Tuli kitako nakaa, kwenye kigoda changu nang'aa
Uzee paso na busara, ni sawa na kunywa chang'aa
Nami sitaki kuwa pakacha, kama Ali wa kitaa
Naskiza kwa umakini, mnadi huyo Klorokwini
Amini nakuaminia, hata awe mchungu kama shubiri
Busara nimekujaza, hekima ziko pomoni
Hakika huwezi shindwa, Abadani asilani
Ngoja nikulainishe kwanza. . .
Baba nakukubali, kwa zako nyingi busara. .
Zilobeba wako utu, ukaheshimu hata fukara. . .
Mwanao nakuheshimu, nisije kuwa hasara. . .
Niseme nini mie, baba yangu namba wani!
Mahitaji ulinipatia, mpaka nikanawiri. .
Heshima ukanifunza, nijue nini sahihihi. . .
Shule ukanipeleka, nisijechanganya fasihi. . .
Niseme nini mie, baba yangu namba wani!
Macho nilojaaliwa, uso yapendezesha. . .
Hakika yanapendeza, mwenyewe ushanijulisha. . .
Ndo maana vijana watapa tapa, usumbufu bado kwisha. .
Baba mkubali mkwe, wazushi watapotea!
Najua wamekuchosha, vijana kunivizia. . .
Wengi wao wakukera, amani kukumalizia. . .
Visimu vyao vyasumbua, usiku ukisinzia. . .
Baba mkubali mkwe, wazushi watapotea!
Mkwe nlokuletea, hakika namtambua. . .
Kwa hali hata mali, tayari kumchambua. . .
Kwa mapenzi yake ya dhati, macho amenifumbua. . .
Baba naomba umpokee, mkweo Klorokwini!
Ikibidi umweke kitako, maswali umuulize. . .
Mwenyewe uhakikishe, wasiwasi umalize. . .
Hana hila nakwambia, mwenyewe jiridhishe. . .
Kisha umpokee mkweo, bintio nakuomba!