Nafikiri thread ya mtu mzima Chief Isike inapaswa kuongezewa some facts kama hizi...
Dkt. Slaa aliingia Mkoa wa Tabora kwa kupitia Wilaya ya Kaliua, kisha Urambo, Sikonge, Igalula, Tabora mjini, Nzega kisha Igunga... Katika wilaya hizo, alifanya mikutano miwili hadi mitatu kwa kila jimbo. Maeneo mengi yakiwa ni vijijini. Tutaweka some facts kwa mkoa huo tu, eneo kwa eneo....
Kaliua...
CHAMA cha Demokrasia na Maendeleo (CHADEMA), kimetoa kauli kuhusu mabishano kati ya serikali na Tume ya Uchaguzi juu ya uboreshaji wa daftari la wapiga kura kwa ajili ya katiba mpya, kikizitaka pande zote mbili kusema ukweli, badala ya kusema sababu ambazo hazipo. Kimesema kuwa kinaelewa kiini cha mabishano hayo, hivyo hakitakubali kura ya maoni ifanyike bila daftari kuboreshwa kama sheria ya uchaguzi inavyoagiza.
Katika kauli hiyo chama hicho kimetoa madai mazito kuwa kinazo taarifa kwamba hakuna maelewano kati ya Serikali na NEC, kwa sababu tume inataka uandikishaji mpya wa daftari zima badala ya kufanya maboresho ambayo serikali inataka kuyatumia kulinda maslahi Chama Cha Mapinduzi (CCM), kwenye mchakato wa katiba mpya.
Akizungumza katika mkutano wa hadhara jana katika Kijiji cha Mwendakulima, wilayani Kaliua, ikiwa ni siku yake ya kwanza akiwa mkoani Tabora akitokea Mkoa wa Kigoma, Katibu Mkuu wa CHADEMA, Dkt. Willibroad Slaa alisema kuwa katiba ni suala nyeti ambalo mchakato wake unapaswa kuwa jumuishi kwa gharama yoyote. Aliongeza kusema kuwa suala la uboreshaji wa daftari la wapiga kura ni takwa la kisheria wala halitegemei hisani ya mtu kwa kisingizo chochote kile ikiwemo gharama au ukubwa wan chi.
"Tumepata taarifa kwamba serikali na NEC yaani Tume ya Uchaguzi wanabishana…wanavutana kuhusu kuboreshwa kwa daftari la wapiga kura kwa ajili ya kura ya maoni ya katiba mpya. Wakati serikali wanasema wameshatoa fedha, tume inasema haiwezekani kwa sababu muda ni mdogo kulingana na ukubwa wa nchi na gharama ni kubwa. "Tunataka kuwaambia kwamba kwanza suala la uboreshaji wa daftari hilo si suala la hisani ni takwa la kisheria.
Kama nchi imeamua kuwa ya demokrasia haiwezi kutoa visingizio vya muda, ukubwa wa nchi na gharama kwa sababu demokrasia yenyewe ni gharama. Lakini pili, ambalo ndilo kubwa zaidi, hawasemi ukweli.
"Tunazo taarifa kwamba wanachobishania ni kuboreshwa au kuandikwa upya. Tume ya Uchaguzi wanajua daftari hilo la sasa limechakachuliwa sana sana kwa maslahi ya CCM, halifai tena. Hivyo kitu pekee kinachoweza kufanyika ili kunusuru mchakato huu kufanyika vizuri ni kuandikwa upya. Serikali haitaki hivyo. Tunajua hawataki kwa sababu wanataka kulinda CCM," alisema Dkt. Slaa.
Dkt. Slaa ambaye jana ameingia mkoa wa tatu akiwa katika ziara ya kukagua na kuimarisha uhai wa chama hicho katika mikoa ya Shinyanga, Kigoma, Tabora na Singida, alisema kuwa serikali isifanye mchezo na mchakato wa katiba mpya kwani endapo daftari hilo halitafanyiwa kazi, kuna hatari wananchi wengi wakakosa haki yao ya kikatiba.
"Mchakato wa katiba mpya unapaswa kuwa jumuishi kwa gharama yoyote ile. Hatuwezi kukubali wananchi wengi ambao ni vijana wenye sifa za kupiga kura kuamua hatima ya nchi yao kwa kupiga kura ya hapana au ndiyo kwenye katiba mpya, wasipate haki yao eti kwa sababu yeyote ile," alisema Dkt. Slaa.
Dkt. Slaa jana alikuwa na mikuano miwili Mwendakulima na Kaliua mjini, ambapo leo ataendelea na ziara yake kwa wilaya ya Urambo, ambapo atafanya mikutano katika Jimbo la Urambo Kaskazini, ambalo linaongozwa na Waziri wa Afrika Mashariki, Samuel Sitta.
