Teknolojia inaleta fursa muhimu katika Elimu. Ni muhimu kuondoa vikwazo vinavyozuia wengine kuifurahia

[The Sheriff]

Elimu ni msingi wa maendeleo na fursa binafsi. Hata hivyo, kupata elimu bora kunaweza kuwa changamoto kubwa kwa makundi mbalimbali katika jamii. Lakini kwa miaka ya hivi karibuni, teknolojia imeleta mapinduzi katika uwanja wa elimu na kuwapa wengi fursa mpya.

Kuthibitisha hili, Ripoti ya Shirika la Umoja wa Mataifa la Elimu, Sayansi na Utamaduni (UNESCO), kwa mfano, inaeleza kuwa teknolojia inachukua nafasi ya vifaa vya kawaida vya kuwasaidia watu wenye mahitaji maalumu na hivyo kuwawezesha kujifunza na kushiriki katika elimu bila vizuizi. Hata hivyo, pamoja na ukweli kwamba teknolojia inaleta matumaini makubwa, wapo wengine ambao wanakosa fursa ya kufurahia uwepo wake.

Moja ya chngamoto kubwa za kidunia kuwahi kutokea katika miaka ya hivi karibuni ni Janga la COVID 19. Janga hili lilisababisha kufungwa kwa shule katika maeneo mengi duniani kote, na elimu mtandaoni ikawa suluhisho. Elimu ya mtandaoni ilifungua fursa ya elimu kwa zaidi ya wanafunzi bilioni 1 duniani kote, kwa mujibu wa ripoti hiyo. Hata hivyo, takribani 31% ya wanafunzi duniani hawakuweza kufikia elimu hii ya mtandaoni. Pia, 72% ya wanafunzi wa familia za kipato cha chini hawakuweza kunufaika na teknolojia hii. Hii inaonesha jinsi teknolojia inavyoendelea kuwa chanzo cha kutengeneza pengo la elimu kati ya matajiri na maskini.

Haki ya elimu sasa inaambatana na haki ya kufikia huduma ya mtandao. Hata hivyo, upatikanaji wa teknolojia hii bado ni changamoto. Duniani, ni 40% tu ya shule za msingi, 50% ya shule za sekondari za chini, na 65% ya shule za sekondari za juu zinaunganishwa na mtandao. Ripoti ya UNESCO pia inasema ingawa 85% ya nchi zina sera za kuboresha upatikanaji wa mtandao kwa wanafunzi na shule, bado kuna safari ndefu ya kufikia usawa wa upatikanaji wake.

Mabadiliko ya haraka katika teknolojia yanaweka shinikizo kubwa kwa mifumo ya elimu kuzoea na kuhakikisha inakidhi mahitaji ya wakati huu. Nchi nyingi zimeanza kutambua umuhimu wa kuweka vipaumbele vya ujuzi wa kidigitali katika mitaala na viwango vya tathmini. Hata hivyo, ripoti ya UNESCO pia inaeleza kuwa viwango hivi mara nyingi vinabuniwa na wadau wa kibiashara, na hii inaweza kuathiri ubora na upatikanaji wa ujuzi huu kwa wanafunzi.

Lakini pia, wanafunzi wengi hawana nafasi ya kutosha ya kujifunza na teknolojia ya kidigitali shuleni. Hata katika nchi tajiri zaidi duniani, ni takriban 10% tu ya wanafunzi wenye umri wa miaka 15 hutumia vifaa vya kidigitali kwa zaidi ya saa moja kwa wiki katika masomo ya hisabati na sayansi. Hii inaonesha umuhimu wa kuongeza ufikiaji wa teknolojia kwa wanafunzi wote na kuwezesha walimu kufundisha kwa kutumia teknolojia.

Walimu pia wanahitaji kujiandaa na kuwa na ujasiri wa kufundisha kwa kutumia teknolojia. Ni nchi chache tu zenye viwango vya ujuzi wa ICT kwa walimu. Ripoti ya UNESCO pia inaeleza kuwa ingawa ni 5% tu ya mashambulizi ya ransomware yanalenga sekta ya elimu, bado kuna haja ya kuimarisha mafunzo ya walimu kuhusu usalama wa mtandao.

Teknolojia inaleta fursa kubwa katika uwanja wa elimu, lakini kuna changamoto nyingi zinazohitaji kushughulikiwa. Ili kuhakikisha kuwa teknolojia inatumika kwa manufaa ya wote, serikali, sekta binafsi, na wadau wa elimu wanahitaji kushirikiana katika kuhakikisha upatikanaji na ubora wa elimu ya kidigitali. Ni muhimu kwa mifumo ya elimu kubadilika na kukabiliana na mahitaji ya wakati wetu ili kuhakikisha kuwa hakuna anayeachwa nyuma. Elimu ni haki ya kila mtu, na teknolojia inapaswa kutumiwa kama chombo cha kuhakikisha kuwa haki hii inatekelezwa kwa wote.

 

[Numbisa]

Nice