Mtu hawezi kukuelewa hadi avae viatu vyako, awe amekumbana na changamoto kama yako, binafsi kuna changamoto ya kifamilia nilikutana nayo inafanana na hii kwa kiasi fulani.
Mimi na ndugu zangu tulimpoteza mzazi wetu miaka kadhaa iliyopita. Kabla ya kufariki mzazi wetu aliugua kwa kipindi kirefu na ilibidi tujipange na kuweka utaratibu wa kumpatia matibabu. Katika kipindi hicho cha kuugua, pamoja na huzuni ya mzazi kuugua, faraja tuliyokuwa tukiipata ni ukaribu tuliokuwa tukiiujenga miongoni mwetu sisi kama ndugu, na ukaribu tuliokuwa tukiupata kutoka kwa mgonjwa, ambapo kabla ya hapo, ilikuwa vigumu kuupata ukaribu huo kwa kuwa tulikuwa mbali mbali kutokana na majukumu ya kazi. Ilikuwa fursa nzuri sana kwa mgonjwa kutuambia mengi yaliyokuwemo moyoni na akilini mwake kabal ahajafariki.
Hatimaye mzazi wetu akatangulia mbele ya haki, na sisi kama watoto wake tukapanga na kuamua taratibu za mazishi kutokana na tulivyoona sisi inafaa. Cha ajabu wakajitokeza ndugu wengine wa mbali, na baadhi ya wazee wakataka utaratibu wa mazishi ubadlike kwa matakwa yao wao, na walikuja kwa hoja kwamba marehemu anawahusu. Tuliwagomea, lakini polepole baadhi ya ndugu zangu walijawa na hofu kutokana na shinikizo kutoka kwa hawa 'ndugu zetu wengine wa mbali', nilibaki peke yangu kutetea uamuzi ule. Hawakunielewa mwanzoni, lakini nilisimama kidete hatimaye walifuata tulichopanga ingawa kwa shingo upande. Miaka kadhaa imepita maisha yanaendelea, ndugu zangu wananishukuru kwa kuwasemea na hata baadhi ya wale ndugu sasa wananielewa kwa msimamo ule.
Ikuwa changamoto iliyoleta majaribu na kutaka kusambaratisha familia, lakini nilisimamia nilichoamini, nilipingwa sana lakini nami nikasema sitetereki, mwishowe walikuja kunielewa. Nafsi ingenitesa sana maishani mwangu laiti nisingetetea ninachokiamini.
Nilichojifunza ni kwamba kama unaamini kilichomo moyoni mwako, kitetee kwa nguvu zako zote hata wasipoelewa ni suala la muda tu, watakuja kuelewa.