Huyu demu"
"Be-Bebe! Anaitwa Bebe!"

Anaitwa Bebe! Nd'o ikawa sentensi ya kwanza kukisumbua kichwa chake.
Akamhimiza rafiki yake himahima ampeleke pale kwenye klabu ambayo mrembo huyu anafanya kazi.
Siku ya kwanza, wakafukuzwa na walinzi baada ya mavazi yao kuwatambulisha kama vijana mabarobaro waliokuja kutalii na kuondoka tu.
Hawakujipanga, bali walikurupuka tu.
LE CLUB GRANDE sio mahala pa wanaoulizia bei.
Wakajipanga vyema siku ya pili, lakini haikuwa bahati yao. Hawakumkuta!
Baada ya J4 kubembeleza sanaa,
Wakajaribu tena siku nyingine. Safari hii wakaenda usiku. Na kweli, akamuona Bebe kwa mara ya kwanza.
Moyo wake ukamuuma sana! Ni heri asingemuona kabisa labda angeweza kujiepusha na yote.
Kwamba hii sanaa bora ya uumbaji inayopumua ni kahaba?
Alikataa kuamini.

Moyo wake ukataka kufanya kosa la kumfumba macho na kumtupa kwenye shimo la huba. Lakini akili yake ikawahi upesi na kuikamata miguu yake, ikamrudisha kwenye njia sahihi.
Kwamba azame penzini na kahaba? Akili yake ikamshutumu na kumfanya ajidharau.
Lakini moyo uliougua gonjwa la mapenzi unatibika kwa namna ya kipekee sana. Na tiba yake ya kweli ni muda!
Naam, kama ambavyo alimpenda taratibu. Ni hivyo hivyo alijifunza kumsahau taratibu.
Na katika darasa hilo la kujifunza kumsahau, akadurusu somo ambalo alitaka limpe sababu zenye mashiko, ni kwa nini asimpende kahaba.

Hapa akaiacha nadharia, akajifunza kwa vitendo. Akaanza kumfuatilia Bebe nyendo zake zote alizotegemea ziwe chafu machoni mwake.
Yeye alikuwa na lengo moja tu. Kujifunza kumsahau. Hilo tu.
Lakini macho yake kijana huyu mhitimu wa uhandisi wa umeme na masomo ya kompyuta, yakaiona fursa!
Fursa ambayo labda aliwahi kuiona na kuipuuza. Lakini sasa anapata kila sababu ya ni kwa nini anahitaji sana fursa hii.
Akazidi kuzama darasani!

Aliyaona macho ya wanaume wenye tamaa, yanavyolitazama umbo la Bebe na kummezea mate. Aliyaona macho yao yanavyoweweseka baada ya kutazamana na ile sura yake jamali.
Tazama wanaume hawa wanavyomwaga fulusi za kutosha ili tu wampate Bebe kwa ajili ya kuiridhisha miili yao.
Tazama namna wanavyoteketeza fedha ambazo labda zingetosha kabisa kubadilisha maisha ya J4 na wazazi wake kule Ushirombo. Wanaume hawa ndimi zao zinaning'inia nje wakitokwa na mate kwa uchu wa ngono. Macho yao yanawaka tamaa wakimtazama Bebe.
Tazama!

J4 akafumba macho yake na kuzikumbuka nyakati na maisha yote magumu, yaliyogubikwa na umasikini aliyoyapitia tangu akiwa chuoni hasa baada ya kukosa mkopo wa serikali. Akalazimika kukitumia kipaji chake akidukua vyanzo mbalimbali vya mitandao na kuuza intaneti kwa wanafunzi wenzake ambao nao walimlipa kwa rasharasha.
Mara kadhaa akakoswakoswa kudakwa na vyombo vya usalama kama mhaini na tapeli wa mitandao.
Yote haya aliyafanya ili tu apate fedha ya kujikimu. Leo hii yupo mtaani, anatumia kipaji chake kama silaha ya kuiwinda fedha. Lakini hapa anaona fedha ile inamwagwa na matajiri kwenye uasherati.
Ajabu!

Vita yake ya kuitafuta fedha ikamdai silaha ya ziada. Hapa akamtazama Bebe kama silaha yake mpya ya maangamizi.
Alikuwa amemfatilia kwa muda mrefu.
Mpaka Bebe anapata umaarufu, J4 alikuwa kimya nyuma ya skrini za kompyuta akiandaa mitego yake ambayo aliiamini sana.
Na alihitaji nyakati moja pekee ya kuitega mitego hii.
Ndipo ikafika hii siku ambayo aliwafuata Bebe na Didas hotelini kwa usiri.
Akalazimisha kumpiga Bebe kikumbo mpaka vitu vyake vilivyokuwa ndani ya mkoba legevu vikaanguka chini.
Katika kumsaidia kuviokota, mikono yake ikafanya kazi kwa kasi ya ajabu na kubandika vinasa sauti na kamera ndogo ndogo kwenye baadhi ya vitu vyake. Akiwa na uhakika kuwa ni lazima tu atanasa. Na kweli akanasa!

Ilikuwa bahati mbaya sana kwa bwana Didas Kilonzo Ambrozi. Ndani ya muda mchache, tayari J4 alikuwa na vipande vya video kadhaa ambavyo aliviunganisha.
Usiku wa siku ile akakutana na Bebe baada ya kumpigia na kumueleza kuwa upo ujumbe wa siri anaotaka kuzungumza na yeye peke yake.
Akamuondoa hofu kuwa kwa usalama zaidi, Bebe yeye mwenyewe apange mahala ambapo angependa wakutane.
Bebe alipojaribu kuleta maringo, akashtuliwa kwa kipande cha video ile kilichotumwa katika simu yake.
Hapo akakurupuka na kukutana na J4. Saa nne usiku, LE CLUB GRANDE!
Ni hapa ambapo Bebe alipaona kuwa mahala salama zaidi kutokana na kujulikana kwake mahala pale.

Hapo akakutana na J4 kwa mara ya kwanza, wakazungumza.
"Wewe ni nani? Hiyo video umeitoa wapi?"
Bebe aliuliza akiwa mwingi wa hofu. Licha ya uzoefu wake wa kuwahudumia wanaume kingono, hakuwahi katu kujirekodi au kuruhusu hilo litokee akiwa kazini.
"Jina langu utalifahamu mara tu baada ya mimi kukamilisha kile nilichokusudia kukifanya ili wote tufaidike. Namaanisha, nikusaidie wewe na wewe unisaidie mimi." J4 akiwa ndani ya kofia pana na mavazi yaliyojaribu kumfanya aonekane kama jasusi wa kimataifa, akatamka kwa kujiamini.
"Unisaidie? Nikusaidie?...wewe unanisaidiaje mimi? Unaweza kunisaidia kwa lipi?" Bebe akaruhusu kiburi kimfanye ajihisi yeye ni jitu la miraba minne na huyu anayeongea naye ni mbilikimo tu.
J4 akatabasamu kidogo kisha akaketi vyema.
"Sikia Frola!" Kutajwa kwa jina hili kukamfanya Bebe aubadili mkao wake na kukaa chonjo.
"Mimi nafahamu fika wewe ni mwanamke wa aina gani. Nafahamu fika kuwa unapenda kuwa huru, ulitoka hapa GRANDE ili uwe huru. Hata huko ulikoenda, unautafuta uhuru!
Lakini bado maisha yako, yako ndani ya minyororo ya utumwa.
Haujapata kile unachokitafuta." Akatulia na kuyapa nafasi maneno yale yazame kwa Bebe.
"Uhuru? Unadhani mi ni mtumwa?" Jazba inaanza kumpanda Bebe.
"Hii video hii...inaweza kukupa fedha mara ishirini ya huo mshahara wako wa milioni mbili na nusu unaopata kwa ajili ya tangazo moja unaloigiza! Huwezi kuamini." J4 akatema cheche huku akitikisatikisa simu yake ya kupangusa, iliopasuka kioo chake na kuacha nyufa kadhaa zikitambaa.

Bebe akapagawa. Huyu jamaa anajua mpaka mshahara wake!
"We..ume..umejuaje mshahara wangu?" Akababaika.
"Nataka nifanye kazi na wewe Frola! Kazi yetu tukiwa huru, mimi na wewe. Nakuhaidi tutapata hela nyingi sana! Tutakuwa matajiri."
Utajiri? Utajiri gani hasa ambao Bebe alikuwa akihuitaji kutoka kwa huyu kijana mpya machoni mwake?
Tayari anao umaarufu mkubwa nchini japokuwa huu haukumfanya awe tajiri moja kwa moja.
Hata kama angepata ofa yenye malipo makubwa, bado isingeweza kuzidishwa mara ishirini ya mshahara wake.
Akaketi vizuri na kuiegemea meza yake, akajisogeza karibu, tayari kumsikiliza J4.
J4 akaachiwa umiliki wa dimba la maongezi.

Akauweka mezani mchoro wake mzima wa namna atakavyoikamilisha mipango yake yeye na Bebe.
Maneno yake yakawa sumu kali ambayo iliulegeza moyo wa Bebe, supastaa.
Bebe akalainika na kukubaliana moja kwa moja na mpango ule wa J4.
Mpango ambao ulimhakikishia kuwa siku inayofuata, atakuwa na zaidi ya milioni hamsini kibindoni.
Ulikuwa mchezo rahisi sana kwake...ugumu wote uliachwa kwa J4.
Ni ndani ya siku mbili tu.
Muda huu wanatazamana na kisanduku kilichosheheni fedha.
Milioni mia!

"Huu ni mwanzo tu! Bado kuna mtu fulani huko ametutunzia hela zetu. Inatakiwa anase kwenye mtego wetu upesi." J4 anayasema haya baada ya mgawo kufanyika kama walivyokubaliana. Na sasa kila mmoja amekifutika kiasi chake anapopafahamu.
Wako ndani ya gari la Bebe alilopewa na kampuni ya Bwana Didas. Muda mchache tu ujao, anafahamu kuwa ataachana nalo.

"Kituo kinachofuata?" Bebe akamuuliza mikono yake ikiwa kwenye usukani.
"Hakuna oda yoyote ile ya mtu binafsi ambayo umeipokea?" J4 akamuuliza.
"Nadhani ipo.." Bebe akamuinamia sikioni na kumnong'oneza suala nyeti ambalo alitaka walifahamu wao tu.
Wao tu, sio mimi na wewe msomaji.

"Basi nadhani unajua ni nini unatakiwa kufanya." J4 akamjibu vilevile akinong'ona kisha akatoa cheko la kibabe. Cheko la fedha!
Akafungua mlango wa gari na kuanza kutoka nje.
"Wapi sasa, si ninakupeleka mpaka kwako au?"
"Hapana, ukifika wakati wa wewe kupajua kwangu. Nitakuleta mwenyewe. Mahusiano yetu hapa ni ya kibiashara tu na si vinginevyo..." J4 akatamka kwa kujiamini tayari yuko nje ya gari.
"Mawasiliano yako ni yalayale ama?" Bebe akapaza sauti.
"Hapana hayo yameshapotea, hayapo tena hewani....nitakutafuta kwa namba mpya." J4 akamjibu akitokomea.
Hakumng'ang'ania Bebe kwa lolote na wala hakuonesha kumjali. Hili ndilo lililomuacha Bebe njia panda.
"Ni mwanaume wa aina gani huyu?" Akajiuliza.
Amekutana naye jana usiku tu...lakini tayari wamezoeana kama ndugu mapacha wa tumbo moja. Na katu hajababaishwa na urembo wake.
Bebe akaliondoa gari lake eneo lile huku akilitafakari ombi la kijana huyu mwenye uelekeo wa hirimu moja na yeye.
Alitaka wawe na mahusiano ya kibiashara! hivyo tu.
Akazikagua noti zile mpya ndani ya mkoba wake, akazikuta bado zinapumua.
Akatabasamu.
Ama hakika, alikuwa kwenye biashara.

 

[Mnachihanguu]

Hakika huyu ni kibiritingoma

 

[Godlove Kabati]

Hakika huyu ni kibiritingoma

Naam,
Yeye ndiye. 😃