Watu wakifa hugeuka kuwa majini?

Watu wakifa hugeuka kuwa majini?

1. Je Ibilisi ni katika majini au malaika?

Kuna mawazo tofauti kuhusiana na jambo hili kati ya wanazuoni wa tafsiri. Imam Shahid Sayyid Qutb amesema katika tafsiri yake "Fidhilalil Qur-an" kwamba Iblisi ni katika majini, kwani neno la Allah (SWT) katika suratul Baqarah, aya 34 ," isipokua Iblisi" linafahamisha kwamba alikua si Malaikah isipokuwa yeye alikua pamoja na Malaikah wakati ilipotolewa amri ya kumsujudia Adam (AS).

Kuna rai nyingi nyingine zinazodai kwamba Iblisi ni katika Malaikah, lakini zote hazina nguvu mbele ya neno lake Allah (SWT) aliposema: "isipokuwa Iblisi alikua ni katika majini akaiasi amri ya Mola wake." Al-Kahf 50. Vile vile ushahidi mwingine wa kuthibitisha ya kwamba Iblisi ni katika majini ni neno lake yeye Mwenyewe Iblisi alipokua akizungumza na Allah (SWT) aliposema : "Umeniumba kutokana na moto, na kumwumba yeye ( Adam A S ) kutokana na udongo." Al 'Araf 12.

Na vile vile Iblisi ana watoto kinyume na malaika, na kwamba malaikah wao wapo kama vile walivyoelezea na Allah (SWT): "Hawamwasi Allah katika amri zake na wanatekeleza kila wanaloamrishwa."At-Tahrim 6. Izingatiwe kwamba malaikah wameumbwa kutokana na nuru, lakini majini wameumbwa kutokana na moto. Imepokewa na Aishah (RA) kutoka kwa Mtume (SAW) kwamba amesema : "Wameumbwa Malaikah kutokana na nuru, wakaumbwa majini kutokana na moto, na akaumbwa Adam kutokana na vile mlivyoelezewa." Imepokewa na Muslim. Hivyo basi Iblisi ni katika majini wala si Malaikah.

2. Je Majini wana husdah?

Jawabu ni ndiyo kwani jicho lipo la aina mbili : kuna jicho la kibinadamu, na jicho la kijini. Na imepokewa hadithi sahihi kutokana na Umu Salamah (RA) kwamba Mtume (SAW) alimwona kijakazi huko kwa ( Umu Salama ) akiwa na alama usoni mwake akasema (SAW): "Mfanyeni kisomo kwani yeye amepatwa na kijicho", yaani jicho baya la kijini.

Na imepokewa na Bukhari kutokana na Abu Hurayrah (RA) kwamba Mtume (SAW) amesema: "Kijicho ni kweli kipo, na akakataza kujichora."Rejea mlango wa Tiba katika Sahih Bukhari.

3. Ni vipi anatakiwa mwislam kuamini kuhusiana na majini?

( a ) Wao ( Majini ) ni viumbe wa Allah (SWT), kama ambavyo Allah (SWT) aliumba malaika vile vile aliumba majini na watu

( b ) Qur-an Tukufu haikuelezea namna ya sifa ya ndani ya maisha ya majini isipokua tu vile walivyoumbwa kwa moto, na namna ya kuongea kwao na sisi kuongea nao na kuwasiliana nao

( c ) Lakini la kuzingatia mno ni kwamba Qur-an kwa nguvu zote inakataza watu kutaka msaada kutoka kwa majini au kuwategema, kuwaogopa n.k kwani atakaye wafanya kuwa ni wapenzi wasaidizi, na kuomba kinga kutoka kwao kinyume na Allah (SWT), Allah (SWT) atamdhalilisha huyo atakayefanya hivyo. Kwani majini hawana uhusiano wowote na mwanadamu katika maisha yao. Hawawashi wala hawazimi, wala hawatufanyii lolote gumu kuwa jepesi, wala hawafanyi lililopo mbali kuwa karibu. Wala hawana uwezo wa kumdhuru adui yetu.

Mwisho wa yote wao ( majini ) ni viumbe waliopo chini ya mamlaka ya Allah (SWT) hawatoki kwenye himaya yake, wala hawawezi kutoka nje ya hukumu zake. Ndugu mwislam uislam ni ITIKADI iliyokuwa mbali mno na ushirikina kwa kutapeli watu, kwa kutabiri mambo yatakayotokea kwa uongo.
 
1. Je kulikuwepo na Majini mitume / manabi ?

Swali hili aliulizwa Adhwihaak ya kwamba, je kuna waliokua mitume au manabii miongoni mwa majini kabla ya Mtume Muhammed (SAW)? Akajibu kwa kusema, "Hivi hamkusikia tamko la Allah (SWT) lisemalo 'Enyi makundi ya majini na wanadamu, Je hawajakufikieni Mitume miongoni mwenu kukubainisheni aya zangu ..' Al - An'am 130." Aya hii kwa alivyoona Adhwihaak inafahamisha ya kwamba Allah (SWT) alipeleka majini wakiwa ni Mitume. Lakini yeye amepingwa kwamba hii aya haikuweka wazi mitume waliyotajwa walikua ni katika jamii ipi mojawapo, majini au watu, kwa sababu neno lake Allah (SWT) "miongoni mwenu" inawezekana kwamba mitume walitumwa katika jamii zote hizo mbili na inawezekana ikawa mitume walikuwepo katika jamii moja lakini kwa wote hao. Katika jambo hili wanazuoni walitofautiana katika makundi mawili wengi wao walikubaliana ya kwamba mitume hawakuwepo katika jamii ya majini kamwe, mitume walikuwepo tu katika jamii ya wanadamu.Ni wanazuoni wachache tu ndio walioonelea kwamba kulikuwepo na mitume waliyopelekwa katika jamii ya majini, na miongoni mwa walioonelea hivyo ni huyu mwanazuoni aitwaye Adhwihaak.

2. Utume Wa Nabii Muhammad (SAW) kwa majini na wanadamu

Wanazuoni wote wa kiislam wamekubaliana kwamba Muhammad (SAW) alitumwa na Allah (SWT) kwa majini na watu wote. Na hivi ndivyo ilivyo kama asemavyo Ibn Taymiyah - kwani Qur-an inashindana na jamii ya majini na pia jamii ya wanadamu. Allah (SWT) anasema: "Sema hata wakijikusanya majini yote na watu wote, ili kuleta mfano wa hii Qur-an, basi hawangaliweza kuleta mfano wake, hata kama watasaidiana wao kwa wao." Al - Israa 88. Na kundi mojawapo la majini lilisilimu mara tu baada ya kusikia Qur-an tukufu: "Sema imefunuliwa kwangu ya kuwa kundi moja la majini lilisikia Qur-an likasema ( kundi hilo ), 'Hakika sisi tumesikia Qur-an ya ajabu inayoongoza kwenye uongofu, tukaiamini, na kamwe hatutamshirikisha Mola wetu na yeyote yule ....'" A1 - Jinn 1 - 2. Aya zote hizi za Qur-an zinafahamisha wazi kwamba Mtume (SAW) alitumwa kwa majini na watu wote. Ama kuhusu upande wa hadithi za Mtume (SAW) kuna uthibitisho wa wazi katika sahihi mbili Bukhari na Muslim kutokana na hadithi ya Jabir bin Abdallah (RA) kwamba Mtume (SAW) amesema: "Nimepewa mambo matano ambayo hajawahi kupewa Mtume yeyote yule kabla yangu - Mpaka alipofikia: Na kila Mtume alikua akipelekwa kwa kabila lake tu lakini mimi nimetumwa kwa watu wote." Na akasema Jauhariy kwamba makusudio ya watu wote hapa ni kwa majini na wanadamu wote pamoja. Hivyo basi Mtume Muhammad (SAW) alitumwa kwa wanadamu wote pamoja na majini akiwa ni Mjumbe Mwonyaji. Na huu ndio ubora wake uliowazidi mitume wote waliotangulia.

3. Mila na madhehebu ya majini

Allah (SWT) ametufahamisha ndani ya Qur-an aliposema, "Katika sisi wapo ( majini ) wema na kuna miongoni mwetu ( majini ) kinyume na hao tumekua njia mbali mabli." Al - Jinni 11. "Nasi ( majini ) wamo miongoni mwetu waislamu na wamo miongoni mwetu waliokengeuka. Waliosilimu hao ndio waliotafuta uongofu. Na wanaokengeuka hao watakuwa kuni za Jahannam." Al- Jinn 14 - 15 . Hivyo basi Allah (SWT) katufahamisha kwamba majini nao wana mila na itikadi tofauti kama vile wanadamu walivyo, kuna waislam, makafiri na madhehebu mbalimbali.

4. Je majini nao wanalipwa kutokana na vitendo vyao?

Wanazuoni wanatofautiana katika hili. Kuna pande mbili za maoni:

Upande wa kwanza: unaona kuwa majini watalipwa kwa wema watakaoufanya, na wataadhibiwa kwa maasi yao na hayo ni maoni ya Imam Malik, Shafii, Ahmad na Ibn Abbas.

Kundi la pili: linaona kwamba majini hawatakuwa na malipo yeyote isipokuwa kukombolewa na moto wa Jahannamu. Kisha wataambiwa wawe mchanga kama vile itakavyokuwa hali ya wanyama. Na hayo ni maoni ya Imam Abu Hanifa, Laith, Abu Salim na wengineo.

Lakini usahihi ni kwamba majini watalipwa kwa vitendo vyao vizuri au vibaya kwa ushahidi wa Qur-an, Allah (SWT) anasema: "Na wote wana daraja ( malipo ) sawa kwa yale waliyoyatenda. Na Mola wako si mwenye kughafilika na yale wanayoyatenda." Al - An'am 132. Na toleo lijalo litahusu majini katika maisha yao ya kijamii.
 
Majini nao wana maisha yao ya kijamii, na katika mada hii tutazungumzia dondoo zifuatazo:-

( a ) Je majini wanaoana na kuzaliana?
( b ) Je anaweza mwanadamu kuoana na jini na inakuaje?
( c ) Je ndoa kati ya mwanadamu na jini ina hukumu gani katika sheria ya kiislam?
( d ) Je kujamiiana kati ya mwanadamu na jini kuna ulazimu kuoga janaba?
( e ) Je watoto wanaotokana na majini na wanadamu wapo katika hali gani?
( f ) Nini hukumu ya mwanamke aliyetekwa mume wake na jini
( g ) Je majini wanakula na kunywa?
( h ) Wapi yapo makazi ya majini
( i ) Je wana vipando vya kupanda?

Hivyo basi tutaanza na dondoo ya mwanzo inayohusu ndoa za majini na kizazi chao. Ni kweli kwamba majini wanaoana na kuzaana na hilo limethibitishwa na kitabu chetu kitakatifu na sunna za Mtume Muhammad (SAW). Katika Qur-an Tukufu Allah (SWT) amesema:

"Je! Mnamfanya yeye na kizazi chake kuwa marafiki ( zenu ) badala yangu, hali wao ni maadui zenu?" Al - Kahf 50. Aya hii inafahamisha wazi kwamba majini wanaoana kwa ajili ya kupata watoto, vile vile Allah (SWT) anatuambia katika sehemu nyingine katika Qur-an akituhadithia kuhusu wanawake wa peponi akisema:

"watakuwepo huko wanawake watulizao macho yao, ambao hawajaingiliwa na binadamu wala majini katu." Ar-rahman 56. Aya hii pia inaonyesha kwamba majini nao huingiliana na kuziondoa bikira na kujamiiana. Ama upande wa sunnah za Mtume (SAW) zinazofahamisha ndoa zao na kuzaliana ni neno

lake mtume (SAW) aliposema: "Hakika majini wanazaliana kama wanavyozaliana wanadamu, nao ni wengi mno idadi yao."Ameipokea hadithi hii Hatim na Abus-Sheikh- katika Al-Adhamah kutokana na Qataadah.

Je kuna ndoa kati ya majini na watu?

Imeenea katika baadhi ya maeneo kwamba kuna mtu ameoa jini; au kwamba mwanamke wa kibinadamu kaolewa na jini au ameposwa, kuna ukweli gani katika jambo hili? Ni kweli kwamba ndoa huenda ikawa

kati ya mwanadamu na jini, Allah (SWT) anasema katika Qur-an Tukufu, "Nashirikiana nao katika mali ( zao ) na watoto ( wao )." Al - Israa 64. Akasema Mtume (SAW), "Anapokutana na mume na mkewe

pasi na kutamka jina la Allah, basi shetani hushirikiana na huyo mume katika tendo la ndoa." Hadithi hii ameitoa Shubly katika kitabu Ahkamul - Murjaan. Na amepokea Hafidhi bin Jarir kutoka kwa Ibn Abbas (RA) kwamba Mtume (SAW) amesema: "Pindi amwingiliapo mume mkewe wakati akiwa katika hedhi,

shetani humtangulia na ( mkewe ) akishika mimba basi atazaa mtoto ( khanithi ). Na ( makhanithi ) ni watoto wa majini." Na kuhusiana na hilo amesisitizia Ibn Taymiyah kwamba: "Inatokea kujamiiana kati ya majini na wanadamu na ikiwa ni hivyo basi huzaliwa watoto mara nyingi ( kwa kujamiiana huko )

kwa inavyofahamika." Wanazuoni wa mambo ya historia wameelezea kuhusu habari zilizotangulia zinazohusiana na ndoa kati ya majini na binadamu tutataja kisa kimojawapo, kisa kilichotolewa na Abu Bakar bin Abid-Dunia, kutokana na Abu Yusuf Saruji kwamba yeye amesema: "Alikuja mwanamke mmoja

kwa bwana mmoja huko Madina, akamwambia: 'Hakika sisi tumeshukia hapa jirani je utanioa?' Basi yule bwana akamwoa, kisha baada ya muda yule jinni ( mke ) akamwambia yule bwana, 'umefika wakati wa kuondoka, basi naomba unipe talaka.' Na alikua akimjia usiku katika maumbile ya mwanamke. Ikatokea

baada ya kumpa talaka akamwona siku moja katika mtaa mmoja ( jinni ) huyo akiokota nafaka zilizoanguka kutoka kwa wauzaji wa mazao. Akamwuliza ( jinni huyo ), 'Je unazihitaji nafaka hizi?' Yule jini akaweka mkono wake kichwani kuonyesha kuumbuka, kisha akainua uso wake akamtazama yule

bwana, akamwuliza, 'umenionaje?' Yule bwana akajibu, 'kwa jicho hili', yule jini akanyoosha kidole chake kwenye lile jicho la yule bwana na kulipofua."

Na pamoja na kwamba kuna visa vingi vilivyopokewa kuhusu kuwepo ndoa kati ya wanadamu na majini, isipokua kuna wanaodai ya kwamba Majini wana asili ya maumbile ya moto, na wanadamu wana asili ya

vitu vinne ( Hewa, maji, udongo na joto ), hivyo basi kuwepo kwa asili ya moto katika majini kunazuia kukaa yale ( manii ) ya binadamu katika tumbo la uzazi la jini, kutokana na moto uliopo.

Hivyo tutaelezea uwezekano huo katika toleo lijalo Inshaallah, usilikose.
 
( a ) Je kujamiiana kati ya majini na wanadamu kuna wajibu wa mtu kuoga janaba?

Aliuliza swali hili Abul-Maaliy wa dhehebu la Hanbali, kwamba kuna mwanamke mmoja alisema: 'kuna jini anayenitokezea kama vile awavyo mume na mke, je? nawajibika kuoga

janaba?' Hapo baadhi ya wafuasi wa Imam Hanbal walisema, 'huyo hatooga janaba.' Abu-Maaliy akasema: 'Hata kama huyo mwanamke angesema, 'ameniingilia mimi jinni kama vile mwanaume afanyavyo' pia halazimiki kuoga janaba, hiyo ni kutokana na kukosekana ushahidi wa kuingiliwa na kushusha, hivyo basi hali hiyo ni sawa na kuota ndoto.'


( b ) Nini hukumu ya mke aliyetoweka mumewe kwa kutekwa na jini?

Kisa kama hiki kilitokea wakati wa utawala wa Khalifa wa pili Umar bin Al-khatab (RA). Kuna bwana mmoja alikwenda kusali sala ya Isha akiwa na jamaa zake, akatoweka. Mke wake

akenda kwa Umar bin Al-khatab (RA) akamwelezea kuhusu mume wake. Umar (RA) akawauliza jamaa zake kuhusu maelezo ya yule mwanamke, wakasema ni kweli mume wake katoweka.

Hivyo Umar (RA) akamwamuru yule mwanamke angojee na kumsubiri mumewe kwa muda wa miaka minne. Yule mwanamke akafanya hivyo. Baada ya miaka minne kupita, akarudi tena kwa Sayyidna Umar (RA) akamwambia kwamba miaka minne imepita na hakuna dalili yeyote

ya kuonekana mume wake. Sayyidna Umar (RA) akawauliza jamaa zake. Nao wakamwambia kuwa ni kweli bado hajatokea. Hivyo akampa ruhusa ya kuolewa. Alipoolewa tu, yule mume wake wa kwanza akatokea, ikabidi aende kwa Sayyidna Umar (RA) akamwambia: 'Mtu

unatoweka bila ya jamaa zako kuwa na taarifa yeyote kuhusu wewe.' Yule bwana akamwambia nilikuwa nina udhuru, Sayyidna Umar (RA) akamuuliza: 'udhuru gani huo.' Yule bwana akasema, 'siku moja nilipokuwa nakwenda msikitini kusali sala ya Isha nilikumbwa na jinni

mwanamke - Nikawekwa kwao muda mrefu. Wakavamiwa na majini waislam. Waliovamiwa wakashindwa vita na wengine kuuawa na wengine wakatekwa, nami nikawa ni katika mateka. Wakaniuliza kuhusu dini yangu. Nikawaambia kwamba mimi ni mwislam. Wakaniambia

kwamba wao pia ni waislam, hivyo si halali kwao kunifanya mimi ni mateka. Hivyo wakaniambia nichague kati ya kuondoka kurejea kwetu au kukaa nao, ndipo nilipochagua kurejea kwetu. Wakawa wakinimulikia usiku kwa vijinga vya moto na mchana nikifuata

mwelekeo wa upepo kurudi.' Umar (RA) akamuuliza, 'ulikuwa ukila nini?' Akasema: 'kila kilichokua hakitajwi jina la Mwenyezi Mungu ( yaani nyamafu ).' Akamuuliza tena, 'Nini ulikua ukinywa?' Akajibu: 'kila kilichokuwa kama mvinyo.' Hapo Umar (RA) akamwambia kwamba anaweza kumrudia mke wake au achukue mahari yake kutoka kwa yule mkewe.

(c) Ni kipi chakula cha majini?

Kuna tofauti nne kuhusu chakula chao: Kuna wanaosema kwamba majini hawali wala hawanywi, kuna wanaosema kwamba baadhi yao wanakula na kunywa na baadhi nyingine

hawanywi wala hawali. Kuna wanaosema kwamba majini wote wanakula na kunywa na hii ndio rai sahihi kulingana na kitabu kitakatifu Qur-an na sunna za Mtume Muhammad (SAW)

aliposema, "Shetani atakuwa anakula na mtu, mpaka atakapotaja jina la Allah (SWT), shetani atatapika kile alichokula tumboni." Na katika sehemu nyingine alisema, "Msiende haja kwa kutumia samadi au mifupa kwani hivyo ni vyakula vya ndugu zenu majini." Na katika sehemu nyingine anatukataza kula kwa mkono wa kushoto kwani yeye alisema,

"Anapokula mmoja wenu atumie mkono wake wa kulia, na anapokunywa atumie vilevile mkono wake wa kulia, kwani shetani anakula na kunywa kwa kutumia mkono wa kushoto." Huo ni ushahidi wa kutosha wa kuonyesha kwamba majini wanakula na kunywa.
 
Ni yapi makazi ya Majini?

Majini wanaishi katika mgongo wa ardhi, na wanapatikana kwa wingi katika majangwa na sehemu za takataka, sehemu zenye najisi, chooni na makaburini. Na hii ndio sababu hasa ya wale waganga ambao wana uhusiano na mashetani kupenda kuwashauri wateja wao kupeleka vitu vyao na uchawi wao katika maeneo hayo.

Zipo hadithi za Mtume (SAW) ambazo zinakataza watu kuswali chooni, na hiyo ni kutolana na najisi iliyopo sehemu hiyo, na pia ndiyo makazi ya mashetani. Vile vile majini hupatikana kwa wingi mno katika maeneo yanayokithiri maasi kama vile masokoni. Na hiyo ndiyo sababu Mtume (SAW) akamuusia mmoja wa masahaba wake akamwambia, "Ikiwezekana usiwe ni wa mwanzo kuingia sokoni, wala wa mwisho kutoka, kwa sababu humo sokoni ndipo penye harakati za shetani, na ndipo anaposimika bendera yakc." Imetolewa na Muslim.

Na kama ilivyo vile vile mashetani hukaa katika majumba ya binadamu, na Bismillahi tu ndiyo inayowakimbiza. Amepokea Muslim na Abu Dawood kutoka kwa Jabir kwamba Mtume (SAW) amesema: "Yeyote atakayeingia nyumbani kwake akataja jina la Allah (SWT) wakati anaingia na wakati anapokula shetani husema: ‘Leo hapana malazi hapa wala chakula’, na atakapomtaja Allah (SWT) wakati anapoingia nyumbani, na asitaje wakati wa kula, shetani husema, 'Mmewahi chakula lakini hakuna kulala', na mtu asipotaja jina la Allah (SWT) anapoingia nyumbani kwake shetani husema kuwaambia wenzake, ‘mmewahi chakula na malazi’."

Na mahali pengine ambapo shetani hupenda kukaa `ni kati ya jua na kivuli', na hiyo ndio sababu ya Mtume (SAW) kutukataza kukaa katika sehemu hizo, kama ilivyopokewa katika hadithi.


Vipando vya majini?

Mtume (SAW) ameelezea kwamba majini nao wana vipando, na hiyo ni katika hadithi sahihi iliyotolewa na Muslim kutokana na Ibn Mas'ud (RA) kwamba Majini walimwomba Mtume (SAW) awaombee chakula, ndipo Mtume (SAW) akasema: "Mtakula kila mfupa uliotajwa jina la Allah (SWT) ambao utakua ni bora kuliko nyama, na kila samadi itakua ni chakula cha vipando vyenu." Katika hadithi hii kuna dalili ya wazi ya kuonyesha kwamba Majini nao wana vipando.

Elimu na maarifa waliyonayo Majini

Kuna baadhi ya watu ambao wanadai kutibu wagonjwa na kwamba wao wamejifunza tiba hiyo kupitia kwa majini. Na kweli tokea zamani tunasikia kwamba kuna watu wa namna hii wanye uwezo wa kutibu baadhi ya maradhi sugu kama

yanavyofahamika. Na miongoni mwa visa vinavyofahamika ni kile kilichosimuliwa na An-nadr bin Amril-Harithiy, aliposema: "Katika zama za ujahiliyah tulikua siku moja karibu na kisima, nikamtuma binti yangu na chombo ili anitekee maji, akakawia, tukamtafuta lakini hatukumwona mpaka tukakata tamaa. Akasema: 'Naapa kwa Allah (SWT) kwamba

siku moja nilikua nimekaa mbele ya baraza yangu, akanitokezea Sheikh mmoja, alipoinama kuniangalia mara akawa ni binti yangu. Nikasema: 'Binti yangu.' Akasema: 'Binti yako ndiyo!' Nikasema: 'Ulikua wapi binti yangu?' Yule binti akasema, 'ile siku uliponituma kisimani, alinichukua jinni akawa ananizungusha huku na kule, nikawa nipo kwao mpaka

ilipotokea vita kati ya makundi mawili ya majini. Akaahidi kwamba wakishinda vita atanirudisha. Wakashinda ndipo aliponirudisha.' Lakini akawa binti huyo amebadilika rangi yake ya mwili na akawa amekonda sana. Akakaa kwa muda akaanza kubadilika kuwa katika hali ya kawaida, akachumbiwa na mabinamu zake tukamwozesha. Lakini lile jinni likawa limempa ishara ya kumwita kwa moshi pindi panapotokea matatizo yeyote. Basi yule mume wake akawa anamkera na

kumwambia wewe ni jini, shetani wala si mtu. Basi yule binti akawasha moshi, yule mume akasikia sauti inamwambia, 'Una nini na huyu ukimsogelea atakutoboa jicho. Nimemchunga tokea wakati wa ujahiliyah kwa maarifa yangu, na katika uislam kwa dini yangu.' Yule mume akamwambia, 'Huwezi ukajitokeza tukakuona?' Yule jinni akajibu,

'Haturuhusiwi. Hakika baba yetu aliomba mambo matatu. Tuone lakini tusionekane, tukae katika tabaka za ardhi, na aishi mmoja wetu mpaka atakapofikia kuwa mtu mzima, kisha atarudi tena kuwa kijana mdogo.' Yule bwana akamwuliza: 'Je unaweza kunipa dawa ya homa?' Lile jinni likajibu: 'Ndio. Unamjua yule mdudu mdogo katika maji,

ambaye anafanana na buibui?' Yule bwana akasema, 'Namfahamu.' Basi yule jinni akamwambia, 'Mchukue halafu tengeneza nyuzi kutokana na miguu yake kisha ufunge katika mkono wako wa kushoto.' Yule bwana akafanya hivyo. Akawa kama aliyefunguliwa kamba ya shingo."

Pia Zayd bin Wahab alisema, "Tulipigana vita tukashuka katika kisiwa kimoja, wakawasha moto, pakawa pana chumba kikubwa, akasema mmoja wao, 'mimi naona kuna chumba kikubwa, pengine mnawaudhi waliomo ndani ya chumba hiki.'

Wakazima moto wao. Akatokezewa usiku akaambiwa, 'Hakika wewe umeihami nyumba yetu tutakufundisha tiba ambayo itakusaidia, atakapokujia mgonjwa basi chochote utakachomwambia kuwa ni dawa basi atapona.' Ikawa siku moja akajiwa na mtu mwenye tumbo kubwa, alipokua amekaa katika msikiti wa Kufah. Yule mtu akamwomba ampatie

dawa ya tumbo lake. Akamwambia, 'Hivi jamani hamshangai kumwona mtu ananiuliza kuhusu dawa naye atakufa leo kwa kula matunda?' Basi siku ile ilipopita watu wakamfuata kumwambia, 'Wewe ni mwongo mbona yule bwana hajafa?' Akawaambia, 'Muulizeni hali ya ugonjwa wake.' Wakasema amekwisha pona.' Akawaambia, 'Mimi nilimtisha asile sana!' Kimetolewa na Abadalla bin Muhammad A-Qurashiy.
 
( a ) Ipi sababu kuu ya uadui uliopo kati ya shetani na wanadamu?

Uadui kati ya shetani na mwanadamu ulianzia mbali mno tokea pale Allah (SWT) alipomuumba Adam (AS) na kumpulizia roho kisha akawaambia Malaika wamsujudie. Na alikua Iblisi akifanya ibada pamoja na Malaika naye akawa ni miongoni mwa walioamrishwa, lakini yeye alikataa na akafanya kiburi na wala hakusujudu.Wakati Allah (SWT) alipomwuliza sababu ya kukataa kwake kutii amri ya kumsujudia Adam (AS) alijibu kwa kusema:

"Mimi ni bora kuliko yeye umeniumba kwa moto na yeye ukamuumba kwa udongo." Na hapa hasa ndio kiini cha uadui uliopo kati ya shetani na binadamu. Na picha nzuri ya historia ya uadui huo ni kama vile ilivyotolewa katika Qur-an Tukufu, Allah (SWT) anatuhadithia: "Na hakika tulikuumbeni, kisha tukakutieni sura, kisha tukawaambia

Malaika msujudieni Adamu". Basi wakasujudu isipokua Ibilisi hakuwa miongoni mwa waliosujudu. Allah (SWT) akasema: "Nini kilichokuzuia kumsujudia nilipokuamrisha?" Akasema: "Mimi ni bora kuliko yeye. Umeniumba kwa moto, naye umemuumba kwa udongo." Akasema Allah (SWT): "Basi shuka huko, haikufai kufanya kiburi

humo. Haya toka; hakika wewe ni miongoni mwa wadhalili - duni." Akasema: "Nipe muda ( nisife ) mpaka siku watakapofufuliwa viumbe." Akasema Allah (SWT): "Utakuwa miongoni mwa waliopewa muda, ( lakini si mpaka wakati huo)."Akasema: "Kwa kuwa umenihukumia upotovu basi nitawakalia waja wako katika njia yako iliyonyooka ( ili niwapoteze ), kisha nitawafikia mbele yao na nyuma yao na kulia kwao na kushoto

kwao; wengi katika wao hawatakuwa ni wenye kushukuru." Akasema Allah (SWT): "Toka humo hali ya kuwa ni mwenye kudharauliwa na mwenye kufukuzwa. Atakaekufuata miongoni mwao ( nitamtia motoni ) niijaze Jahannamu kwa ninyi wote." Kisha Allah (SWT) akasema kumwambia Nabii Adam (AS): "Na wewe Adam kaa peponi pamoja na mkeo, na kuleni mnavyopenda, lakini msiukaribie mti huu msije mkawa miongoni mwa

waliodhulumu nafsi zao." Basi shetani; ( naye ni yule yule Iblisi ) aliwatia wasi wasi ili kuwafichulia aibu zao walizofichiwa, na akasema: "Mola wenu hakukukatazeni mti huu ila msije kuwa Malaika au kuwa miongoni mwa wakao milele ( msife )." Naye akawaapia kwamba: "Kwa yakini mimi ni mmoja wa watoao ushauri mzuri

kwenu." Basi akawateka wote wawili kwa kuwahadaa. Na walipoonja mti ule, aibu zao ziliwadhihirikia, na wakaingia kujibandika majani ya ( miti ya huko ) peponi. Na Mola wao akawaita ( akawaambia ): "Je sikukukatazeni mti huu na kukuambieni ya kwamba shetani ni adui aliye wazi?"Wakasema: "Mola wetu! Tumezidhulumu nafsi zetu, na

kama hutotusamehe na kutuhurumia, bila shaka tutakua miongoni mwa wenye hasara kubwa." Allah (SWT) akasema: "Shukeni ( katika ardhi ), ninyi kwa ninyi maadui. Na makao yenu yatakuwa katika ardhi na starehe yenu pia."Al - A'raaf 11 – 23. Cha msingi tunachosoma katika aya hizi ni kwamba uadui uliopo kati ya shetani na

mwanadamu hautomalizika wala kuondoka kwani yeye shetani anaona kwamba sababu ya yeye kufukuzwa kutoka kwenye neema za Allah (SWT) ni Adam. Hivyo ni lazima ampoteze yeye na kizazi chake na hii ndio sababu hasa ya Qur-an kutuhadharisha mno dhidi ya shetani huyu.

( b ) Ni maasi gani yanayompendeza mno Iblisi?

Anasema Mtume (SAW): "Hakika mamlaka ya Iblisi yapo kwenye bahari, kisha huwatuma majeshi yake, ili wawafitinishe watu. Katika fitna kubwa huja mmoja wao kumwambia, 'Nimefanya hili na lile.' Iblisi anamjibu, 'Hamna kitu.' Kisha anakuja mwingine anasema vilevile, naye humwambia pia, 'Hujafanya lolote.' Kisha

anakuja mwingine anamwambia, 'Sikumuacha mtu yule mpaka nimehakiklsha ametengana na mkewe.' Hapo Iblisi humwinamia jinni huyo na kumwambia,'Wewe ndio.'" Imepokewa na Muslim.
 
Ili tuweze kuprove hili, em kufa tuone basi afu kua jini ingilia mtu umwambie aje JF kuandika kua ni wewe
 
You must log in or register to reply here.

Similar Discussions

Our Community

Coming Soon

Regional Communities

Coming Soon
Back
Top Bottom
Menu
Forums
New posts
Log in
Register