Mbunge kijana machachari ambaye aliasisi mapambano dhidi ya kashfa ya Buzwagi miaka kadhaa iliyopita, Zitto Kabwe, ameunda kamati ya watu watatu kusaka jimbo atakalogombea ubunge Oktoba mwaka huu.
Zitto ambaye ni mbunge wa Kigoma Kaskazini (Chadema), alitoboa mkakati huo kwenye taarifa kwa vyombo vya habari aliyotoa jana kupitia jukwaa la wanabidii, hata hivyo hakutaja majina ya watu hao mbali tu ya kusema ni watalaam kutoka Chuo Kikuu cha Dar es Salaam.
Mbali na jimbo lake la sasa, Zitto ameelekeza matamanio yake katika majimbo ya Kigoma Mjini (Kigoma), Kahama (Shinyanga), Kinondoni (Dar es Salaam) na Geita (Mwanza).
Jana magazeti kadhaa yanayochapishwa kila siku, yaliandika habari kwamba Zitto atagombea ubunge jimbo la Kinondoni huku Mwenyekiti wa NCCR-Mageuzi, James Mbatia akielezwa kugombea huko Kawe, yote ya jijini Dar es Salaam.
Kutokana na taarifa hiyo, Zitto alisambaza waraka kwa vyombo vya habari jana, kuelezea kile alichokiita kuwa ni ufafanuzi kuhusu habari hiyo.
Zitto alisema kamati hiyo ni ya uchunguzi (Exploratory Committee) itakayofanya utafiti wa kina kubaini jimbo linalomfaa kwa ajili ya kugombea.
Alisema majimbo aliyoomba yaangaliwe ni pamoja Kigoma Kaskazini, ukiondoa kata ya Mwandiga ambayo imependekezwa kukatwa na kupelekwa Jimbo la Kigoma Mjini.
Alisema Kata ya Mwandiga ina zaidi ya wapiga kura 15, 000 ambao awali walikuwa katika jimbo la Kigoma Kaskazini.
Pia Zitto ambaye amewahi kukaririwa akisema kwamba siasa halikuwa chaguo lake la kwanza akifananisha na kazi ya kufundisha aliyoitamani zaidi, aliyataja majimbo mengine kuwa ni Kigoma Mjini, Kahama, Kinondoni na Geita.
Nimeelekeza kufanyike utafiti (survey) wa kina ili nitakapofikia kufanya maamuzi, nifanye maamuzi kutokana na taarifa za kutosha, alisema.
Zitto alisema utafiti huo utafanywa na wanataaluma kutoka Chuo Kikuu cha Dar es Salaam ambao pia watafanya uchambuzi wa hali ya kisiasa na kutoa mapendekezo.
Alisema kwa mujibu wa mpangilio wa kazi, anatarajia kutangaza rasmi jimbo atakalogombea ubunge ifikapo Machi 28, mwaka huu.
Naomba ifahamike kuwa bado sijafanya uamuzi rasmi na kwamba uamuzi wangu utazingatia taarifa ya uchunguzi, ushauri wa viongozi wa chama changu (Chadema) na matarajio yangu ya kisiasa ya baadaye, alisema.
Zitto alisema akiwa Mtanzania, ana haki ya kugombea ubunge mahala popote nchini.
Uamuzi wowote nitakaoutoa utazingatia kwa kiasi kikubwa sana umuhimu wa kujenga mfumo imara wa demokrasia ya vyama vingi na hasa kuwa na Bunge imara lenye wabunge wengi wa kambi ya upinzani, alisema.
Wakati Zitto akifikia hatua hiyo, watu mbalimbali wametoa maoni tofauti kuhusu uamuzi huo.
Ayoub Kafyulilo akichangia kwa njia ya mtandao, alipinga hatua ya Zitto kufanya utafiti wa jimbo gani agombee.
Kafyulilo alisema kuna hoja ambazo Zitto anastahili kuzifafanua, ikiwa ni pamoja na kama hakuwa na mipango ya muda mrefu katika jimbo la Kigoma Kaskazini analoendelea kuliwakilisha bungeni.
Au (mipango ya Zitto) ilikuwa inaishia miaka mitano tu, kama ilikuwa ya muda mrefu unafikiri ni nani ataweza kuikamilisha kiusahihi kama ulivyoipanga wewe, alihoji katika mchango huo kwa Zitto.
Aliendelea, na kama hukuwa nayo, je, waweza kuwa kiongozi mzuri kiasi gani, kwa nani, nini kinacho kusukuma kutafuta jimbo lingine, unatafuta mahali unapokubalika ili uweze kushinda, au unatafuta mahali ambapo maendeleo yapo duni unataka ukahamasishe maendeleo huko.
Kafyulilo alisema anaamini kama Zitto alilitumikia kwa uaminifu jimbo la Kigoma Kaskazini kwa miaka mitano, atakuwa amezoeana vema na watendaji na kujua mikakati mizuri ya kuboresha hali zao za maisha.
Naye James Dongwe, alisema anaunga mkono hoja za Kafyulilo kuwa ni miongoni mwa watu wanaotoka Kigoma Kaskazini.
Zitto nimejifunza mengi kupitia wewe, umefanya mambo makubwa katika national level (ngazi ya kitaifa), lakini ninaona kuna negative impact (matokeo hasi) katika local level (ngazi ya msingi), alisema katika mchango wake.
Hata hivyo, Zitto alijibu hoja hizo na nyingine akisema hajaamua agombee jimbo gani na kusisitiza anachokifanya utafiti aliouita kuwa ni exploratory work. Zitto alisema baada ya Mwandiga kuelekea kuhamishiwa Kigoma Mjini, kumekuwa na maoni mengi kutoka kwa watu mbalimbali kwamba akagombee ubunge Kigoma Mjini.
Pia alisema wapo waliomshauri abakie Kigoma Kaskazini na wengine walitaka agombee katika majimbo mengine kama Kinondoni.
Alisema jimbo la Kinondoni alilianza kulifikiria tangu mwaka 2005, lakini ikaonekana Kigoma Kaskazini ilikuwa muafaka kwa kugombea.
Zitto alieleza kuwa wakazi wa majimbo ya Geita na Kahama wamekuwa wakimuomba agombee tangu mwaka 2007. Lakini ni hatari sana kukubali tu maombi ya watu fulani fulani, ni vema kufanya siasa kisayansi, exploration huwa zinatangazwa na baadaye by elimination (kwa kuondoa mengine) unabakia na jimbo moja na sababu za jimbo hilo, alisema.
Alisema utafiti wa kisiasa anaouita kama political exploration ni mpana kwa mwanasiasa na unatumika zaidi katika nchi zilizoendelea.
Huku kwetu tumezoea kusema nimeombwa na wazee niende nikagombee, halafu mtu aliyeombwa anaenda anapata kura kiduchu, mpaka unashangaa hao waliomwomba hawakumpa, alihoji.
Zitto alisema kutokana na hali hiyo, inabidi vijana kubadili siasa na kwamba uamuzi atautoa Machi 28 Machi, mwaka huu katika viwanja vya Mwandiga Sokoni, wilayani Kigoma.
Alisema hatua yake ya kutogombea Kigoma Kaskazini haina maana kuwa Chadema haiwezi kumsimamisha mgombea ubunge.
Kuna vijana wengi sana wenye uwezo mkubwa ambao wanaweza kuwa wabunge wazuri, kwani nani alinijua mimi kabla sijapewa heshima hii na watu wa Kigoma? alihoji.
Alisema bado ana imani ya kufanya uamuzi sahihi kuhusu jambo hilo.
CHANZO: NIPASHE
