Wiki chache baada ya kumshtaki Mbunge wa Kigoma Kusini (NCCR-Mageuzi), David Kafulila, Kampuni ya kufua umeme ya Independent Power Tanzania Limited (IPTL) na wenzake wawili, sasa imemgeukia Mbunge wa Kigoma Kaskazini (Chadema), Zitto Kabwe kwa kumfungulia kesi ya madai ya fidia ya Sh. bilioni 500 Mahakama Kuu, Kanda ya Dar es Salaam.
IPTL pamoja na wadai wenzake wanaiomba mahakama imwamuru Zitto kulipa fidia hiyo kwa madai ya kutoa kashfa dhidi yao kimaandishi.Wadai wengine katika kesi hiyo ni Kampuni ya Pan Africa Power Solutions Tanzania Limited (PAP) na Mwenyekiti Mtendaji wa kampuni hizo, Harbinder Sing Seth.
Kesi hiyo ilifunguliwa katika mahakama hiyo, Septemba 4, mwaka huu, kupitia Wakili Melchisedeck Lutema kutoka Kampuni ya Mawakili ya Asyla Attorneys na Kay Felician Mwesiga kutoka Kampuni ya Mawakili ya Bulwark Associates Advocates.
Pamoja na mambo mengine, wadai hao wanataka Zitto aamriwe kulipa fedha hizo.
Mbali na Zitto, wadaiwa wengine katika kesi hiyo, ni Mhariri wa gazeti la Raia Mwema, Kampuni ya Raia Mwema na Kampuni ya Flint Graphics.
Wote wanatakiwa kulipa fidia inayodaiwa kuwa inatokana makala ya kuwachafua iliyochapishwa kwenye gazeti hilo iliyosababishwa na wadaiwa hao.
Wadai pia wanataka mahakama hiyo itamke rasmi kwamba, makala iliyokuwa na kichwa cha habari Fedha za IPTL ni Mali Ya Umma iliyochapishwa katika ukurasa wa saba na 14 za gazeti hilo la tarehe 13 Agosti, mwaka huu, ilikuwa ni ya kupotosha.
Wanadai kuwa na kupotosha, makala hiyo pia ilikuwa ni ya kuchafua kwa kudhamiria na kuhitaji wadaiwa kuomba radhi kwa kuandika na kuchapisha katika kurasa za mbele kichwa cha habari ya kuomba msamaha katika matoleo mawili mfululizo ya gazeti hilo.
Pia wadai wanaiomba mahakama hiyo kuweka vizuizi vya kudumu kwa wadaiwa, watumishi wao, wafanyakazi wa shirika, wawakilishi au watu wengine wowote wanaofanya kazi chini ya wadaiwa kwa uchapishaji, kuchapisha au usababisha kuandika na kuchapishwa kwa makala yoyote ya kuwachafua.
Wanadai IPTL iliingia mkataba na Shirika la Umeme Tanzania (Tanesco) kuwa umeme unaozalishwa na mdai (IPTL) utakuwa ukinunuliwa na kusambazwa na Tanesco kwa bei waliyokubaliana.
Inadaiwa kuwa katika kurasa namba saba na 14 za Raia Mwema la Agosti 13, mwaka huu, Zitto aliandika wakati mdaiwa wa pili, wa tatu na wa nne walihariri, kuchapa na kusambaza makala, ambayo ilikuwa ni ya uongo na ya kuwachafua wadai.
Katika hati ya mashtaka, wadai wanadai kuwa makala hiyo ilikuwa na maneno yafuatayo yaliyokuwa si ya ukweli na ya kuwachafua wanaodai: Kwa mara nyingine, serikali kupitia viongozi wake, akiwamo Mwanasheria Mkuu wa Serikali (AG),
.wamedai kwamba, Dola za Marekani milioni 250 zilizopaswa kuendelea kuwapo katika Tegeta Escrow Account si mali ya serikali na hivyo, si mali ya umma...Akaunti hiyo ilifunguliwa na serikali kupitia Wizara ya Nishati na Madini, Tanesco pamoja na IPTL.
Inadaiwa kuwa pasingekuwa na nia ya dhati ya kumchafua mdai, mdaiwa asingechapisha na kusambaza maneno yaliyonukuliwa kama angefanya juhudi za kuthibitisha ukweli kutoka upande wa pili (kwa mdai) au kutoka kwa maafisa husika wa serikali, ambao wangethibitisha kwamba:
Kiasi cha fedha kilichowekwa kwenye akaunti ya Escrow kilikuwa ni Dola za Marekani 122,000,000.00 na siyo Dola za Marekani 250,000,000.00 kama ilivyodaiwa na mdaiwa, ilisomeka sehemu ya hati ya madai.
Kwa mujibu wa wadai, Tanesco kamwe haikuwa sehemu ya makubaliano ya Escrow kama ilivyodaiwa na wadaiwa.
Fedha ziliwekwa katika makubaliano ya Escrow na siyo kama fedha za umma. Lakini ni kwa kutokana na mgogoro wa malipo yaliyotakiwa kufanywa na Tanesco kwa IPTL, sehemu ya hati ya madai ilisomeka.
Iliongeza: Madai kuwa fedha hizo ziliwekwa kama fedha za umma ni ya uongo na kuupotosha umma na kuwachafua wadai kuwa ni wabadhilifu wa fedha za umma.
Hatua hiyo imechukuliwa na IPTL na wenzake, wiki chache baada ya kumfungulia mashtaka ya kashfa Kafulila kwa madai ya kuituhumu kujipatia Sh. bilioni 200 kutoka katika Akaunti ya Escrow ndani ya Benki Kuu (BoT) kwa njia zisizo halali.
Kesi hiyo imefunguliwa na IPTL, ambayo ni mdai wa kwanza kwa kushirikiana na Kampuni ya Pan African Power Solutions (T) Limited na Seth. Baadaye, IPTL na wenzake waliwasilisha maombi mahakamani wakiomba itoe amri ya kumfunga mdomo Kafulila.
Baadaye, Kafulila aliwasilisha mahakamani pingamizi la awali dhidi ya kesi hiyo.
CHANZO: NIPASHE
