Mkasa wa kweli : Nilioa mwanamke jini na kuzaa nae

[Kanungila Karim]

SEHEMU YA 01



Nilikuwa bado kijana na umri wangu ulikuwa wastani wa miaka ishirini na mitano. Sikuwa nimepata elimu ya kutosha baada ya wazazi wangu wote wawili kufariki dunia wakati nikiwa mdogo.
Nilianza maisha ya kuhangaika tangu nikiwa mdogo baada ya wazazi wangu hao kufariki dunia. Nilianza kuajiriwa kazi ndogondogo ili nipate pesa za kujikimu na nilipofikia umri wa miaka kumi na minane ndipo nilipopata ajira rasmi.
Ajira yenyewe ni ya kazi ya ulinzi. Niliajiriwa katika kampuni moja ya ulinzi, kazi yangu ikiwa ni kulinda zamu usiku. Kwa vile sikuwahi hata kupitia mafunzo ya mgambo nilifundishwa hapo hapo jinsi ya kutumia bunduki na jinsi ya kukabiliana na wezi na majambazi.
Lindo langu la kwanza lilikuwa katika eneo la Gofu. Unapoingia katika jiji la Tanga eneo hilo unakutana nalo mwanzo mwanzo. Halikuwa eneo la makazi ya watu isipokuwa viwanda vidogo vidogo na maghala ya makampuni mbalimbali.
Wakati wa mchana eneo hilo linakuwa limechangamka kwa sababu kunakuwa na pilikapilika za wafanya kazi lakini ikifika usiku mahali hapo hupooza na kuwa kimya kabisa.
Mimi nilikuwa ninalinda ghala la kampuni moja ambayo wamiliki wake walikuwa ni Waasia. Ghala hilo lilikuwa liko mbali kidogo na maghala mengine na unapoliacha ghala hilo unaelekea katika maghala ya zamani ambayo yalikwa hayatumiki tena.
Nilikuwa ninaingia kazini saa 12 jioni na kutoka saa 12 asubuhi. Kama si dhiki ya kimaisha niliyokuwa nayo nisingekubali kwenda kukesha usiku katika eneo hilo kwani lilikuwa linatisha sana.
Siku za mwanzo mwanzo nilipoanza kazi nilikuwa na hofu na wasiwasi lakini kadiri siku zilivyoendelea hofu ilinipungua.
Nikawa najiambia pengine ni kwa sababu sijaizoea kazi yenyewe ndiyo maana ninapata hofu, lakini nikiizoea hofu itaondoka.
Nilipata mshahara wangu wa kwanza ukanisaidia kununua vitu vidogo vidogo vya chumbani mwangu. Nilikuwa nimepangisha chumba katika eneo la Chumbageni ambalo halikuwa mbali sana na lilipokuwa lindo langu. Ofisi zetu ndizo zilikuwa katikati ya jiji.
Siku moja nilipokuwa katika lindo langu nikirandaranda huku na huku nilimuona msichana mmoja akipita katika barabara iliyokuwa karibu na lile ghala ninalolinda
Nilishituka kwa sababu kwanza ilikuwa ikikaribia kuwa saa nane usiku. Nilijiuliza yule msichana alikuwa anatoka wapi usiku ule?. Pili nilishituka kwa sababu mahali alikokuwa anaelekea hakukuwa na makazi ya watu bali kulikuwa na maghala ya zamani yasiyotumika tena na viwanda vilivyokufa.
Nikasimama na kumuangalia. Kwa vile barabara ilikuwa mbali kidogo, msichana huyo hakuniona au pia inawezekana aliniona lakini hakunijali. Alikuwa akitembea kwa hatua za haraka lakini bila kuonesha kuwa alikuwa na wasiwasi.
Alikuwa amevaa vazi jeupe la aina ya dera lililoficha kabisa miguu yake na alijitanda ushungi mrefu uliofanana na rangi ya dera alilovaa.
Wakati akitembea kulikuwa na mlio wa ko! ko! ko! uliokuwa ukisikika kwenye miguu yake. Nikahisi alikuwa amevaa viatu vya mchuchumio ambavyo vilikuwa vikitoa mlio kila alipopiga hatua.
Kwa vyovyote vile kitendo cha msichana huyo kuwa peke yake usiku huo na akitembea kwa kujiamini bila kuonesha wasiwasi kilionesha ujasiri.
Punde tu akawa amelipita eneo hilo na kupotea kwenye kiza. Hata hivyo niliendelea kuusikia ule mlio wa viatu vyake ko! ko! ko! japokuwa mwenyewe sikuwa nikimuona tena.
Nikawa najiuliza msichana yule alikuwa nani, anakwenda wapi na anatoka wapi. Lakini sikupata jibu.
Usiku wa siku ya pili yake muda kama ule nikaanza kuisikia tena ile sauti ya viatu ko! ko! ko!. Nilipotupa macho barabarani nikamuona yule msichana akitokea kwa mbali. Alikuwa amevaa mavazi yaleyale na akitembea kwa mwendo wake uleule wa harakaharaka lakini bila kuonesha kuwa alikuwa na wasiwasi.
Wakati huo nilikuwa nimeketi kwenye kiti baada ya kuchoka kurandaranda. Nikawa namtazama. Alipita karibu na lile lindo kisha akaendelea na safari yake. Punde tu akapotea kwenye kiza.
“Huyu msichana anakwenda wapi saa hizi?” nikajiuliza.. Hata hivyo kama ilivyokuwa usiku wa jana yake sikupata jibu.
Ilipofika saa 12 asubuhi nilibadilishana lindo na mlinzi mwenzangu, nikarudi nyumbani.
Kama kawaida yangu ya siku zote nilipofika nyumbani nilioga kisha nikalala. Sikuamka hadi saa sita mchana. Nilivaa nguo zangu za kiraia, nikaenda katika mkahawa uliokuwa jirani na nyumba niliyopanga chumba. Nikala ugali na maharage. Nilikuwa natamani nile nyama au samaki lakini uwezo nilikuwa sina..
Kila inapofika saa kumi jioni hununua kabisa chakula ambacho nitakula usiku. Chakula hicho hukiweka kwenye chombo kinachotunza joto. Kwa hiyo ninapokwenda kazini jioni ninakuwa na mfuko wangu wenye chakula changu cha usiku pamoja na chupa ya maji.
Lakini si chupa ya maji safi yanayouzwa madukani bali ni maji ya bomba ambayo huyatia kwenye chupa tena bila kuyachemsha.
Chakula ninachokwenda nacho hukila inapofika saa tatu usiku halafu naendelea na kazi yangu. Sikuwa nikivuta sigara kama ilivyo kwa walinzi wengine ambao huvuta sigara sana usiku kwa sababu ya baridi.
Nilikuwa na koti langu la mvua ambalo hulivaa usiku ili kujikinga na baridi. Ninapovaa koti hilo huwa sisikii baridi.
Tangu nilivyofika katika lindo hilo saa 12 jioni, niliona dalili za kunyesha mvua kwani wingu lilikuwa limejikusanya na kulikuwa na upepo mkali.
Hata hivyo hakukunyesha mvua lakini hali ya hewa haikuwa nzuri.
Ilipofika saa nane usiku nikausikia tena ule mlio wa viatu vya yule msichana, ko! ko! ko!. Nilipotupa macho barabarani nikamuona. Alikuwa amechanganya mwendo kwani matone ya mvua yalikuwa yameanza kuanguka
Msichana huyo alipokuwa karibu na lindo langu, mvua ikaanguka kwa kishindo. Nikamuona anakuja mbio kuelekea kwenye lile ghala kujificha mvua.
Alipofika alipitiliza moja kwa moja hadi karibu na lango la ghala hilo mahali ambapo nilikuwa nimesimama. Mvua ilikuwa hainipati kwa sababu palikuwa pamepauliwa bati.
‘Asalaam alaykum’ akanisalimia.
Nilikuwa Mkristo lakini nilikwishaizoea salamu hiyo ya kiislamu.
Nikamuitikia. ‘Alaykumu salaam’
Alinitupia jicho mara moja tu kisha akauelekeza uso wake chini. Alikuwa amejikunja kwa sababu ya baridi na nguo zake zilikuwa zimetota kwa mvua.
Ingawa alinitazama mara moja tu lakini uso wake niliuona. Alikuwa na pozi la kisomali. Na kama hakuwa msomali alikuwa chotara wa kiarabu. Alikuwa mweupe mwenye nyusi zilizopakwa wanja. Macho yake yalikuwa makubwa yenye mboni za kijivu, pia aliyakoleza wanja mzito na kuwa na mvuto wa kipekee.
Midomo yake alikuwa ameipaka rangi ya waridi. Ilikuwa na papi za ukubwa wa wastani. Alikuwa amevaa mkufu wa dhahabu kwenye shingo yake.
Mara moja eneo hilo likaenea hewa ya manukato ya udi wa mawaridi na manukato ya Al-uud na marashi alivyokuwa amefukiza nguo zake.
‘Hujambo?’ Nilijaribu kumsemesha ili niweze kumuuliza, anatoka wapi na anakwenda wapi.
‘Sijambo’ akanijibu bila kunitazama. Alikuwa akitetemeka kwa baridi iliyompata.
‘Pole sana. Unatoka wapi saa hizi?

ITAENDELEA

 

[Avatar]

Hahaha basi sawa

 

[Kanungila Karim]

SEHEMU YA 02

ILIPOISHIA
Msichana hakunijibu mpaka nilipomuuliza mara ya pili.
“Natoka hukoo!” akaniambia.
“Wapi?”
“Kazini”
“Ni wapi?”
Akanitajia klabu moja ya usiku ilikokuwa karibu na Posta.
“Na unakwenda wapi?”
“Ninaenda nyumbani”
“Unaishi wapi?”
“Hukoo”
Akanionesha kwa kidole kule alikokuwa anakwenda.
“Kwani kule kunaishi watu?” nikamuuliza.
Akanikubalia kwa kichwa.
SASA ENDELEA
Pakapita kimya kifupi huku mvua ikiendelea kunyesha. Nikamsikia akisema.
“Hii mvua haiachi, nakwenda nayo hivyo hivyo”
“Subiri kidogo, inaweza kuacha”
Msichana akatikisa kichwa.
“Hii haitaacha, sitaki alfajiri inikute hapa”
“Jinsi unavyotetemeka ukiendelea kunyeshewa unaweza kupata homa”
“Si kitu, acha niende”
“Ngoja basi nikupe koti langu uendenalo, utanirudishia kesho”
Nikavua koti langu na kumvalisha yeye.
“Asante kaka, nitakurudishia kesho” akaniambia kisha akaingia kwenye mvua na kwenda zake.
Nilimsindikiza kwa macho hadi alipopotea kwenye macho yangu.
Nikabaki kujiuliza kama kule alikokuwa anakwenda kulikuwa na nyumba za watu. Kwa jinsi nilivyokuwa nafahamu mimi upande ule haukuwa na nyumba isipokuwa maghala ya zamani yaliyokuwa hayatumiki tena na viwanda vidogo vidogo vilivyokufa.
Msichana huyo alipoondoka ndipo nilianza kujilaumu kwa kutomuuliza jina lake. Hata hivyo niliona hata kama ningemuuliza asingenitajia jina lake kwa vile ilikuwa ndio kwanza tunakutana. Baadhi ya wanawake wa pwani huwa hawapendi kutaja majina yao kwa watu ambao hawawafahamu vyema.
Siku iliyofuata ambayo haikuwa na mvua, yule msichana alipita tena saa nane usiku. Nilikuwa nimemsubiri kwa hamu ili nizungumze naye.
Alikuja mpaka pale kwenye ghala nilipokuwa nimesimama akanisalimia.
“Asalaam alaykum”
“Waalayka salaam. Hujambo?” nikamjibu.
“Sijambo. Habari ya tangu jana?”
“Nzuri”
“Samahani kaka, nilisahau kukuchukulia koti lako asubuhi lakini kesho nitakupitishia” akaniambia kwa sauti ya kubembeleza.
Na kweli nilibembelezeka. Hata sikujali kuwa koti hilo lilikuwa muhimu kwangu.
“Usijali, utaniletea kesho”
“Asante kaka”
“Mimi naitwa Alfredy, wewe unaitwa nani?” nikamuuliza ghafla.
Msichna aliguna kisha akanitazama machoni mwangu.
“Nitakutajia jina langu kesho, kwaheri”
Msichana huyo alikuwa ameshageuka ili aende zake.
“Unakwenda zako?” nikamuuliza.
“Ndiyo. Usiku mwema”
Msichana akawa anachanganya mwendo kuelekea kule alikodai anaishi.
Udadisi ukanipata. Alipofika mbali nikaamua kumfuata ili niweze kujua anakwenda wapi.
Nilimfuata kwa kumnyemelea huku nikijificha ficha kwenye miti ili asinione au kugundua kuwa namfuata.
Nilisahau kuwa niliacha lindo langu likiwa halina mlinzi. Tulikwenda mbali kidogo. Nilijiambia kama ni kukosa uoga msichana huyo alikuwa namba moja. Huko mahali alikokuwa anakwenda kulikuwa kimya na kulikuwa kunatisha.
Binafsi kama nisingekuwa na bunduki nisingethubutu kufika katika eneo hilo usiku huo lakini yule msichana alikuwa haogopi kabisa.
Baada ya mwendo wa nusu saa hivi nilimuona akiingia katika jumba moja la zamani ambalo upande wake mmoja ulibomoka na kuwa kama gofu.
Jumba hilo kama sikosei lilijengwa enzi za wajerumani na sikuweza kujua lilikuwa likitumika kwa shughuli gani.
Kulikuwa na msufi mrefu uliokuwa umeota mbele ya jumba hilo na kusababisha kivuli kipana.
Msichana huyo alipoingia ndani ya jumba hilo nilishituka, nikajiuliza kama alikuwa akiishi mle ndani.
Udadisi wa kutaka kumchunguza ukanipata. Nikatembea haraka haraka na kufika katika mlango wa jumba hilo ambao ulikuwa wazi, nikaingia ndani.
Nilipoingia ndani nilisimama kando ya mlango kwani kiza kilinifanya nisiweze kuona chochote. Nilitaka macho yangu yazoee kiza ili niingie ndani zaidi. Sikujua yule msichana aliingiaje wakati kulikuwa na kiza kiasi kile.
Macho yangu yalipozoea kiza nilijikuta nimeingia katika chumba kipana kilichokuwa na vichuguu vya mawe baada ya sakafu iliyokuwapo kuvunjika. Pia kulikuwa na mimea iliyoota mle ndani.
Kitu cha kwanza kilichonishitua ni kwamba nilikuta lile koti langu nililomuazima yule msichana limetundikwa kwenye moja ya kuta za chumba hicho
Nilikuwa sitaki kutoa tochi yangu ndogo lakini nililazimika kuitoa na kulimulika lile koti, nikahakikisha kuwa ni langu.
Hapo nikajiuliza yule msichana anaishi katika gofu lile?. Halikuelekea kuwa ni makazi ya binaadamu kwani licha ya kuwa linatisha, mazingira ya gofu hilo yalikuwa ni ya kuishi wadudu kama nyoka.
Dukuduku likanifanya niharakishe kuingia ndani zaidi. Nilizima ile tochi ili mwanga usionekane. Nikapita kwenye sehemu iliyokaa kama ukumbi ambayo pia ilikuwa na mawe na mimea iliyoota.
Upande mmoja wa ukuta palikuwa na tundu ambalo nilihisi zamani lilikuwa ni dirisha lililong’oka. Tundu hilo lilikuwa likiingiza mwanga wa mwezi ulionifanya nione uwazi mwingine mbele yangu. Nikaenda mbele zaidi.
ITAENDELEA KESHO

 

[babalao 2]

Ohooo

 

[Marlex Jr]

Weee mlinzi una andika vyema kuzidi walimu wa humu.

 

[Castr]

Yaani nilitarajia nikute stori fupi ila ni ndefu na hii tecno kioo chake hovyo.

Ungeandika tu.

Siku ya kwanza nilikutana naye kiwanjani nikamuomba namba.

Wiki ijayo akaja gheto nikamfirigisa kisawa sawa akiwa anamwaga akasema yeye ni jini, ukadhani utamu umekolea.

Mwezi ujao akapata mimba, ukashangaa anataka damu ya kuku baada ya muda akawa anakunywa hadi damu ya paka.

Ukaona anakuzingua ukaachana naye na sasa hivi hujui alipo.

 

[Kanungila Karim]

SEHEMU YA 03


ILIPOISHIA
Uwazi uliokuwa mbele yangu ulikuwa ni wa chumba kipana kilichokuwa kinatoka moshi kama vile kulikuwa kumewashwa moto ingawa moto huo sikuuona. Nikabaki nimesimama nikiangalia huku na huku.
Ghafla nikasikia sauti kutoka chumba kingine. Zilikuwa sauti za wanawake waliokuwa wakisemeshana kwa lugha ambayo sikuielewa. Nilipata uhakika wa kutosha kuwa sauti mojawapo ni ya yule msichana niliyemfuata.
Nikaenda upande ule nilikosikia sauti hizo. Palikuwa na uwazi uliotokana na kung’olewa kwa mlango. Nikasimama pembeni mwa ukuta na kuchungulia ndani ya uwazi huo. Nikawaona wanawake wawili waliokuwa warefu kama mnazi. Mmoja alikuwa amechutama akipulizia moto na mwenzake alikuwa amesimama.
Aliyesimama nilimtambua, alikuwa ni yule msichana niliyemfuata pale..
Hata hivyo hawakuwa na maumbo ya kibinaadamu. Licha ya kuwa warefu, walikuwa na nywele ndefu nyeupe. Pia waliota manyoya marefu mwilini. La kutisha zaidi walikuwa na miguu yenye kwato kama za punda!.
Moyo wangu ulishituka sana. Hapohapo yule msichana ninayemfahamu aligeuza uso na kuniona. Macho yake yalikuwa yamebadilika na kuwa na mboni zilizosimama kama za paka na zilikuwa za rangi ya kibluu.
“Wewe umefuata nini huku?” akaniuliza kwa fadhaa.
Hapo hapo nilianguka na kupoteza fahamu. Sikujielewa tena.
Nikiwa katika usingizi mzito nilisikia sauti ya yule msichana wa pili ikiuliza.
“Ni nani?”
“Si yule kijana niliyekwambia” Sauti ya yule msichana ninayemfahamu ikajibu.
“Ulimuonesha hili geto letu?”
“Sikumuonesha labda alinifuata”
“Amefuata koti lake”
“Atakoma! Si nilimwambia nitampelekea kesho”
Hapo hapo nikajiona nazinduka. lakini badala ya kujikuta niko kwenye lile gofu, nilijiona ninazindukia kwenye lindo langu, bunduki yangu nikiwa nimeishika mkononi. La kushangaza zaidi ni kuwa lile koti langu nililomuazima yule msichana nilikuwa nimelivaa!.
Nikashituka na kujiuliza nimefikaje hapa, wakati nilianguka na kupoteza fahamu nikiwa ndani ya lile gofu.
Nani aliyenileta hapa? Nilijiuliza.
Kumbu kumbu zangu za mwisho zilikuwa ni za mazungumzo kati ya wale wasichana wawili. Baada ya hapo sikukumbuka kitu kingine.
Nilijikuta nimelala mbele ya lindo langu, nikainua uso wangu na kuangalia huku na huku, sikuona mtu yeyote. Nilikuwa peke yangu. Nikainuka na kuketi. Niliikagua ile bunduki na kugundua ilikwa na risasi zake sawasawa. Shaka yangu kuhusu bunduki ikaisha.
Sasa nikawa najiuliza yule msichana na yule mwenzake niliyemkuta naye, walikuwa viumbe wa aina gani? Sikupata jibu.
Ile hofu iliyonipata ndani ya lile gofu nilikuwa bado ninayo. Nilijuta kumfuatilia yule msichana lakini nilishukuru kujikuta nipo salama.
Hata hivyo nilijiambia kama yule msichana atatokea tena mahali hapo muda ule, ningeliacha lindo na kumkimbia. Sikutaka kukutana naye tena katika maisha yangu..
Sikujua ni kitu gani kilichonifanya nitupe macho kwenye lango la lile
ghala. Nikashituka nilipoona lango hilo lilikuwa wazi. Nikanyanyuka haraka na kwenda kuliangalia. Nilikuta makufuli yalikuwa yamevunjwa. Nilitoa tochi yangu ndogo na kumulika mle ndani. Ghala hilo lilikuwa karibu tupu kwani vitu vyote viilivyokuwamo vilikuwa vimesafishwa.
Huo ulikwa ni mshituko mwingine nilioupata. Ghala limeibiwa! Huenda majambazi hao walikuja wakati nimemfuatilia yule msichana. Wakakuta hakuna mlinzi, wakavunja na kuiba kila kitu
Kwa kweli nilichanganyikiwa. Nilipiga mluzi na kutikisa kichwa changu kwa fadhaa.
Sasa nimekwisha!, nikajiambia.
Kama ghala limevunjwa nani atakuwa mtuhumiwa namba moja?. Jibu lilikuwa rahisi. Mtuhumiwa namba moja nitakuwa mimi.
Nitamueleza nini mwenye mali au nitawaeleza nini polisi?. Kwa vyovyote vile itaonekana nimekula njama na majambazi waje wavunje na kuiba.
Jela nilikuwa ninaiona kwenye macho yangu. Hakukuwa na chochote cha kuninusurisha na kifungo.
Nikatoa simu yangu. Sikukumbuka kupiga mahali popote zaidi ya polisi.
Iliwachukua nusu saa tu polisi kufika katika eneo hilo. Nilijua kuwa walifika kwa haraka si kwa sababu niliwapa taarifa za kushitusha za kuvunjwa kwa ghala bali kituo kikuu cha polisi hakikuwa mbali sana na eneo hilo.
Walifika polisi sita wakiwa ndani ya Land Rover 110, kila mmoja akiwa na bunduki yake begani.
Niliwaeleza juu ya tukio la kuvunjwa kwa ghala hilo na kuibiwa kwa mali zilizokuwamo.
Swali la kwanza ambalo mmoja wa polisi hao aliniuliza lilikuwa.
“Wewe ulikuwa wapi wakati majambazi hao wanavunja ghala?”
Ilibidi niseme uongo wa kipumbavu kuwa nilikuwa nimepitiwa na usingizi. Na nilipozinduka nikakuta ghala limeshavunjwa.
“Haiwezekani. Wewe na hao majambazi mmekula njama moja!” Polisi hao wakaniambia.
Walilikagua lile ghala lililovunjwa kisha wakaniuliza kama nimeshamuarifu mkuu wangu wa kazi na mwenye mali
Nikajibu “Bado sijawaarifu”
“Tupe namba ya simu ya mkuu wako wa kazi”
Nikawapa namba ya mkuu wangu wa kazi. Nilikuwa nikiifahamu kwa kichwa.
Polisi hao wakampigia simu na kumuarifu juu ya kuvunjwa kwa ghala hilo pamoja na wizi uliotokea.
“Tunakuomba ufike hapa haraka sana ukiwa na askari mwingine kwa sababu huyu tutaondoka naye”
Polisi huyo akakata simu na kuniambia
“Maelezo yako hayaridhishi. Utakuwa mtuhumiwa wetu namba moja”
Sikuwa na la kumjibu kwani mazingira ya tukio zima yanaonesha na mimi ninahusika.
Mkuu wangu wa kazi James Makete
alifika dakika chache baadaye akiwa na askari mwingine.
ITAENDELEA

 

[Kanungila Karim]

SEHEMU YA 04


ILIPOISHIA..
Mkuu wangu wa kazi James Makete
alifika dakika chache baadaye akiwa na askari mwingine.
SASA ENDELEA..
Akajitambulisha na kuelezwa na polisi hao kilichotokea. Makete hakuamini. Alikwenda kulikagua ghala hilo na kupigwa na bumbuazi.
“Imekuwaje Alfred?” akaniuliza.
Nilimueleza kama nilivyowaeleza polisi.
“Lakini Alfred hukuja hapa kulala, ulikuja kulinda hili ghala”
‘Nilipitiwa mzee”
“Sasa sisi tunakwenda naye kwa hatua zaidi. Askari wako mwingine ataendelea kulinda hili ghala. Asubuhi uje kituo cha polisi cha Chumbageni pamoja na mwenye ghala hili” Polisi mmoja akamwambia mkuu wangu.
Nilikabidhi bunduki kwa askari mwenzangu kisha nikapakiwa kwenye gari la polisi.
Karibu njia nzima polisi hao walikuwa wakinisema mimi. Walinituhumu kwamba nimekula njama na hao majambazi waliovunja lile ghala na kwamba endapo hawatapatikana nitashitakiwa peke yangu.
Tulipofika kituo cha polisi nilihojiwa na maelezo yangu yaliwekwa katika jalada kisha nikatupwa mahabusi.
Humo mahabusi nilikuta watu kadhaa, wengine wakiwa wamelala kwa mtindo wa kukaa huku wengine wakiwa macho. Nilitafuta kipembe nikaketi kwa kujiegemeza kwenye ukuta.
Ilikuwa ni mara yangu ya kwanza katika maisha yangu sio tu kukamatwa na polisi, bali kutiwa mahabusi. Usiku ule ndio niliiona na kuijua mahabusi ilivyo. Chumba kidogo lakini kilijaa watu wengi. Kilikuwa na joto na hakikuwa na harufu ya kupendeza kwani choo hakikuwa mbali.
Hata hivyo adha iliyokuwemo humo ndani haikunizuia kujiambia kuwa hukumu ya kosa langu ni kifungo kisichopungua miaka 30 jela. Ukilinganisha miaka hiyo na umri wangu, ilikuwa wazi kuwa ningefia jela au nitatoka jela nikiwa nimeshazeeka.
Nililia bila kujali kuwa mahabusi wenzangu walikuwa wakiniangalia. Kwa upande mwingine nilikuwa nikimfikiria yule msichana aliyenisababishia nipate balaa hili.
Sikujua alikuwa kiumbe wa aina gani. Alipokuja katika lindo langu na kuzungumza naye alikuwa binaadamu wa kawaida lakini nilipomuona tena akiwa ndani ya lile gofu hakuwa mwanaadamu. Alikuwa amebadilika. Alikuwa mrefu kupita kiasi, mwili wake ulikuwa umeota manyoya marefu na alikuwa na miguu yenye kwato kama ya punda
Kila nilivyojaribu kuliwaza umbo lake, mwili wangu ulikuwa ukisisimka. Sikuweza kujua alikuwa kiumbe wa aina gani.
Wakati ninalia, usingizi ulikuja kunichukua ghafla. Nikaota eti yule msichana amekuja kule mahabusi kuniangalia. Akaniambia.
“Mimi sikukuambia unifuate, ulinifuata mwenyewe. Unaona sasa!”
“Lakini wewe ndiye uliyesababisha. Kama ungeniletea koti langu, haya yasingetokea” na mimi nikamjibu.
“Sasa sikiliza nikwambie, najua una uchungu na unanilaumu mimi. Nitakuonesha mali zilizoibiwa zilikopelekwa. Twende”
Nikaona nimetoka mahabusi na yule msichana. Tukaenda katika eneo moja linaloitwa Kisosora katika barabara inayoelekea Mombasa. Akanionesha nyumba moja na kuniambia.
“Vitu vilivyoibiwa vimewekwa ndani ya nyumba hii. Na mwenye nyumba hii anawajua wote waliohusika kuvunja ghala na kuiba”
“Sasa nikiulizwa nimejuaje kuwa vitu vilivyoibiwa vimeletwa humu, nitajibu nini? Si nitaonekana ninahusika?”
nikamuuliza msichana huyo.
“Basi nitakuja mwenyewe kituo cha polisi asubuhi niwambie polisi nimeona vitu vikiingizwa usiku ndai ya nyumba hii”
Aliponiambia hivyo nikazinduka. Nikaona kulikuwa kumeshakucha.. Waliingia polisi wawili wakatuhisabu kwa kutuita majina. Walipomaliza kutuhisabu waliondoka. Kila mahabusu akaenda kunawa uso na kurudi. Baada ya muda kidogo tuliletewa uji. Ulikuwa uji wa sembe uliotiwa chumvi. Baadhi ya mahabusu waliletewa chai kutoka majumbani kwao.
Ilipofika saa mbili asubuhi alikuja polisi kuniita. Nikaenda naye katika ofisi ya afisa upelelezi wa wilaya. Afisa upelelezi mwenyewe alikuwa ameketi kwenye kiti. Pia kulikuwa na polisi wawili miongoni mwa wale polisi walionikamata usiku wakiwa wesimama huku wakiwa na bunduki walizokuwa wamezibeba tumboni.
Mbali ya polisi hao kulikuwa na raia sita waliokuwa wamewekwa chini. Nilishuku kuwa walikuwa ni wahalifu.
Mara tu nilipoingizwa katika ofisi hiyo afisa upelelezi aliwauliza wale watu kama walikuwa wananifahamu. Wote wakajibu kuwa hawakuwa wakinifahamu. Na mimi nikaulizwa kama nilikuwa nawafahamu watu hao. Baada ya kuwaangalia sikuona yeyote niliyekuwa namfahamu. Nikatikisa kichwa na kujibu kuwa siwafahamu.
“Una hakika kuwa hakuna yeyote unayemfahamu miongoni mwa watu hawa?”Afisa upelelezi akaniuliza kwa mkazo.
“Nina hakika, hakuna ninayemfahamu” nikamjibu.
“Basi mrudishe” afisa upelelezi akamwambia yule polisi aliyenileta huku akiwa ameshikilia bunduki yake huku nikiwa na hofu kweli kweli.
Nikarudishwa mhabusi. Sikujua watu wale walikuwa kina nani na kwanini nilipelekwa kuulizwa kama ninawafahamu ilhali siwafahamu.
Baadaye tena kama saa nne hivi nilitolewa nikapelekwa tena katika ofisi ya afisa upelelezi wa wilaya. Nilimkuta afisa upelelezi, mkuu wangu wa kazi na mtu mmoja mwenye asili ya kiasia ambaye nilihisi alikuwa ndiye mmiliki wa ghala lililovunjwa.
Afisa upelelezi akaniambia kwamba mnamo saa moja asubuhi alifika msichana mmoja pale kituoni ambaye alidai alikuwa mkazi wa eneo la Kisosora. Akawaeleza kuwa aliona gari likishusha vitu usiku katika nyumba moja.
“Akaendelea kutueleza kwamba alishuku kuwa vitu vile vilivyokuwa vinashushwa vilikuwa vya wizi hivyo akatuomba twende katika nyumba hiyo kuchunguza” Afisa upelelezi huyo akaniambia na kuendelea.
“Tukaenda katika nyumba hiyo ambayo yule msichana alituelekeza. Tulifanya upekuzi na tuligundua kuwa vyumba viwili vya ndani na vyumba vitatu vya uani vilikuwa vimejaa mali ambayo tuliikamata.
“Vilevile tulikamata watu wawili tuliowakuta wamelala katika chumba kimoja. Baada ya kuwahoji tuligundua kuwa walikuwa majambazi kwani mmoja wao tulikuwa tunamtafuta. Wakatueleza kwamba walikwenda kuvunja ghala moja usiku huko Gofu na waliwataja wenzao wanne ambao pia tulikwenda kuwakamata” Afisa upelelezi aliendelea kuniambia.
Akaniambia mwenye ghala lililovunjwa
alipooneshwa ile mali iliyoletwa pale kituo cha polisi alithibitisha kuwa ni mali yake iliyoibiwa na kuonesha hati zote za umiliki.
“Tulipokuita mara ya kwanza, wale uliowakuta walikuwa ndio majambazi wenyewe tuliowakamata. Tulipowahoji wote walisema hawakujui na wewe tulipokuuliza ulisema huwajui. Sisi tulikuwa tunadhani mlishirikiana, kumbe haikuwa hivyo. Kwa hiyo kwa vile mali iliyoibiwa imepatikana na majambazi waliohusika wamekamatwa, tumeamua kukuachia. Mshukuru sana yule dada aliyewezesha kupatikana kwa ile mali na wale majambazi kukamatwa”
Nikashusha pumzi ndefu za faraja. Hapohapo niliikumbuka ile ndoto niliyoota nikiwa mahabusi. Yule msichana aliniambia atakuja yeye pale kituoni kutoa taarifa kuhusu majambazi hao, na ndivyo ilivyokuwa.
Ingawa niliachiwa na kutakiwa kufika tena hapo kituoni kesho yake asubuhi, nilikutana na zahama jingine. Nilipofika ofisini kwetu nilipewa barua ya kufukuzwa kazi kwa kosa la kufanya uzembe na kulala nikiwa katika lindo na kusababisha lindo kuvunjwa na mali kuibiwa.
Baada ya kupewa barua hiyo nilishukuru na kurudi nyumbani. Niliketi kitandani na kujiambia, balaa hilo la kukamatwa na hatimaye kufukuzwa kazi, ulikuwa mkosi uliotokana na yule msichana ambaye mpaka muda ule sikuweza kutambua alikuwa kiumbe wa aina gani.
ITAENDELEA

 

[Kanungila Karim]

SEHEMU YA 05


ILIPOISHIA..
Baada ya kupewa barua hiyo nilishukuru na kurudi nyumbani. Niliketi kitandani na kujiambia, balaa hilo la kukamatwa na hatimaye kufukuzwa kazi, ulikuwa mkosi uliotokana na yule msichana ambaye mpaka muda ule sikuweza kutambua alikuwa kiumbe wa aina gani.
SASA ENDELEA..
Baada ya kutafakari kwa kina, nilijiambia yaliyopita yameshapita, sasa ni kuganga yaliyopo na yajayo. Kama ni yule msichana sitaweza kumjua. Na kama ni kazi nimeshafukuzwa. Sasa liliopo ni kujaribu kuandika barua kuomba sehemu nyingine. Kulikuwa na makampuni mengi ya ulinzi yaliyokuwa yanahitaji walinzi hasa vijana kama mimi.
Siku ileile niliandika barua kadhaa na kuzipeleka katika ofisi za makampuni mbalimbali ya ulinzi. Nilitegemea katika makampuni hayo sitakosa kampuni mojawapo itakayonipatia kazi.
Usiku wa siku ile kabla sijalala, nilisoma biblia yangu, nikasali na kuomba. Nilitegemea kwa uwezo wa Mwenyezi Mungu sitakaa muda mrefu kabla ya kupata kazi.
Ingawa nilikuwa nimesongwa na mawazo mengi kwa kuachishwa kazi ghafla, sikuchelewa kupata usingizi nikalala. Nikazinduka usiku mwingi. Nikahisi kama kulikuwa na mtu ananiita. Nikatega masikio yangu kusikiliza.
Kwanza palipita ukimya wa kama dakika moja hivi kisha nikasikia tena sauti ikiita jina langu. Ilikuwa sauti ya mwanamke niliyoitambua. Lakini sikuweza kukumbuka mara moja ilikuwa sauti ya nani na alikuwa wapi.
“Alfred! Alfred!” Sauti hiyo iliendelea kuita. Moyo wangu ulishituka. Nikaendelea kutega masikio.
Niligundua kuwa ile sauti ilikuwa ikitokea mlango wa nje.
Ni nani anayeniita usiku huu? Nilijiuliza bila kupata jibu. Sauti iliyokuwa ikiniita iliacha kwa muda kisha ilianza kusikika tena. Na sasa aliyekuwa akiita alianza kubisha mlango.
Hapo hapo akili yangu ikazinduka. Nilitambua kuwa ile sauti ilikuwa ya yule msichana niliyemuazima koti langu.
Ameijuaje nyumba ninayoishi na kwa nini amenifuata nyumbani? Anataka nini? Nilijiuliza kwa mshituko.
Ataita na kubisha mpaka watu wa nyumba nzima wataamka, mimi sitatoka, nikajiambia.
Na kweli, aliita na kubisha mpaka ile sauti ikapotea, kukawa kimya. Hata hivyo mimi sikulala tena mpaka asubuhi.
Ile ilikuwa ni mara ya kwanza. Usiku wa siku ya pili yake nilishituka tena usingizini nikaisikia ile sauti ikiniita. “Alfred! Alfred!”
Safari hii aliita na kubisha mara chache tu kisha nikasikia mlango wa nje unafunguliwa. Moyo wangu ulishituka. Hakukuwa na mtu yeyote mle ndani aliyeuliza “wewe nani?” Nikahisi pengine sauti ya msichana huyo na sauti ya kufunguliwa kwa ule mlango nilizisikia peke yangu.
Baada ya mlango huo kufunguliwa nilisikia mlio wa ko! ko! ko! hapo ukumbini. Nikahisi ulikuwa mlio wa viatu ama wa kwato za yule msichana. Punde tu nilisikia mlango wa chumba changu unabishwa huku ile sauti ya msichana ikiita jina langu. “Alfred! Alfred!”
Moyo ulikuwa ukinienda mbio kama uliotaka kutoka. Nilinyamaza kimya. Nilikuwa nimejifinika shuka gubigubi. Msichana aliendelea kubisha na kuniita kwa karibu dakika mbili. Alipoona siitikii wala sifungui mlango, nilisia anaondoka. Alirudi mlango wa nje akatoka kisha akafunga mlango. Baada ya hapo sikusikia kitu tena.
Kwa kweli sikulala tena. Niliendelea kukaa macho hadi saa 12 asubuhi. Nikawa mtu wa kwanza kutoka chumbani. Nilikwenda mlango wa mbele nikitegemea ningeukuta mlango huo ukiwa umefunguliwa lakini nilikuta umefungwa kwa ndani vile vile.
Nikajiuliza yule msichana aliufunguaje na kuweza kuingia wakati mlango huo ulifungwa kwa ndani? Kwa kweli sikuweza kupata jibu.
Nilirudi chumbani nikakaa kitandani na kufikiria kwamba msichana huyo anaweza kuharibu maisha yangu kama ambavyo alishaanza kuyaharibu. Sikuweza kujua ni kitu gani kilichomfanya anifuatefuate.
Hofu yangu ilikuwa kwamba usiku wa juzi alibisha mlango wa mbele, usiku uliofuata akaingia ndani na kubisha mlango wa chumba changu. Usiku wa leo anaweza kuja kuingia chumbani mwangu!
Baada ya kutafakari vizuri nilitoka nikaenda kupiga mswaki na kuoga. Niliporudi nilivaa kisha nikatoka. Nilikwenda katika kibanda cha mama lishe ambako hunywa chai kila asubuhi. Nikanywa chai kisha nikatoka.
Nilikuwa nimeamua kwenda kwa Mchungaji wa kanisa letu ili nimueleze matatizo yangu nione jinsi ambavyo atanisaidia.
Nilikuwa nimepata hofu kuwa endapo sitamueleza Mchungaji, yule msichana wa ajabu anaweza kuendelea kunifuatafuata wakati sikujua lengo lake lilikuwa nini. Na baya zaidi nilishuku kuwa usiku ule angeweza kuniingilia chumbani mwangu.
Wakati nataka kuingia katika wigo wa kanisa niliona msichana amesimama pembeni mwa lango la kanisa akiniangalia kwa macho makali huku amekunja uso. Nilipomuangalia vizuri niliona alikuwa ni yule msichana wa ajabu.
Nikashituka na kugeuza uso wangu haraka nikijifanya sikumuona. Nikaingia ndani ya ua wa kanisa. Baada ya kupiga hatua tatu dukuduku lilinishika, nikageuza uso nyuma kumuangalia. Akanionesha ishara ya kuniita.
“Njoo “ akaniambia bila kutoa sauti. Aliniambia kwa midomo tu kama anayezungumza na mtu asiyesikia.
Nilipoona ananiita niligeuza tena uso wangu na kuendelea kwenda. Lakini sikufika mbali niligeuka tena nyuma
kumuangalia
Sasa nilimuona amesimama katikati ya lango akiniita kwa kunipungia mkono.
“Nimekwambia njoo!” akaniambia bila kutoa sauti yake.
Nikawa ninaenda huku namuangalia yeye. Alipoona nazidi kwenda aliacha kuniita. Akawa ananitazama kwa uso wa huruma kama kiumbe kisicho na hatia. Alikuwa na uso wenye sura ya mvuto. Macho yake makubwa yalilegea na kutoa nuru ya kunilaani kwa kutomjali.
Wakati ninakwenda huku naangalia nyuma, nilimkumba mtu aliyekuwa anatoka. Nikageuka haraka na kumuomba msamaha. Kumbe alikuwa Mchungaji.
“Bahati mbaya, endelea tu” akaniambia alipoona nimegwaya.
“Nilikuwa nakuja kwako”
“Na mimi nilikuwa natoka lakini naweza kurudi kwa ajili yako”
“Nitakushukuru baba, nina matatizo makubwa”
Mchungaji huyo alinipeleka katika ofisi yake akanikaribisha kwenye kiti kisha na yeye akaketi.
“Sasa unaweza kuzungumza shida yako” akaniambia.
Nikamueleza matatizo yangu tangu mwanzo hadi yalipofikia.
Mchungaji akashangaa. “Sijawahi kusikia kisa kama hicho ulichonieleza!”
“Na huyo msichana nimekutana naye kwenye lango sasa hivi, alikuwa ananiita. Pale nilipokukumba nilikuwa namtazama yeye!” nikamwambia.
“Kwanini usinioneshe pale pale?. Hebu twende”
Mchungaji aliinuka na mimi nikanyanyuka. Tukatoka kwenda kwenye lango. Tulipofika hatukumkuta yule msichana.
“Naona ameshaondoka alikuwa amesimama hapa”
Nilimuonesha Mchungaji mahali alipokuwa amesimama yule msichana.
“Pia nataka twende ukanioneshe hilo gofu ambamo uliwakuta” Mchungaji akaniambia na kuongeza “Tutakwenda kwa gari langu”
“Sawa, twende nikakuoneshe”
ITAENDELEA

 

[Kanungila Karim]

SEHEMU YA 06


ILIPOISHIA..
Mchungaji aliinuka na mimi nikanyanyuka. Tukatoka kwenda kwenye lango. Tulipofika hatukumkuta yule msichana.
“Naona ameshaondoka alikuwa amesimama hapa”
Nilimuonesha Mchungaji mahali alipokuwa amesimama yule msichana.
“Pia nataka twende ukanioneshe hilo gofu ambamo uliwakuta” Mchungaji akaniambia na kuongeza “Tutakwenda kwa gari langu”
“Sawa, twende nikakuoneshe”
ENDELEA
Mchungaji alikwenda kutoa gari lake akanipakia na tukaelekea Gofu. Tulifika katika lile ghala nililokuwa ninalinda nikamuonesha. Kisha tukaenda katika lile jumba la zamani lililokaa kama gofu.
“Ndipo hapa?” akaniuliza huku akishangaa.
“Ndipo hapa” nikamjibu.
Tulishuka kwenye gari tukawa tunalitazama gofu hilo.
“Wewe ulikuja saa nane usiku mahali hapa?”
“Ndiyo, nilikuja kumfuata yule msichana”
“Inaelekea una roho jasiri sana. Mahali hapa wakati wa usiku panatisha sana. Hebu tuingie ndani”
Sikutaka kutangulia kuingia. Nilimuacha Mchungaji atangulie yeye. Kabla ya kuingia alisali kwanza na mimi nikasali kisha tukaingia.
Tulikwenda hadi katika kile chumba nilichomkuta yule msichana akiwa na mwenzake wakiwa katika maumbo yasiyo ya kibinaadamu.
Tulipoingia ndani ya chumba hicho tulikuta mafiga matatu ya jiko na rundo la majivu. Licha ya kulikagua jumba lote hatukukuta mtu zaidi ya makorokoro ambayo tulihisi yalirundikwa na wendawazimu.
“Basi twende zetu” Mchungaji akaniambia.
Tulitoka, tukapanda gari na kuondoka.
“Una hakika hukuwa umeota?” Mchungaji akaniuliza.
“Sikuota, nilifika kweli na kuwaona hao wasichana”
Mchungaji akanyamaza kimya.
Tulikwenda hadi katika lango la kanisa. Mchungaji akaniambia.
“Kesho ni jumapili, uje katika ibada ya asubuhi. Tutakufanyia maombi”
“Nitakuja kesho asubuhi lakini nataka kuuliza, kwa leo hatanifuata tena?”
“Hatakufuata kwa maana ameona umejisalimisha mahali ambapo hapawezekani”
“Namshukuru sana Yesu”
“Ondoa wasiwasi, tatizo lako litakwisha. Sasa unaweza kushuka uende zako”
“Asante baba Mchungaji”
Nikashuka kwenye gari na kufunga mlango na kwenda zangu. Nilizungukazunguka mjini kasha nikarudi nyumbani.
Ilipofika usiku, nilikwenda kula chakula kisha nikarudi. Sikuwa na matembezi ya usiku. Baada ya kukaa kidogo nilichukua Biblia yangu nikasali kisha nikalala.
Ilipofika saa nane usiku nilishituka usingizini, nikaona taa ilikuwa inawaka. Kumbe nilisahau kuizima kabla ya kulala. Mara nilisikia mlango wa chumba changu unabishwa. Moyo wangu ukashituka na kuanza kunienda mbio.
Nikasikia sauti ya msichana ikiita
“Alfred! Alfred! Nifungulie…”
Mara moja niliitambua sauti ya yule msichana, nikanyamaza kimya. Lakini ghafla niliona mlango wa chumba unafunguka.
“Mama yangu wee…nimekwisha!” nikajisemea kimoyomoyo.
Mlango ulifunguka na kuwa wazi kabisa. Mbele ya mlango nilimuona msichana amesimama akiangalia ndani. Sikujua ule mlango aliufungua yeye au ulifunguka wenyewe kwani mikono yake haikuwa imeshika mlango.
Alikuwa amevaa dera jeupe lililoziba viatu vyake. Na sikujua kama alikuwa na viatu au kwato. Alijitanda upande wa kitambaa cheupe kichwani, akauziba uso wake kwa mtindo wa kiarabu. Masikio yake hayakuwa yakionekana.
Ilikuwa ajabu, jinsi macho ya msichana yule yalivyokuwa yanabadilika. Nilivyoyaona usiku ule hayakuwa kama nilivyoyaona wakati wa mchana pale kwenye lango la kanisa. Muda ule wa mchana yalikuwa macho ya kawaida lakini sasa yalikuwa yamebadilika na kuwa na mboni za kijivu.
Alikuwa ameyapaka wanja mkali na kwenye nyusi pia alipaka wanja mweusi uliokaa kama upindi wa mvua.
Alikuwa akitabasamu peke yake na kuifanya sura yake ionekane ya kupendeza na ya kirafiki.
Mlango ulipokuwa wazi aliinua hatua na kuingia ndani. Moyo ulinilipuka ukawa unanienda mbio na kijasho chembamba kikaanza kunivuja.
Kitu ambacho kilinishangaza muda wote ni kuwa nilikuwa nimejifinika shuka gubigubi na kuziba uso wangu lakini bado nilikuwa namuona yule msichana.
Alipoingia ndani alisimama katikati ya chumba na kukitupia macho chumba changu kisha nikamuona anatikisa kichwa kama vile chumba changu hakikumridhisha.
Wakati amesimama hapo, kupuo la harufu ya manukato yake ilienea chumba kizima. Sijawahi kusikia manukato mazuri kama yale niliyoyasikia usiku ule.
Baadaye nilimsikia akishusha pumzi kisha akaenda kuketi kwenye kiti kilichokuwa kando ya meza, akauweka mguu wake mmoja juu ya mwingine kisha akanitazama.
“Alfred!” akaniita. “Inuka tuzungumze, nimekufuata wewe mpenzi wangu”
Nikanyamaza kimya.
“Usiniendee kwa Mchungaji. Mimi si adui yako. Mimi ni rafiki yako mwenye lengo la kukusaidia” akaniambia.
Ingawa nilijifanya nimelala, aliendelea kunisemesha kama vile alijua kuwa nilikuwa macho.
“Alfred nataka tuwe marafiki. Tangu siku nilipokuona nilikuchunuka. Sitaficha kukwambia kuwa nimekupenda na utakuwa mume wangu”
Ndani ya moyo wangu nilikuwa najiuliza, huyu msichana alikuwa kiumbe wa aina gani?
Hapo hapo nikamsikia akinijibu. “Mimi ninaitwa Banuna. Ninatoka katika kizazi cha familia ya kijini. Kwetu ni chini ya bahari, karibu na kisiwa cha Unguja.”
Alivyoniambia kwamba yeye ni jini anayeishi chini ya bahari alinishitua sana, nikakurupuka pale kitandani na kutoka mbio huku nikiburuza shuka. Nilifungua mlango nikatoka ukumbini nikiwa na chupi tu, shuka nilikuwa nimeishikilia. Nilikimbilia mlango wa mbele nikaufungua na kutoka nje kisha nikaufunga tena.
Nilijifunga ile shuka kwenye shingo nikatembea kwa mwendo wa haraka haraka kuelekea mtaa wa pili alikokuwa akiishi rafiki yangu fulani aliyeitwa Juma.
Nilikuwa natembea huku nikiangalia nyuma. Nilikuwa na wasiwasi kwamba yule msichana anaweza kunifuata.
Lakini hadi ninafika katika mtaa huo sikumuona yule msichana. Nikaenda katika ile nyumba anayoishi Juma. Nilibisha kwenye dirisha la chumba
chake lililokuwa upande wa mbele.
“Juma! Juma!” nilimuita. “Amka unifungulie mlango”
Baada ya muda kidogo, sauti ya Juma ikasikika ikiuliza.
“Nani wewe?”
“Ni mimi rafiki yako Alfred, nimepata matatizo, nifungulie mlango”
“Wewe ni Alfred?”
“Ndiyo”
“Subiri”
ITAENDELEA

 

[Kanungila Karim]

SEHEMU YA 7
ILIPOISHIA..
“Juma! Juma!” nilimuita. “Amka unifungulie mlango”
Baada ya muda kidogo, sauti ya Juma ikasikika ikiuliza.
“Nani wewe?”
“Ni mimi rafiki yako Alfred, nimepata matatizo, nifungulie mlango”
“Wewe ni Alfred?”
“Ndiyo”
“Subiri”
ENDELEA...
Nikasubiri. Baada ya kupita kama dakika tatu hivi, Juma alifungua mlango akatoka. Alipoona nimejifunga shuka alishituka.
“Vipi tena Alfred?” akaniuliza.
“Tuingie ndani nikueleze” nikamwambia.
“Karibu”
Tukaingia ndani. Alinikaribisha chumbani kwake. Yeye aliketi kitandani, mimi nikakaa kwenye kiti.
Nikamueleza mkasa wa yule msichana wa kijini, tangu nilivyoanza kukutana naye hadi alivyoniingilia chumbani usiku ule.
Juma nilipomueleza alishituka.
“Unasema kweli?” akaniuliza huku amenikazia macho.
Nakueleza ukweli, huyo msichana nimemuacha chumbani mwangu na kukimbilia hapa kwako. Hata nguo sikuwahi kuvaa”
“Amekwambia mwenyewe kwamba yeye ni jini?” Juma akaniuliza.
“Ndiyo ameniambia. Mlango niliufunga kwa ndani lakini ulifunguka wenyewe, akaingia”
“Dah! Sasa utafanyaje rafiki yangu?”
“Jana nilikwenda kwa Mchungaji akaniambia atanifanyia maombi hii leo”
“Unadhani atakapokufanyia maombi, huyo jini hatakufuata tena?”
“Hatanifuata”
“Basi ni vizuri ufanyiwe hayo maombi haraka kwani inaonekana huyo msichana atakusumbua. Anataka uwe mume wake. Utaishije naye wakati yeye ni jini?”
“Hapo sasa!”
“Pole sana Alfred. Ni matatizo makubwa yaliyokukuta! Sasa utalala wapi?”
“Nakuomba unisindikize nyumbani nikavae nguo na nifunge milango. Mlango wa chumbani mwangu na wa nje ipo wazi”
‘Umesema yule msichana yuko chumbani mwako?”
“Atakuwa ameshaondoka baada ya mimi kukimbia”
“Ngoja nivae twende” Juma akaniambia.
Baada ya dakika kumi hivi, mimi na Juma tukawa tunakwenda katika nyumba niliyokuwa ninaishi. Kwa vile nilikuwa na mwenzangu. Hofu ilinipungua.
Tulipofika nyumbani nilisukuma malango tukaingia ndani. Tulikwenda kwenye mlango wa chumba changu nikamwambia Juma aufungue yeye.
Juma akaufungua mlango na kuchungulia ndani.
“Yumo?” nikamuuliza kwa sauti ya kunonong’ona.
“Sioni mtu” Juma alinijibu huku akitumbukiza mguu wake ndani. Aliangalia pande zote za chumba kabla ya kuingia kabisa.
“Ingia, hayumo”akaniambia. Nikaingia.
Chumba changu bado kilikuwa kina harufu ya manukato yake. Juma aliyasikia.
“Mbona kunanukia hivi? Unatumia manukato gani?”
“Ni yule msichana aliyeingia….”
“Ananukia manukato namna hii!....ni jini kweli!”
“Tena hii harufu imepungua. Naona ameondoka muda mrefu”
“Viumbe hawa wanapenda sana manukato!”
Wakati tunazungumza na Juma nilikuwa nikivaa suruali yangu na shati. Juma aliketi kwenye kiti.
“Sasa unavaa uende wapi?”
“Navaa turudi kwako”
“Kwanini tujisumbue? Huyo msichana si ameshaondoka?”
“Hata kama!. Ile imani ya kubaki humu sina kabisa”
“Tutabaki sote mpaka kutakapokucha. Kule nimeshawambia wafunge mlango. Siwezi kwenda kuwasumbua tena.”
“Basi tutabaki hapa hapa sote. Tukiwa wawili si neno”
Tukakaa mle chumbani na Juma mpaka asubuhi. Juma aliondoka saa kumi na mbili asubuhi akaniacha ninakwenda kuoga. Niliporudi nilivaa nikawa nasubiri muda wa kwenda kanisani. Siku ile sikukumbuka kunywa chai kabisa
Muda wa kwenda kanisani ulipowadia nilitoka nikaenda kanisani. Baada ya ibada waumini wenye matatizo mbalimbali waliitwa ili waombewe. Na mimi nikawemo.
Wenye mapepo yalitolewa na wenye magonjwa mengine walipata nafuu. Mimi niliombewa mpaka machozi yakanitoka. Niliamini kabisa yule jini ametokomezwa mbali au ameshateketezwa kwa moto.
Baada ya kipindi hicho cha maombi kilichochukua karibu saa mbili, tulitoka kanisani nikiwa na furaha. Furaha yangu ilinifanya nisalimiane na kila ninayemuona ingawa haikuwa kawaida yangu.
Nilipotoka kwenye lango la kanisa, nilimuona Juma amesimama kando ya lango hilo. Nikamfuata.
“Mbona uko hapa?” nikamuuliza.
“Nimekufuata wewe. Umeshafanyiwa maombi?”
“Tayari. Nashukuru nimeombewa sana”
“Sasa hivi hofu yako imekwisha kabisa?”
“Imekwisha. Leo najiona kama nimezaliwa upya”
“Kwanini Alfred?”
“Nimeepushwa na yule shetani aliyekuwa ananisumbua na nimeambiwa na Mchungaji nisiache ibada. Kwa vile nimeshampokea Yesu sitaacha kabisa”
“Ni vizuri kama matatizo yale yamekwisha. Kwa sasa utaweza kulala peke yako?”
“Bila shaka yoyote. Yule jini hawezi kunifuata tena
“Na mimi nimefurahi Alfred. Twenzetu”
Tukaondoka na Juma.
“Juma umeshakunywa chai?” nikamuuliza wakati tukienda. Sasa nilikuwa nasikia njaa.
“Mimi nimeshakunywa, sijui wewe?”
“Mimi bado. Asubuhi nilikuwa na kihoro, sikukumbuka kunywa chai”
“Sasa utakwenda kunywa wapi?”
“Mimi nakunywa chai kwa kina mama lishe”
“Tena kibanda cha mama lishe kile pale”
Juma alinionesha kibanda cha mama lishe kilichokuwa kwenye uchochoro. Tukaenda.
Nilikunywa chai. Baada ya hapo Juma alinisindikiza hadi nyumbani. Tukaagana.
ITAENDELEA KESHO

 

[chuma cha mjerumani]

Story nzuri

 

[bandu bandu]

Duuuuh

 

[jogi]

Irndelee tu! Maana hamna jinsi.

 

[Jogoo wa Shamba II]

Iko poa mkuu

 

[Mwanambugulu]

Weka vitu mkuu

 

[Frega Bao]

Ok

 

[UDSM Alumni]

[HASHTAG]#MJUKUUWACHIFU[/HASHTAG]

 

[mkome]

Duu hatari hadithi ndefu ila nzuli

 

[Kanungila Karim]

SEHEMU YA 08


ILIPOISHIA..
Kutoka siku ile yule jini hakunifuata tena, nikawa nimefurahi. Lakini baada ya kupita juma moja nilianza kuota ndoto za ajabu ajabu, nyingine zikiwa za kutisha.
Kusema kweli hazikuwa ndoto za kawaida kwani zilifululiza kama mkanda wa sinema, ikimalizika hii inakuja hii. Wakati mwingine ninaota nipo kwenye majabali marefu nikiwa na msichana
ambaye ghafla huanza kunilaumu kuwa nimemgeuka. Lakini mara sura yake hubadilika na kuwa ya yule msichana wa kijini. Hapo huanza kumkimbia na kila ninavyokimbia yule msichana hutokea mbele yangu.
Wakati mwingine huzinduka usingizini lakini usingizi unaponijia tena, ile ndoto huendelea. Inapoendelea hujikuta nimefika kingoni mwa jabali ambapo yule msichana hunisukuma, nikajiona naanguka kutoka juu ya jabali refu huku ninapiga kelele.
Inapomalizika ndoto hii inakuja nyingine. Huota nipo kwenye maeneo ya makaburi. Ghafla miili ya watu waliokufa hutoka katika makaburi na kunifuata ikiwa mifupa mitupu. Ninatoka mbio lakini najiona ninavutwa kwa nyuma kama ninayevutwa kwa sumaku hadi ile mifupa inanikaribia na kunigombania na ndipo ninapozinduka.
Ndoto za namna hiyo ziliniandama karibu kila siku. Mwisho nilirudi tena kwa yule Mchungaji kumueleza, akanifanyia maombi tena lakini ndoto hazikukoma. Nilipoona hali inazidi kuwa mbaya nikahamia kwa rafiki yangu Juma.
Kwa Juma pia sikupata nafuu yoyote. Ndoto ziliendelea kuniandama huko huko. Siku moja niliota nachinjwa nikapiga ukulele uliomuamsha Juma. Alipoamka aliniuliza.
“Una nini Alfred?”
Jasho lilikuwa linanitoka na moyo ulikuwa unanienda mbio kama ulitaka kutoka. Nikaketi kitandani na kumueleza nilivyoota Hata yeye aliogopa. Siku ile hatukulala tena hadi asubuhi.
“Uende kwa mganga” Juma akaniambia asubuhi. Alinielekeza kwa mganga mmoja aliyekuwa akikaa kitongoji cha Amboni. Kitongoji hicho kipo umbali wa kilometa 10 hivi kutoka jiji la Tanga.
Akaniambia kaka yake alikuwa na tatizo kama langu la kuota ndoto za kutisha lakini alipokwenda kwa mganga huyo tatizo hilo likamalizika.
“Huyo mganga anaitwa nani?”
“Anaitwa Mtemi Wembe”
“Nitakwenda Amboni kumuulizia”
“Ningekupeleka lakini ndiyo hivyo ninakwenda kazini na kurudi ni jioni”
“Hakuna tatizo, kwa vile umeshanielekeza nitakwenda mwenyewe”
Juma alipoondoka kwenda kazini kwake na mimi niliondoka kwenda huko Amboni. Nilikwenda stendi nikapanda daladala za kwenda Amboni. Nilipofika Amboni nilimkuta mtu mmoja akichoma mahindi ya kuuza palepale kwenye kituo cha daladala. Nikamuuliza kama anamfahamu mganga Mtemi Wembe.”
“Ni maarufu” akanijibu na kuongeza..
“Kamata barabara hii, nenda moja kwa moja. Mbele kule utakuta njia mbili, moja inaelekea kulia na nyingine kushoto. Fuata ile ya kushoto, ukienda mbele utakuta mbuyu. Ukiupita mbuyu utakata tena kushoto. Nyumba utakayoikuta mbele yako ndiyo hiyo ya Mtemi Wembe”
Ilikuwa kama alivyonielekeza Juma. Nikamshukuru yule mtu kisha nikafuata ile barabara aliyonielekeza hadi nikauona ule mbuyu. Nilipokata kona kushoto nikaiona ile nyumba. Nikaenda
Nilikuta watu kadhaa wakiwa nje wameketi kwenye gogo la mnazi wakisubiri zamu ya kuingia. Na mimi nikaenda kujiunga nao. Kulikuwa na watu wengine waliokuja nyuma yangu. Sote tukawa tunasonga taratibu kuelekea kwenye mlango wa nyumba ya mganga.
Ghafla nilisikia harufu ya manukato makali puani mwangu, nikageuza uso wangu na kumtazama msichana aliyekuwa ameketi kushotoni kwangu. Nikashituka nilipoona ni yule msichana wa kijini. Alikuwa ameketi sambamba na mimi. Wakati namtazama na yeye alikuwa akinitazama.
“Amekuja muda gani?” nikajiuliza kimoyomoyo huku nikiwa nimepatwa na mshangao.
Ukweli ni kuwa nilipofika hapo, msichana huyo hakuwepo. Bila shaka alikuwa miongoni mwa watu wanne waliokuja baada ya mimi. Lakini kwa vyovyote vile kuja kwake kulikuwa kwa kimiujiza kwani sikumuona alivyofika, nilishitukia tu yupo hapo baada ya kusikia harufu ya manukato yake.
Kwa jinsi nilivyoshituka, moyo wangu ulianza kunienda mbio. Sikuwa na raha tena. Nikanyanyuka ghafla na kuondoka kama mtu ambaye nilikuwa nimeghairi kuingia kwa mganga kwani nilihisi angenifuata humo ndani.
Nilitenbea haraka haraka nikakata kona kwenye ule mbuyu kisha nikaanza kukimbia. Nilipokata kona nyingine kuelekea upande wa kulia. Ghafla nikamuona yule msichana mbele yangu.
Nikasisimama ghafla. Kwa kweli niligwaya. Nikawa namtazama na yeye akanitazama. Macho yake yalikuwa makali kama kaa la moto na uso alikuwa ameukunja.
“Unajisumbua bure!” akaniambia.
Ingawa alionekana kukasirika lakini sauti yake ilikuwa tulivu.
“Mimi sikimbiliki. Nimeshakuzunguka pande zote. Kama unaweza kuingia chini ya ardhi ingia, ndio sitaweza kukufuata. Lakini huku juu ya ardhi hata kama utakimbilia Ulaya nitakufuata tu!” akaniambia.
Nilikuwa nimenyamaza kimya nikimtazama na kumsikiliza huku nikirudi nyuma taratibu. Pakapita ukimya mfupi.
“Ulienda kwa mganga kufuata nini?” akaniuliza ghafla na kuongeza.
“Unadhani mganga ataweza kunifukuza mimi? Mimi sifukuziki!”
Akaendelea kuniambia “Mimi ni Banuna mwana wa Ziraili. Ukoo wetu ni wa wachawi. Babu yangu ni mkuu wa wachawi! Hakuna mganga atakayeniweza mimi”
Akanyamza na kunitazama jinsi nilivyokuwa ninahema kisha akaendelea.
“Ni kwa sababu tu nimekupenda ninakuruhusu urudi nyumbani. Lakini ninakupa muda mwingine mfupi ufanye maamuzi sahihi. Ukiendelea kuniletea kisoi utajuta!”
Baada ya kuniambia hivyo alichora msitari chini kwa mguu wake, akaniambia.
“Vuka huu msitari urudi nyumbani”
Nilikuwa nimepatwa na hofu isiyo na kifani. Sikuelewa alikuwa ananiambia nini,mpaka aliporudia kwa mara ya pili.
“Nimekuambia vuka huu msitari urudi nyumbani. Nisikuone tena kwenye nyumba za waganga!’
Nikapiga hatua haraka haraka kuvuka ule msitari aliouchora chini kwani alikuwa amesogea kando. Nilipouvuka tu ule msitari nikajikuta nipo mbele ya nyumba ninayoishi. Sikuwapo tena mahali pale nilipokuwa na yule msichana wa kijini!.
Huku nikiwa nimeshikwa na mshangao uliochanganyika na hofu, niliangalia upande wa kulia na wa kushoto. Sikumuona tena yule msichana
Nikawa najiuliza nimefikaje pale nyumbani? Hatua moja tu niliyopiga kuvuka ule msitari imenifikisha katika nyumba ninayoishi? Ilikuwa miujiza mikubwa!.
Badala ya kuingia ndani niligeuka nikaelekea nyumbani kwa Juma, Juma alikuwa yupo kazini kwake lakini kwa vile alikuwa ameniachia ufunguo mmoja, nilifungua mlango nikaingia ndani. Nikafikia kujilaza kitandani.
Ingawa sikuwa na yule msichana, hofu ilikuwa imenitawala na kusababisha nijisikie kupata homa.
Siku ile sikutoka tena mle chumbani mpaka Juma aliporudi jioni. Alikuta nilikuwa nikitetemeka kwa homa.
“Alfred unaumwa?” akaniuliza.
“Nasikia homa”
“Tangu saa ngapi?”
“Tangu asubuhi”
“Dah! Umeshakula dawa?”
“Bado. Kwanza hebu kaa nikueleze yaliyotokea kule kwa mganga”
Huku akionekana kupata wasiwasi, Juma alikaa kwenye kiti. Nikamueleza yale yaliyonitokea kule Amboni na nilivyorudishwa nyumbani kimiujiza.
Juma akashangaa.
Je nini kitatokea.