Science is the Savior of Humanity
Imekuwa ni jambo la kawaida sana kukutana na maandiko ya watu wakisifu miungu yao na imani zao. Lakini ni mara chache sana kukutana na maandiko yanayoeleza mambo makuu na ya kishujaa yaliyofanywa na binadamu wachache waliojitolea kwa dhati kuisaidia jamii kupitia gunduzi na tafiti mbalimbali za kisayansi.
Ufuatao ni uchambuzi mfupi unaoeleza kwa nini sayansi inapaswa kutazamwa kama mkombozi wa kweli wa binadamu katika kutatua matatizo ya maisha ya kila siku.
1. Sayansi imeongeza umri wa kuishi wa binadamu
Sayansi imeweza na itaendelea kuwezesha binadamu kuishi maisha marefu zaidi ukilinganisha na karne zilizopita. Leo hii kuna chanjo nyingi dhidi ya magonjwa ambayo zamani yalikuwa tishio kubwa kwa maisha ya watu.
Bila ugunduzi wa “germ theory of disease”, hakuna ambaye angeelewa chanzo cha magonjwa mengi wala namna ya kuyatibu. Thibitisha hili kwa kulinganisha idadi ya watu (population) ya miaka ya 1990 na ya mwaka 2022 – utaona ongezeko kubwa sana la watu duniani.
Sasa jiulize: kama watu wangelitegemea tu maombi, ibada, kufunga, au hija, je magonjwa kama polio, tetekuwanga, surua na mengine yangeweza kutokomezwa kupitia chanjo?
2. Kupungua kwa vifo vinavyoweza kuzuilika
Vifo vilivyokuwa vinaepukika vimepungua kwa kiwango kikubwa. Mfano mzuri ni kupungua kwa kiwango cha vifo vya watoto wachanga (Infant Mortality Rate). Haya yote ni matokeo ya maendeleo ya sayansi na huduma za afya.
Leo hii mama mjamzito anaweza kuchagua kujifungua kwa njia ya kawaida au kwa upasuaji salama. Jiulize bibi zetu wa miaka ya 1500 walipitia changamoto kiasi gani wakati wa kujifungua, na ni watoto wangapi walipoteza maisha kutokana na kukosekana kwa tiba na teknolojia ya kitabibu?
Je, matatizo hayo yangetatuliwa kwa maombi peke yake, mafuta ya upako, au dua?
3. Nishati ya umeme – zao la fikra za kisayansi
Nishati ya umeme kwa sasa ni hitaji muhimu sana kwa binadamu. Maisha ya kisasa hayawezi kuendelea bila umeme: mawasiliano, hospitali, elimu, viwanda, usafiri na hata shughuli ndogo kama kupasi nguo au kuhifadhi chakula.
Haya yote ni matokeo ya kazi za watu waliotumia akili na utafiti wa kisayansi hadi kugundua misingi ya umeme kama “Direct Current (DC)” na “Alternating Current (AC)”.
Jiulize: kama Nikola Tesla na wanasayansi wenzake wangesubiri maono ya kimiujiza badala ya kufanya utafiti, je leo tungekuwa na umeme wa maji (Hydroelectric Power) au mitambo ya kisasa?
4. Mapinduzi katika sekta ya usafiri
Usafiri ni nguzo muhimu ya maisha ya binadamu, hasa mijini. Biashara, elimu, afya na shughuli za kijamii zote hutegemea usafiri.
Magari, meli na ndege havikutokea tu kwa bahati mbaya. Ni matokeo ya tafiti, majaribio na ubunifu wa kisayansi. Leo mabilioni ya watu wanatumia vyombo vya moto bila hata kufahamu kwa undani jinsi injini zinavyofanya kazi.
Kama ndugu Wright (Wright Brothers) wangelisubiri maono badala ya kufanya majaribio ya kisayansi, je leo tungekuwa na kitu kinachoitwa ndege?
5. Teknolojia ya Habari na Mawasiliano
Tunatumia simu na intaneti kila siku, lakini wengi hatujui namna mawimbi yanavyosafiri na kubadilishwa kuwa sauti au maandishi kwa umbali wa maelfu ya kilomita.
Leo mtu aliyeko Tanzania anaweza kuzungumza na mtu aliyeko Marekani, au hata kuwasiliana na chombo kilicho angani. Haya yote ni matokeo ya sayansi na teknolojia, si miujiza.
Maendeleo ya hivi karibuni kama Akili Unde (Artificial Intelligence) yanaonesha wazi kuwa mustakabali wa binadamu unategemea zaidi sayansi kuliko chochote kingine – hasa kwenye afya, elimu na biashara.
Hitimisho
Hayo ni machache tu kati ya maelfu ya mafanikio ya sayansi.
Maarifa ya kisayansi hayahitaji kuabudiwa wala kusifiwa kama dini. Yanahitaji kusherehekewa, kujadiliwa na kufundishwa kwa uhuru kwa ajili ya kujenga kesho iliyo bora zaidi.
Not by Almighty
But by Rationality
Not by Grace
But by Effort
Embrace Reality
