Tegelezeni
JF-Expert Member
- Dec 31, 2009
- 268
- 124
Zamani enzi za ujima kabla ya ujio wa hizi dini za mapokea mababu zetu waliishi kwa amani na upendo huku wakiheshimiana na kuvumiliana.
Walikuwa wakiamini kwamba binadamu wote ni sawa na kila mmoja alikuwa akimthamini mwingine siyo kwa kile alicho nacho, bali kama binadamu aliyekamilika. walikuwa wakitofautiana kwa nguvu ya hoja na siyo kwa hoja ya nguvu. Inapotokea kuhitilafiana, kama wanadamu walikuwa wakikaa chini na kuzungumza kwa busara na hekima na kumaliza tofauti zao.
Vikao vya usuluhishi vilikuwa vikiendeshwa na wazee wenye hekima na busara ambao walikuwa ni mahiri katika kulitizama jambo na kulipima kwa uzito wake. Pale mmoja anapokutwa amekosea alikuwa akipigwa faini ambapo mara nyingi ilikuwa ni mifugo.
Viapo na kulishwa yamini kimila vilikuwa vikitumika kutatua migogoro inayoonekana kukosa suluhu na yule aliyedanganya alikuwa akipata adhabu yake kulingana na aina ya kiapo. Hivyo, kulikuwa na nidhamu ya hali ya juu kwa miongoni mwa jamii kwa sababu viapo vingi vilikuwa vinasababisha vifo katika familia au ukoo.
Wazee wetu walikuwa na imani zao ambazo zilikuwa na nguvu na waliziheshimu sana. Walikuwa wakiamini katika dini za asili za matambiko na kafara. Kupitia mizimu waliyokuwa wakiamini tangu kale walikuwa wakipata ishara mbalimbali kupitia ndoto na maono na walimudu kuchukua tahadhari kungali mapema.
Walikuwa wakipata ishara za maradhi, vifo, baa la njaa na hata tufani, gharika na ukame. walikuwa wakichukua hatua za kuomba mizimu iwaepushe na dhahama hizo na mara nyingi walipewa masharti ambayo wakiyatekeleza walikuwa wakiepuka au kunusurika na majanga hayo.
Lakini leo hii,yote hayo yametoweka baada ya ujio wa hizi dini za mapokeo. Dunia imekuwa si salama tena, hofu imetanda, watu hawaaminiani tena. Dini tulizoletewa tuliambiwa kwamba, zitaleta amani na upendo hivyo tuachane na dini zetu za asili maana ni za kishenzi, zimegeuka kuwa angamio kwa vizazi vyetu.
Lakini kwa bahati mbaya kule walipotoka hawakuwa na huo upendo na amani waliyotuambia. Inashangaza kuona kwamba walikuwa wanajaribu kuzima moto kwa jirani il hali kwao kunateketea. Wazee wetu hawakuyajua hayo kutokana na ufinyu wa upatikanaji wa habari. laiti kama wangetuletea dini hizi leo hii, sidhani kama wazee wetu wangewaelewa. Kwani naamini wangewauliza. Je huko mnakotuambia kuna asali na maziwa mbona kila uchao watu wanachinjana...?
Je wangekuwa na jibu gani?
Lakini wazee wetu hawakuwa wajinga, hawakukubali kirahisi kupoteza asili yao, walikataa kuwa watumwa wa kuabudu, wengi walidiriki kukimbilia msituni. Hata hivyo haikuwa rahisi kwao kuepuka utumwa huo. Walilazimishwa kwa mijeledi na wengine kunyongwa ili kuzipokea dini hizo maana ndizo zenye kumjua Mungu.
Naam, Taifa likagawanywa vipande vipande kila mwenye dini na dhehebu lake akitupa nyavu kujaribu kuvua waumni kwa ajili ya kuongeza idadi ya waumini.
Wazee wetu wakalazimika kutupa pembe, tunguli na ngozi za wanyama walizotumia katika kufanya matambiko. Mapango yaliotumika kuomba mizimu ikatelekezwa wakavalishwa suti, kanzu na barkhashia ili kumuabudu Mungu wao.
Zile kumbukumbu za kuwakumbuka mababu zao waliotangulia mbele ya haki zikakemewa kwamba hazifai kabisa maana hao ni wafu, lakini wakalazimishwa kuwakumbuka kina Paulo, Yahaya, Musa, Said na Omar na Aboubakar Sadik...... Kebehi gani hii..............!
Siku hizi dini zao walizotuletea zimetumika kama kitega uchumi kuwakamua wanyonge na masikini. Mazingaombwe siku hizi ndio mpango mzima. Yule ambaye ni mahiri katika kufanya mazingaombwe ndiye ambaye huvua waumni wengi. Umasikini wa kifikra umegeuzwa mtaji na wajanja. Hivi sasa wananyang'anywa hata kile kidogo walicho nacho.
Yupo mwanafalsafa mmoja alipata kusema kwamba heri kukosa mali kuliko kukosa akili, lakini nawashangaa wananchi wenzangu maana naona wamekosa vyote, yaani mali na akili. haiwezekani mtu akujie kwa jina la dini kisha umpe hata kile kidogo ulicho nacho. Lakini pia unanyimwa haki ya kuhoji matumizi ya hicho ulichotoa maana unatishwa kwamba umemtolea Mungu, na Mungu haulizwi ametumia vipi...!
Nabaki najiuliza ni kitu gani wamekosa wanadamu hawa. Mungu aliwaumba wakiwa ni binadamu kamili wenye viungo vyote na akili timamu, lakini mtu akiwajia kwa jina la dini na kuwatisha wanakuwa dhalili na wanyonge wakifuata kila wanachoambiwa bila hata kuhoji.... Ujinga gani huu...!
Dini zao walizotuletea zimeigeuza dunia imekuwa si salama tena, vita kila kona, visasi, chuki na husuda zimashamiri. Kama tungeendelea kubakia na dini zetu za asili kusingekuwa na AL QAIDA wala AL SHABAAB, kusingekuwa na kutokuaminiana, kusingekuwa na chuki za kidini, kusingekuwa na matabaka, maana hata huko kwenye nyumba zao za ibada kuna matabaka, yule anayeonekana kuwa ni tajiri huwekwa mbele na hata akizungumza pumba hushangiliwa na kupigiwa makofi. Lakini pia kusingekuwa na kutokuaminiana.
Mimi naamini katika dini za asili, wengine huita upagani na ninajivunia kuwa hivyo, sina akili ya kushikiwa na ninafurahia maisha kama kawaida, ninafanya matambiko na kutoa kafara kama kawaida na maisha yangu ni mazuri na sina hofu ya kesho kwa sababu hakuna hata mmoja kati yetu anayeweza kusimama na kusema anaijua kesho.
Copy to Eiyer, Nyani Ngabu, Kiranga, Bujibuji, Kaizer, FaizaFoxy, figganigga, ladyfurahia, cacico, snowhite, gfsonwin, Heaven on earth, Kongosho
Amkeni....
Last edited by a moderator:
