Ukweli lazima usemwe. Nimekuwa nikiusema ukweli bila kujali mjadala unaofuata kuhusu hoja yangu. Ni kwakuwa sina upande wowote wa kisiasa ninaouegemea. Ingawa sina uanachama au ushabiki wa chama chochote cha siasa hapa nchini au kwingineko, nimekuwa nikipewa uanachama na kuhamishwa kutoka chama kimoja hadi kingine kila mara kulingana na mada zangu. Nausimamia ukweli daima.
Kama nchi, tumefikia katika mapambano dhidi ya rushwa, ufisadi na uhujumu uchumi. Vita dhidi ya madhila hayo ya kitaifa imepamba moto na inaendelea vyema chini ya uongozi wa Rais Dr. John Pombe Magufuli. Ingawa bado haijafanikiwa kwa aslimia mia moja, nia na matendo ya kupinga rushwa,ufisadi na uhujumu uchumi yanatosha kupunguza, kuwafunza adabu na 'kuwatisha' wahusika. Ni mwanzo mzuri na wenye kila aina ya matumaini.
Kama nchi, tupo katika jitihada kubwa za kulinda rasilimali zetu ili zitunufaishe. Tupo kwenye mikakati mizito kimaneno na kimatendo ya kuzilinda na kuzipigania rasilimali zetu za kitaifa kama madini, Wanyama na nyinginezo. Katika kuonyesha nia thabiti katika hilo, kuna mabadiliko mbalimbali ya kisheria yameshafanyika katika kulinda na kuzifanya rasilimali zetu zitunufaishe. Ni jambo jema na kuungwa mkono.
Kama nchi, tupo katika jitihada na mipango kabambe ya kuimarisha uchumi wetu na hata kuimarisha miundombinu. Serikali ya awamu ya tano chini ya Rais Magufuli imejipambanua katika kuimarisha uchumi wa viwanda; uimarishaji wa miundombinu mbalimbali kama barabara, madaraja, reli na uzalishaji wa nishati ya umeme. Serikali ya awamu ya tano iko thabiti katika kuisimamia nia yake hiyo ya kiuchumi.
CHADEMA, kama chama kikuu cha upinzani nchini, kimekuwa kikipigania mambo yanayosimamiwa sasa na Serikali kwa muda mrefu. CHADEMA imekuwa ikipinga waziwazi ufisadi, wizi wa mali za umma, rushwa na uhujumu uchumi. Imekuwa ikipigania kulindwa kisheria kwa rasilimali zetu za taifa na hata kuimarishwa kwa uchumi. pamoja na kuandamwa na changamoto mbalimbali wakati eote huo, Wabunge na viongozi wa CHADEMA wamekuwa wakiyasimamia hayo.
Ushahidi mkubwa wa mambo hayo kutoka CHADEMA ni Hansard za Bunge zilizo na 'mapambano makali' ya kupinga ufisadi kama wa Richmond, EPA, Escrow, Buzwagi na kadhalika. Pia, Hansard za Bunge letu tukufu zina kumbukumbu adimu za Hoja mbadala na maridhawa za upinzani kuhusu uimarishwaji wa uchumi, miundombinu na uwezeshwaji wa wananchi kimapato. Katika kila Hotuba za Kambi Rasmi ya Upinzani Bungeni za kibajeti, CHADEMA imekuwa ikishauri na kuasa kuhusu mambo mbalimbali ya kisekta ambayo kwasasa yanaing'arisha Serikali yetu.
Hakika, kwa tunachofanya na tunachokisimamia, tumefika hapa kwa sababu ya CHADEMA kama chama kikuu cha upinzani nchini. Wanapaswa kutetewa, kuombewa na kuenziwa.