Ndugu yangu
Mshana Jr naamini bado unaendelea na maisha mapya ya wokovu, baada ya kuachana na mambo ya ushirikina. If so, jitahidi kuilisha roho yako kila siku kwa kusoma Biblia ili uukulie wokovu. Vile vile hakikisha mabaki yote ya kiganga na kishirikina unayachoma moto hadharani, umwaibishe kabisa shetani kama watu hawa walivyofanya:
Matendo 19:19
"Na watu wengi katika wale waliotumia mambo ya uganga wakakusanya vitabu vyao, wakavichoma moto mbele ya watu wote..."
Jitahidi pia kuutumia muda wako mwingi kumtangaza Kristo na kuwafundisha watu Neno la Mungu. Hilo ndilo agizo kuu tulilopewa watu wote tulioamua kuacha dhambi na kuokoka. Agizo hilo lipo katika Marko 16:15.
Kwahiyo utampendeza Mungu zaidi ukiutumia ushuhuda wako wa zamani kuwaonya wengine kuhusu madhara ya uchawi na kutegemea vitu badala ya kumtegemea Mungu.
Kibiblia, mtu anayefanya mambo ya kichawi huwa anafanya hivyo kwa kushirikiana na shetani na pepo wake, hata kama yeye hajui. Kwa maneno mengine mchawi au mganga akiacha uchawi ni kwamba ameacha kushirikiana na pepo. Pepo wanakuwa wamemtoka. Hata hivyo pepo wakitoka, huwa wanatafuta tena kurudi walipotoka (Mt 12:43-45). Kwa mantiki hiyo, udumu sana katika kumuomba Mungu ili pepo wakijaribu kurudi kwako wakute mlango umefungwa kabisa.
Naamini pia umeishajiunga na Kanisa linalohubiri wokovu na kufundisha maisha matakatifu. Kama bado, usikawie. Mungu ameweka katika Kanisa wahudumu wenye karama mbalimbali (Waefeso 4:11–14) kwa lengo la kufundisha na kuwajenga waamini. Kwa mtu mwenye historia ya uganga, ni muhimu sana kupata ushirika wa waaminio na mafundisho sahihi badala ya kujiongoza mwenyewe.
Hivyo, pamoja na kusali na kusoma Biblia ukiwa mwenyewe nyumbani, usiache kushirikiana na wengine walioamua kumfuata Yesu. Hakikisha tu kanisa unalojiunga nalo liwe kweli linafundisha habari za Kristo na wokovu, toba, utakatifu na Maandiko; sio yale yanayochanganya Injili na imani za kishirikina.