12. Kama vijana hawatamiliki nchi, nchi itawamiliki

[CHAGOSI GERALD]

Kama vijana hawatamiliki nchi, nchi itawamiliki.
Na mkiiachia iwaendeshe, haitawaendesha kama binadamu-
itawaendesha kama mizigo.

Kama gunia la mahindi lisilopiga kelele.

Hayo ndiyo mmeanza kuyaona sasa.
Na bado mnafikiri ni kisiasa.
Bado mnafikiri CCM au CHADEMA au ACT ndo watakuja kuwaokoa.
Ninyi ni watoto wazuri mno; mfumo umefurahia upumbavu wenu.

Najua mnajiona mko huru.
Mnavaa vizuri, mnatembea mjini, mnajiona mna haki.

Lakini hebu ngoja niwaambie kitu ambacho hakisemwi:

Raia aliye huru hana hofu ya serikali yake.
Lakini Tanzania, tuna raia wanaoogopa kivuli cha sare hata kama haina mtu ndani.
Huko ndiko kutekwa kunakoita UTAIFA.

Mnaamini nini?
Kwamba mkiikimbia JKT mmeikataa?
Hapana.

Mkiikimbia JKT mmejikataa.
Mmeikata OPPORTUNITY ya kuwa na nchi yenu.

Kwa sababu JKT si taasisi ya askari-
ilikuja kuwakusanya vijana, kuwapa nchi mikononi,
kisha mfumo ukaigeuza kuwa kambi,
mahali pa kuonyesha nguvu badala ya kuonyesha akili.

Uliukimbia mzizi wako.
Ukaacha mzizi ukaokotwa na mabeberu wa ndani.

Najua mna hasira za ajabu na JKT.
Lakini hebu niseme neno ambalo litawachoma mpaka kwenye mifupa:

JKT iliyoharibika haibadilishwi kwa kuisusia.
Inabadilishwa kwa kuiteka.
Kwa kuirudisha mikononi mwa vijana.

Si kwa kulalamika Twitter.
Si kwa live Instagram.
Si kwa kupiga picha na sare mkijifanya “patriots”.

Kwa mapinduzi ya fikra.
Kwa mapinduzi ya mfumo.
Kwa katiba mpya.

Unajua mabaya ni haya?
Kila mwaka vijana 50,000 wanapita JKT,
halafu wanarudi mtaani na akili zile zile—
hakuna falsafa, hakuna maadili, hakuna upeo, hakuna uzalendo.
Kambi inawalea physically, mfumo unawaua mentally.

Kisha jamii inawaambia:
"Kijana hana nidhamu."
NO.
Kijana hana TAIFA.

Kama JKT ingesimama kama taasisi ya kweli,
kama ingekuwa ikimiliki uchumi,
migodi, mashamba, viwanda, taasisi, technology hubs,
kama vijana wangekuwa shareholders,
kama wanapomaliza miezi mitatu wanatoka wakiwa stakeholders wa ardhi,
si vibarua wa ardhi-
leo hii mngekuwa taifa la kutisha.

Mngekuwa Korea ya Afrika.
Si nchi ya kulilia tiketi za ajira.

Na ndio maana, kabla hamjasema chochote,
naawaambia kama mzimu unaotembea usiku:

Katiba mpya haipaswi kuandika tu “haki za raia”.
Inapaswa kuandika:
JKT ni moyo wa taifa.
Vijana ni misuli ya uchumi.
Uongozi ni dhamana ya kizazi, si zawadi ya chama.”

Hilo ndilo ninalofundisha leo.
Msiache neno lolote lipite kama upepo.
Lishike kwenye mifupa.

Kwa sababu mkikataa leo,
vizazi vitatu mbele vitawalilia.