fexcash
JF-Expert Member
- Jul 30, 2017
- 555
- 1,044
UKOMBOZI WA TANGANYIKA UTAFANYWA NA NANI?
Taifa la Tanganyika linapitia kipindi kigumu kinachohusisha changamoto za ukandamizaji, uporaji wa haki za wananchi na unyonyaji wa rasilimali za taifa. Hoja na maneno mengi yamekuwa yakizungumzwa, lakini bado hakuna hatua madhubuti za kutosha kuhakikisha kuwa serikali inawajibika na wananchi wanaishi katika mazingira ya usalama, haki na uhuru kama Katiba inavyoelekeza.
Nchi imejikuta katika mazingira ya hofu kutokana na madai ya vitendo vya utekaji, ukandamizaji wa mawazo tofauti, kubanwa kwa uhuru wa vyombo vya habari, ubinafsi na upendeleo katika madaraka, ukosefu wa ajira, rushwa na ubadhilifu wa rasilimali za taifa.
Kila Mtanzania mwenye uelewa wa masuala ya kijamii na kisiasa anaweza kuona changamoto hizi. Sasa swali ni: Ni nani atakayemfunga paka kengele? Ni nani atakayesimama na kuchukua hatua za kuleta mabadiliko?
KIZAZI GANI KINABEBEWA LAWAMA?
Kwa mtazamo wangu, kizazi kinachopaswa kubeba sehemu kubwa ya lawama kwa hali ambayo Tanganyika imefikia ni Generation X (waliozaliwa kati ya mwaka 1965–1980) pamoja na Generation Y, maarufu kama Millennials (waliozaliwa kati ya mwaka 1981–1996).
Hivi ni vizazi vilivyopitia kipindi kikubwa cha mabadiliko ya kiteknolojia, kutoka mfumo wa analog kwenda digital, pamoja na kuingia na kukua kwa matumizi ya intaneti. Leo hii, wengi wao wapo katika ngazi mbalimbali za uongozi na maamuzi nchini.
Pamoja na kuwa na uelewa mkubwa wa mambo mengi, kwa mtazamo wangu, sehemu kubwa ya kizazi hiki imekosa ujasiri wa kutosha wa kusimamia misingi ya haki na uwajibikaji. Wapo ambao wanapopata nafasi au manufaa madogo kutoka kwenye mfumo, husahau wajibu wao kwa jamii na kugeuka kuwa watetezi wa mfumo huo, hata pale unapokosolewa.
Ni kizazi kinachoshuhudia changamoto za taifa, lakini mara nyingi kinashindwa kuchukua hatua zinazolingana na nafasi na uwezo wake. Baadhi wameingia kwenye mfumo wa ajira na uongozi bila ushindani wa haki, huku wengine wakibaki kuwa wapiganaji wa mitandaoni (keyboard warriors) bila kugeuza hoja zao kuwa hatua za uwajibikaji na mabadiliko.
Aidha, baadhi wameathiriwa na mazingira ya kisiasa ya muda mrefu, ikiwemo utamaduni wa kuhalalisha kila jambo kwa kauli ya kwamba Tanzania ni nchi ya amani, hata pale ambapo kuna masuala yanayohitaji kuhojiwa na kurekebishwa.
MATARAJIO: KIZAZI CHA UKOMBOZI
Matarajio yangu yapo kwa Generation Z pamoja na Generation Alpha. Hivi ndivyo vizazi ninavyoviona kuwa na nafasi kubwa ya kuleta fikra mpya, kuhoji mifumo iliyopo na kusukuma mabadiliko ya kijamii, kiuchumi na kisiasa.
Kizazi hiki kinapaswa kujifunza kutokana na makosa ya vilivyotangulia. Kipaswe kuwa na ujasiri, uzalendo, uadilifu na uwezo wa kutetea haki bila kuyumbishwa na maslahi binafsi.
Hata hivyo, ukombozi wa kweli hauwezi kutegemea kizazi kimoja pekee. Unahitaji mshikamano wa Watanzania wote, uwajibikaji, uongozi bora, kuheshimu Katiba na kudai haki kwa njia za amani na za kisheria.
Ninaamini Generation Z na Generation Alpha wanaweza kuwa sehemu muhimu ya safari hiyo ya mabadiliko.
Generation X na Millennials: kizazi cha maamuzi na uwajibikaji.
Generation Z na Alpha: kizazi cha mabadiliko na matumaini.
Generation Beta: kizazi cha matokeo ya misingi tutakayoiweka leo.
Swali linabaki pale pale: Je, tutakuwa tayari kubadilisha historia au tutaendelea kuwa watazamaji wa mustakabali wa taifa letu?
Jumapili Njema!
