50 cent

Curtis James Jackson III aliyezaliwa tarehe 6 Julai 1975, anajulikana kitaaluma kama 50 Cent, ni rapa, muigizaji, mtayarishaji wa vipindi vya televisheni, mfanyabiashara na mtendaji wa lebo ya muziki kutoka Marekani.

Alizaliwa South Jamaica, eneo la Queens, na alianza kufuatilia kazi ya muziki mwaka 1996. Mwaka 1999 hadi 2000 alirekodi albamu yake ya kwanza Power of the Dollar chini ya Columbia Records, lakini baada ya kupigwa risasi mara tisa Mei 2000, albamu hiyo haikutolewa na akaachwa kwenye lebo hiyo.

Mwaka 2002, mixtape yake Guess Who's Back? ilimvutia rapa wa Detroit Eminem, ambaye alimsainisha kwenye Shady Records, tawi la Aftermath Entertainment ya Dr. Dre kwa kushirikiana na Interscope Records.

Albamu yake ya kwanza ya studio Get Rich or Die Tryin' iliyotoka mwaka 2003 ilipokelewa vizuri na kufanikiwa kibiashara. Iliongoza chati ya Billboard 200 na kutoa nyimbo zilizoongoza Billboard Hot 100 ambazo ni In da Club na 21 Questions aliyoshirikishwa Nate Dogg. Albamu hiyo ilipata cheti cha platinum mara tisa kutoka RIAA.

Mwaka huo huo alianzisha lebo ya G-Unit Records, ikiwa ni jina la kundi la hip hop alilounda awali, huku wasanii wa kwanza kusainiwa wakiwa Lloyd Banks na Tony Yayo.

Albamu yake ya pili The Massacre pia ilifanikiwa na kuungwa mkono na wimbo Candy Shop aliyomshirikisha Olivia. Baadaye alichukua mwelekeo mwepesi kibiashara kupitia albamu Curtis na Before I Self Destruct ambazo hazikufikia mafanikio ya awali. Alirejea kwenye mizizi yake kupitia albamu Animal Ambition.

Baadaye alielekeza nguvu zaidi kwenye televisheni na vyombo vya habari, akitayarisha na kuigiza kwenye mfululizo wa televisheni Power pamoja na misururu yake mingine kupitia kampuni yake G-Unit Films and Television Inc.

50 Cent ameuza zaidi ya albamu milioni 30 duniani kote na kushinda tuzo nyingi ikiwemo Grammy, Primetime Emmy, tuzo 13 za Billboard Music Awards, World Music Awards sita, American Music Awards tatu na BET Awards nne.

Kwenye uigizaji, aliigiza kwa mara ya kwanza kwenye filamu ya wasifu Get Rich or Die Tryin', kisha akaonekana kwenye Home of the Brave na Righteous Kill. Mwaka 2023, Billboard ilimweka nafasi ya 17 kwenye orodha ya marapa wakubwa 50 wa wakati wote na kumtaja kama msanii wa sita bora wa muongo wa 2000s, huku Rolling Stone ikiiorodhesha albamu na wimbo wake miongoni mwa bora wa muongo huo.