Utandawazi noma mi nataka kuachana na simu!
Tunapoongelea utandawazi mara nyingi tunaongelea picha zinazoonekana kwenye TV, na internet. Watoaji wakubwa wa content za TV na internet zinazolalamikiwa sana ni Wamarekani. Kwa hiyo kwa kiasi kikubwa watu wanapolaumu utandawazi kuharibu maadili huwa wanailaumu Marekani.
Lakini nimefuatilia kidogo historia ya Marekani ni taifa ambalo limeundwa kwenye msingi wenye nguzo mbili tu. Nguzo ya kwanza ni UHURU (Liberty) na UTAFUTAJI WA RAHA (Pursuit of happiness).
Lilikuwa ni taifa la majaribio lililoundwa na wazungu waliokuwa wanakimbia tawala za kidini na zenye mila na desturi kali za Ulaya, ambako ndiko chimbuko la wazungu, na hivyo kutokana na wao kuwa wameishi Ulaya muda mrefu sana wakajikuta wamejitwika mila ambazo wengine zilikuwa zinawakandamiza.
Sasa ukiangalia hivyo utagundua kwamba misingi ya Marekani ni misingi ya binadamu wengi tu duniani. Kila mtu anapenda uhuru na anapenda kupata raha. Ndio maana mambo mengi wanayofanya Wamarekani yanapokelewa vizuri hata nje ya Marekani. Na hata ukiangalia taifa lenyewe la Marekani hivi sasa ni mkusanyiko wa watu toka kila pande ya dunia, hivyo waweza kusema ni wawakilishi wa dunia. Imefikia steji wanaongozwa na raisi mwenye damu ya Kenya. Hata sisi weusi wa Afrika tunaona kabisa kuwa kumbe Marekani inatuhusu.
Sasa utakuta hali kama iliyotokea Marekani inatokea sehemu nyingi. Watu wanapohama toka vijijini kwenda mijini ni sawa sawa na wazungu waliohama toka Ulaya kwenda Marekani.
Vile vifungo vya mila vilivyokuwa vinawabana vijijini huku mijini havipo, maana huku ni mkusanyiko wa watu toka pande zote Tanzania. Hakuna anayeweza kusema mila za kwao ndio zitawale mjini, kwa hiyo watu wanakuwa huru zaidi, na wanakuwa na uwezo zaidi wa kufanya ile kitu roho inapenda.
