WAKATI ikiwa ni siku ya nne tangu kuuanza mwaka mpya wa 2013, watu watatu wamekufa papo hapo na wengine zaidi ya 20 kujeruhiwa vibaya na kulazwa katika hospitali ya Mafinga wilayani Mufindi, mkoani Iringa, baada ya basi la Newforce, walilokuwa wakisafiria kutoka mkoani Mbeya kwenda Dar es salaam kuacha njia na kupinduka.
Ajali hiyo, ilitokea jana saa 4.30 asubuhi, eneo la Nyololo wilayani Mufindi katika barabara kuu ya Dar es salaam-Mbeya, ikihusisha basi la Newforce lenye namba za usajili T 465 BBY aina ya U-Tong, baada ya kushindwa kupanda mlima Nyololo.
Akizungumzia ajali hiyo, Kamanda wa Polisi Mkoa wa Iringa, Michael Kamhanda aliwataja waliokufa kuwa ni Rogers Boniface (42), mkazi wa Mbeya, Anon Mwaijande (28) mfanyabishara wa Mbeya na Witnes Minja (25) mfanyabishara wa jijini Dar es salaam.
Alisema sababu za ajali hiyo, ni mwendo kasi wa basi hilo ambalo, lilipokumbana na utelezi dereva wake alishindwa kulimudu jambo lililosababisha kuaacha njia na kupinduka.
"Bado hatujaweza kumkamata dereva wa basi hili, amekimbia japo tunaendelea kumtafuta, majeruhi wanaendelea vizuri na miili ya waliofariki imeandaliwa kwa ajili ya kuhifadhiwa hospitali ya Wilaya ya Mufindi kusubiri ndugu," alisema Kamuhanda.
Hata hivyo, alisema idadi kamili ya majeruhi na majina yao haijajulikana kutokana na harakati za kuhakikisha wanapatiwa matibabu ya haraka.
Hata hivyo, aliwataka madereva kuendesha magari ya abiria kwa umakini, ili kuepuka ajali zinazoweza kutokea kutokana na mvua ambazo zimeanza kunyesha.
Baadhi ya majeruhi waliozungumza na mtanzania, walisema kuwa mwendo kasi na uzembe wa dereva wa basi hilo ndio vilivyosababisha ajali.
"Tangu tunatoka Mbeya, basi lilikuwa likikimbia japo mvua ilikuwa ikinyesha, tulipofika Nyololo hali ikawa mbaya zaidi kwa sababu ya utelezi ajali hii ikatokea," alisema Enock Mwaibabile, mmoja wa majeruhhi.
Hata hibaadhi ya mashuhuda wa ajali hiyo, walisema mvua kubwa iliyonyesha usiku wa kuamkia jana katika eneo hilo, ulisababisha barabara hiyo kuwa na utelezi mkali.
Source: Mtanzania
