Hussein Massanza
JF-Expert Member
- Dec 26, 2012
- 1,016
- 2,195
Mbunge wa Kigoma Kusini (NCCR-Mageuzi), David Kafulilla
Dodoma. Ripoti ya uchunguzi katika akaunti ya escrow imeonekana kuipasua kichwa Serikali baada ya wabunge kuibana wakitaka ripoti hiyo iwasilishwe bungeni na kuwekwa wazi.
Hali hiyo ambayo imelifanya Bunge kupanga suala hilo lijadiliwe katika Kamati ya Uongozi, ilizua malumbano bungeni baada ya Mbunge wa Kigoma Kusini (NCCR-Mageuzi), David Kafulila kuomba mwongozo wa Spika.
Kafulila alisema ripoti hiyo ni ya haraka baada ya uchunguzi wa Taasisi ya Kuzuia na Kupambana na Rushwa (Takukuru) na Ofisi ya Mkaguzi Mkuu wa Hesabu za Serikali (CAG) kukamilika.
Baada ya Kafulila kutoa hoja hiyo, Waziri wa Nchi, Ofisi ya Waziri Mkuu (Sera, Uratibu na Bunge), William Lukuvi alisimama na kusema: "Ni kweli Waziri Mkuu alitoa maelekezo kwa Takukuru na CAG kufanya uchunguzi huo na kukabidhi ripoti kwake ili atoe taarifa bungeni."
Lukuvi alisema ukaguzi wa CAG bado unaendelea na utakamilika muda si mrefu kwa kuwa unahusisha mambo mengi.
Alisema itakapokabidhiwa, Waziri Mkuu ataiwasilisha kwa Spika kwa ajili ya utekelezaji. Waziri huyo alisema taarifa hizo mbili hazijakabidhiwa kwa Waziri Mkuu na akadokeza kuwa Takukuru ikimaliza uchunguzi wake inaweza kuchukua hatua yenyewe na taarifa inayosubiriwa na Bunge kwa sasa ni ya CAG.
Majibu hayo ya Lukuvi yalimnyanyua Mbunge wa Kasulu Mjini, Moses Machali akitumia Kanuni ya 68(1) na 64(1)(a) akidai kuwa taarifa inaliyotolewa na Waziri Lukuvi haina ukweli. "Nashangaa waziri anasimama na kusema hapa bungeni kwamba hii hoja si ya haraka wakati kuna matatizo mengi yanayohitaji fedha hapa nchini. Haiwezekani waziri anaongea blah blah hapa," alisema Machali.
Baada ya kauli hiyo, Lukuvi alinyanyuka tena na kusema: "Mimi hapa ndiye ninayetoa maneno ya Serikali hapa ndani, kama mbunge anasema ni blah blah basi anapingana na Serikali, kama nyie mnayo hiyo ripoti ileteni hapa tuijadili."
Mbunge wa Kigoma Mjini, Peter Serukamba naye alisimama na kusema ni lazima Bunge lifanye uamuzi. "Nakubali kuwa bado Serikali inachunguza na inaweza kuendelea kuchunguza kwa muda mrefu tu, lakini kupitia Bunge hili, lazima ifikie mahali sasa tuunde tume kuchunguza hili jambo ili liishe."
Baada ya mvutano huo, Ndugai alisema: "Suala la Kafulila tutalishughulikia kwenye Kamati ya Uongozi kwa kuwa kiti hiki hakina mamlaka."
Chanzo: Gazeti MWANANCHI