Kwa nchi zilizostaarabika zinazoongozwa na Setikali zilizostaarabika, hakuna kilicho muhimu kama uhai wa wananchi wao.
Magaidi ya Hamas, yalipoingia Israel na kufanya mauaji makubwa na kisha kuchukua mateka, hayakuchagua mtu. Yaliua na kuwateka Wayahudi, Waarabu, Wapalestina, Wazungu, Wahindi na jamii nyingine zote, alimradi ulikuwa nchini Israel, na kwamba yaliweza kukufikia.
Tofauti na nchi nyingine zote ambazo zilifuatilia hali za wananchi wao na kutoa taarifa rasmi kwa wananchi wao, Serikali ya Tanzania haikufanya hivyo. Habari za Watanzania waliotekwa, zilisikika juu juu tu! Na wala hakukuonekana kuwepo uzito mkubwa ambao Serikali iliweka kwenye tukio hilo.
Magaidi ya Hamas, ni sehemu ya utawala wa Palestina. Na Palestina ina ubalozi wake nchini Tanzania. Na hiyo ni kutokana na ukaribu uliokuwepo kati ya Yasar Arafat (RIP) na Mwalimu Nyerere (RIP). Ifahamike kuwa Yasar Arafat, aliyekuwa rafiki mkubwa wa Mwalimu, alikuja kugeuka kuwa adui wa Hamas kwa sababu Yasar Arafat alikaribisha mazungumzo kati ya Palestine na Israel, jambo ambalo makundi haya ya kigaidi ya Hamas na Hizbollah, hayakutaka. Baadaye Yasar Arafat, kwa uchunguzi uliofanyika iligundulika kuwa aliuawa kwa njia ya sumu.
Kwa hiyo kiuhalisia, Tanzania haijawahi kuwa karibu kwa namna yoypte na kundi la kigaidi la Hamas.
Maswali ya kujiuliza, ni kwa nini Serikali ya Tanzania haikutoa uzito mkubwa kwa maisha ya Watanzania waliochukuliwa mateka na Hamas? Kwa nini Serikali ya Tanzania, haikutoa amri kwa balozi wa Palestina nchini kuwa Watanzania waachiwe au la ubalozi wao nchini ufungwe mara moja? Kuna haja gani ya kuwa na mahusiano ya kibalozi na watu wanaoteka na kuua watu wenu?
Yawezekana Setikali ya Tanzania haikufanya chochote kwa sababu haijali uhai wa Watanzania? Au ni kwa sababu kama ni kutekwa au kupotezwa watu moja kwa moja, mambo hayo yamekuwa yanafanyika nchini bila ya Serikali kuchukua hatua yoyote? Hivyo Serikali iliona ni jambo dogo, kwa sababu mambo hayo yamekuwa yakifanyika hata hapa nchini?
