MWANETU NENDA SHULENI

[tamu 3]

MWANETU NENDA SHULENI

1.
Wazazi wako zamani, hatukuenda shuleni,
Hapo kale tuamini, likuwa chache nchini,
Tungelisoma jamani, mengi tungeyajueni,
Mwanetu nenda shuleni, unoe wako ubongo.

2.
Wazazi hatukupata, nafasi ya kwenda shule,
Ujuzi tuliopata, sio mwingi huko kale,
Kukosa shule twajuta, ni hasara ya milele,
Mwanetu nenda shuleni, unoe wako ubongo.

3.
Wazazi wako zamani, hatukupata elimu,
Pindi mjarumani, haikupewa muhimu,
Ukishakua zamani, wayaanza majukumu,
Mwanetu nenda shuleni, unoe wako ubongo.

4.
Siku hizi bila shule, mwanetu umepotea,
Hutojua mambo yale, kichwani utasumbua,
Na utaishi kikale, kipishana na dunia,
Mwanetu nenda shuleni, unoe wako ubongo.

5.
Mwanetu nenda shuleni, ung'amue ya dunia,
Kiwa huko darasani, kusomeni zingatia,
Nidhamu weka mbeleni, mavuno kuyafikia,
Mwanetu nenda shuleni, unoe wako ubongo.

6.
Siku hizi bila shule, utaishindwa dunia,
Hautajua mchele, ni wapi umetokea,
Utakuwa msukule, chochote usichojua,
Mwanetu nenda shuleni, unoe wako ubongo.

7.
Si vyote utavipata, ukiwa huko shuleni,
Lakini acha kusita, kuingia darasani,
Jifunze kipimo mita, tatumia maishani,
Mwanetu nenda shuleni, unoe wako ubongo.

8.
Elimu kwako muhimu, mfano wake ni njia,
Usafirishapo ndimu, humo ndimo tapitia,
Hili ni letu jukumu, mwanetu kukuusia,
Mwanetu nenda shuleni, unoe wako ubongo.

9.
Kurusha ndege angani, lazima wende shuleni,
Ujifunze ya angani, huko nako kuna nini,
Ujue dira ya nini, uwendapo Marekani,
Mwanetu nenda shuleni, unoe wako ubongo.

10.
Daktari maridadi, lazima ende shuleni,
Tena some kwa juhudi, kwa kufuata kanuni,
Uuache ukaidi, puuzo la darasani,
Mwanetu nenda shuleni, unoe wako ubongo.

11.
Kwa mwanasheria nguli, hakwepi kwenda shuleni,
Mwanetu tambua hili, uliweke akilini,
Huko tapata akili, mambo kuyapembueni,
Mwanetu nenda shuleni, unoe wako ubongo.

12.
Kiitwa kwenye semina, utoe lolote neno,
Utasema ya maana, yasoleta mgongano,
Hivyo shule kwa kijana, kama ulimi na meno,
Mwanetu nenda shuleni, unoe wako ubongo.

13.
Mazingira ya kisasa, tofauti na zamani,
Mwanetu tunakuasa, sipuuze ya shuleni,
Mbeleni tapata pesa, ujuzi wako kichwani,
Mwanetu nenda shuleni, unoe wako ubongo.

14.
Elimu ni ufunguo, mwanetu hili kariri,
Takupandisha upeo, cheo nguo na muhuri,
Elimu kikaangio, kupikia ni kizuri,
Mwanetu nenda shuleni, unoe wako ubongo.

Denny Jeremias kitumbika
Mtunzi wa mashairi na ngano za Kiafrika
Mufindi Tanzania 1/4/2025

Attachments​

• 

 

[Teknocrat]