Kufeli Si Mwisho: Maisha Yanaendelea

[Zack Abdul]

Kaa chini kwa dakika chache na utafakari maisha.

Fikiria watu uliowahi kuwaona wakifanikiwa sana — leo hawapo tena.
Fikiria wafanyabiashara waliotikisa miji kwa utajiri wao — leo majina yao hayasikiki.
Fikiria kampuni zilizokuwa kubwa, maduka yaliyokuwa yamejaa watu, biashara zilizokuwa zinaonekana haziwezi kuanguka — nyingi zimekufa kimya kimya.

Lakini dunia bado inaendelea.

Hili ni somo ambalo wengi hawalitaki kulisikia:
Kila kitu duniani kinaweza kupotea.
Fedha zinaweza kuisha.
Biashara inaweza kufa.
Kampuni inaweza kufilisika.
Kazi inaweza kupotea.
Na hata watu tunaowapenda wanaweza kuondoka ghafla.

Lakini maisha yataendelea.

Mwanaume aliyepoteza biashara yake leo anaweza kuwa tajiri tena miaka michache ijayo.
Mwanamke aliyelia kwa kufilisika leo anaweza kuwa mwajiri wa watu kesho.
Kijana aliyeshindwa mtaji wake wa kwanza anaweza kujenga kampuni kubwa baadaye.

Kufeli si mwisho wa maisha.
Ni sehemu ya maisha.

Tatizo kubwa si kuanguka.
Tatizo ni kukaa chini baada ya kuanguka na kuamini kwamba maisha yamekwisha.

Tazama dunia vizuri.
Watu wanafukuzwa kazi kila siku — lakini wengine wanaanza upya.
Watu wanaibiwa kila siku — lakini bado wanainuka tena.
Watu wanafilisika kila siku — lakini wengine wanarudi sokoni wakiwa na nguvu zaidi kuliko mwanzo.

Biashara hufa.
Lakini ndoto hazifi mpaka mwenye ndoto aamue kuzikataa mwenyewe.

Usijichukie kwa sababu ulifeli.
Usione aibu kwa sababu ulianza biashara ikafa.
Usikate tamaa kwa sababu watu walikucheka ulipoanguka.

Kumbuka:
Hakuna mtu anayezungumzia maumivu yako muda wote. Dunia inaendelea mbele. Na wewe pia unatakiwa kuendelea mbele.

Ukifilisika leo, usikae kaburini mwa biashara iliyokufa.
Inuka.
Jifunze.
Anza tena.

Kwa sababu maisha haya waheshimu wale wasiokata tamaa.

Mara nyingi, watu tunaowaona leo wamefanikiwa sana walipitia vipindi vya aibu, madeni, usaliti, njaa, na kufeli ambavyo hawavionyeshi hadharani.

Lakini waliinuka.

Na wewe unaweza kuinuka pia.

Usikubali kufa moyo kwa sababu ya kipindi kibaya.
Mvua hainyeshi milele.
Usiku haukai milele.
Na uchumi mbaya hauzuii maisha kusonga mbele.

Jifunze kuanza tena bila aibu.
Jifunze kupoteza bila kujichukia.
Jifunze kuanguka bila kusahau thamani yako.

Kwa sababu mwisho wa biashara si mwisho wa maisha.
Na kufilisika si mwisho wa safari ya mafanikio.

Bado unapumua.
Bado una akili.
Bado una muda wa kupambana tena.

Na hiyo pekee ni sababu tosha ya kutokukata tamaa.

Dr. Zack✍️