Niliwahi kuandika haya hapa chini kwenye moja ya magazeti hapa nchini. Japokuwa malengo yalikuwa tofauti kidogo kipindi hicho, maudhui yake bado yanasimama. Nape ameanza kupambana na CCM muda kidogo na naona style yake haijabadilika, jambo linalomfanya aonekana 'odd out'. Wakati ule alishindwa kusimama sijui sasa tunapoelekea zile siku zao 90 kama ataweza. Kwa sasa, kama ningeandika tena hii makala, ningebadilisha tu neno Nchimbi na kuweka Lowasa na/au Chenge. Jikumbushe kama mie nilivyojikumbusha...
************************************************************************************************************
CCM ya Nape ni nadharia; ya Nchimbi ndiyo iliyopo
Kitila Mkumbo
Nimefuatilia, kama ilivyo kwa watanzania wengine, ‘mgogoro' wa kifikra na mtazamo kati ya aliyekuwa mgombea wa nafasi ya uenyekiti wa UVCCM, Nape Nnauye, na Mwenyekiti anayemaliza muda wake katika umoja huo, Emmanuel Nchimbi. Hata hivyo nikiri mapema kabisa kuwa sielewi mantiki ya mgogoro huu na hatimaye mjadala uliofuatia na unaoendelea. Nisichoelewa hasa ni msingi wa dhamira ya Nape katika hoja yake ya kupinga mkataba wa mradi wa ujenzi wa jengo la makao makuu ya UVCCM, ambayo imevutia hisia za watu wengi, ndani na nje ya CCM.
Najiuliza maswali mawili. Mosi, je, Nape ameibua hoja ya kupinga mkataba ‘haramu' wa mradi wa ujenzi wa jengo la UVCCM kama karata na turufu ya kumwezesha kushinda kiti cha uenyekiti wa umoja huo? Pili, je, ni kweli kwamba Nape ni miongoni mwa wana CCM wachache "waliokoka" na kujiunga na kundi kubwa la wananchi wanaochukizwa na kukerwa na mwenendo wa ufisadi miongoni mwa viongozi waandamizi wa CCM na serikali yake? Kama msingi wa hoja ya Nape ni ule wa kwanza, wa kutumia hoja yake kama turufu ya kuvuta hisia za wana UVCCM wenzake ili wamchague kuwa mwenyekiti wao, ni wazi kuwa amekwishashindwa kabla hajaanza. Kwa msingi huu, anachojaribu kufanya Nape ni kuvunja misingi mama ya kanuni za ushindani ndani ya CCM. Nape anataka achaguliwe kwa misingi ya hoja za kimantiki, uadilifu, ustaraabu, ukweli, uwazi, uhuru na kujitegemea katika kufikiri, na, zaidi ya yote, kutanguliza utaifa dhidi ya uchama na ukada. Yote hii ni misingi mizuri, lakini sio misingi ya CCM na ndipo upofu wa Nape ulipo. Kwa hoja zake, Nape anajaribu kuweka mlo safi katikati ya jalala la taka. Hautanoga na wala hataufaidi mlo huo, na zaidi ya yote anajiweka katika mazingira hatari ya kuambukizwa vijidudu hatari vitakavyompelekea augue ugonjwa hatari wa matumbo!
Anachofanya Nape ni kupingana na misingi ya kanuni za msingi za kutafuta madaraka ndani ya CCM, ambazo, kwa uchache kabisa, ni pamoja na ubabaishaji, uzandiki, ujanjaujanja, njia za mkato, unafiki, ghiliba, kujipendekeza, kuiba wajumbe na kuwaficha, na muhimu zaidi kuliko zote, kutanguliza ukada na uchama dhidi ya uwezo wa kiuongozi na kiutendaji na uzalendo kwa nchi. Hii ndio CCM ambayo Nape anajaribu kuibomoa na ambayo Nchimbi na wenzake akina Makamba wanaipigania. Kwa hiyo utaona kwamba CCM ambayo Nape anajaribu kuipigania haipo, ni ndharia; iliyopo ni ile CCM ambayo Nchimbi na Makamba wanajaribu kuilinda kwa mafanikio makubwa.
Niliwahi kuwa mwanachama na kada wa CCM kwa muda kidogo na nilijaribu kugombea nyadhifa kadhaa katika UVCCM, na,kwa bahati nzuri, nilishindwa zote! Kwa uzoefu nilioupata ni kwamba hushindi uchaguzi ndani ya CCM kwa kuwa na uwezo au kwa kujenga hoja za kimantiki zinazoweka maslahi ya nchi mbele. Unashinda uchaguzi ndani ya CCM kwa kujifanya wewe ni kada kuliko mmwingine yeyote, kwa ujanjaujanja, kwa kujipendekeza na kujipitishapitisha kwa baadhi ya wakubwa wanaoingia kwenye vikao muhimu vya CCM, kurubuni wajumbe wa vikao, ikiwemo kuwaficha wajumbe wa vikao hivyo. Ukitaka kushindwa kirahisi katika uchaguzi wa CCM uonyeshe uwezo na utangulize mambo ya taifa mbele badala ya ukada. Kama kuna kiongozi wa CCM aliyeshinda uchaguzi ndani ya chama hicho kwa kujenga hoja za kutetea maslahi ya taifa dhidi ya ukada awe wa kwanza kujibu makala hii.
Nape, na wana CCM wengine makini, wanajua vizuri sana kwamba ingekuwa ni swala la uwezo na kutanguliza maslahi ya taifa, Rais Kikwete asingewashinda Salim Ahmed Salim, Mark Mwandosya, na hata Frederick Sumaye. Pamoja na mambo mengine, sifa kubwa iliyomfanya Rais Kikwete awashinde wenzake katika kinyang'anyiro cha kugombea urais ni ukada wake wa muda mrefu katika CCM. Kwa hiyo katika CCM ukada ndio sifa mama na kigezo muhimu cha kuweza kuchaguliwa. Ndio kusema Nape anapojaribu kutanguliza utaifa, tena kwa kuzomea ufisadi ambayo ni nguzo muhimu ya kuwepo kwa CCM, kama turufu ya kutaka achaguliwe kuwa mwenyekiti wa UVCCM anajaribu kukata mbuyu kwa uwembe. Hataweza; atajikata mwenyewe na kuuacha mbuyu umesimama kidete.
Pengine tumpe Nape ile wazungu wanaita "the benefit of doubt". Kwamba Nape ni miongoni mwa wana CCM wachache waliokoka hivi karibuni, na ameamua kujitoa mwili na roho katika kujiunga na majemadari wa vita dhidi ya ufisadi. Kuokoka kupo sio tu katika siasa na dini, lakini pia katika nyanja nyingine za maisha ya kijamii. Lakini unapoamua kuokoka lazima ujue na uzingatie misingi ya wokovu, vinginevyo utaanguka tena. Kuokaka kisiasa na kidini kunahitaji ujasiri wa kukubali kusutwa na kuacha mazoea. Ili ukamilishe wokovu lazima ukubali kubadilika kimwili na kiroho.
Ninachokiona hapa ni kwamba Nape amekwisha kutoka CCM kiroho, kiakili na kisaikolojia lakini bado amebaki kimwili. Hili ni tatizo linalowakumba wana CCM wengi. Ninaamini kuna wana CCM wengi waliokwisha kukihama chama chao kiroho, kiakili na kisaikolojia, lakini wameendelea kubaki huko kimwili kwa kukosa ujasiri au kwa sababu zingine, ikwemo kuamini kwamba ipo siku CCM itadilika. Nikiri kuwa mimi ni mojawapo ambaye ilinichukua takribani miaka mitano kuhama CCM kimwili. Nilikuwa nimeachana na CCM kiroho, kiakili na kisaikolojia tangu mwaka 2000, lakini ilinichukua miaka mitano hadi 2005 nilipoamua kujitoa hadi mwili na kujiunga na CHADEMA.
Binafsi nilijitoa CCM baada ya kujiridhisha bila shaka kuwa CCM imefikia hatua ya usugu, na haiwezekani kubadilika. Ni hatua ambayo vyama dada kama KANU, ZANU-PF na UNIP vilipitia, na ambayo ni wananchi pekee wenye uwezo wa kuibadilisha. Kama kweli tumechoshwa na madhira ya CCM, ikiwemo ufisadi, inabidi tufike mahala tukubali kuachana na CCM. Kuendelea kuibakisha CCM madarakani ni kukubaliana kwamba, pamoja na kwamba tumeumia kama nchi, bado tunaweza kuendelea kuwavumilia CCM, hatujaumia vya kutosha. Kufikiri kwamba CCM inaweza kubadilika ni njia nzuri ya kujiridhisha kisaikolojia baada ya kushindwa kuitoa madarakani, lakini haisaidii kubadili hali ya mambo katika nchi yetu.
Kwa hiyo Nape ana mambo mawili ya kuchagua. Mosi, anaweza akaendelea kubaki CCM kimwili na kuisaliti dhamira yake ya ndani na akaendelea kupiga kelele za ufisadi, ambazo zitazidi kumtenga na wenzake ambao "hawajaokoka" katika CCM, na hivyo kuendelea kuonekana kituko! Pili, anaweza akavaa ujasiri na akatoa mwili wake katika CCM na kujiunga na majemadari wengine walioamua kupigania maslahi ya nchi hii badala ya ukada na uchama. Tumemuonya, uamuzi ni wake.
kitilam@yahoo.com
0754 301 908
Wana CCM tumebaki kama mazuzu kuhusu suala la Emanuel Nchimbi
Baada ya Nchimbi, CCM yapanga upya safu ya makatibu wa mikoa