WAZIRI wa Nchi Ofisi ya Rais (Uhusiano na Uratibu), Stephen Wassira (69), ataomba kuwania urais wa Jamhuri ya Muungano wa Tanzania, kupitia Chama cha Mapinduzi.
(CCM) katika Uchaguzi Mkuu wa mwaka 2015, Raia Mwema linaweza kuthibitisha.
Katika mahojiano maalumu aliyofanya na gazeti hili mjini hapa mwishoni mwa wiki iliyopita, Wassira alisema kilichomfanya awaze kufanya hivyo ni maombi mengi kutoka kwa wanaCCM wanaoona anaweza kukabiliana na changamoto zinazolikabili taifa katika wakati huu.
Kwanza niseme kwamba nimeombwa na watu wengi sana kugombea urais, lakini mimi ni mwanachama wa CCM na lazima nifuate kanuni za chama zinazotuongoza kufanya kampeni.
Lakini inakuwa vigumu kutofautisha hatua ya kutangaza nia ya kugombea na hatua kama hii ya kuniuliza ili upate habari ya kuandika gazetini.
Kwa kifupi, nimekwishashauriwa sana, lakini ninasubiri kwanza ruhusa ya kanuni za chama, wakati ukifika nitatoa kauli kuhusu suala hilo la kugombea urais, maana nimeombwa sana.
Kwa kweli kwa kiasi kikubwa nimeshafikia uamuzi wa kugombea. Nitagombea kupitia CCM, alisema Wassira ambaye pia ni Mbunge wa Jimbo la Bunda mkoani Mara, kupitia chama hicho.
Jina la Wassira limekuwa likitajwa miongoni mwa watu wanaotaka kuwania urais kupitia chama hicho katika uchaguzi huo wa mwaka 2015, lakini hii ni mara ya kwanza kwa Wassira kuzungumzia dhamira yake hiyo na chombo cha habari cha Tanzania.
Akieleza kuhusu nini kinatakiwa kwa Rais ajaye wa Tanzania, Wassira alitaja mambo makubwa manne ambayo yanapaswa kufanyika.
Kwanza, kuboresha kilimo kwa kuwekeza zaidi katika sekta hiyo ili kuondoa umasikini uliojikita kwa wakulima vijijini na wananchi kwa ujumla.
Namaanisha kuongeza bajeti ya kilimo itakayotosha kugharimia huduma ambazo mkulima hawezi kujigharimia zikiwamo za utafiti, ugani, uzalishaji mbegu bora na umwagiliaji maji badala ya kutegemea mvua zisizo na uhakika. Hayo yatawezesha kilimo kuwa cha kisasa na chenye tija kwa wakulima.
Pili, kufufua na kuongeza viwanda vya kusindika mazao ya kilimo nchini. Tunalima mahindi kwa wingi, lakini tunauza mahindi badala ya unga. Zao hilo linahitaji usindikaji ili tufaidike nalo ipasavyo kwa kuuza unga badala ya mahindi ghafi.
Vivyo hivyo, tuongeze viwanda vya kusindika korosho, pamba, n.k. Tunataka viwanda vi-support (vipige jeki) kilimo. Tukiwa na viwanda vingi vikiwamo vya nguo tutaongeza ajira kwa vijana na kuinua uchumi wa wakulima na Watanzania kwa ujumla.
Tatu, ni suala la miundombinu. Kwanza katika hili niseme kwamba Rais Jakaya Kikwete anastahili pongezi kubwa kutokana na juhudi zake kubwa za kuwezesha ujenzi wa barabara nyingi katika kipindi cha uongozi wake. Masuala ya ujenzi wa barabara, reli na bandari yanastahili kuwa endelevu hapa nchini.
Nne, elimu nayo ni lazima. Tunahitaji kupiga hatua zaidi, hasa katika sayansi, maana maendeleo yote ni mazao ya sayansi, hata kilimo ni sayansi. Hili litatusaidia kujiajiri na kumudu ushindani mkubwa uliyopo wa masoko kimataifa, alisema
Majina mengine ya wana CCM wnaotajwa kutaka kuwania urais kupitia chama hicho mwakani ni Frederick Sumaye, Edward Lowassa, January Makamba, Bernard Membe, William Ngeleja na Hamisi Kigwangala ambaye naye amekwishaweka bayana atagombea kama ilivyo kwa January.
Chanzo: Raia Mwema