Hadithi ya kusisimua: Nilitafuna maiti ya mwanangu

[Herbalist Dr MziziMkavu]

NILIRUDI
nyumbani na kumkuta mke wangu akiwa vilevile. Alikuwa amejilaza kitandani akiugulia maumivu ya tumbo. Nikaketi kitandani na kumsogeza karibu yangu. Nikamlaza miguuni mwangu.

“Vipi Rita, unaendeleaje sasa?” nikamwuliza.
Hakujibu!

Alijipapasa tumbo huku akikunja uso. Nilijua alichomaanisha. Rita bado alikuwa anaumwa tumbo. Sikuwa na fedha za kumpeleka hospitalini. Nilibaki nimejiinamia kwa mawazo. Huku nimemshika Rita wangu, huku nimeshika tama!

Kwa tabu Rita alifumbua macho na kuniangalia. Aliniona nikiwa nimeshika tama kuonesha kwamba nilikuwa kwenye lindi la mawazo.
“Vipi na wewe huko umefanikiwa?” aliniuliza Rita kwa sauti chovu, kavu iliyotoka kwa kukatakata.
“Hakuna kitu Rita. Pamoja na kuwahi kote huko, sijafanikiwa kupata kibarua.”
“Kwa nini?”

“Watu walikuwa wengi sana, tena waliwahi zaidi yangu. Lakini ujenzi bado unaendelea, kesho nitajaribu tena naweza kubahatisha.”

Nilizungumza kwa uchungu mwingi. Nikijikaza kiume, machozi nikayabana ndani ya kuta za macho yangu, sikutaka yatoke Rita ayaone!
Mwanaume mzima!
Aibu!Haifai mwanaume kulia hovyo!

Ndivyo nilivyoamini, hata baba yangu aliniambia hivyo, kwamba wanaume wanatakiwa kujikaza. Mara chache sana nilipojisikia hasira ya kulia, nilifanya hivyo nikiwa na mbali na uso wa mke wangu.

Sikuwa tayari mke wangu ayaone machozi yangu, najua ningemuumiza zaidi, jambo ambalo sikuwa tayari kabisa kuliruhusu litokee.

“Lakini Galos, maisha haya ni mpaka lini? Tutakuwa wenye shida hivi hadi lini? Natamani hata kufa kuliko kuendelea na maisha haya ya dhiki na tabu kiasi hiki,” akasema Rita akimwaga machozi.

“Acha kumkufuru Mungu mke wangu. Mapambano bado yanaendelea. Tutafanikiwa siku moja,” nilimwambia maneno ya kumpa matumaini.
Taswira ya maisha yetu ilikuwa ngumu kufanikiwa. Tufanikiwe kwa lipi hasa? Nimezaliwa familia ya kimaskini, mbaya zaidi sina ujuzi wala elimu yoyote. Kikubwa ninachojua ni kubeba zege kwenye ujenzi wa majengo makubwa.

Ndiyo kazi iliyoniweka mjini na mke wangu Rita. Leo kazi inapatikana, kesho hakuna. Ni tabu mtindo mmoja. Pamoja na yote hayo, niliendelea kumwambia Rita avumilie, siku moja tutafanikiwa.
Kichwani nilijua ni ndoto!

Rita aliniangalia kwa jicho la kuhoji, kwa kiasi kikubwa alionekana wazi kutokubaliana na maneno yangu kabisa. Alijua ni kwa namna gani nilikuwa naongea maneno ya kumfariji tu.
Ni kweli!
Nilimfariji tu!

Nilimtazama Rita machoni, nikaachana naye. Nikaanza kukagua vizuri chumba chetu. Kilikuwa kimoja tu...tena hakina umeme! Tuna kitanda tu ndani, zaidi ni jiko la mafuta na ndoo za maji.

Nikahema kwa kasi, halafu nikaliendelea lile jiko pale chini, nikalifungua na kuangalia kama lilikuwa na mafuta ya taa!
Hakuna kitu.

Sufuria zote zilikuwa kama nilivyoziacha. Jiko lilikuwa limenuna! Hapakuwa na matumaini ya kupika siku hiyo.
“Rita,” nikamuita mke wangu.
“Abee Galos.”
“Unajiasikiaje sasa?”
“Bado naumwa...hasa hapa,” akasema akinionesha tumboni, chini ya kitovu.
“Pole sana mke wangu,” nikamwambia halafu nikatulia kidogo.
Kisha nikamwuliza tena: “Hivi umefanikiwa kula?”
“Hapana!”
“Mungu wangu....” nikatamka kwa sauti kubwa.

Nilichanganyikiwa kwa sababu kubwa mbili; Rita wangu alikuwa anaumwa, lakini mbaya zaidi hata chakula alikuwa hajapata! Atapona vipi?
Bila dawa!

Bila chakula! “Kwa nini mimi?” nikasema kwa sauti kubwa bila kugundua kwamba nilizidi kumuumiza Rita.
Akaanza kulia.

Nilikuwa nimefanya kosa kubwa sana, haraka nikaanza kumbembeleza Rita asizidi kulia.
“Tafadhali nyamaza mke wangu, haya mambo yataisha tu. Mungu mkubwa,” nikamwambia.
“Yataisha lini? Kila siku matatizo tu, sidhani kama kuna mwisho hapa, zaidi ya mateso kila

kukicha!” alisema kwa uchungu, akanizidishia maumivu moyoni mwangu.
Nilitulia kwa muda nikiendelea kutafakari, lakini sikupata jibu la maana. Tatizo ilikuwa ni pesa. Nikamkumbuka rafiki yangu ambaye huwa ananisaidia ninapokuwa na shida. Nikainuka pale kitandani.
“Narudi baada ya muda kidogo.”
“Unakwenda wapi?”
“Ngoja nikatafute maarifa.”
“Sawa.”

Nikatoka nyumbani na kwenda kwa rafiki yangu Patrick ambaye alikuwa fundi baiskeli. Niliamini yeye angeweza kunisaidia. Kwa bahati nzuri nilimkuta kijiweni kwake. Nikamvuta pembeni.

“Kaka nina matatizo sana, mke wangu anaumwa sana, sina pesa hata ya kula. Nimekwenda kibaruani wiki sasa nakosa nafasi.”
“Pole sana ndugu yangu.”

“Kilinichonileta kwako, naomba unisaidie shilingi elfu kumi ili niweze kumpeleka mke wangu hospitali, ndani ya wiki hii nitajitahidi nikurudishie!”
Patrick alitulia kwa muda akifikiria, hakujibu kitu. Aliondoka na kuniacha nimesimama palepale.

Niliduwaa nisijue la kufanya. Dakika ya kwanza iliondoka bila Patrick kurejea, hatimaye ya pili na sasa ilikatika robo saa nzima!
“Si yule pale,” nikasikia sauti ya kijana wa kiume akitamka, nikageuka kumwangalia...
“Ndiyo ni yeye,” mwingine akadakia.
Walikuwa wanaume wawili wa shoka, waliojazia sawasawa. Wakashuka garini kwa pamoja, wakaanza kunifuata huku nyuso zao zikionekana dhahiri walinifuata kwa shari!

Je, nini kitaendelea? Usikose kufuatilia kwa makini (Like) Zenu tena hapo.

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI2


ILIPOISHIA...
Wakashuka garini kwa pamoja, wakaanza kunifuata huku nyuso zao zikionekana dhahiri walinifuata kwa shari!
SASA ENDELEA...

NILIJARIBU kuvuta kumbukumbu zangu vizuri kuona kama ningeweza kuwakumbuka wale vijana, zikagoma. Hakuna mtu niliyemfahamu kati yao. Kilichonishangaza ni namna walivyokuwa wakinifuata.
Walionekana wazi kuwa wanamfuata mtu wanayemjua kwa uhakika kabisa. Walikuwa wananifuata mimi.

Kilichonitisha ni ile hali ya kuja wakiwa wanaonekana wana uhakika kuwa mimi mtu wanayemfuata.
Nilitaka kukimbia lakini sikujua ni kwa nini miguu ilishiiwa nguvu. Nikiwa bado nawashangaa, Patrick alitokea akiwa ameshika shilingi elfu kumi mkononi. Ni ile niliyomuomba.

Kabla hajanifikia, tayari wale vijana wawili walishafika, wakasimama mbele yangu. Nyuso zao zilitangaza vita. Zilikuwa zimekunjamana wakionekana dhahiri kama wamekuja kulipiza kisasi.
Sijui nini kilitokea, lakini ghafla nikashangaa Patrick akirudi nyuma kwa hofu, tayari wale jamaa walikuwa wameshanifikia kabisa. Walikuwa wamesimama mbele yangu.
"Galos!" mmoja wa vijana wale akaita.
"Ndiyo, vipi?"
"Achana na mambo ya vipi."
"Mnasemaje?" niliuliza nikiwa nimejawa hofu.
"Tunasemaje?" mwingine akadakia.

"Mbona siwaelewi, ninyi ni akina nani na mnataka nini kwangu?" nikawauliza tena.
"Dar es Salaam ni ndogo sana. Huwezi kujificha milele, sasa tumekukamata. Songa kule..." akasema mmoja wao.
Sikujua ilivyokuwa, ni kama niliduwazwa hivi, nikajikuta natembea mwenyewe kuelekea kwenye gari. Mmoja wao alinifungulia mlango, ulikuwa wa kiti cha nyuma.

Nilipokaa tu, nikagundua kuwa kwenye gari kulikuwa na mtu mwingine amekaa mwishoni, mimi nikakaa katikati kisha yule mmoja wa wale niliokuwa nao nje, akaketi dirishani, mwingine akaenda kwenye kiti cha dereva.
Gari likaondolewa.
***

Niseme ule ukweli kutoka moyoni mwangu, akili hazikuwa zangu kwa muda. Nilihisi kupumbazwa, baadaye nikaona kiza kidogo, kisha nikahisi usingizi mzito sana.
Nikalala.

Sina hakika kama nililala au nilipoteza fahamu, lakini fahamu kuwa, sikuwa na mawasiliano tena na watu wale kwa muda.
Sikujua chochote kilichoendelea!
***

Nilihisi baridi kali sana, kwa mbali nikasikia muungurumo wa maji yalipiga kwa kasi. Ni kama vile nilikuwa nimesimama ufukweni mwa ziwa au bahari. Sikuwa na hakika ni wapi hasa kati ya sehemu hizo.

Macho yangu yalikuwa mazito kufumbuka. Nilijitahidi sana kuyafumbua lakini ilishindikana. Ghafla maji ya baridi yakamwagwa mwilini mwangu. Nilishtuka kwa kasi na kufumbua macho.
Nikasimama.

Nilikutana na kitu cha ajabu sana. Mtu mmoja, mrefu, mweusi, mwenye ndevu nyingi alikuwa amekaa kwenye kiti cha mbao mbele yangu. Nyuma yake kulikuwa na wasichana waliokuwa wameshika vifaa maalum vilivyotengenezwa kwa ngozi, wakimpepea!

Pembeni yangu kulikuwa na wale vijana wawili walionichukua mtaani kwangu Tandale. Wakaniangalia mara moja, kisha wakarudisha macho yao kwa yule mzee.
Kwa mara moja, wote wakaainamisha vichwa vyao na kuvirudisha juu!
"Mkuu, tumekamilisha kazi uliyotuagiza!" wakasema wote kwa wakati mmoja.
Yule mzee akatingisha kichwa.
"Mango!" yule mzee akaita.
Kijana mmoja wao, akaitikia kwa sauti: "Naam! Mkuu."

"Kushoto..." akasema, mara moja huyo jamaa ambaye sasa niligundua kuwa anaitwa Mango, akasogea mkono wangu wa kushoto, akanishika bega.
"Ngoma!" akasema tena, yule kijana mwingine akaitikia:
"Mkuu."
"Kulia."

Naye akasogea kulia kwangu na kusimama kisha akaniwekea mkono begani. Kusema ule ukweli, sijawahi kuhisi woga kama niliopata siku hiyo. Niliogopa kuliko kawaida. Mpaka muda ule, sikuwa ninajua nilikuwa wapi na nilifanya kosa gani. Nilibaki nimesimama nikiwa sijui la kufanya.
"Galos," yule mzee akaita.
"Ndiyo mzee."
"Najua hujui hapa ni wapi."
"Ni kweli sijui."
"Hapa ni pembeni mwa Kata ya Sandulula, Wilaya ya Sumbawanga Vijijini, Mkoa wa Rukwa."
"Nimefikaje? Kwa nini nipo hapa na mmenileta kufanya nini?"
"Unamfahamu Matima Mtimandole?"
"Ni baba yangu mzazi, kwa sasa ni marehemu."
"Yeye ndiye sababu ya wewe kuwa hapa. Unafahamu alichotufanyia?"
"Sijui, lakini ninyi ni akina nani?"

"Hayo utayajua baadaye, lakini unatakiwa kufahamu kitu kimoja, mkeo hawezi kuzaa mtoto akabaki salama katika maisha yake yote. Tutaendelea kuharibu mimba zake kila siku.
"Najua sasa hivi ana mimba nyingine. Kwa taarifa yako, pia imeshaharibika. Mkakati wa mwisho uliokuwa

umebaki ulikuwa ni kumuua kabisa mkeo, kukuua na wewe ili kizazi chenu kipotelee mbali.
"Tulikuwa na uwezo wa kufanya hivyo muda mrefu kabla, hata sasa tunaweza kufanya hivyo, ndiyo maana umeona umetoka Dar es Salaam hadi Rukwa kwa nusu saa tu. Hujui umefika wala usafiri uliotumia.

"Makosa ya baba yako, ndiyo unayotakiwa kuyatumikia wewe. Adhabu tumeshaipitisha – ni kifo. Tutaanza na mkeo, halafu wewe. Hakuna mtu yeyote atayejua tukio hilo," alisema mfululizo kwa sauti huku sauti yake ikiunguruma.
"Mango..." akaita.
"Ndiyo mkuu."
"Peleka eneo la tukio!"

Nihisi mwili ukiniisha nguvu! Mango na Ngoma wakanishika juujuu, kisha wakaanza kutembea kunipeleka nisipopajua!

Je, nini kitatokea? Usikose Kesho....

 

[Dengue]

Nini kitokea?

 

[kidaganda]

Duh hizo picha sasa Mkuu

 

[Dengue]

Duh hizo picha sasa Mkuu

Hii ni hadithi, picha za wazungu tukio la mkoa wa Rukwa

 

[mamsapkhan]

Asante kwa burdan ile ya mke jin bas itupie

 

[WABALLA Inc]

iko 😛oa

 

[Herbalist Dr MziziMkavu]

HADITHI MPYA YA KUSISIMUWA:NILITAFUNA MAITI YA MWANANGU NIWE TAJIRI-3


ILIPOISHIA...
“Mango...” akaita.
“Ndiyo Mkuu.”
“Peleka eneo la tukio!”
Nihisi mwili ukiniisha nguvu! Mango na Ngoma wakanishika juujuu, kisha wakaanza kutembea kunipeleka nisipopajua!
SASA ENDELEA...

HAIKUWA safari ndefu sana. Tuliishia kwenye chumba kimoja kidogo chenye giza kali sana. Nikabwagwa chini kama mzigo. Moyoni nilikuwa na maumivu makali, sikujua sababu ya kupewa mateso yale.

Walivyonitupa pale chini, kama walioambiana waliondoka kwa pamoja na kuniacha peke yangu nikiugulia maumivu makali. Ghafla nilihisi wadudu wakianza kunitembelea mwilini mwangu.
Walikuwa wadudu ambao niligundua haraka kuwa walikuwa siafu.

Waliniuma kwa kasi mwilini mwangu, siafu wale hawakuwa na huruma hata kidogo. Nilihisi mwili ukivimba. Nilipiga kelele lakini hakuna aliyetokea kunipa msaada wowote.
Baada ya muda kama robo saa hivi, mlango ulifunguliwa, mwanga hafifu ukaonekana. Mara baada ya mlango kufunguliwa, wale siafu wote waliondoka mwilini mwangu.
Kuna mtu mmoja aliingia peke yake, sikumjua ni nani.

“Galos,” mtu huyo aliita.
Sauti yake ilinifanya nimjue kuwa ni yule mzee aliyewaagiza akina Ngoma na Mango walipeleke kwenye kile chumba.
“Naam!”
“Unajisikiaje?”
“Naumia sana mzee. Kwa nini mnanitesa kiasi hiki?”
“Hujui?”
“Sijui kitu.”

“Nilikuuliza swali mara ya kwanza, kuwa unamfahamu Matima Mtimandole ukasema ndiyo, si ni sawa?”
“Ni kweli.”
“Hebu ngoja tupate mwanga kidogo, fumba macho yako haraka.”
Nikafumba.
“Haya fumbua.”
Nikafumbua.

Nilishangaa sana kukuta nipo kwenye chumba kingine kizuri tofauti na kile cha awali, hapakuwa na siafu tena wala chochote kibaya. Kifupi kilikuwa chumba kizuri kama cha kawaida cha kuishi watu.
“Hiki ni chumba changu cha mazungumzo na wageni. Huwa nawaingiza watu ninaowaheshimu tu, hivyo nawe nimekupa hii heshima, lakini ukinitibua utajuta,” akasema akinikazia macho.

Kilikuwa chumba kilichotandazwa zulia zuri jekundu la manyoya ya kuteleza. Chini kulikuwa na mito mbalimbali. Nikajiegemeza kwenye mto mmoja, nikiangalia uvimbe niliokuwa nao mwilini kutokana na kuumwa na wale siafu.

Ghafla nikiwa nimezubaa, aliingia msichana mmoja akiwa amebeba chano kilichokuwa na glasi mbili za juisi, akaweka moja mbele yangu kisha akapeleka nyingine kwa yule mzee.
“Karibuni kinywaji!” akasema yule msichana mrembo akitabasamu.
“Ahsante,” yule mzee akaitika.

Mimi nilibaki kimya, moyoni nilikuwa na woga wa hali ya juu. Yule mzee akachukua glasi yake na kuipeleka kinywani mwake. Akapiga funda moja kubwa kisha akairudisha glasi chini, akaniangalia.
“Kunywa!” alisema kwa kuamrisha.

Nikainua glasi na kuipeleka kinywani, nikanywa. Dah! Ilikuwa juisi yenye ladha tamu kuliko kawaida. Sikukumbuka ni lini au wapi nilipata kunywa juisi yenye ladha tamu kama ile.
Nikarudisha glasi chini huku nikijitahidi kuachia tabasamu la kulazimisha.

“Naitwa Mukulungu – Mkuu wa Wachawi. Walio chini yangu wamezoea kuniita Mkuu, nawe pia unatakiwa kuniita hivyo,” akasema.
Nikatingisha kichwa kukubaliana naye.
“Nataka kukusaidia.”
“Nitashukuru.”

“Kwanza nataka kukujulisha sababu ya wewe kuwa hapa. Marehemu baba yako Matima Mtimandole, alikuwa mwanachama wetu. Tulifanya naye kazi vizuri lakini mwisho alianza kuharibu masharti yetu.

“Nadhani unakumbuka kuwa mmefiwa mfululizo na ndugu zenu. Utakumbuka kuwa, baba yako ndiyo amekuwa wa mwisho kufariki na mara baada ya kufariki, utajiri wote ukapukutika.
“Ni sisi ndiyo tulifanya hivyo kwa sababu ya ubishi na ujuaji wa baba yako. Wewe umepata nafuu kwa sababu ni mtoto wa mwisho, ndiyo maana tukaamua kuchukua watoto wako.

“Mkeo anaweza kupata mimba na akajifungua kama haitakuwa ya kwako. Tunachotaka sisi ni kizazi chako chote. Tunataka ubaki peke yako kwenye mateso makali, ndiyo lengo letu,” alisema mfululizo akiniangalia.
Nilipigwa na butwaa.

Nilimkumbuka baba yangu, mama yangu na ndugu zangu waliofariki. Moyo wangu uliumia sana, maana nilibaki peke yangu kama jicho.
“Sitaki kukuambia maneno mengi, ila unatakiwa kujua kuwa, tunataka kukusaidia – tupo tayari kurudisha utajiri wa baba yako mikononi mwako,” akasema.
Sikujibu kitu.
“Unanielewa?” akauliza.
“Sijakuelewa vizuri.”
“Unataka kuendelea kuishi masikini?”
“Hapana.”
“Unataka mimba za mkeo ziendelee kuharibika?”
“Hapana.”
“Sasa kama ndivyo unatakiwa kuwa tayari kwa maelekezo yetu.”
“Maelekezo gani?”

“Unatakiwa kujiunga nasi, uwe kama alivyokuwa marehemu baba yako lakini lazima uwe makini na usivunje masharti yetu.”
“Ni nini?”
“Unatakiwa uingie kwenye chama chetu cha wachawi.”
“Mh!” niliguna.
“Paaaaaaa!” kitu kizito kilitua mgongoni mwangu.

“Pumbavu! Unadhani kuna kubembelezana hapa? Kwa nini unataka kutuzungusha? Au unataka kufa? Sawa...tutajua cha kufanya. Toweka!” Mkuu alisema kwa sauti ya ukali, yenye muungurumo mkali.
Nikapoteza fahamu.
***

Nilijikuta nipo nje ya chumba changu, mlangoni tena nikiwa nimeshika kitasa cha mlango wa chumba chetu. Bila kuelewa ilivyokuwa, nikajikuta nimefungua mlango. Nikaingia na kukutana na kitu cha ajabu sana. Damu zilikuwa zimetapakaa chumba kizima! Rita mke wangu kipenzi, alikuwa akigaragara kitandani!
Nikashtuka sana!

Itaendelea tena.............

 

[Herbalist Dr MziziMkavu]

HADITHI MPYA YA KUSISIMUWA:NILITAFUNA MAITI YA MWANANGU NIWE TAJIRI-4

ILIPOISHIA...
Damu zilikuwa zimetapakaa chumba kizima! Rita mke wangu kipenzi, alikuwa akigaragara kitandani!
Nikashtuka sana!
SASA ENDELEA...

NILIKODOA macho pale kitandani nikiwa siamini kabisa nilichokuwa nakiona. Ni kweli Rita alikuwa amelala pale kitandani akionekana mchovu sana. Hana nguvu.
Damu ndiyo zilinitisha zaidi, kitanda kizima kilikuwa chapachapa, achana na kitandani, damu nyingine ilikuwa inachuruzika chini. Nilihisi kizunguzungu.
“Rita...” niliita kwa sauti nikisogea kitandani kwa hadhari sana.
Hakuitika.
“Rita...” nikaita tena.
Bado hakuitika.

Moyo wangu ukapigwa na butwaa, nilihisi ganzi ikiushika moyo wangu. Nikasogea taratibu na kumtingisha, hakugeuka. Nikaamua kumgeuza mwenyewe.
Hapo ndipo niliposhuhudia macho yake yakifumbuka kwa mbali, akinitazama kwa huruma. Nilijaribu

kumuita lakini hakuitika. Alionekana kutaka kuzungumza lakini ulimi wake ulikuwa mzito sana.
Nilishaanza kuhisi kilichotokea.
“Jikaze mke wangu, hebu niambie unajisikiaje?” nikamwuliza.
“Nakufa Galos, nakufa baba.”
“Hufi mpenzi wangu, hutakufa niamini mimi.”
“Kila mtu atakufa Galos, lakini muda wangu wa kufa umefika.”
“Najua kila mtu atakufa, najua hata wewe utakufa, lakini namaanisha kwa sasa hutakufa mpenzi wangu. Utakufa siku uliyopangiwa na Mungu itakapofika, siyo katika tatizo hili,” nikamwambia.
“Mimba imeharibika tena,” akasema.
“Najua mpenzi, pole sana.”

“Lakini Galos kwa nini inakuwa hivi? Kwa nini nakuwa kama vile nimetoa mimba? Sijawahi kufanya hivyo na wala sitafanya hivyo, kwa nini tumbo liniume sana halafu baadaye damu ziwe kama hivi?
“Hali itaendelea hivi hadi lini? Lazima tutafute ufumbuzi wa hili jambo, hatuwezi kuacha mambo yakawa hivi kila siku,” akasema mke wangu.

“Narudia tena kukuambia mama, niachie mimi. Hebu kwanza tuyaache yote, ngoja tujitayarishe twende hospitali,” nikamwambia.
“Hospitali?” akang’aka.
“Ndiyo, twende hospitali, kwani hujanisikia.”
“Siendi.”
“Kwa nini?”

“Kwani kuna nini cha maana ninachokifuata huko? Mara zote nilizokwenda walinisaidia nini? Hakuna cha maana kabisa. Acha tu nipumzike. Chemsha maji unikande.”
“Hapana, unahitajika kwenda hospitali mke wangu Rita, kwani hujionei huruma?”
“Najionea huruma sana, nataka kwenda hospitali sana lakini kwanza una pesa?” Swali lake likaninyong’onyesha moyo wangu.

Aliuliza swali la msingi sana ambalo kiukweli lilijaa ukweli mtupu. Sikuwa na fedha, hivyo kama nilitaka kweli kumpeleka hospitalini nilitakiwa kuwa na fedha.
“Sina mke wangu lakini nitapata tu,” nikamwambia mke wangu.
“Utapataje?”
“Najua mwenyewe.”
“Galos mume wangu, unanisikiliza lakini?”
“Nakusikiliza mama.”

“Nisaidie tu kubandika maji jikoni kisha unikande, nitapata nguvu,” akasema kwa sauti iliyojaa uchovu, akionekana kutokuwa na matumaini kabisa.
“Jiko lina mafuta?” nikamwuliza.
“Ndiyo...mafuta yapo kidogo, kwa kuchemsha maji tu, yanatosha sana.”
“Sawa.”

Haraka sana nikawasha jiko la mafuta, maarufu kama jiko la Mchina, nikamimina maji kwenye sufuria kisha nikabandika juu yake. Baada ya hapo, nikamgeuza mke wangu upande na kutoa lile shuka lenye damu.

Nikakusanya sehemu moja, kisha nikadeki zile damu pale chini. Baada ya kuwa pasafi kabisa, maji nayo yalikuwa yameshachemka kabisa. Nikayaepua na kumimina kwenye ndoo ya plastiki.
Nikachukua na mengine ya baridi kidogo, nikayachanganya ili kupunguza ule ukali. Nikamsaidia mke wangu kuteremka pale kitandani, nikamfunga kanga mbili, moja kiunoni na nyingine kifuani.

Tukaongozana hadi bafuni, nikamkanda vizuri kisha nikamwogesha.
Akajisikia nafuu kidogo. Nikamrudisha chumbani. Ilibidi nitandike kitanda kwanza ndipo apande. Nikampaka mafuta kisha nikamfunika na shuka, akapumzika.
“Unajisikiaje sasa?” nikamwuliza.
“Nguvu kidogo lakini njaa.”
“Usijali mke wangu, nisubiri.”

Nikatoka mbio kwenda kwa rafiki yangu Patrick. Bahati nzuri nilimkuta.
“Vipi Galos,” akaniuliza.
“Poa..”
“Vipi? Mbona sikuelewi? Wale waliokuchukua ni akina nani na kwa nini ilikuwa vile?” akaniuliza akionekana kuwa na hofu.
“Ilikuwaje?”

“Wakati mimi nakuletea pesa uliyosema, nilishangaa kuwaona wale watu wakitaka kukuchukua mkukumkuku, nikajikuta narudi nyuma kiajabuajabu.”
“Kivipi yaani,” nikamwuliza.

“Nilishangaa nakosa nguvu ya kukufuata, kifupi nilijikuta narudi nyuma bila ridhaa yangu, lengo lilikuwa kuja kukusaidia lakini sijui nini kilitokea nini, kifupi nahisi kama ni nguvu za kishirikina.
“Kwani wale ni akina nani na ilikuwaje wakakuchukua? Halafu walikupeleka wapi? Unajua sielewi kabisa,” akasema Patrick mfululizo kiasi cha kunifanya nishindwe kumjibu kwa haraka.

“Kaka hebu tuachane na hayo kwanza, nimejia ile pesa kaka, bado nina matatizo makubwa sana ndugu yangu.”
“Sawa lakini ilikuwaje?”

“Kaka afya ya mke wangu kwa sasa ndiyo muhimu kuliko kitu kingine chochote, tafadhali nisaidie kwanza hiyo pesa niende nikamsaidie halafu mengine yatafuata baadaye,” nikamwambia.
Patrick hakuzungumza kitu tena, alinikazia macho kwa sekunde kadhaa kisha akaingiza mkono mfukoni na kutoa noti moja ya shilingi 10,000, akanikabidhi.
“Ahsante sana.”
“Usijali kaka.”

Nilitoka mbio hadi dukani, nikanunua unga wa sembe nusu kilo, kisha nikapitia kwa Mama Nishe, nikanunua chakula. Ilikuwa ni wali na samaki, nikawekewa kwenye mfuko mdogo wa Rambo.

Nilipofika nyumbani, kwanza nikampikia mke wangu uji na kumsihi anywe, akajitahidi kunywa. Alipotosheka akarudi tena kulala.

Nikatoa kile chakula kwenye mfuko wa nailoni na kuweka kwenye sahani, nami nikaanza kula. Nikiwa katikati ya mlo wangu, mawazo yakaanza kunisonga tena kuhusu kule Rukwa waliponipeleka wale akina Mango na Ngoma.

Nikaanza kuwaza kuhusu marehemu baba yangu, mzee Matima Mtimandole. Niliumiza sana kichwa, lakini sikupata kiungio mahali popote kuwa baba yangu alikuwa mchawi.
“Yaani baba alikuwa mchawi? Kweli? Haiwezekani...” nikajisemea mwenyewe moyoni mwangu.
“Inawezekana sana na wewe unatakiwa kulipa deni letu. Nimeshakuambia acha kiburi. Labda

nikuambie, tayari usajili unaendelea. Ile juisi tuliyokunywa , haikuwa ya matunda kama ulivyodhani.
“Ile ni juisi ya damu, tena damu mbichi kabisa. Damu iliyotoka kwenye mimba ya mkeo tuliyoiharibu. Leo jioni tunakuhitaji makao makuu haraka,” sauti hii iliyojaa muungurumo mkali niliisikia.

Itaendelea

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI-5

ILIPOISHIA...
Sikupata shida kugundua kuwa alikuwa ni mzee Mukulungu ambaye kule huitwa Mkuu. Nilibaki natetemeka, nisijue cha kufanya. Kwa kweli niliogopa sana!
SASA ENDELEA...

MAPIGO ya moyo wangu yalibadilika kabisa, yalikwenda kwa kasi kuliko kawaida. Niliangalia huku na huko, sikuona kitu. Nilibaki kama niliyepumbaa kwa muda ambao sikuujua.
Nilitetemeka sana!
“Nakuuliza, umenielewa?”
“Sijaelewa. Kifupi sikuelewi? Kwa nini msiniache na maisha yangu?”
“Hatuwezi kukuacha wakati kuna deni la baba yako. Hilo ndilo linalokutesa, vinginevyo tungekuacha huru.”
Nikazidi kuchanganyikiwa, kila aliponiambia kuhusu baba yangu, akili yangu ilizubaa. Baba yangu anaingiliana vipi na mimi? Labda ni kweli alikuwa mchawi, maana sikuwahi kuona kiashiria chochote kutoka kwa mzee wangu, ambacho kilimkaribisha na mazingira ya uchawi.

Hata kama ikiwa kweli, kwa nini mimi niingizwe kwenye mambo yao? Kwenye mikataba ambayo siifahamu na sijui makubaliano yao? Kwa nini?
Kwa hakika nilichanganyikiwa sana!

Nilitamani kuepukana na mkasa ule, lakini sikuwa na uwezo. Sikujua nilitakiwa kutoa jibu gani kwa yule mzee. Nilibaki kimya tu natetemeka, lakini cha ajabu, mke wangu Rita akiwa haonekani kugundua chochote.
“Mimi na baba tunahusiana vipi?”
“Swali la kipumbavu kabisa...hujui uhusiano wako na baba yako? Mnahusiana damu. Halafu hicho kiburi chako wewe, tulipaswa tuwe tumeshakuua, bahati yako ni mtoto wa mwisho.”
“Niacheni jamani. Niacheni niendelee na haya maisha yangu kama yalivyo.”
“Hatuwezi kuendelea kubishana, jioni utakuwa makao makuu, kwa heri.”

Muungurumo mkali ukasikika, sauti kama radi ikafuatia kisha nikahisi kama upepo mkali sana ukivuma kwa kasi, kisha kukawa shwari!!!
“Kwa nini mimi?” nikasema kwa sauti.
Hapo ndipo Rita alipojitahidi kujigeuza na kuniangalia. Sauti ile aliisikia vyema, inamaana kuwa, muda wote ule hakusikia kitu chochote nilichozungumza...

“Kuna nini mpenzi wangu?” akaniuliza akionekana kunionea huruma ya wazi kabisa.”
“Acha tu mama.”
“Usijali nitapona mke wangu, najua ni kwa kiasi gani unaumia. Najua ni kwa kiwango gani huna

furaha kutokana na hali hii niliyonayo, lakini jipe moyo, nitakuwa sawa!”
Hapo nikawa na uhakika zaidi kuwa, Rita hakuna alichokuwa akikijua. Sikutaka kumwambia chochote, isingekuwa sawa kumwambia kuwa mimba zake zilikuwa zinatoka kwa sababu ya kafara ya majini ambayo yalikuwa yanafanya kisasi.

Sikutaka kabisa ajue jambo hilo, hiyo niliendelea kuifanya siri iliyokuwa katikati ya moyo wangu. Nilimsihi atulie, nikamwambia sikuwa na tatizo kubwa bali nilichanganywa na namna mimba zake zilivyokuwa zikiharibika kila mara.

“Nataka sana watoto mpenzi, natamani kuona vurugu za watoto wetu humu ndani, ndiyo maana unaniona sina raha,” nikamwambia.
“Hata mimi pia, ndani ya moyo wangu natamani sana jambo hilo, ndiyo haja ya moyo wangu

mpenzi. Tutulie, muda ukifika mambo yatakuwa mazuri,” akasema Rita akiwa hajui kabisa kilicho kichwani mwangu.
Nikajituliza kisha nikaendelea kula chakula changu. Sikuwa na raha kabisa. Nilipomaliza nilipanda kitandani, kisha nikajilaza, kichwa changu kikiangalia juu ya dari, mawazo tele yakiwa yamenisonga!
***

“Galos! Galos! Galos...” kwa mbali nilisikia nikiitwa jina.
Sikugeuka, nilihisi nilikuwa ndotoni. Ilikuwa usiku wa saa sita, nikiwa nimelala na mke wangu Rita ambaye wakati huo alikuwa akisema kuwa hali yake iliendelea vizuri.
Nikapuuza!
“Galos! Galos! We Galos...” sauti ile ikaendelea kuita.
Nikatulia, nikatingisha mwili wangu kidogo ili kujihakikishia kuwa sikuwa ndotoni. Ni kweli sikuwa kwenye ndoto kama nilivyokuwa nikifikiria awali.
“Galos!” sasa ikaita kwa sauti ya juu kidogo.
“Nani?” nikauliza.

Mtu huyo alikuwa akiniita kupitia dirishani. Pamoja na kumwuliza alikuwa ni nani, hakujibu kitu. Dakika ya kwanza ikakatika, ikafuata ya pili! Nikashindwa kuvumilia.
“Wewe ni nani?”
“Naitwa Ngoma.”
“Ngoma?” nikauliza kwa mshtuko dhahiri.
“Ndiyo ni Ngoma, nipo na rafiki yangu Mango.”
“Naomba muondoke kwangu,” nikasema kwa hasira.

“Wewe huna ubavu wa kutufukuza, nadhani ni vema kama ukitoka mwenyewe ndani tukaondoka.”
“Kwenda wapi?”
“Makao makuu.”
“Haiwezekani.”

“Itawezekana,” alijibu huku tayari akiwa ameshaingia ndani kwangu.
Sikujua ni nani kati yao aliyeingia ndani, lakini niliona mtu mmoja tu. Alisimama mbele ya kitanda chetu, akaniangalia kwa macho yaliyoonekana kung’aa sana kwa mwanga mkali, kisha akapuliza dawa fulani ya unga iliyokuwa kwenye kiganja chake...
Nikapoteza fahamu!
***

Kwa harakaharaka niliwaona watu kama kumi wakiwa wamekaa kwenye zulia kwa mzunguko. Ulikuwa mduara mkubwa, halafu mimi nilikuwa nimekaa katikati. Mbele yangu kulikuwa na nyama mbichi, tena inayochuruzisha damu!

Wale watu wote walikuwa wameinamisha vichwa vyao chini. Nikawaangalia, lakini hakuna aliyeniangalia hata mmoja. Cha kushangaza, sikuwaona Ngoma, Mango wala Mkuu.
Muda kidogo, nikasikia vishindo, nikawaona watu wawili wakiingia. Nilipowaangalia nikagundua walikuwa ni Mango na Ngoma.

Wale watu wakainua vichwa vyao juu mara moja na kuviinamisha tena. Kidogo, akaingia Mkuu akiwa amevaa joho linaloburuzika chini!
“Mkuuu!” Mango na Ngoma walisema kwa wakati mmoja.
Watu wote wakasimama wakati mkuu akiingia. Akaonyesha ishara kuwa wote waketi – wakafanya hivyo. Akabaki yeye mwenyewe akiwa amesimama. Tofauti pekee niliyoiona ni kwamba, wale watu waliokuwa wameinamisha vichwa vyao, sasa walikuwa wameviinua!
Mkuu akaanza kuzungumza...

“Nina furaha sana jioni ya leo. Tunakwenda kufanya tukio moja kubwa sana...kuna mgeni hapa kama mnavyoona na kama nilivyowapa taarifa zake. Anaitwa Galos. Jambo la kufurahisha ni kwamba ameshakunywa damu ya mwanaye. Zoezi lililobaki ni kula maiti ya mwanaye.

“Zoezi hilo halitafanyika leo, kwa leo anatakiwa kusaini mkataba na kuanza kazi mara moja. Kuna mambo mawili tu, asaini maisha yake yabadilike yawe mazuri au asisaini, tumuue, mimi ninywe ubongo wake,” akasema Mkuu.
“Sawa Mkuu,” wote wakaitikia wakiinamisha vichwa chini.
“Galos...” Mkuu akaniita.
Sikuitikia!
Siyo kwamba nilionyesha kiburi, sikuweza kufanya hivyo!

Itaendelea

 

[wa kupuliza]

Afu haya mambo ya kingese muache mnaweka mapicha yenu ya kutisha afu hamtoi warning, ni full ungese hapa!!

 

[Herbalist Dr MziziMkavu]

HADITHI MPYA YA KUSISIMUWA:NILITAFUNA MAITI YA MWANANGU NIWE TAJIRI-6

ILIPOISHIA...
“Sawa Mkuu,” wote wakaitikia wakiinamisha vichwa chini.
“Galos...” Mkuu akaniita.
Sikuitikia!
Siyo kwamba nilionyesha kiburi, sikuweza kufanya hivyo!
SASA ENDELEA...

KAMA moyo ungekuwa unaweza kuonekana, naamini bila shaka yoyote moyo wangu ungeonekana ukiwa unatetemeka kwa hofu. Sikuwa na hili wala lile. Nilihisi kuchanganyikiwa.
Niliinua uso wangu na kuwatazama wale watu waliokuwa wamenizunguka, nikawaona kama wananikodolea macho mimi wakinishangaa.

Nikazidi kuchanganyikiwa. Kuna mambo matatu yalikuwa yakiuchanganya sana ubongo wangu. Kwanza kuhusu mkataba! Naweza kusaini mkataba wa kishetani?
Naweza kuingia kwenye makubaliano nisiyoyaelewa? Inamaana mimi niwe mchawi? Niliwaza. Kwa mtu yeyote mwenye akili timamu lazima jambo hilo lingemchanganya kama ilivyokuwa kwangu.

Pili ni kuhusu kunywa damu! Mimi nilikunywa damu ya mwanangu? Inawezekana vipi? Ni kweli nilipewa kitu kama juisi ambayo ladha yake sikuijua mara moja, lakini kwa nini niambiwe ilikuwa ni damu ya mwanangu?

Damu ya mwanangu kivipi? Lingine kubwa kabisa lililoniumiza ni kuhusu kula maiti ya mwanangu. Nitaweza kumtafuna mwanangu? Kwa muda mrefu kiasi gani mimi na mke wangu tumehangaika kupata mtoto na mimba zinatoka!

Leo iweje nije kula maiti ya mwanangu? Ni mambo ambayo yalizidi kunikoroga! Kwa namna fulani niliona ni bora kufa kuliko kula maiti ya mwanangu. Potelea mbali hata kama Rita atabaki katika mateso lakini hatanyanyasika tena maana atapata mwanaume mwingine ambaye atamzalia watoto.

Mimi nisingeweza kumpa watoto kwa sababu tayari nilikuwa kama kafara la majini! Moyo wangu ulijaa huzuni sana, nikapata nguvu mpya na jeuri ya hali ya juu kunijaa moyoni. Nilimwangalia Mukulungu kwa hasira, sura yangu ikatangaza dharau ya wazi.
Nilionekana waziwazi nilikuwa tayari kwa lolote!

Ni kama nilikuwa nimejipanga sawasawa. Nikazidi kumkazia macho bila kuyapepesa kabisa. Naye akaniangalia kwa ukali. Muda uleule, nikaona kitu kama machozi yakidondoka machoni mwa Mukulungu. Nilipotazama vizuri, niligundua jambo jingine la kushangaza sana.

Macho ya Mukulungu yalikuwa yakidondosha damu! Tena ilikuwa damu mbichi kabisa!
“Galos! Galos! Galos!” akaita kwa ukali.
“Ukali wako haunitishi,” nikajikuta nimetamka kwa haraka nikiwa najiamini kuliko kawaida.
Pamoja na woga niliokuwa nao tangu mtiririko wa tukio lile ulivyoanza, nilijishangaa sana kupata nguvu ya ajabu na ya ghafla sana mbele ya Mukulungu ambaye aliogopwa na kila mtu!

“Unasemaje?”
“Nipo tayari kwa lolote!”
“Umeuuzunisha moyo wangu. Kwa hakika moyo wangu sasa unavuja damu....damu inachuruzika. Sasa nitakuuliza kwa mara ya mwisho kabla sijachukua hatua inayokustahili. Uko tayari kusaini mkataba au haupo tayari?” akauliza Mukulungu akinikazia macho.
“Sipo tayari!”
“Unasema?”
“Sipo tayari.”
“Galos, una hakika na kinachotoka kinywani mwako.”
“Nasema sipo tayari kusaini ujinga!”

“Paaaaa! Paaaaa! Paaaa!” ilikuwa ni mlio wa mikanda ikishuka mwilini mwangu.
Sikuelewa ni nani aliyenipiga na alikuwa wapi. Nilihisi maumivu makali sana, mwili wangu ukaishiwa nguvu ghafla na nikahisi kutapika. Nilijilazimisha kutoa matapishi lakini haikuwezekana. Nikajitahidi tena na tena lakini haikuwezekana.

“Mpelekeni kwenye hatua ya pili haraka! Huyu nitamalizana naye mwenyewe, hana ujanja huyu. Mpumbavu kabisa. Wa kumlaumu ni baba yako aliyeingia mkataba na sisi!” akasema Mukulungu.

Wale watu haraka wakanivaa. Kila mmoja alikuwa akinisukuma huku akinipiga sehemu anayoona inamfaa. Ndani ya dakika kumi tu, tayari kila kiungo katika mwili wangu kilikuwa kimeshapigwa. Nililainika na nilipatwa na maumivu makali kuliko kawaida.

Waliniburuza hadi kwenye chumba ambacho sikukielewa kilivyokuwa, lakini muda mfupi sana baadaye, nilipoteza fahamu kabisa! Sikujua chochote kilichoendelea.
***

Nilihisi maumivu makali sana miguuni, mwili wangu ulikuwa una joto kali kuliko kawaida, baadaye nikagundua kuwa siyo joto tu, ni moto mkali ulikuwa unatembea mwilini mwangu. Nilipofumbua macho, nilishangaa kujiona nimening’inizwa, kichwa chini, miguu juu.

Miguu yangu ilikuwa imefungwa kwa mnyororo juu ya kamba, mikono yangu ilikuwa chini lakini nayo ilikuwa imefungwa kwa mnyororo, chini kukiwa na moto ambao ulikuwa ukinielekea pale juu nilipokuwa nimefungwa!
Nilikuwa nachomwa kama nyama!

Ni eneo ambalo sikulijua ilikuwa ni wapi, lakini ilikuwa pembeni ya kitu kama ziwa au bahari, maana niliona nipo ufukweni. Nilipoangalia kando nikamuona Mukulungu akiwa na wenzake wawili wananitazama.

Wote walikuwa wamekenua meno yao wakinicheka. Mukulungu ndiye aliyekuwa amebeba kitu kama faili lenye makaratasi. Akaacha kucheka na kusogea karibu yangu. Akanitazama kwa macho ya hasira sana. Alionekana kuwa na neno alilotaka kuzungumza...

“Utakufa hapo mtini taratibu kama ng’ombe anavyobanikwa baada ya kuchomwa. Hili ni zoezi la mwisho kwako. Ni adhabu ya mwisho. Narudia tena hakuna adhabu nyingine, maana adhabu hii itakufikisha moja kwa moja kwenye kifo.

“Sasa ni hiyari yako kusema, upo tayari kusaini mkataba uendelee na maisha yako na tukupe utajiri au ufe hapo mtini ukibanikwa kama nyama ya ng’ombe?” akasema Mukulungu akiniangalia kwa macho yanayosubiri majibu.

“SITASAINI UCHAFU WENU, KAMA KUFA NIPO TAYARI KUFA!”

nikamjibu kwa kujiamini.
Nilihisi maumivu makali sana lakini sikuwa tayari kabisa kujiunga na mambo nisiyoyajua wala sikuwahi kuyaota. Nilikuwa tayari kwa lolote! Mukulungu na wenzake wakaonekana kunishangaa sana!
“Unasemaje wewe?” Mukulungu akauliza.
“Nilivyosema ndiyo hivyohivyo!”
“Ongeza moto tafadhali,” akasema Mukulungu.
Muda huohuo, moto ukaongezeka ghafla. Nikahisi mwili mzima ukiungua.

Itaendelea wiki ijayo.

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI-7

ILIPOISHIA...
"Sawa Mkuu," wote wakaitikia wakiinamisha vichwa chini.
"Galos..." Mkuu akaniita.
Sikuitikia!
Siyo kwamba nilionyesha kiburi, sikuweza kufanya hivyo!
SASA ENDELEA...

KAMA moyo ungekuwa unaweza kuonekana, naamini bila shaka yoyote moyo wangu ungeonekana ukiwa unatetemeka kwa hofu. Sikuwa na hili wala lile. Nilihisi kuchanganyikiwa.
Niliinua uso wangu na kuwatazama wale watu waliokuwa wamenizunguka, nikawaona kama wananikodolea macho mimi wakinishangaa.

Nikazidi kuchanganyikiwa. Kuna mambo matatu yalikuwa yakiuchanganya sana ubongo wangu. Kwanza kuhusu mkataba! Naweza kusaini mkataba wa kishetani?

Naweza kuingia kwenye makubaliano nisiyoyaelewa? Inamaana mimi niwe mchawi? Niliwaza. Kwa mtu yeyote mwenye akili timamu lazima jambo hilo lingemchanganya kama ilivyokuwa kwangu.

Pili ni kuhusu kunywa damu! Mimi nilikunywa damu ya mwanangu? Inawezekana vipi? Ni kweli nilipewa kitu kama juisi ambayo ladha yake sikuijua mara moja, lakini kwa nini niambiwe ilikuwa ni damu ya mwanangu?

Damu ya mwanangu kivipi? Lingine kubwa kabisa lililoniumiza ni kuhusu kula maiti ya mwanangu. Nitaweza kumtafuna mwanangu? Kwa muda mrefu kiasi gani mimi na mke wangu tumehangaika kupata mtoto na mimba zinatoka!

Leo iweje nije kula maiti ya mwanangu? Ni mambo ambayo yalizidi kunikoroga! Kwa namna fulani niliona ni bora kufa kuliko kula maiti ya mwanangu. Potelea mbali hata kama Rita atabaki katika mateso lakini hatanyanyasika tena maana atapata mwanaume mwingine ambaye atamzalia watoto.

Mimi nisingeweza kumpa watoto kwa sababu tayari nilikuwa kama kafara la majini! Moyo wangu ulijaa huzuni sana, nikapata nguvu mpya na jeuri ya hali ya juu kunijaa moyoni. Nilimwangalia Mukulungu kwa hasira, sura yangu ikatangaza dharau ya wazi.
Nilionekana waziwazi nilikuwa tayari kwa lolote!

Ni kama nilikuwa nimejipanga sawasawa. Nikazidi kumkazia macho bila kuyapepesa kabisa. Naye akaniangalia kwa ukali. Muda uleule, nikaona kitu kama machozi yakidondoka machoni mwa Mukulungu. Nilipotazama vizuri, niligundua jambo jingine la kushangaza sana.

Macho ya Mukulungu yalikuwa yakidondosha damu! Tena ilikuwa damu mbichi kabisa!
"Galos! Galos! Galos!" akaita kwa ukali.
"Ukali wako haunitishi," nikajikuta nimetamka kwa haraka nikiwa najiamini kuliko kawaida.
Pamoja na woga niliokuwa nao tangu mtiririko wa tukio lile ulivyoanza, nilijishangaa sana kupata nguvu ya ajabu na ya ghafla sana mbele ya Mukulungu ambaye aliogopwa na kila mtu!
"Unasemaje?"
"Nipo tayari kwa lolote!"
"Umeuuzunisha moyo wangu. Kwa hakika moyo wangu sasa unavuja damu....damu inachuruzika. Sasa nitakuuliza kwa mara ya mwisho kabla sijachukua hatua inayokustahili. Uko tayari kusaini mkataba au haupo tayari?" akauliza Mukulungu akinikazia macho.
"Sipo tayari!"
"Unasema?"
"Sipo tayari."
"Galos, una hakika na kinachotoka kinywani mwako."
"Nasema sipo tayari kusaini ujinga!"

"Paaaaa! Paaaaa! Paaaa!" ilikuwa ni mlio wa mikanda ikishuka mwilini mwangu.
Sikuelewa ni nani aliyenipiga na alikuwa wapi. Nilihisi maumivu makali sana, mwili wangu ukaishiwa nguvu ghafla na nikahisi kutapika. Nilijilazimisha kutoa matapishi lakini haikuwezekana. Nikajitahidi tena na tena lakini haikuwezekana.

"Mpelekeni kwenye hatua ya pili haraka! Huyu nitamalizana naye mwenyewe, hana ujanja huyu. Mpumbavu kabisa. Wa kumlaumu ni baba yako aliyeingia mkataba na sisi!" akasema Mukulungu.
Wale watu haraka wakanivaa. Kila mmoja alikuwa akinisukuma huku akinipiga sehemu anayoona inamfaa.

Ndani ya dakika kumi tu, tayari kila kiungo katika mwili wangu kilikuwa kimeshapigwa. Nililainika na nilipatwa na maumivu makali kuliko kawaida.

Waliniburuza hadi kwenye chumba ambacho sikukielewa kilivyokuwa, lakini muda mfupi sana baadaye, nilipoteza fahamu kabisa! Sikujua chochote kilichoendelea.
***

Nilihisi maumivu makali sana miguuni, mwili wangu ulikuwa una joto kali kuliko kawaida, baadaye nikagundua kuwa siyo joto tu, ni moto mkali ulikuwa unatembea mwilini mwangu. Nilipofumbua macho, nilishangaa kujiona nimening'inizwa, kichwa chini, miguu juu.

Miguu yangu ilikuwa imefungwa kwa mnyororo juu ya kamba, mikono yangu ilikuwa chini lakini nayo ilikuwa imefungwa kwa mnyororo, chini kukiwa na moto ambao ulikuwa ukinielekea pale juu nilipokuwa nimefungwa!

Nilikuwa nachomwa kama nyama!
Ni eneo ambalo sikulijua ilikuwa ni wapi, lakini ilikuwa pembeni ya kitu kama ziwa au bahari, maana niliona nipo ufukweni. Nilipoangalia kando nikamuona Mukulungu akiwa na wenzake wawili wananitazama.

Wote walikuwa wamekenua meno yao wakinicheka. Mukulungu ndiye aliyekuwa amebeba kitu kama faili lenye makaratasi. Akaacha kucheka na kusogea karibu yangu. Akanitazama kwa macho ya hasira sana.

Alionekana kuwa na neno alilotaka kuzungumza...
"Utakufa hapo mtini taratibu kama ng'ombe anavyobanikwa baada ya kuchomwa. Hili ni zoezi la mwisho kwako. Ni adhabu ya mwisho. Narudia tena hakuna adhabu nyingine, maana adhabu hii itakufikisha moja kwa moja kwenye kifo.

"Sasa ni hiyari yako kusema, upo tayari kusaini mkataba uendelee na maisha yako na tukupe utajiri au ufe hapo mtini ukibanikwa kama nyama ya ng'ombe?" akasema Mukulungu akiniangalia kwa macho yanayosubiri majibu.

"SITASAINI UCHAFU WENU, KAMA KUFA NIPO TAYARI KUFA!" nikamjibu kwa kujiamini.
Nilihisi maumivu makali sana lakini sikuwa tayari kabisa kujiunga na mambo nisiyoyajua wala sikuwahi kuyaota. Nilikuwa tayari kwa lolote! Mukulungu na wenzake wakaonekana kunishangaa sana!
"Unasemaje wewe?" Mukulungu akauliza.
"Nilivyosema ndiyo hivyohivyo!"
"Ongeza moto tafadhali," akasema Mukulungu.
Muda huohuo, moto ukaongezeka ghafla. Nikahisi mwili mzima ukiungua.

Itaendelea

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI-8

ILIPOISHIA...
“Unasemaje wewe?” Mukulungu akauliza.
“Nilivyosema ndiyo hivyohivyo!”
“Ongeza moto tafadhali,” akasema Mukulungu.
Muda huohuo, moto ukaongezeka ghafla. Nikahisi mwili mzima ukiungua.
SASA ENDELEA...

NIkweli kabisa, tena ukweli usio na shaka kwamba mara nyingi nimewahi kupata maumivu. Hata hivyo, nakiri sijawahi kupata maumivu makali kama ya moto ule uliokuwa ukiwaka chini yangu, nikiwa nimening’inizwa juu.

Moto ulikuwa mkali sana, nilihisi mwili wangu ukiniteleza. Nikamkumbuka Rita wangu. Mwanamke wa maisha yangu ambaye nilimpenda kwa kila hali. Nakubali vipi kufa nimwache mwenyewe?
Nilimwonea huruma sana. Sikujali mimi kufa, nilikuwa tayari kufa kuliko kuingia kwenye uchawi. Hata
siku moja sikupenda uchawi. Sikuwahi kufikiria kuwa naweza kujiingiza kwenye mambo ya uchawi.

“Mamaaaaaa...” nilipiga kelele.
Nilipojaribu kuangalia eneo ambalo Mukulungu alikuwa amekaa na wale wazee, hakuwepo. Hapakuwa na mtu. Kwa mbali sasa nilianza kufikiri kubadilisha mawazo. Hata kama sitakuwa mchawi, nilikuwa tayari kukubaliana nao ili tu niokoke katika ule moto.
“Rahisi sana...nasema nipo tayari, halafu wakinitoa hapa natoroka,” nikawaza.
“Mkuuuuuu...” nikapiga kelele.
Muungurumo mkali ukasikika.
“Mkuuuuu,” nikaita tena.
Muungurumo ukazidi.

“Unataka nini? Kufa hapohapo mtini,” nikasikia sauti ambayo sikuwa na shaka kuwa alikuwa ni Mukulungu.
“Hapana Mkuu, hapana.”
“Hapana nini?” Sasa nikasikia sauti hiyo mbele yangu.
Nikafumbua macho haraka, nikamuona Mukulungu akiwa mbele yangu. Amesimama ananitazama kwa macho makali. Machozi yalikuwa yakinitoka kwa kasi sana machoni mwangu. Machozi ukichanganya na damu, ilikuwa ni balaa juu ya balaa.
“Nisaidie,” nikamwambia.
“Umeshakuwa tayari kuwa nasi?” akauliza.
“Ndiyo.”
“Unasema?”
“Ndiyo Mkuu.”
“Ondoa moto!” akasema Mukulungu.

“Myvuuuuuu!” mlio mkali kama upepo ukasikika, ghafla ule moto ukaondoka.
Nikatetemeka. Mwili ulikuwa umeanza kutoka malengelenge, nikavuta pumzi ndefu sana kisha nikazishusha taratibu kabisa.
“Niokoe Mkuu.”

“Huwezi kuokolewa hapo kabla ya kukubali ninachokuambia,” akasema huku akiketi chini.
“Ndiyo Mkuu.”
“Kwanza lazima ujue kuwa sisi hatuna lengo baya na wewe. Kubwa zaidi ni kukusaidia. Tunahitaji kukusaidia maisha yako, acha ujinga.”

“Sawa, lakini kwa nini mmenichagua mimi?”
“Ngoja ushuke hapo juu kwanza tuzungumze,” akasema.
Nilihisi kizunguzungu cha ghafla, kisha nikahisi kama nimepoteza fahamu hivi. Naam! Ni kweli nilipoteza fahamu. Sikujua kilichoendelea tena baada ya pale.
***

Ni muda mfupi baada ya kutolewa kule kwenye ufukwe nilipokuwa nimening’inizwa. Sasa tupo kwenye chumba kilekile cha awali. Tofauti ni kwamba, wale watu waliokuwepo mwanzoni, safari hii hawakuwepo tena.

Pale kulikuwa na Mango na Ngoma tu. Mukulungu alikuwa amekaa mbele yangu, tukawa tunatizamana. Kitu cha kushangaza ni kwamba, ule uvimbe na malengelenge niliyokuwa nayo kule ufukweni, hayakuwepo tena.

Mwili haukuwa na maumivu tena. Ni kama hapakuwa na jambo lolote lililotokea kabla. Mukulungu alinikazia macho...
“Sasa nisikilize...” akasema.
“Ndiyo!” nikaitikia.

Ngoma na Mango, waliposikia kauli ya Mukulungu ikisema, sasa nisikilize, walisimama kwa wakati mmoja. Wakashikana mikono, halafu wakainamisha vichwa vyao chini, kisha wakaanza kutembea kwa mwendo wa taratibu kuelekea mlangoni.

Walipomalizikia mlangoni tu, Mukulungu akaendelea: “Galos kijana wangu.”
Sauti ya Mukulungu sasa ilikuwa ya taratibu iliyojaa uungwana. Nilimshangaa kwa kweli. Sikutegemea kumsikia akizungumza nami kwa sauti iliyojaa unyenyekevu kama ile.
“Unajua watu wanafikiria vibaya sana kuhusu uchawi na ushirikina. Nikuambie tu ukweli kuwa, siyo

kitu kibaya. Hii ni aina ya sanaa ambayo huwa na makubaliano rahisi. Makubaliano hayo yakifanyika, utajiri unafuata.

“Si kwamba unapewa utajiri kwa manyanyaso au unamdhuru mtu, hapana. Ni waongo wanaosema hivyo. Kwa mfano wewe ni kijana mzuri, una nyota nzuri, ni rahisi kuogelea kwenye utajiri kwa muda mfupi sana.

“Mazungumzo haya yakifikia mwisho na tukakubaliana vizuri, wewe utakuwa tajiri mkubwa sana. Acha woga, achana na mawazo potofu. Tumia uwezo wako kinyota kubadili maisha yako. Hebu nikuulize, unafaidika nini kuishi maisha ya kijinga pale Tandale?

“Kipi unachonufaika nacho kwa kiburi chako huku mkeo akiwa mgonjwa kila siku? Tumia akili. Sisi hatuna lengo baya na wewe. Jambo la msingi kujua ni kwamba, mwisho wa mazungumzo haya, ukiendelea na ule msimamo wako wa kukataa, UTAKUFA.

“Lakini ukiwa mwerevu, ukaingia mkataba na sisi ambao kimsingi ni wa lazima kwa sababu ya marehemu baba yako, basi utaanza maisha mapya. Acha ujinga mwanangu. Acha upuuzi, wewe ni mtu mkubwa sana mwenye utajiri mkubwa kwenye maisha yako. Unanielewa?” akasema.
Maneno yake yaliniingia sana, kiukweli nilijawa hofu sana. Sikuweza kumjibu haraka. Nilibaki namwangalia tu nisijue cha kufanya.

“Galos...” akaniita.
“Mkuu.”
“Umenielewa?”
“Ndiyo, lakini nataka kujua kuhusu baba yangu.”
“Vizuri sana. Hebu sasa nikueleze kwa undani kuhusu baba yako,” akasema.

“Angalia pale...” akasema akisonza kidole kwenye ukuta ambao kulikuwa na ngozi ya mnyama.
Sikujua ni mnyama gani!
Nikaangalia!
Nilishuhudia mambo ya ajabu ya kushangaza. Hofu kuu ikanijaa, nikazidi kukodoa macho yangu. Mwili mzima ulitetemeka.

Itaendelea tena Kesho jioni...

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI-9

ILIPOISHIA...
"Angalia pale..." akasema akisonza kidole kwenye ukuta ambao kulikuwa na ngozi ya mnyama.
Sikujua ni mnyama gani!
Nikaangalia!
Nilishuhudia mambo ya ajabu ya kushangaza. Hofu kuu ikanijaa, nikazidi kukodoa macho yangu. Mwili mzima ulitetemeka.
SASA ENDELEA...

Ngozi ile ya mnyama ukutani ambayo kwa kuiangalia ilifanana na ya Fisi ingawa sikuwahi kumwona zaidi ya picha zake na wakati mwingine kwenye runinga, ilikuwa ni kama runinga, kila kitu kilionekana kama naangalia filamu fulani ya kutisha.

Ulikuwa ni wakati wa usiku, chini ya mti mkubwa wa Mbuyu, watu wote wakiwa kama walivyozaliwa, wameshikilia vibuyu mikononi mwao. Usoni wakiwa wamepaka dawa nyeusi iliyofanana kabisa na masizi, hakika niliyokuwa nikiitazama kwenye runinga ya ngozi ya Fisi, ilikuwa ni tafrija ya wachawi usiku wa manane.

Maiti za walioonekana ni kama watoto wachanga zilikuwa zikiletwa na kuwekwa juu ya jiko kubwa lililokuwa likiwaka moto kama makaa ya mawe kwa jinsi ulivyokuwa mkali, muda mfupi tu baadaye maiti hizo zilikuwa zikidondosha mafuta mengi zilikauka kisha kushushwa zikiwa bado za moto, bibi vizee wakakamata miguu na kuichana katikati, kisha kuanza kula kwa furaha kama vile walikuwa wakila nyama nyingine yoyote, hawakujali kabisa kwamba ilikuwa ni maiti.

Awali sikuelewa ni kwa nini Mukulungu aliamua kunionyesha tafrija ile, lakini baadaye watu hao walipoanza kunawa nyuso zao ndipo nilielewa, baba yangu mzazi mzee Matima Matimandole alikuwa ni miongoni mwao! Nikashika mikono yangu yote mdomoni kwa mshangao, sikuwahi hata mara moja kuwaza kwamba baba yangu alikuwa mchawi, kwani alikuwa mcha Mungu kupita kiasi.

"Babaaa? Mchawi?" nilijikuta natamka maneno hayo.
"Ndiyo! Baba yako alikuwa mwenzetu, kwenye chama chetu, alishaua watu wengi mno, kama sharti ili mimi nikiachia ngazi yeye aendelee, lakini ghafla alipotakiwa kukutoa wewe kafara, ili achukue cheo akakataa na kuanza kusali kanisani, jambo ambalo sisi halikutufarahisha, tukaamua kumuua!

Tunachotaka kufanya ni kusaini mkataba wetu wa uchawi, usipofanya hivyo hata wewe tutakuua!"
"Je, mnaona kufanya hivyo ni sawa?"
"Ndiyo, lazima uwe mchawi, ili siku moja ukikalie kiti hiki ninachokikalia mimi maana baba yako alikistahili, mrithi ni wewe."
"Siwezi!" nilisema na hapo hapo runinga ya ngozi ukutani ikazima, Mukulungu akatoka kwenye kiti chake na kunisogelea akionekana kabisa kuvimba kwa hasira.
"Umesemaje?"
"Siko tayari kufanya mambo ya aina hii kama ni kufa acha nife, lakini nisiwe mchawi."
"Yaani pamoja na kuongea muda wote huo bado hujaelewa?"
"Sitaelewa."

"Sasa sikiliza, nakuachia uende nyumbani ukafikirie, huwezi kutukimbia sisi, himaya yetu ni kubwa mno tutakufikia wakati wowote tukikuhitaji."

Baada ya kusema maneno hayo Mukulungu aliondoka na kupotelea gizani, hapohapo nikafumbua macho na kujikuta nimelala kando ya mke wangu Rita, akiendelea kugugumia kwa maumivu makali, damu nyingi zikimtoka sehemu za siri na kulowanisha mashuka.
"Darling yaani kweli mimi nateseka na maumivu wewe umelala usingizi?" Rita aliongea.

Hakuwa kabisa na picha ya mahali nilipokuwa, kwenye ulimwengu usioonekana kwa macho ya kawaida, nikipambana na Mukulungu akinishawishi nitie saini mkataba wa kuwa mchawi jambo ambalo sikuwa tayari kulifanya.

Hakika nilikuwa nimejifunza mambo mengi ambayo sikuwahi kuyafahamu, taswira ya baba yangu mzazi akiwa utupu huku akila maiti za watoto bado ilinitisha kila nilipoikumbuka. Ukweli kwamba mimba za mke wangu mpenzi zilizokuwa zikitoka ilikuwa ni adhabu sababu baba alisaliti wachawi wenzake uliniumiza sana lakini sikuwa na uwezo wa kumsimulia Rita, nikaahidi ingebaki kuwa siri yangu.

"Nipeleke hospitali, ona ninavyovuja damu nyingi!"
Nikajikusanya haraka na kuanza kuvaa nguo, nilipomaliza nilitoka nje hadi nyumba ya jirani ambako aliishi mwanaume mmoja mwenye moyo safi, nikagonga kwenye lango kubwa, mlinzi akafungua na nikamweleza shida niliyokuwa nayo, akanyanyua simu na kumpigia bosi wake aliyekuwa amelala, saa iliyokuwa imetundikwa ukutani ndani ya kibanda cha mlinzi ilisomeka saa tisa na nusu.

Muda mfupi baadaye mwanaume huyo mwenye umri kati ya miaka hamsini na sitini alitoka ndani ya nyumba yake akiwa amevalia bukta na shati tu, akanisabahi nami nikampa heshima yake kisha kumsimulia mateso ambayo mke wangu alikuwa akiyapata.
"Yuko wapi?"
"Nyumbani kwangu."
"Mnaishi nyumba ipi kweli?"
"Pale kwa mzee Mwinyimkuu, tuko banda la uani."
"Subiri."

Akarudi ndani ya nyumba yake akikimbia, nikagundua alikuwa amefuata ufunguo wa gari, mawazo yangu yakawa sawa kwani aliporejea muda mfupi baadaye alinitaka niingie garini na kurudi kinyumenyume kisha kuendesha kwa kwenda mbele hadi mbele ya nyumba tuliyoishi, tukashuka naye hadi kwenye banda letu la nyuma ambako tulimsaidia Rita kuvaa kisha kumbeba hadi kwenye gari, nguo zote zikiwa zimelowa damu.

Safari kwenda hospitali ikaanza, kichwa changu kikiwa kimejawa na mawazo mengi ya vitisho vya mzee Mukulungu na serikali yake ya Kichawi, sikujua jinsi ya kujinasua kutoka kwenye mtego huo lakini jambo nililoelewa ni kwamba sikuwa tayari kusaini mkataba wa kichawi na kuanza kuua watu.

Je, nini kitaendelea?

 

[Herbalist Dr MziziMkavu]

HADITHI MPYA YA KUSISIMUWA: NILITAFUNA MAITI YA MWANANGU NIWE TAJIRI-10

ILIPOISHIA...
Safari kwenda hospitali ikaanza, kichwa changu kikiwa kimejawa na mawazo mengi ya vitisho vya mzee Mukulungu na serikali yake ya kichawi, sikujua jinsi ya kujinasua kutoka kwenye mtego huo lakini jambo nililoelewa ni kwamba sikuwa tayari kusaini mkataba wa kichawi na kuanza kuua watu. SASA ENDELEA...

Dakika ishirini baadaye gari likiendeshwa kwa kasi, lilikata kona kuingia hospitali tukanyoosha moja kwa moja hadi mapokezi ambako muuguzi alikuwepo, akatupeleka moja kwa moja chumba cha daktari mke wangu akiwa amekalishwa kwenye kiti cha magurudumu.
“Vipi?” Daktari aliuliza, alikuwa kijana mdogo tu, kwa miaka ya nyuma usingeweza kukubali daktari wa umri ule akuhudumie, alilingana kabisa na watoto wa kidato cha sita.
“Mke wangu anaumwa.”
“Nini?”
“Tumbo.”
“Mjamzito?”
“Alikuwa mjamzito.”
“Unamaanisha nini kaka yangu?”
“Damu nyingi zinamtoka.”
“Ooh! Dada unaweza kupanda hapo kitandani?”

“Ndiyo.” Rita aliitikia na kwa msaada wa mimi na jirani yangu, tulimbeba na kumpandisha juu ya kitanda, daktari akachukua pazia lililounganishwa na vyuma na kukizungushia kitanda, kisha akatutaka mimi na jirani yangu tusimame nje ya pazia ili ampime mgonjwa, ampime bila mimi kuwepo? Nilijiuliza kichwani mwangu lakini sikuwa na jinsi, ikabidi nitii.

Dakika kumi baadaye daktari alitokeza akivua mipira mikononi mwake, jambo lililoashiria kuwa alikuwa amempima mke wangu sehemu za siri, sikukipenda kabisa kitendo hicho lakini sikuwa na namna. Akaniangalia usoni, nami nikagundua masikitiko aliyokuwa nayo.
“Pole sana ndugu yangu.”
“Kwa nini daktari?”
“Mimba imeharibika.”
“Sijui kama tutakuja kupata mtoto?” niliuliza swali hilo nikimsikia Rita akigugumia kwa maumivu nyuma ya pazia.

Nilikuwa na siri nzito ndani ya moyo wangu ambayo nisingeweza kumweleza mtu, wachawi walikuwa wamedhamiria kuhakikisha sipati mtoto maisha yangu yote, mwisho wangeniua mimi mwenyewe kama adhabu sababu tu baba yangu alikiuka masharti ya uanachama wake wa uchawi. Jambo hili liliniumiza moyo sana, nikajiuliza jinsi ya kujinasua lakini sikupata jibu, nikainamisha kichwa chini huku machozi yakinibubujika.
“Kwani ni mimba ya ngapi kuharibika?”
“Ya tatu.”
“Mna mtoto?”
“Hatuna.”
“Hii inaitwa kwa kitaalam Habitual Abortion, inabidi ufanyike uchunguzi wa kina kufahamu ni kwanini mimba zinaharibika.”
“Hata ukifanya uchunguzi daktari sijui kama…”
“Hapana usiseme hivyo, inawezekana kabisa tukaligundua tatizo.”
“Siyo rahisi.”
“Kwanini unasema hivyo? Kuna jambo unalijua?”
“Hapana daktari!”

“Acha tumpeleke chumba cha upasuaji tukamfanyie Evacuation, kesho utafanyika uchunguzi wa kina kufahamu ni kwa nini mimba zinatoka mfululizo.”
“Hilo neno la Kiingereza ulilolisema sielewi maana yake.”
“Evacuation?”
“Ndiyo.”

“Ni kitendo cha kusafisha mfuko wa uzazi baada ya mimba kuharibika.”
“Ahsante daktari.”
“Mna bima?”
“Hapana.”
“Kwa hiyo mtalipia taslimu?”
“Sina fedha.”
“Mh!”
“Ni kiasi gani daktari?” jirani aliuliza.
“Inaweza kufika shilingi elfu arobaini.”
“Nitazilipa.”
“Ahsante jirani.”

Tukaelekea dirishani kufanya malipo, baada ya hapo Rita akachukuliwa kwenye chumba cha upasuaji ambako mfuko wake wa uzazi ulisafishwa na kutolewa saa nzima baadaye, akiwa katika hali ya usingizi na kulazwa kwenye wodi ya wazazi.

Jirani yangu baada ya hatua hiyo aliondoka na kuniacha nje ya wodi, nikabaki hapo mpaka asubuhi ya siku iliyofuata kichwa changu kikiwa kimejawa na mawazo mengi juu ya mambo yote niliyoyaona usingizini na vitisho nilivyokuwa nimepewa na mzee Mukulungu, ambaye tayari alishaitoa mimba ya mke wangu, hii ilionyesha kwamba alikuwa hatanii, kama nisingeusaini mkataba wao mwisho wa siku nisingekuwa na mtoto na wangeniua.

“Siwezi kusaini, siwezi kuwa mchawi, bora nife!” niliendelea kukataa akilini mwangu.
Mchana wa siku hiyo yote vipimo vingi vilifanyika ili kufahamu ni kwa sababu gani mimba za mke wangu zilikuwa zikitoka ilichukuliwa damu kwenda kupima homoni za uzazi na kitu kingine kiitwacho Rhesus Factor, ambacho niliambiwa huhusika sana na mimba kuharibika pale ambapo mtoto

anakuwa na Positive wakati mama yake ana Negative, mama mjamzito hutengeneza askari mwilini mwake waitwao Anti D ambao huenda kumshambulia mtoto kwenye mfuko wa uzazi, kusababisha kifo chake na hatimaye mimba kuharibika.

Pia akapigwa picha iitwayo Ultra-Sound kwenye mfuko wake wa uzazi, kuona kama kulikuwa na kasoro yoyote lakini vipimo vyote vilionyesha hapakuwa na tatizo la namna yoyote ile, madaktari wakashangaa, mwisho wakafikia uamuzi wa kuturuhusu mimi na mke wangu turejee nyumbani.

Nililia mno tukiwa nyumbani kiasi cha kumfanya Rita awe na wasiwasi, kilichokuwa kikinisumbua moyoni mwangu ni siri nzito niliyokuwa nimeibeba ambayo nisingeweza kabisa kumshirikisha mke wangu. Niliumia kuona watoto ambao wangeniletea furaha maishani wakifa kikatili kwa sababu tu sikuwa tayari kuwa mchawi.
“Darling mbona unalia sana?”
“Basi tu.”
“Au kuna jambo unajua?”
“Mh! Mh!Mh!” niliishia kuguna tu.
“Tafadhali nieleze.”

Je, nini kitaendelea? Fuatilia Kesho

 

[Shy land]

MziziMkavu tunakufatilia doctor wetu.

 

[Herbalist Dr MziziMkavu]

HADITHI MPYA YA KUSISIMUWA:NILITAFUNA MAITI YA MWANANGU NIWE TAJIRI-11

Hapo ndipo Rita analazimika kumbana Galos aeleze ukweli kama kulikuwa na jambo la siri alilokuwa akilifahamu kwani kilio chake kilimshangaza.
Je, nini kitaendelea?

“Naomba unieleze kama kuna chochote unachokifahamu juu ya haya yote yanayotutokea.” Rita alimuuliza Galos ambaye bado aliendelea kulia pamoja na kutulizwa kwa muda mrefu.
“Hakuna ninachokifahamu.”
“Sasa ni kwa nini unalia kiasi chote hicho?”
“Inaniuma tu, kila ninapotarajia kupata mtoto, anayeyuka!”
“Usijali mume wangu, tutapata tu mtoto mwingine, cha muhimu tuendelee kupendana.”
Saa mbili baadaye Rita alikuwa usingizini, lakini Galos alikuwa macho, akili yake yote ikimuwaza Mukulungu na mambo aliyokuwa akimfanyia.

Hakuwa tayari kusaini mkataka wa kichawi lakini pia alihitaji sana watoto maishani mwake akiwa na mke wake, kwa hali ilivyokuwa hofu ilikuwa imeanza kuugubika moyo wake kwamba Rita angeweza kumwacha, kama mimba zingeendelea kuharibika.

Hilo ndilo jambo kabisa hakutaka litokee, maisha yasingekuwa na maana bila mwanamke aliyempenda. Macho yakaendelea kubaki wazi, akimsubiri kwa hamu Mukulungu, atokee na waondoke wote kwenda kwenye ulimwengu mwingine ambako alitaka kukutana na kuongea na Mukulungu ili amwache aendelee na maisha yake.

Kulipokucha asubuhi alikuwa bado yu kitandani na mke wake, muujiza wa kwenda kwenye ulimwengu usioonekana haukutokea. Siku hiyo alishinda nyumbani na mke wake lakini siku iliyofuata aliingia mitaani kutafuta riziki, safari hii akiwa ameamua kufanya biashara ya kuuza maji kwa mkokoteni.

Alifanya kazi hiyo asubuhi mpaka jioni na kurejea nyumbani akiwa taaban, hayo ndiyo yalikuwa maisha yake, ya umaskini wa hali ya juu, akiishi eneo la watu maskini, ambalo lilitoa harufu mbaya saa ishirini na nne sababu watu waliachilia maji machafu ya chooni kutiririka mitaroni.

Maisha yaliendelea kwa miezi sita, bila Rita kuugua, wala Galos kuchukuliwa tena na Mukulungu kwenda kwenye ulimwengu wa kichawi, lakini mwanzoni mwa mwezi wa saba, katikati ya usiku alishtukia anapigwa pigwa begani, alipofumbua macho alikutana moja kwa moja na uso wa Mukulungu ukiwa umejawa na tabasamu.
“Twende!”

Hakuwa na swali la kuuliza, akatupa jicho kumwangalia mkewe kando yake, usingizi aliokuwa nao ulikuwa mzito mno. Taratibu Galos alinyanyuka na kuanza kumfuata Mukulungu, kufumba na kufumbua wakajikuta wako chini ya mti mkubwa, mamia ya wachawi wakiwa wamekusanyika hapo, wakila nyama za binadamu zilizochomwa kwenye majiko makubwa.
“Nimekupa muda mrefu sana wa kufikiria, umefikia uamuzi gani?”
“Katika lipi?”
“La uchifu.”
“Wa wachawi?”
“Ndiyo.”
“Hilo nimekwishaligomea.”
“Bado hutaki pamoja na kukufanyia mambo yote tuliyoyafanya?”
“Ndiyo.”
“Wewe maskini jeuri, lakini sikiliza, mkeo ni mjamzito tena, ukifanya mchezo hata huyo mtoto hutamwona.”
“Ni mjamzito?”
“Wewe hujui lakini mimi najua.”
“Siyo kweli, angeshaniambia.”
“Subiri utaona.”

“Mukulungu tukamtese?” mtu mwingine aliyekuwa jirani aliuliza na Mukulungu aliuza akatikisa kichwa kuonyesha ishara ya kukataa, mwisho akamruhusu Galos aondoke zake, akanyanyuka na kuanza kutembea kuelekea gizani.
***

“Mbona ulikuwa unaongea peke yako?”
“Mimi?”
“Ndiyo.”
“Wapi?”
“Usingizini.”
“Nilikuwa naongea nini?”
“Mambo mengi yasiyoeleweka, mara ujauzito, mara hutaki kusaini mkataba, ni mkataba gani huo?”
“Ndoto tu darling.”

Asubuhi kulipopambazuka, Rita aliondoka kitandani anakimbia kwenda nje kutapika, aliporejea alimpa Galos taarifa kwamba alikuwa na miezi miwili tangu apate hedhi mara ya mwisho, hapakuwa na sababu tena ya kutilia mashaka ambacho Galos aliambiwa na Mukulungu, roho ikamuuma kufahamu ya kwamba hata mtoto ambaye mke wake alikuwa naye tumboni pia asingemwona.
“Sijui nitafanyaje?” aliwaza.

Maisha yaliendelea vizuri baada ya hapo, ujauzito ukaendelea kukua na Galos akiendelea kufanya kazi zake ngumu za kimaskini, kila alichokipata alikitumia kumtunza mke wake. Wala hakujiwekea akiba yoyote ya kulea mtoto, sababu alifahamu lazima angekufa, mimba ilipotimiza miezi sita, Rita alianza kumsisitizia Galos aanze kununua vitu mbalimbali vya mtoto lakini kijana huyo aliishia kububujikwa na machozi.

Mwezi wa saba, Galos akijua labda Mukulungu alishaahirisha adhabu yake, usingizi ulimpitia akajikuta katika ulimwengu wa wachawi ambako alianza kulazimishwa tena kusaini mkataba, akakataa. Vitisho vya kuua mtoto vikaendelea lakini bado hakubadilika, mwisho Mukulungu akabadilisha maelezo na kuanza kuzungumzia utajiri, hapo ndipo akaugusa moyo wa Galos.

“Utakufa maskini, mimi naweza kukufanya uwe tajiri kuliko unavyofikiria, unachotakiwa ni kutimiza masharti.”“Kuwa tajiri nataka, ambacho sitaki ni kuwa mchawi.”
“Basi kubali uwe tajiri kwanza!”
“Bila kuwa mchawi?”
“Inawezekana, suala la uchawi tutalifikiria baadaye.”
“Sharti ni lipi?”
“Kesho utarudi tutakuambia.”
***

Ghafla Galos akazinduka akiwa kando ya mke wake aliyekuwa akiteseka kwa maumivu makali ya tumbo na kudai damu zilikuwa zikimtoka, mara moja akaelewa adhabu ilikuwa imefika. Hakuna la kufanya zaidi ya kutoka ndani ya nyumba kwenda kutafuta usafiri, jirani yuleyule wa awali alimsaidia kumpeleka Rita mpaka hospitali ambako ilithibitika mtoto alikuwa amefia tumboni.
“Itabidi achomwe sindano za uchungu ili amsukume atoke, baada ya hapo atasafishwa.”

Hicho ndicho kilichofanyika, Rita akapewa dawa hizo na kusukuma, mtoto mkubwa kabisa akatoka, baada ya hapo akasafishwa.
Hali yake ilipotengemaa walikabidhiwa kichanga chao na kwenda kukizika makaburini, jirani kabisa na hospitali, wakarejea nyumbani wakiwa na huzuni, wote wakilia kwa uchungu, lakini Galos alilia zaidi.
Usiku huohuo alipitiwa na usingizi mzito na kujikuta tena kwenye ulimwengu wa wachawi, Mukulungu alikuwa na maiti ya mtoto mchanga mikononi mwake,

akamwambia Galos kwamba maiti ile ndiyo iliyotoka tumboni mwa mke wake, ilifukuliwa makaburini mara tu baada ya kuzikwa.
“Hili ndilo sharti unalotakiwa kulitimiza, ule maiti hii ya mtoto wako, ndipo utakuwa tajiri! Uko tayari?”

Je, nini kitaendelea? Kuwa pamoja na mimi kesho...

 

[wambagusta]

haaaaaaaa!! noma hiyo

 

[Herbalist Dr MziziMkavu]

HADITHI MPYA YA KUSISIMUWA:NILITAFUNA MAITI YA MWANANGU NIWE TAJIRI-12

“Hili ndilo sharti unalotakiwa kulitimiza, ule maiti hii ya mtoto wako, ndipo utakuwa tajiri! Uko tayari?
Mwili wa Galos ulikuwa ukitetemeka kama mtu mwenye homa kali, yote hiyo ilikuwa ni kwa sababu ya hofu. Moyo ulimuuma mno, kumwona Mukulungu ameshikilia maiti ya mtoto wake mkononi, tena kichwa chini miguu juu, akining’iniza.

Machozi yakambubujika. Hakuna kitu alichokipenda maishani kama watoto, yeye na mke wake kwa muda mrefu walikuwa wametamani kuwa na mtoto pamoja na umasikini wao, waliamini huyo ndiye angewapa faraja lakini Mukulungu bila huruma aliua kila mtoto waliyempata.
“Kwa nini mnanitendea hivi?” aliuliza kwa uchungu.
“Unataka kuwa tajiri hutaki?”
“Nataka!”
“Basi timiza masharti.”
“Huu ni unyama.”

“Umasikini unatenda unyama zaidi kuliko mimi, umeteseka kwa miaka mingi, hivyo basi kama umechoka na aina hiyo ya maisha, kula maiti ya mwanao!”
Galos akainamisha kichwa, fikra zake zote zikarejea kitandani alikomwacha mkewe Rita akiwa

mwenye huzuni. Mwanamke huyo asiye na hatia hakujua kabisa kilichokuwa kikiendelea maishani mwake, mwenye siri moyoni alikuwa ni mumewe, Galos akamwonea huruma, lakini hakuwa na jinsi, umasikini ulikuwa umemchosha, akapiga hatua na kusimama mbele ya Mukulungu.

“Niko tayari, ili mradi tu mke wangu asije kufahamu siri hii.”
“Hawezi kufahamu, mambo ya huku huwa hayasemwi, isitoshe yeye pia kama hatasaini mkataba wa kurithi kazi ya baba yako, atakufa!”
“Tafadhali msimuue mke wangu.”
“Achana na hiyo, chukua haka kamaiti ka mwanao ukakachome pale kwenye moto unaowaka, kisha ule, baada ya hapo utarejea nyumbani na kila kitu kitakachotokea kitakushangaza, utatajirika bila juhudi yoyote.”

Galos akanyoosha mkono wake wa kuume, huku mkono wa kushoto akiutumia kufuta machozi na makamasi, akaishika maiti ya mwanaye miguuni, hivyohivyo akiining’iniza alitembea mpaka kwenye moto na kuiweka juu ya wavu, wachawi wote wakashangilia, wakimwita Shujaa.

Maiti ilichomwa kama mshkaki au kuku juu ya jiko la mkaa, ikaendelea kudondosha maji na mafuta hatimaye ikakuka kabisa, ndipo Mukulungu akamwamuru Galos aiondoe kwenye moto na kwenda nayo kando ambako majani ya mgomba yalikatwa na kuwekwa juu yake, wachawi wengi wakamzunguka.
“Kula! Kula uwe tajiri.” Mukulungu alisema.

Huku akilia Galos akakata mguu wa maiti ya mtoto wake, macho yake yakiwa yamefumbwa, akaanza kuila bila huruma, kichwani mwake akiwaza utajiri, magari atakayokuwa akiendesha, majumba ambayo angemiliki, heshima ambayo angepewa katika jamii.

Alipomaliza tu kula ghafla alizinduka usingizini na kumkuta mke wake ameketi kitako akilia, akaanza kumbembeleza na kumtuliza. Rita alitaka kufahamu ni kwa nini Galos alilia sana akiwa usingizini, lakini hakuambiwa ukweli. Wote wawili hawakulala usingizi, saa kumi na mbili kasorobo za asubuhi, Galos aliamka na kutoka nje ya nyumba yao kwenda msalani kujisaidia haja ndogo.

Alipofungua tu gunia lililotumika kama pazia kwenye choo, alishangaa kuona kitu kiking’ara ardhini, taratibu akainama na kukiokota, kilimshangaza, alishasikia sana juu ya Almasi, Ruby na Dhahabu, hisia zake zilimtuma kudhani hiyo ilikuwa ni Ruby.

Haja kubwa na ndogo zote zikakata, akasahau hata chooni alikwenda kufanya nini, haraka akarudi hadi ndani akiwa amekishika kipande cha jiwe alichokiokota mkononi mwake.
Ndani hakuongea kitu, akaifuata suruali yake ya khaki iliyokuwa imetundikwa kwenye msumari na kukiweka ndani yake, uso wake ulikuwa umekunjuka na kujawa na furaha iliyomshangaza Rita.

“Vipi tena?”
“Ahaa!Ahaaa!”
“Mbona umechangamka?”
“Basi tu.”
Jua lilipochomoza hakutaka hata kusubiri kifungua kinywa, aliondoka moja kwa moja akitembea kwa miguu hadi katikati ya jiji eneo la Kariakoo ambako alianza kutafuta mahali ambako watu walinunua madini, baada ya kuuliza alijikuta yuko mtaa wa Mafia, kulikokuwa na mnada wa wauza madini, akaingia kwenye moja ya ofisi.
“Mnanunua madini?”
“Ndiyo.”
“Mnaweza kununua la kwangu?”
“Lipi?”

Galos hakuwa na jibu, alichokifanya ni kuingiza mkono mfukoni mwa suruali na kutoa kipande cha jiwe alichokuwa nacho na kukiweka juu ya meza, watu wote ndani ya chumba hicho walisimama na kuonyesha mshangao, hapo ndipo akaelewa alikuwa na kitu cha thamani alichokipata kimazingara.

“Umeipata wapi Almasi kubwa kiasi hiki?”
“Niliachiwa na baba.”
“Mungu wangu! Hebu subiri.” Aliongea mtu huyo na kuiweka juu ya chombo kilichoonekana kuwa mzani.
“Gramu ngapi?” mtu mwingine aliyekuwa chumbani aliuliza.
“Mia moja na hamsini.”

“Mungu wangu! Haijawahi kutokea hapa ofisini, nimefanya kazi hapa kwa miaka karibu thelathini, kijana umetajirika, una akaunti?”
“Sina.”
“Utatuuzia?”
“Ndiyo, kama tutaelewana bei.”
“Unauzaje?”
“Kwani ninyi mna bei gani?”

“Subiri.” Alisema mtu huyo akivuta mashine ya kupigia hesabu na kuanza kubonyeza namba fulanifulani, kisha akamwonyesha Galos, kulikuwa na sifuri nyingi zilizotanguliwa na mbili, kisha tano!
“Kiasi gani hicho?”
“Utapata milioni mia mbili na hamsini.”
“Sawa.”

Biashara ikawa imefanyika, bila Galos kuelewa thamani hasa ya Almasi yake, wanunuzi wakamsaidia kufungua akaunti kwenye benki ya kizalendo ya Wezesha Mzawa, kiasi cha milioni ishirini na tano akazichukua na kwa msaada wa watu haohao, akanunua gari aina ya Mark II, kuajiri dereva,

kufanya manunuzi ya nguo za thamani kwa ajili yake ya mkewe, kutafuta nyumba ya kifahari ya kupanga maeneo ya Mikocheni.

Mfukoni akabaki na milioni tatu baada ya kununua samani za ndani ya nyumba yake, ndipo akamwamuru dereva amwendesha kuelekea nyumbani. Alipofika, kitu cha kwanza alichofanya ni kupiga honi mbele ya kibanda chao, Rita akatoka akiwa ameshika sufuria la ugali na kumwaga ukoko kando ya barabara, kichwani mwake akiwa hajui kabisa ndani ya gari hilo alikuwemo mumewe.
“Mpenziiiii!” Galos aliita, Rita akageuka kuangalia.
“Hee!”

Je, nini kitaendelea? Usikose kuwa pamoja na mimi tena....