KATIBU Mkuu wa Chadema, Dk Willibrod Slaa kesho atatoa majibu ya kauli zilizotolewa na naibu wake Zitto Kabwe, ambaye alisema kuwa ataendelea kumtetea rafiki yake, David Kafulila kwenye kampeni za ubunge wa Kigoma Kusini kwa tiketi ya NCCR Mageuzi.
Awali Dk Slaa alisema hawezi kuzungumzia kauli hiyo ya Zitto iliyosababisha mwenyekiti wa zamani, Bob Makani kutamka kuwa baraza la wazee litajadili na kutoa uamuzi mzito dhidi ya mbunge huyo wa Kigoma Kaskazini.
Lakini jana mkurugenzi wa habari na uenezi wa Chadema, Erasto Tumbo alisema kuwa kauli hizo za Zitto zitatolewa ufafanuzi na Dk Slaa kesho kwenye kongamano la Vyuo Vikuu lililoandaliwa na Chadema na kufanyika jijini Dar es Salaam.
"Leo hii kama ulivyoona tumezungumza suala la kongamano letu, masuala ya Zitto siku hiyo yatatolewa ufafanuzi na Dk Slaa pamoja na (mwenyekiti wa Chadema, Freeman) Mbowe kwa kuwa watakuwepo. Ni wazi kuwa wataulizwa swali nini maamuzi ya chama kwa Zitto, kwa hiyo kila kitu kitajulikana siku hiyo," alisema Tumbo.
"Leo haikuwa siku maalumu ya kuzungumza kuhusu kauli ya Zitto, lakini kama unataka ufafanuzi wa suala hili njoo kwenye kongamano kwa kuwa suala hilo litafafanuliwa na, kama sio, Mbowe basi Dk Slaa."
Akizungumza na waandishi wa habari jana, katibu wa kongamano hilo ambaye ni mwanafunzi wa Chuo Kikuu cha Dar es Salaam (UDSM), Mwakajila Emmanuel alisema watafanya mijadala yao kwenye ukumbi wa DDC Mlimani jijini Dar es Salaam.
Alisema kongamano hilo litajadili mada mbalimbali ikiwa ni pamoja na mwelekeo wa hali ya siasa nchini na vita dhidi ya ufisadi.
"Pia kongamano litajadili mwelekeo wa sera za Chadema kuelekea uchaguzi mkuu 2010, masuala ya huduma za jamii, ulinzi na uendelezaji wa rasilimali za nchi na mfumo wa utawala na ujenzi wa demokrasia," alisema Emmanuel.
Emmanuel, ambaye ni mwenyekiti wa vijana wa Chadema (Bavicha) mkoani Mbeya alisisitiza kuwa kongamano hilo litakalowashirikisha wanafunzi 1,000, kutoka vyuo mbalimbali nchini, limeandaliwa na Chadema na kuwashirikisha watu mbalimbali.
"Ukweli ni kwamba kongamano hili linaitwa kongamano la Chadema kwa wanafunzi wa vyuo vikuu nchini," alifafanua Emmanuel.
Alisema kuwa katika kongamano hilo ambalo mgeni rasmi ni Mbowe, mada ya hali ya siasa nchini na vita dhidi ya ufisadi itawasilishwa na Dk Slaa; mada kuhusu mwelekeo wa sera za chama hicho kuelekea uchaguzi mkuu 2010 itawasilishwa na Susan Lyimo (Mb); mfumo wa utawala na ujenzi wa demokrasia utawasilishwa na msomi, Prof Mwesiga Baregu.
Alisema malengo ya kongamano hilo ni kuwafanya wanafunzi kutafakari hali ya siasa nchini, kuhimiza jamii vyuoni kushiriki katika chaguzi mbalimbali, kuelimisha jamii kutorubuniwa na wanasiasa pamoja na kukitaka chama hicho kueleza wazi ni kwanini kiungwe mkono na wananchi, kina hoja na sera gani zitakazowasaidia Watanzania.
Jumatatu wiki hii, Zitto aliibuka tena na kutonesha majeraha ya mgogoro uliokuwapo ndani ya chama chake, akisema haridhiki na uamuzi wa chama hicho kuwaengua David Kafulila na Danda Juju.
Ingawa Kabwe hakutaja jina, kauli yake kupinga maamuzi ya kuwavua madaraka wanachama hao; imeonyesha kumzungumzia Dk Willibrod Slaa kwa vile ndiye muajiri wa wafanyakazi wa sekretarieti kwa nafasi yake ya katibu mkuu na ndiye mwenye mamlaka ya kuwatimua.
"Mimi sipendi siasa za kinafiki, uamuzi wa kuwavua nyadhifa zao kina Kafulila haukuniridhisha kwa sababu haukuwa mzuri, ingawa ulipitishwa na mamlaka husika, katika vikao husika," alisema Kabwe katika kipindi cha Jambo Tanzania kilichorushwa na kituo cha televisheni cha TBC1 juzi asubuhi.
Akizungumza na gazeti hili juzi kutoka nchini Ujerumani aliko masomoni Zitto alisema hawezi kuzungumza lolote kuhusu kauli ya Makani kuwa atajadiliwa na uamuzi mzito utatolewa dhidi yake.
MWANANCHI 08-01-20010