ManiTek TV
JF-Expert Member
- Jun 3, 2011
- 410
- 159
Ukizungumzia kompyuta za mezani, Fusion Leviathan ni mashine ambayo haina mpinzani kwa sasa katika kasi na nguvu. Hapa hatuzungumzii kupendeza kama kule kwa gajeti za Apple, tunazungumzia uwezo wa kompyuta kupiga mzigo na kuwa na ufanisi wa kila namna kwa matumizi ya kompyuta ya leo na hata miaka 20 ijayo. Kabla ya kueleza vielelezo vya kompyuta hii, tunatabiri kwamba kompyuta za Apple ambazo ni kompyuta za urembo labda zitafikia kasi na uwezo wa kompyuta hii mwaka 2020, weka msisitizo kwenye neno LABDA.
Kompyuta hii imetengenezwa na kampuni isiyo na umaarufu mkubwa inayojulikana kama Chillblast iliyoko Uingereza, taarifa za kompyuta hii ni kwa mujibu wa mtandao rasmi wa Chillblast na jarida la Tech toleo la wiki inayoanzia tarehe 28/03/2013. Prosesa ya Fusion Leviathan ni Intel Xeon yenye koo (core) 12, ikiwa na jumla ya kasi ya 55.2 Ghz kwa pamoja. Hivyo kasi ya koo hizo ni 4.6 kwa kila moja wapo. Mashine hii ina RAM kiasi cha 48 GB, hata hivyo ina slot za kutosha za kuiongezea RAM hadi kufikia 768 GB.
Huu ni wazimu kwa sababu hakuna anayehitaji nguvu ya namna hii katika shughuli yoyote ya desktop, hivyo hii ni kompyuta iliyoutangulia wakati kwa muda mrefu sana. Chillblast walitakiwa waitoe kompyuta hii miaka 15 ijayo. Disk ina ukubwa wa 21 TB, kwa waliozoea GB zidisha 21 mara 1024, hivyo ni 21,504 GB. Hii unaweza kutumia umri wako wote bila ya kuijaza na sijui utawezaje kuzimudu (manage) data za namna hii.
Bei ya kuanzia ni $2,499. Hata hivyo utakapochagua nini unataka uwekewe kwenye kompyuta hii bei inaweza kufikia $26,000 bila ya kupata taabu sana. Hivyo kompyuta hii sio tu ina nguvu bali bei nayo si ya kawaida ukizingatia kwa bei ya $26,000 unaweza kupata gari ya maana ikiwa na maili 0, yaani mpya kabisa. Bila ya shaka yoyote Chillblast wameitengeneza kompyuta hii kwa ajili ya watu wenye ugonjwa (addiction) wa kompyuta na wenye fedha ya ziada ambayo haina kazi. Yaani wale ambao pesa sio tatizo, tatizo ni matumizi.
Chillblast pia wanatengeza kompyuta mbali mbali zenye nguvu kubwa kwa bei nzuri, mashine kama vile Silverstone, Fusion 7 na Fusion Thunderbird. Ingawa hizi hazina nguvu kama ya Fusion Leviathan lakini itazizidi kompyuta nyingi tu za hali ya juu, na pia unaweza kuipata kwa bei nafuu sana ukilinganisha na iMac ya mwaka 2013. Chillblast wanafanya biashara kwa mtindo wa kupokea oda kwanza. Baada ya kutoa oda huchukua si zaidi ya siku 10 kukujengea kompyuta yako.
Chanzo: