Kisumo awavaa kina Malecela, awataka wasigombee ubunge 2010
Mwanasiasa Mkongwe nchini Peter Kisumo ambaye amewataka wabunge wenye umri mkubwa kutogombea ubunge kwenye uchaguzi mkuu ujao
Daniel Mjema, Moshi
MWANASIASA mkongwe nchini, Peter Kisumo amewataka wabunge wenye umri mkubwa kutogombea nafasi hizo katika uchaguzi mkuu ujao na badala yake wawaachie nafasi hizo wagombea vijana.
Kisumo, ambaye ni mwenyekiti wa baraza la wadhamini wa CCM, aliwahi kutoa kauli kama hiyo mwaka 2005 alipomsindikiza Rais Jakaya Kikwete kutangaza nia yake ya kugombea urais.
Kauli ya Kisumo ya mwaka 2005 iliibua malumbano na baadhi ya wagombea, akiwemo John Malecela aliyelazimika kujibu mapigo kwa kusema hata kama ni mzee, akili yake inakata kama wembe.
Jana Kisumo alirejea kauli hiyo lakini safari hii akiwalenga wabunge na madiwani, wakati akipokea hati ya utambulisho ya kamanda mpya wa Umoja wa Vijana wa CCM (UVCCM) wilaya ya Mwanga, Seleman Mfinanga.
"Ni matumaini yangu kuwa safari hii wabunge wazee watawaachia vijana kwa kusema hivyo sina maana wazee hawa hawana kazi ya kufanya, wao watabaki kuwa washauri kwa vijana,"alisema Kisumo.
Kisumo aliwataka wabunge na madiwani wazee ambao wameshikilia nyadhifa hizo kwa miaka mingi kutoona nongwa kuwaachia vijana na akisisitiza kuwa kutokana na mabadiliko ya sasa, damu changa inahitajika.
Mkonngwe huyo alisema wapo vijana ambao wamejifunza uongozi na wana sifa za kuiongoza nchi kwa uadilifu mkubwa.
Alimpongeza mbunge wa Kwela, Chrisant Mzindakaya na Paul Kimiti wa Sumbawanga kuamua kwa hiyari yao kutogombea tena ubunge akisema wameonyesha mfano na akawataka wengine kuiga.
Katika Bunge la sasa, wabunge ambao wameshikilia viti vyao kwa muda mrefu ni pamoja na John Malecela (Mtera), Samuel Sitta (Urambo Mashariki) na Jackson Makwetta (Njombe Kaskazini).
Kisumo alitumia nafasi hiyo kukemea kile alichosema kuwa ni kuanza kwa kampeni zinazoegemea katika udini kwenye wilaya ya Mwanga na kuwataka wananchi kuwa macho na wagombea wa aina hiyo kwa kuwa hawafai.
"Kaeni macho, msiruhusu mtu yeyote kuwachonganisha hapo Mwanga kwa udini kwamba ooh mgombea wa dini fulani ndiye anayefaa kuwa mbunge, mtu wa iana hii ni mchochezi wa vurugu," alionya.
Mwanasiasa huyo alikemea pia kampeni za ukabila katika jimbo hilo ambako wagombea ubunge hutambulishwa kwa kutaja sehemu anakotoka, yaani ama Usangi, Ugweno au Tambarare akisema hiyo sio sifa ya uongozi.
Kisumo alifichua kile alichodai ni kuundwa kwa mabaraza ya wazee wa CCM katika tarafa mbalimbali za jimbo hilo akisema mabaraza hayo yanaundwa ili kutumika katika kampeni, lakini hayako katika katiba.
Kwa upande wake, Mfinanga, ambaye alifuatana na mwenyekiti mpya wa chipukizi wilaya ya Mwanga, Zena Salim alisema changamoto kubwa inayomkabili kwa sasa ni kupanua wigo wa ajira kwa vijana. Mfinanga ameteuliwa kushika wadhifa wa ukamanda wa UVCCM wilayani Mwanga baada ya Cleopa Msuya, aliyeshikilia nafasi hiyo kwa miaka zaidi ya 10, kuamua kungâatuka kwa hiyari.