AIFANANISHA NA WINGU ZITO LINALOPITA
Elias Msuya
KATIBU Mkuu wa Chama cha Wananchi (CUF), Seif Sharif Hamad, amekiponda Chama cha Jamii (CCJ) akisema siyo tishio kwa chama chake wala kwa kambi ya upinzani nchini na ni sawa na wingu linalopita.
Maalim Seif ametoa kauli hiyo jana katika mahojiano maalum na Mwananchi jijini Dar es Salaam, ambapo pia alielezea hali ya vyama vya upinzani nchini ikiwa ni mahojiano yake ya kwanza tangu atoke hospitalini alikokuwa amelazwa hivi karibuni.
Hii ni mara ya kwanza kwa Maalim Seif kujitokeza kuzungumzia masuala ya kitaifa tangu akumbwe na maradhi ya mkamba (bronchitis) Machi 5, mwaka huu akiwa Uwanja wa Ndege wa Kimataifa wa Dar es salaam akijiandaa kusafiri kwenda Muscat, Oman ambapo alilazwa Hospitali ya Hindu Mandal na akaruhusiwa Machi 11.
Kulazwa kwa Maalim Seif, kulizua hofu kubwa kwa baadhi ya watu baada ya kuenezwa kwa uvumi kuwa kiongozi huyo wa upinzani alikuwa amekufa, ambazo hazikuwa na kweli.
Sioni kama chama hicho ni tishio kwa chama chetu, (ni kama wingu). Hata viongozi wake walikuwa hawajulikani, alisema Maalim Seif na kuongeza:
Ni chama ambacho kimekuzwa tu na vyombo vya habari, kwakuwa kilijitangaza kuwa kitazoa (vigogo) wa CCM ambao hata hivyo wameshakiruka. Ndiyo, watapata wanachama kwa kipindi hiki lakini, hakitafika mbaliâ
CCJ yenyewe imekuwa ikikanusha kuhusishwa na vigogo wa CCM, lakini haijaweza kutuliza habari zinazokihusisha chama hicho na makada wa chama hicho tawala. Tayari vigogo kadhaa wameshakanusha habari za kuhusishwa kwao na CCJ, akiwemo Spika Samuel Sitta, Mkurugenzi Mtendaji wa Taasisi ya Mwalimu Nyerere, Joseph Butiku, mawaziri wakuu wa zamani, Jaji Joseph Warioba na John Malecela.
Kwa sasa CCJ ina usajili wa muda ilioupata Machi 2 na inahaha kusaka angalau wanachama 2,000 kutoka Bara na Visiwani katika kipindi cha miezi sita ili kiweze kupata usajili kamili. Lakini katika muda mfupi, chama hicho kimeshatangaza kuwa kimevuna wanachama 7,700 katika mikoa 11.
Akizungumzia maridhiano yaliyofikiwa kati ya chama chake (CUF) na CCM mwishoni mwa mwaka jana, Maalim Seif alitetea uamuzi wake wa kumuunga mkono Rais Karume akisema: âSitishiki kubadili msimamo wangu na kumuunga mkono Rais Karume. Hapo ndipo tulipotaka tufikie.Politics is not staticâ (siasa siyo mawazo mgando), hatuwezi kushikilia misimamo hiyo hiyo muda mrefu, lazima tufikie makubaliano ya amani.
Hata hivyo, Maalim Seif aligoma kuweka bayana nini walichozungumza baina yake na Rais Karume katika vikao vyao hivyo vilivyokuwa vya faragha.
Kuhusu Serikali ya umoja wa kitaifa itakayoundwa baadaye mwaka huu visiwani Zanzibar, Maalim Seif alisema serikali hiyo itakuwa ni endelevu tofauti na serikali za makubaliano yaliyofikiwa nchini Kenya na Zimbabwe.
Tuangalie mazingira ya kila nchi, Kenya na Zimbabwe zilifikia makubaliano ya serikiali ya umoja wa Kitaifa kutokana na shinikizo la Kimataifa. Kofi Annan alihamia Kenya, hata Rais Kikwete alikwenda huko lakini, Zanzibar ni tofauti. Wazanzibar wenyewe bila (shinikizo) lolote wameamua. Hata Rais Karume na mimi tulikutana bila yoyote kutoka nje, hivyo serikali hiyo haitakuwa na migogoro tena,alisema.
Alisema kuwa Rais Karume ameonyesha nia njema katika maridhiano hivyo hatarajii kuona tena malumbano yaliyokuwepo awali.
Akizungumzia maandalizi ya uchaguzi mkuu wa mwaka huu, Maalim Seif alisema kuwa CUF imejipanga vizuri na kwamba yeye mwenyewe atagombea kiti cha urais Zanzibar.
âMimi nilishasema tangu zamani kuwa nitagombea urais. Ni kweli chama kitakaa na kutoa fomu za wagombea lakini, mimi nimeonyesha nia yangu ya kuendelea kugombea.
Tumejipanga vizuri hata upande wa bara, kuhakikisha kwamba hata ikiwa hatupati rais basi tunakuwa na nguvu bungeni,alisema Seif ambaye amekuwa akigombea urais wa Zanzibar tangu uchaguzi mkuu wa kwanza mfumo wa vyama vingi vya siasa nchini mwaka 1995.
Kuhusu uandikishaji wa wapiga kura visiwani Zanziba, kiongozi huyo wa chama kikuu cha upinzani alionyesha kutokuwa na wasiwasi na kauli za Rais Aman Karume licha ya kasoro zinazojitokeza.
Uandikishaji umerudia mara ya pili, 'ile spirit' (roho) ya maridhiano bado iko on 'trek' (mbioni), hivyo sina shaka na Rais Karume kwa sababu ameshatoa maagizo kwa watendaji wake kuwa kila mwenye sifa ya kuandikishwa aandikishwe.
Lakini, baadhi ya watendaji hao, ama kwa makusudi au 'inefficiency' wamekuwa wakiwabagua wanachama wetu. Kwa mfano Nungwi kuna wanachama 866 hawakuandikishwa kwa sababu ya kutokuwa na vitambulisho, Konde nako kuna wanachama wetu 427. Bado tunafanya tathmini.
Tunaamini kauli ya Rais Karume kwa sababu alishasema kuwa kama watu hawakuandikishwa hakutakuwa na uchaguzi,alisema Maalim Seif.
http://www.mwananchi.co.tz/newsrids.asp?id=18625