UZUSHI Matiti ya mwanamke hudondoka yanapoguswa guswa na viganja vya wanaume

Binadamu kama walivyo wanyama wengine wanaopatikana kwenye Kundi la Mamalia huwa na sifa mbalimbali zinazowatenganisha na viumbe wengine. Baadhi yake ni;

• Kuwa na manyoya
• Kuwa na tezi za jasho
• Huwa na tezi maalum za kuzalisha maziwa, maarufu kama mammary glands
• Huwa na mifupa 3 kwenye sikio la kati
• Uwepo wa eneo la Neocortex kwenye ubongo
• Kuwa na meno yaliyotofautishwa muundo na muonekano
• Moyo wenye vyumba 4 pia chembe nyekundu za damu zisizo na kiini (Nucleus) katikati

Kwa kurejea sifa hizi, mwanamke kama kiumbe kinachonyonyesha huwa na tezi kubwa zaidi za maziwa (Matiti) kuliko wanaume, pia huwa na homoni nyingi zaidi zinazosaidia uzalishwaji wa maziwa kuliko zile alizonazo mwanamme.

Kuanguka baada ya kushikwa na wanaume
JamiiForums imepokea madai haya na kufanyia kazi kwa kuzungumza na wataalam wa afya. Katika uchunguzi wetu, tumebaini mambo yafuatayo;

1. Ukuaji wa matiti ya mwanamke huongozwa na mfumo wa taarifa za urithi (Genes) pamoja na mfumo wa vichocheo vya mwili (Homoni)
2. Hakuna mfumo mmoja wa ukuaji wa matiti unaofanana kwa wasichana wote. Baadhi hukua mapema na baadhi huchelewa
3. Kushikwa matiti na wanaume hakuwezi kusababisha kudondoka (kuanguka) kwa matiti, au hata kuongezeka ukubwa wake.

Ukiondoa Genes na Homoni, mambo mengine kama uzee, kani ya mvutano wa dunia (Gravity), uzito mkubwa, umri wa ukomo wa hedhi, kuzaa watoto wengi, kupoteza sana uzito wa mwili pamoja na uvutaji wa sigara husababisha kudondoka kwa matiti.

Pia, kwa mujibu wa Taasisi ya Nemours Teens Health, kuvaa au kutokuvaa sidiria hakuwezi kusababisha kukua, kudumaa au kudondoka (kuanguka) kwa matiti. Nadharia hizi ni uzushi usio na uhalisia kisayansi.