Uhakiki wa Taarifa hudumisha uwazi, kujenga imani kwa jamii, kukomesha upotoshaji pia kuwepo kwa taarifa sahihi katika jamii itaifanya jamii iweze kufanya maamuzi sahihi kwenye jambo sahihi.
Kuchochea uwajibikaji- Uhakiki wa taarifa utachochea makundi mengi kuwajibika kwani watakosa fursa ya kusambaza taarifa potofu kwa manufaa yao.
Mfano, wanasiasa husambaza taarifa au kutoa ahadi nyingi za kweli na za uongo ili kuwaaminisha watu wao ni sahihi kuchukua wadhfa wanaokuwa wanagombea na baada ya kupata nyadhfa huendelea kusambaza taarifa ili aidha kuwapumbaza wananchi juu ya mabaya yao au kupalilia nafasi zao.
Kwa kuhakiki taarifa jamii itaweza kuwawajibisha pale watakapokuwa wanaweza kubaini kuwa taarifa fulani si kweli au kweli.
Kuhakikisha kuwa taarifa zinazotolewa na vyanzo mbalimbali zinakuwa za kweli na sahihi katika kuimarisha uwazi katika jamii na kuhakikisha uwajibikaji wa watu au taasisi zinazotoa taarifa hizo.
Pia uwajibikaji kwa jamii yenyewe kwa kuwa wasambaza taarifa potofu watakosa wafuasi kwa kuwa jamii itazihakiki taarifa zao.
Si tu kuchochea uwajibikaji bali pia Uhakiki wa taarifa una faida nyingine nyingi sana kama-
Kuelimisha Umma- Kuhakiki ukweli sio tu kusahihisha habari za uongo bali huelimisha umma kuhusu jinsi ya kutathmini habari na kuwa wabunifu katika kutambua vyanzo sahihi vya habari.
Kuimarisha Ufanisi wa Mawasiliano- Kwa kuhakiki na kuthibitisha taarifa, mawasiliano yanakuwa ya ufanisi zaidi, kuepuka mgongano wa taarifa na kusaidia kueleweka kwa ufasaha zaidi.
Kuhamasisha Mijadala yenye Tija- Ukiwa na taarifa sahihi itakusaidia kuchangia na kuanzisha mjadala sahihi na wenye taarifa za kweli, huchochea majadiliano yenye tija na yanayotoa suluhisho sahihi kwa masuala mbalimbali.
Uwezo wa Kufanya Maamuzi Sahihi- Taarifa potofu hupelekea maamuzi potofu lakini uwepo wa uhakiki wa taarifa husaidia watu kufanya maamuzi ya busara na yenye msingi sahihi katika kuendeleza jamii yenye uwezo wa kufanya maamuzi sahihi.
Kuzuia Usambazaji wa Habari Potofu- usambazaji wa habari potofu au za uongo huzuiwa au punguzwa na kuhakiki habari kwani wasambazaji wakiona wanabainika hawatakuwa na namna zaidi ya kuacha.
Kuhakikisha Uwazi na Ukweli- Uhakiki wa taarifa unaweka msisitizo kwenye ukweli na usahihi wa habari zinazosambazwa ili kujenga jamii yenye taarifa sahihi.
Kupunguza Ubaguzi- Taarifa potofu huchochea ubaguzi kwa kueneza simulizi za kuidumaza jamii fulani na kuihuisha nyingine kwa taarifa za uongo kuchunguza ukweli kunaweza kupunguza hili kwa kuwasilisha maoni yenye uhalisia na sahihi ya jamii husika.
