CHADEMA yahofia machafuko nchini
Sasa "helkopta' kutua kila kijiji mpaka kwa Nyerere,
Ushirikiano na vyama vya upinzani wazikwa rasmi
Na Said Mwishehe
CHAMA cha Demokrasia na Maendeleo (CHADEMA), kimetangaza kuanza kwa ziara ya nchi nzima ya uongozi wa juu wa chama hicho kwa ajili ya kukutana na Watanzania wote, kutekeleza mkakati wake maalumu unaoitwa Operesheni Sangara, ambao unalenga kulikomboa Taifa lisikumbwe na machafuko.
Akizungumza jana Dar es Salaam, Mwenyekiti wa CHADEMA Bw. Freeman Mbowe, alisema lengo la operesheni hiyo ni kuwafahamisha wananchi kuhusu wajibu wao wa kulikomboa Taifa kwa kuwa kuna dalili mbaya kwa nchi zilizoanza kuonekana.
"CHADEMA imeamua kuanzia kesho (leo), tunazindua operesheni maalumu ambayo viongozi wa ngazi zote wa chama, watazunguka nchi nzima kuwaunganisha Watanzania wote katika harakati za kuikomboa nchi kwa mara ya pili, baada ya ile ya kwanza iliyofanywa na Baba wa Taifa, hayati Mwalimu Julius Nyerere, alipukuwa na TANU," alisema Bw. Mbowe.
Kiongozi huyo aliyeanzisha kampeni za juu kwa juu kwa kutumia helkopta, alisema wataanza mkoani Mara ambapo watafanya kazi ya kuwaunganisha wananchi bila kujali itikadi zao za dini, kabila wala vyama vya siasa kwa wiki mbili na baada ya hapo, watakwenda Mwanza na mikoa mingine ya Kanda ya Ziwa.
"Viongozi wote wa chama, kesho (leo) tutakuwa Mara kwa ajili ya kuzindua rasmi operesheni yetu, tunaomba Watanzania watuunge mkono kwa kuwa nia yetu ni njema. Tuaamini tutafanikiwa ingawa tutaifanya kazi hiyo bila fedha," alisema Bw. Mbowe.
Alisema sababu za operesheni hiyo zimetokana na kuonekana kwa mambo mengi ambayo yalikuwa hayatokei kwa Taifa. Alitoa mfano wa tukio la wananchi kupiga mawe msafara wa Rais Jakaya Kikwete, kuwa linaonesha inchi inaendeshwa bila kufuata utawala wa sheria.
"CHADEMA sasa tumesimama imara kuhakikisha Taifa linakwenda mahali ambapo wananchi hawataishi maisha ya shida kama waliyonayo sasa, tutaungana na Watanzania wote na kutafakari kwa kina nini kifanyike ili kujikomboa katika wimbi la umasikini," alisema.
Aliongeza kuwa nchi imegawanyika katika makundi mawili ya matajiri na masikini. Wale matajiri wanaoishi maisha mazuri na kusomesha watoto nje, lakini kundi kubwa la watu masikini wanakosa pa kukimbilia na kuishia kusomesha watoto wao katika sekondari za kata ambazo hazina walimu wala vifa vya kufundishia.
Wakiwa mkoani Mara watakwenda kijiji cha Butiama kuona na Mama Maria Nyerere kumueleza nia yao ambayo inalenga kuunga mkono mapambano ambayo awali yalikuwa yakifanywa na Hayati Mwalimu Nyerere.
Aliaomba Watanzania wenye kuhitaji mabadiliko ya kweli, kutoa misada ya aina yoyote ambayo wanahisi inaweza kuwasaidia katika operesheni yao, iwe unga au maji na kusisitiza kuwa katika operesheni hiyo, watalala kwa wananchi na hawatalipana posho kwa kuwa hawana kitu.
Pia watapanga chama upya katika mitaa na kuwa na mabalozi kila kijiji.
Akizungumzia ushirikiano uliokuwepo kati yao na vyama vingine vitatu ambao walikubaliana, Bw. Mbowe alisema kwa sasa wameamua kujitoa kutokana na kuona vyama wanavyoshirikiana navyo, baadhi havina nia njema dhidi yao.
