Kwa wale ambao wanafuatilia siasa za marekani watakumbuka kuwa miaka ya 90, serikali ya Clinton ilifanikiwa kuweka makubaliano na Korea kaskazini ili wamarekani wawapatie wakorea mafuta na chakula kwa uhakikisho kuwa wakorea wataachana na mipango ya kujenga nyuklia.
Joji Kichaka (ambaye alipondea sana alichofanya Clinton na democrats) alivyoingia madarakani alitishia kuwa angetumia nguvu ili wakorea waache nyuklia na vitisho vingine kibao. Haya, hata miaka haijapita, kichaka amedhihirisha kuwa mtu wa vitisho tu kwani wakorea wamejaribu kwa mafanikio nyuklia yao na pia Kichaka imebidi tu atume watu wakafanye mazungumzo na wakorea.
Mfano huu wa Kichaka na vitisho vya maneno ya democrats ni kitu ambacho Kikwete amejifunza toka kwa rafiki yake joji kichaka na sasa anakitumia Tanzania. Nilifuatilia sana maneno na ahadi za Kikwete wakati wa kampeni za kugombea uraisi. Maneno mengine sio tu yalikuwa kama ahadi za Joji Kichaka bali yalikuwa kama ahadi za mama anayebembeleza na kuhadaa mwanaye ili anyamaze na kulala.
Kikwete aliahidi ajira milioni moja, aliahidi kupitia mikataba upya, aliahidi kuboresha maisha, aliahidi kufanya kazi kwa bidii na uadilifu, aliahidi ujenzi wa miundo mbinu, aliahidi kusaidia michezo nchini, aliahidi kufanya vingi sana...
Baada ya kuwa raisi, akaomba apelekewe majina wa mafisadi na wauzaji wa madawa ya kulevya, akaanzisha website ili kupokea maoni ya wananchi, akatoa namba za simu ili kupokea maoni ya watu na ahadi kibao.
Wakati watu wakisubiria sera zitekelezwe, waziri wake akasaini mkataba wa Richmonduli, buzwagi, mikataba kibao ya uchunguzi wa madini, nakadhalika. Wakati huo huo ikajulikana kuwa kuna upotevu mkubwa sana wa pesa BOT, akiba kubwa ya pesa za kigeni iliyoachwa na Mkapa ilikuwa ikipotea, nk.
Wakati haya yakiendelea, Kikwete akaanza safari za nje ambazo zimetumia mabilioni ya shilingi za watanzania, ukaguzi wa fedha ukaonyesha kuwa kuna matumizi zaidi ya bilioni moja ambayo hayana uthibitisho wowote huko ikulu, nk.
Hali ya wananchi ikazidi kuwa mbaya, mfumuko wa bei zaidi ya asilimia mia mbili kwa bidhaa muhimu, nk wakati serikali na viongozi wakitumbua mabilioni kwa ufahari wa magari na serikali yenye watu wengi sana (moja ya baraza la mawaziri kubwa kabisa barani Afrika).
Wakati wananchi wakisubiri vitendo, Kikwete anaendeleza trik ya Joji Kichaka (ndio maana hawa ni marafiki) ya kutoa maneno tu ambayo hayana vitendo. Hotuba yake ya Dodoma imejaa ahadi nyingi kuliko hata zile alizotoa wakati wa kampeni.
Kwa mara nyingine tena Kikwete amewadanganya watanzani. Swali ni kwamba, mpaka lini ataendelea kuwahadaa watanzania?