CHAMA Cha Mapinduzi (CCM) kimeyapinga maazimio yote manane yaliyotolewa na Chama cha Demokrasia na Maendeleo (Chadema), yanayopinga muundo wa Kamati ya Rais ya Kuchunguza Mikataba ya Madini.
Msimamo huo wa CCM ulitangazwa kwa nyakati tofauti jana na Katibu wa Itikadi na Uenezi, Kapteni John Chiligati na Katibu Mkuu wa Umoja wa Vijana wa chama hicho tawala (UV-CCM, Amos Makala.
Uamuzi huo wa CCM unaendeleza malumbano ya miezi ya hivi karibuni kati ya vyama hivyo viwili, kuhusu masuala mbalimbali yanayohusu uendeshaji wa serikali na maamuzi mbalimbali ya kiutendaji.
Kabla ya suala hili la kamati ya madini, viongozi wa juu wa CCM na Chadema wamekuwa wakilumbana kuhusu kashfa ya ubadhirifu wa fedha katika Benki Kuu (BoT), utiwaji wa saini wa mkataba wa Buzwagi na kabla ya hapo matamko mbalimbali ya viongozi wa Chadema yanayohusu uwezo wa serikali kiutendaji na maamuzi ya kisera na kisiasa serikalini.
Katika suala hili la sasa, Chiligati ambaye alizungumza na waandishi wa habari jijini Dar es Salaam, alisema ni jambo la ajabu kwamba Chadema waliupokea vibaya uamuzi wa Rais Kikwete kuunda kamati hiyo ya madini, hali ambayo ilizaa malumbano miongoni mwa viongozi wa chama hicho cha upinzani.
Kwa mujibu wa Chiligati, mapokeo mabaya ya Chadema yalisababisha malumbano miongoni mwa chama hicho cha upinzani ambayo kwa kiwango kikubwa yalionyesha kushindwa kwao kuelewa dhamira ya rais kuunda kamati hiyo.
"Jambo la kusikitisha ni kwamba Chadema walipokea vibaya uteuzi huo
Chama Cha Mapinduzi kinayaona maazimio hayo ya Chadema kama kushindwa kuelewa dhamira njema ya rais na mantiki ya kuunda kamati hiyo," alisema Chiligati. Akisoma tamko rasmi la chama hicho lenye kurasa nne, Chiligati alieleza kushangazwa na namna maazimio hayo ya Chadema yalivyoshindwa kutofautisha kuhusu haja ya kuundwa kwa tume au kamati ya madini.
"Ni vema ikaeleweka kuwa tume huundwa pale ambapo imethibitika kuwa kuna kosa lililotendeka au athari za wazi zimeonekana kwenye utendaji wa chombo cha serikali, lakini kamati huundwa pale ambapo mwelekeo mpya unahitajika katika utendaji wa chombo cha serikali,
"Tunapenda wananchi waelewe kuwa, alichounda rais ni kamati ya kuangalia upya sera, sheria na mikataba ya uchimbaji madini na si tume ya kuchunguza mikataba ya uchimbaji madini," alisema Chiligati akipinga pendekezo la chadema ambalo pamoja na mambo mengine lilitaka rais aunde tume badala ya kamati.
Mbali ya hilo, Chiligati katika tamko lake hilo alisema iwapo Chadema ilikuwa na mtazamo huo, basi walipaswa kumpa Kabwe Zitto ambaye ni mjumbe wa kamati, maoni yao kuhusu suala hilo badala ya kukimbilia kwenye vyombo vya habari.
Akizungumzia suala la kumtaka Rais Kikwete kufuta uteuzi wa baadhi ya wajumbe wa kamati hiyo, Chiligati alisema madai hayo ni sawa na mbio za sakafuni ambazo lazima zitaishia ukingoni, na kuwa Chadema wanapaswa kuelewa kuwa uteuzi wa rais haufanywi kwa shinikizo la mtu wala taasisi yoyote.
"Hakuna migongano ya kimasilahi baina ya mjumbe yeyote wa kamati na kamati yenyewe na tuhuma za ufisadi dhidi ya baadhi ya wajumbe walioteuliwa hazina uthibitisho wowote na kuwa ni hisia binafsi za uongozi wa chama hicho," alisema.
Alisema Watanzania wanapaswa kufahamu kazi za kamati ambazo miongoni mwake ni pamoja na kupitia mikataba yote ya madini na nyaraka nyingine zinazohusu migodi mikubwa na kuchambua mfumo wa kodi unaotumika katika sekta hiyo.
Kazi nyingine ni kupitia mifumo ya usimamizi wa shughuli za uchimbaji mkubwa unaofanywa na serikali kuchambua na kuainisha haki na wajibu wa mwekezaji na mwenye rasilimali ambaye ni serikali.
Alisema chama chake kinayaona maazimio hayo kuwa ni matokeo ya kushindwa kuendesha siasa zenye hoja ndani ya jamii ya Kitanzaniaa.
Wakati Chiligati akitoa maoni yake hayo, UVCCM nao walitoa tamko la kurasa mbili wakieleza kushangazwa kwao na maazimio hayo ya Chadema.
Taarifa ya UVCCM iliyotolewa na Makala iliyaelezea maazimio hayo ya Chadema kuwa yaliyojaa upotoshaji, dalili za kutapatapa, uzushi pamoja na ubinafsi na kuwa, hoja hizo zinalenga kudhoofisha jitihada za Rais Kikwete zenye lengo la kulinda rasilimali za nchi.
"UVCCM ina imani na wajumbe wa kamati na tuna imani kamati iliyoundwa itafanya kazi kwa uhuru na zaidi imejaa watu makini na wapenda maendeleo na masilahi ya taifa," ilieleza sehemu ya taarifa hiyo.
CCM inatoa matamko hayo mawili tofauti siku moja tu baada ya Mwenyekiti wa Taifa wa Chadema, Freeman Mbowe, kutangaza maazimio manane kuhusu kamati hiyo ya kuchunguza mikataba ya madini.
Chadema katika maazimio yao hayo walimtaka rais afute uteuzi wa baadhi ya wajumbe wa kamati hiyo ambao wanadaiwa kutuhumiwa kwa ufisadi huku wengine wao wakitajwa kuwa na mgongano wa kimasilahi.
Azimio jingine la chama hicho linamtaka rais kutimiza ahadi yake ya kutoa uwakilishi mpana zaidi kwa kuteua wajumbe wengine kutoka taasisi zisizokuwa za kiserikali (NG'Os), mashirika ya dini na taasisi za kitaaluma.
Chama hicho pia kilipendekeza kuongezwa kwa hadidu za rejea ambazo zilitakiwa kujumuisha masuala yanayohusu ukiukwaji wa haki za binadamu katika maeneo yenye migodi mikubwa ya madini na uchafuzi wa mazingira unaotishia afya za wananchi, viumbe hai na rasilimali katika maeneo hayo.
Kwa mujibu wa Chadema, hoja nyingine zinazotakiwa kufanyiwa kazi ni madai ya kuwapo kwa tuhuma za rushwa wakati wa uandaaji na uchapishaji wa mikataba ya madini kati ya kampuni kubwa za madini na viongozi au watendaji wa serikali.
Nyingine ni mchango wa sekta ya madini kwenye uchumi na maendeleo ya jamii ya wananchi waishio kwenye maeneo yenye migodi mikubwa ya madini.
Azimio jingine linamtaka rais kutoa hadharani ripoti ya kamati za uchunguzi zilizokwisha kuundwa na serikali kuchunguza matatizo mbalimbali yanayohusu sekta ya madini tangu mwaka 2001.
Azimio la tano linamtaka rais kuelekeza mikataba yote iliyoingiwa kati ya serikali na kampuni za madini kuwekwa hadharani, ili wananchi waweze kuelewa yaliyomo katika mikataba hiyo.
Azimio la sita ni kuridhia uteuzi na ushiriki wa Kabwe Zitto katika kamati hiyo ya rais na kuweka kipengele kinachoiagiza Kamati Kuu ya Chadema kufuatilia kwa karibu utekelezaji wa majukumu ya Kamati ya Rais.
Azimio la saba linamtaka rais binafsi au kwa kupitia mwenyekiti wa kamati hiyo atoe ahadi kwa wananchi kuwa utekelezaji wa kamati na ripoti yake vitakuwa hadharani na kuwa ushauri wa kamati hiyo utafanyiwa kazi.
Azimio la mwisho limeiagiza sekretarieti ya chama hicho kusambaza tamko hilo nchi nzima kupitia vyombo vya habari na nakala zake kusambazwa katika ngazi zote za chama.
----------------------------------MWISHO------------------------------------------