Candid Scope
JF-Expert Member
- Nov 8, 2010
- 11,897
- 6,933
Dk. Asser Mchomvu wa Hospitali ya Mission Mikocheni jijini Dar es Salaam,
akifafanua jambo kwa kutumia mchoro kuhusu mfumo wa uzazi juzi
baada ya kufanikiwa kufanya operesheni na kukitoa kichanga
Ni maajabu, lakini imetokea jijini Dar es Salaam kwa mimba kutungwa ndani ya utumbo wa kawaida badala ya mji wa mimba na mtoto huyo amezaliwa kwa njia ya operesheni na yuko salama. Kazi kubwa iliyofanywa na jopo la madaktari wanawake kutoka Chuo Kikuu cha Kairuki likiongozwa na Daktari Bingwa wa Upasuaji katika Hospitali ya Mikocheni jijini Dar es Salaam, ndilo la kushukuriwa kwa kufanikisha uokoaji wa maisha ya mtoto mchanga aliyekuwa kwenye sehemu ya tumbo la chakula juu ya tumbo la mama yake kwa miezi tisa.
Mimba ya mwanamke huyo mkazi wa Kinondoni, jijini Dar es Salaam, ilijitunga katika utumbo huo kwa kipindi hicho hadi madaktari bingwa hao walipomfanyia upasuaji Jumatano wiki hii na kufanikiwa kuokoa maisha ya mtoto huyo. Hata hivyo, mama mzazi wa mtoto huyo, Elizabeth Kasongo (29), alipoteza maisha muda mfupi baada ya operesheni hiyo kutokana na kupoteza damu nyingi baada ya operesheni hiyo.
Akithibitisha kutokea kwa tukio hilo, Mkurugenzi Mkuu wa Hospitali ya Mikocheni, Dk. Asser Mchomvu, alisema kuwa walimpokea mama huyo hospitalini hapo na kumfanya vipimo na kugundua kuwa mimba yake ilikuwa imejitunga kwenye utumbo. Katika mahojiano maalum na NIPASHE jana hospitalini hapo, Dk. Mchomvu alisema kuwa wakati wa upasuaji huo, madaktari walifanikiwa kuokoa maisha ya mtoto huyo wa kiume, aliyekuwa na uzito wa kilo 2.6. "Tulijitaidi kadri ya uwezo wetu kumwongezea damu mama huyo, tulimwekea chupa za damu zisizopungua nane, lakini kila tukimwongezea damu ilikuwa haikai mwilini inatoka tu, hivyo alifariki muda mfupi baadaye," alisema Dk. Mchomvu.
Akielezea sababu ya mimba hiyo kujitunga katika utumbo badala ya kwenye mji wa mimba kama inavyofahamika kwa watu wengi, Dk. Mchomvu, alisema kitaalamu mbegu za mwanaume zinapoingia kwa mwanamke na kwenda kurutubisha yai (ovary), yai hilo linaposhindwa kurudi katika mji wa mimba (uterus) kupitia mirija (fallopian tube) inasababisha yai hilo kujitunga katika mirija ya uzazi badala ya kwenye mji wa mimba. Aliongeza kuwa, yai hilo hukua katika mrija huo jambo ambalo husababisha kupasuka na yai hilo kudondokea katika baadhi ya sehemu za ndani ya mwili, ikiwemo kwenye ngozi ya utumbo, utumbo, au kwenye mafuta ya utumbo.
Dk. Mchomvu alisema kuwa, mara nyingi mimba ya aina hii huchukua miezi mitano hadi sita na kusababisha mtoto kufia tumboni, lakini kwa mama huyo imekuwa tofauti kwani mtoto alikaa miezi tisa hadi siku ya upasuaji. Dk. Mchomvu alisema baada ya upasuaji walimfanyia vipimo mtoto huyo na hakuonyesha dalili zozote za matatizo na kwamba anaendelea vizuri na afya yake ni nzuri. "Mtoto anapozaliwa huwa tunampima kwa score 10, huwa tunamwangalia kama mtoto analia, mwili wake pamoja viungo vyake kama vinachezacheza, kama anapumua vizuri, rangi yake kama iko sawa, kwa mtoto huyu vyote anavyo," alisema Dk. Mchomvu.
Akifafanua kitaalam zaidi, Dk. Mchomvu alisema, mimba za aina hiyo zimegawanyika katika makundi mawili ambayo ni mimba zinazotungwa katika utumbo mwembamba ambapo yai linadondokea nje ya uzazi na mimba zinazotungwa katika utumbo mpana ambapo kiumbe hutupwa nje ya mji wa mimba kupitia mirija ya uzazi. Alisema mimba za aina hizo zinaitwa ectopic ambazo asilimia 95 zinakuwa zimejitunga katika mirija ya uzazi. Dk. Mchomvu alisema matukio kama haya ni nadra sana kutokea duniani, na anakumbuka kusoma mojawapo lililotokea mwaka 1780. Hakufafanua ni wapi.
Baba mzazi wa mtoto huyo, Okolewa Amoni, alisema wakati wote wa ujauzito mkewe alikuwa anajisikia vizuri na hakuwa analalamika chochote. "Sikuwahi kumsikia Elizabeth analalamika kama anajisikia vibaya, alikuwa yuko safi tu siku zote, kipindi chote tulipokuwa tunaenda kliniki na hii ndiyo ilikuwa mimba yake ya kwanza," alisema Amoni.
