Mungi
JF Gold Member
- Sep 23, 2010
- 16,975
- 9,580
Chama cha Demokrasia na Maendeleo (Chadema) kitaendelea kuwasiliana na Rais Jakaya Kikwete na serikali kufanya mashauriano ili kuhakikisha Sheria ya Mabadiliko ya Katiba ya Mwaka 2011 inafanyiwa marekebisho ya msingi kabla ya mchakato wa kukusanya maoni kwa mujibu wa sheria hiyo haujaanza.
Uamuzi huo ni kati ya maamuzi yaliyofikiwa na Kamati Kuu (CC) ya Chadema, katika mkutano wake, uliofanyika kwa siku mbili, kuanzia Januari 20, mwaka huu, jijini Dar es Salaam.
Mkutano huo wa CC ulikuwa na ajenda mbalimbali, ikiwamo uteuzi wa mgombea wa uwakilishi wa Jimbo la Uzini, kisiwani Unguja.
Ajenda nyingine, kupitisha mkakati na bajeti ya uchaguzi husika; taarifa ya kamati maalum ya CC kuhusu sheria hiyo na taarifa ya fedha (mapato na matumizi ya chama) kwa mwaka 2011.
Mawasiliano mashauariano hayo na Rais Kikwete na serikali, yamekuwa yakifanywa na kamati maalum iliyoundwa na CC Novemba 20, mwaka jana.
Kamati hiyo inaongozwa na Mwenyekiti wa Chadema, Freeman Mbowe.
Kamati Kuu imeamua kwamba Kamati Maalum iendelee kufanya mawasiliano na mashauriano na Rais Kikwete na serikali kwa ajili ya kuhakikisha kwamba Sheria ya Mabadiliko ya Katiba ya mwaka 2011 inafanyiwa marekebisho ya msingi kabla ya mchakato wa kukusanya maoni kwa mujibu wa sheria husika haujaanza, ilieleza sehemu ya taarifa ya Chadema jana.
Kwa mujibu wa taarifa hiyo iliyosainiwa na Mkurugenzi wa Habari na Uenezi wa Chadema, John Mnyika, katika mkutano huo, CC ilipokea na kujadili taarifa ya kamati maalum kuhusu sheria hiyo.
Pia ilieleza kuwa CC ilijulishwa hatua, ambazo serikali imefikia katika maandalizi ya kuifanyia marekebisho sheria hiyo katika Mkutano wa Sita wa Bunge unaotarajia kuanza Januari 31, mwaka huu.
Ilieleza kuwa CC imeendelea kusisitiza azimio lake la kikao cha Novemba 20, mwaka jana linalotamka kuhusu ushiriki wa Chadema katika mchakato wote wa kupata Katiba Mpya uliowekwa na sheria hiyo.
Kwamba, utategemea utayari wa serikali ya Rais Kikwete kufanya mabadiliko ya kimsingi katika sheria hiyo kwa lengo la kujenga muafaka wa kitaifa juu ya mchakato huo.
Kadhalika CC imepokea taarifa kuhusu hatua iliyofikiwa na chama katika kufanya mikutano ya ndani katika maeneo mbalimbali kulenga kuelimisha viongozi, wanachama na wananchi kuhusu upungufu wa sheria hiyo pamoja na kupokea maoni kwa ajili ya kuboresha sheria husika.
Vilevile, CC imeamua kwamba, Chadema iendelee kutekeleza azimio la kikao cha CC cha Novemba 20, mwaka jana la kutoa elimu kwa wananchi na wadau wote juu ya ubovu wa sheria hiyo na juu ya haja ya kuwa na sheria itakayoweka utaratibu bora zaidi wa kuunda Tume Shirikishi ya Katiba kwa lengo la kukusanya maoni ya wananchi.
Pia kuandaa ripoti na Rasimu ya Katiba Mpya, Bunge Maalum la Katiba na usimamizi wa kura ya maoni itakayowezesha wananchi kufanya maamuzi kwa uhuru na kwa haki.
CC iliendelea kuwaagiza viongozi wote wa chama kama ilivyoelekezwa na waraka namba 3 wa Katibu Mkuu wa mwaka 2011, katika ngazi zote kufanya mikutano ya ndani na ya hadhara.
Kuhusu uchaguzi wa Uzini, alisema CC imeridhika na maandalizi ya awali, ambayo chama kimeyafanya katika jimbo hilo na kuagiza sekretariati ya chama kufanya maandalizi zaidi kwa ajili ya uzinduzi wa kampeni za uchaguzi husika.
Mbali na hayo, taarifa hiyo ilieleza kuwa CC pia ilifanya mapitio ya bajeti na kuweka kikomo cha matumizi ya fedha katika uchaguzi huo.
CHANZO: NIPASHE
